အကြမ်းဖက်လုပ်ရပ်တွေကျူးလွန်ခဲ့တဲ့ စစ်ခေါင်းဆောင်တွေကို ဥပဒေနဲ့အညီအရေးယူနိုင်ဖို့ စဉ်ဆက်မပြတ်ကြိုးပမ်းနေတယ်လို့ ရန်ကုန်တိုင်းဒေသကြီးလွှတ်တော်ကိုယ်စားပြုကော်မတီ CRYH ကိုယ်စားလှယ်တွေက ပြောပါတယ်။

ဖေဖော်ဝါရီ  ၁၂ ရက် ဒီနေ့ ပြုလုပ်တဲ့ ရန်ကုန်တိုင်းဒေသကြီးလွှတ်တော်ကိုယ်စားပြုကော်မတီ နှစ်ပတ်လည်အခမ်းအနားအစီအစဉ်မှာ ရန်ကုန်တိုင်းလွှတ်တော်ကိုယ်စားလှယ်တွေက ပြောဆိုခဲ့တာ ဖြစ်ပါတယ်။

CRYH ကိုယ်စားလှယ် ဦးတင့်လွင်က “ပြည်သူများမျှော်မှန်းထားတဲ့ ဖက်ဒရယ်ပြည်ထောင်စုကြီးမှာဆိုရင် ဒေသဆိုင်ရာအုပ်ချုပ်ရေး အဖွဲ့အစည်းများဟာ ဒေသဆိုင်ရာလွှတ်တော်တွေရဲ့ စောင့်ကြည့်ထိန်းညှိမှုအောက်မှာ မိမိတို့ဒေသအတွက် မိမိတို့ဘဏ္ဍာငွေများကို ရှာဖွေပြီးတော့ မိမိတို့ကိုယ်တိုင် စီမံခန့်ခွဲ သုံးစွဲကြရမှာဖြစ်ပြီး ဒေသတွင်းက ပြည်သူတွေရဲ့ နေ့စဉ်လူနေမှုဘဝများ ဖွံ့ဖြိုးတိုးတက်ရေးကို ဒေသအလိုက် စီမံကိန်းများ ချမှတ်ပြီးတော့ ဆောင်ရွက်ရမှာ ဖြစ်ပါတယ်။  ဥပဒေမဲ့ ဖိနှိပ်ရက်စက်မှုများကို မှတ်တမ်းတင်ဖို့ရယ်၊ နောင်မှာ ကျူးလွန်သူများကို ဥပဒေအတိုင်း ထုတ်ဖော်နိုင်ဖို့အပြင် ကူးပြောင်းရေးကာလ တရားမျှတမှုရှာဖွေရရှိရေးကို အစဉ်တစိုက် ဆောင်ရွက်ရမယ့်လုပ်ငန်းစဉ်အဖြစ် ရည်မှန်းချက်ထားဆောင်ရွက်ဖို့လည်းတိုက်တွန်းလိုပါတယ်” လို့ ပြောပါတယ်။

CRYH ဟာ နွေဦးတော်လှန်ရေးမှာ ကျဆုံးထိခိုက်သူတွေကို ထောက်ပံ့တာ၊ နိုင်ငံရေးအကျဉ်းသားတွေကို ဥပဒေအထောက်အကူပြုအဖွဲ့တွေ ဖွဲ့ပြီးတော့ အကူအညီပေးတာ၊ ထောင်ဝင်စာတွေ ပေးပို့တာ၊ မိသားစုတွေကို ထောက်ပံ့တာတွေကို ဆောင်ရွက်ခဲ့ပြီး  CDM ဝန်ထမ်းတွေကိုလည်း သက်ဆိုင်ရာလွှတ်တော်ကိုယ်စားလှယ်တွေနဲ့ ချိတ်ဆက်ပြီး အကူအညီပေးတာတွေ ကျယ်ကျယ်ပြန့်ပြန့်ဆောင်ရွက်ခဲ့တယ်လို့ ဆိုပါတယ်။ 

ဆက်သွယ်ရေးနဲ့ ဘဏ္ဍာငွေရရှိရေးမှာ အခက်အခဲရှိခဲ့ပေမယ့် ပိုမိုကောင်းမွန်တဲ့ ထောက်ပံ့မှုတွေ ပေးနိုင်ဖို့ ကြိုးစားနေတယ်လို့ ရန်ကုန်တိုင်းလွှတ်တော်ကိုယ်စားလှယ်တွေက ပြောပါတယ်။ 

စစ်အာဏာသိမ်းပြီးရက်ပိုင်းအတွင်းမှာ ပြည်ထောင်စုလွှတ်တော်ကိုယ်စားပြုကော်မတီ CRPH ကို ၂၀၂၀ ရွေးကောက်ပွဲအနိုင်ရကိုယ်စားလှယ်တွေ စုစည်းပြီး ဖွဲ့စည်းခဲ့ပါတယ်။ 

ရန်ကုန်တိုင်းလွှတ်တော်ကိုယ်စားပြုကော်မတီ CRYH ကိုတော့ ၂၀၂၁ ခုနှစ် ဖေဖော်ဝါရီလ ၈ ရက်နေ့မှာ အဖွဲ့ဝင် ၁၅ ဦးနဲ့ စတင်ဖွဲ့စည်းခဲ့တာပါ။ 

လွှတ်တော်ကိုယ်စားပြုကော်မတီတွေကို တိုင်းနဲ့ ပြည်နယ်အသီးသီးမှာ ဖွဲ့စည်းခဲ့ပြီး လုံခြုံရေးနဲ့ အုပ်ချုပ်ရေးအတွက် ပြည်သူ့ကာကွယ်ရေးအဖွဲ့ (ပအဖ)တွေကိုလည်း လွှတ်တော်ကိုယ်စားလှယ်တွေရဲ့ ထိန်းညှိမှုနဲ့ ဆက်လက်ဖွဲ့စည်းခဲ့တာ ဖြစ်ပါတယ်။

ရန်ကုန်တိုင်း​ဒေသကြီးလွှတ်​တော် ကိုယ်စားပြု​ကော်မတီ (Committee Representing Yangon Hlattaw- CRYH) ကို အဖွဲ့ဝင် ၁၅ ဦးနဲ့ ဖွဲ့စည်းကြောင်း ဒီကနေ့ ဖေဖော်ဝါရီ ၈ ရက်မှာ ကြေညာလိုက်ပါတယ်။

အဆိုပါ​ကော်မတီဟာ ရန်ကုန်တိုင်း​ဒေသကြီး လွှတ်​တော်ကိုယ်စားလှယ်တွေရဲ့ သ​ဘောထား ထုတ်ပြန်ချက် (၁/၂၀၂၁) ပါ ​တောင်းဆိုချက်တွေကို အ​ကောင်အထည်​ဖော်ဖို့နဲ့ ရန်ကုန်တိုင်းဒေသကြီး လွှတ်​တော်နဲ့ သက်ဆိုင်တဲ့ လုပ်ပိုင်ခွင့်အာဏာအရပ်ရပ်ကို တာ၀န်ခံ​ ဆောင်ရွက်သွားမယ်လို့လည်း ကြေညာပါတယ်။

အခုဖွဲ့စည်းလိုက်တဲ့ CRYH ကော်မတီအနေနဲ့  ပြည်ထောင်စုလွှတ်တော်ကိုယ်စားပြုကော်မတီနဲ့ တသားတည်း ရပ်တည်ပူးပေါင်းဆောင်ရွက်မယ့် တရားဝင်အဖွဲ့အစည်း ဖြစ်တယ်လို့လည်း ဆိုပါတယ်။

၂၀၂၀ ရွေးကောက်ပွဲအနိုင်ရ အန်အယ်လ်ဒီ ပြည်ထောင်စု လွှတ်တော်ကိုယ်စားလှယ်တွေ ကလည်း ပြည်ထောင်စု လွှတ်တော်ကိုယ်စားပြုကော်မတီဖွဲ့စည်းထားပြီး  နိုင်ငံတော် သမ္မတ ဦးဝင်းမြင့် ခေါင်းဆောင်တဲ့ ပြည်ထောင်စု အစိုးရသာလျှင် ပြည်ထောင်စုသမ္မတ မြန်မာနိုင်ငံရဲ့ တရားဝင်အစိုးရဖြစ်တယ်လို့ ကြေညာထားပါတယ်။

အာဏာသိမ်းစစ်အစိုးရကို ဆန့်ကျင်ကန့်ကွက်တဲ့ ဆန္ဒပြပွဲတွေ ဒီကနေ့ မြန်မာနိုင်ငံအနှံ့ အနည်းဆုံး မြို့ပေါင်း ၁၀၀ ကျော်မှာပြုလုပ်နေပြီး သိန်းနဲ့ချီတဲ့ ပြည်သူတွေ နိုင်ငံဝန်ထမ်းတွေ ပူးပေါင်းပါဝင် ဆန္ဒပြနေကြပါတယ်။