ရန်ကုန်နည်းပညာတက္ကသိုလ်မှာ ကျောင်းသားစုစုပေါင်းဦးရေရဲ့ ၇၃ ရာခိုင်နှုန်းဟာ CDM လှုပ်ရှားမှု ကို ခိုင်မာစွာ ဆက်လက်ဆောင်ရွက်နေတယ်လို့ တက္ကသိုလ်ကောင်စီက ထုတ်ပြန်ပါတယ်။

အာဏာသိမ်းပြီးကတည်းက ရန်ကုန်နည်းပညာကိုတက်ရောက်နေတဲ့ ကျောင်းသား ကျောင်းသူအားလုံးဟာ CDM လှုပ်ရှားမှုကို ပြုလုပ်လာခဲ့တာဟာ ဒီနေ့အထိဖြစ်ပြီး တက္ကသိုလ်ကောင်စီက လက်ရှိအချိန်အထိ လက်ခံရရှိထားတဲ့ စာရင်းအချက်အလက်တွေအရ ရန်ကုန်နည်းပညာတက္ကသိုလ် ကျောင်းသားစုစုပေါင်းဦးရေရဲ့ ၇၃ ဒဿမ ၉ ရာခိုင်နှုန်းဟာ CDM လှုပ်ရှားမှုကို ခိုင်မာစွာ ဆက်လက်ဆောင်ရွက်နေကြောင်း လေ့လာတွေ့ရှိရတယ်လို့ ဆိုပါတယ်။

နှစ်အလိုက် CDM ပြုလုပ်ထားတဲ့ စာရင်းကားချပ်တွေကိုလည်း ဆက်လက်ထုတ်ပြန်ပေးသွားမှာဖြစ်ကာ (Final Year) စာရင်းနဲ့ပတ်သက်ပြီး ယခင်ထုတ်ပြန်ခဲ့တဲ့ လူစာရင်းအပြင် ထပ်တိုးစာရင်းကို ကောင်စီမှ အတည်ပြုနေတယ်လို့လည်း တက္ကသိုလ်ကောင်စီထံက သိရပါတယ်။

စစ်ကောင်စီ ပညာရေးဌာနက တရားမ၀င်ဖွင့်လှစ်ထားတဲ့ အရည်အသွေးအာမခံချက်နဲ့ ပွင့်လင်းမြင်သာမှု ကင်းမဲ့နေတဲ့ သင်တန်းအစီအစဉ်တွေမှာ တက်ရောက်နေတဲ့ ကျောင်းသားကျောင်းသူတွေကို ရန်ကုန်နည်းပညာတက္ကသိုလ်အနေဖြင့် အမည်ပျက်စာရင်းသွင်းကာ ထုတ်ပြန်ကြေညာမှာဖြစ်ပြီး လက်ရှိအချိန်အထိ Final Year မှာ အမည်ပျက်စာရင်းထုတ်ပြန်ပြီးသူ ၉၅ ဦး ရှိ တယ်လို့ တက္ကသိုလ်ကောင်စီက ပြောပါတယ်။

ဒီလို အမည်ပျက်စာရင်းသွင်းခံရတဲ့သူတွေနဲ့ ကြေညာချက်ထုတ်ပြန်တဲ့ ဒီဇင်ဘာ ၂၁ ရက်နေ့က စတင်ပြီး တပတ်အတွင်း မိမိကိုယ်တိုင်ရေးသားထားတဲ့ အယူခံလွှာတွေကို တက္ကသိုလ်ကောင်စီရဲ့ အီးမေးလ်ကို ပေးပို့တင်ပြနိုင်တယ်လို့ အသိပေးထားပါတယ်။

ရန်ကုန်နည်းပညာတက္ကသိုလ်မှာ ဘာသာရပ်သင်တန်း ၂၉ မျိုးရှိပြီးတော့ ပထမနှစ်ကနေ နောက်ဆုံးနှစ်အထိ ကျောင်းတက်ရောက်ခဲ့တဲ့အရေအတွက်ဟာ အယောက် ၅၀၀၀ ကျော်လောက်ထိရှိခဲ့တယ်လို့သိရပါတယ်။

၂၀၂၂-၂၃ ပညာသင်နှစ်အတွက် ရန်ကုန်တက္ကသိုလ်နဲ့ ရန်ကုန်နည်းပညာတက္ကသိုလ်မှာ ကျောင်းဝင်ခွင့်ရရှိခဲ့သူတွေထဲက ကျောင်းသူ၊ ကျောင်းသား တဝက်စီလောက် ကျောင်းမအပ်ကြသေးဘူးလို့ အဲဒီတက္ကသိုလ်တွေက စုံစမ်းသိရပါတယ်။

၂၀၂၂ ခုနှစ် တက္ကသိုလ်ဝင်စာမေးပွဲ အောင်မြင်သူတွေထဲက ရန်ကုန်နည်းပညာတက္ကသိုလ်ရဲ့ ပထမနှစ်ဝင်ခွင့်ရ ကျောင်းသားကျောင်းသူ အရေအတွက် ၄၀၅ ဦးရှိခဲ့ပြီး ကျောင်းအပ်ထားတဲ့ အရေအတွက်ကတော့ ၂၆၂ ဦးသာရှိကာ ကျန်တဲ့ ၁၄၃ ဦးကတော့ ကျောင်းမအပ်ကြသေးဘူးလို့ အဲ့ဒီတက္ကသိုလ် လက်ထောက်ကထိကတဦးက ပြောပါတယ်။

ဒါ့အပြင် ရန်ကုန်တက္ကသိုလ်မှာလည်း ပထမနှစ်သင်တန်းအတွက် ဘာသာရပ် ၂၉ ခုကို ဝင်ခွင့်ရ ကျောင်းသားကျောင်းသူ အရေအတွက် စုစုပေါင်း ၇၆၆ ဦးရှိပေမဲ့ ကျောင်းအပ်နှံပြီးတဲ့ အရေအတွက်ကတော့ ၃ ပုံ ၂ ပုံလောက်ပဲရှိသေးပြီး အဲ့ဒီထက် နည်းနိုင်တယ်လို့ သိရပါတယ်။

ရန်ကုန်တက္ကသိုလ်မှာ ဒီနှစ်အတွက် ပထမနှစ် နေ့သင်တန်းတွေအဖြစ် မြန်မာစာ၊ အင်္ဂလိပ်စာ၊ သင်္ချာ၊ ဓာတု၊ ရူပ၊ နိုင်ငံတကာဆက်ဆံရေး၊ မြန်မာမှုပညာ စသဖြင့် ဘာသာရပ်ပေါင်း ၂၉ ခုကို သင်တန်းဖွင့်လှစ် သင်ကြားပေးနေတာပါ။

သင်တန်းသားအများဆုံး လက်ခံသင်ကြားပေးတဲ့ ဘာသာရပ်တွေအနေနဲ့ နိုင်ငံတကာဆက်ဆံရေးပညာ ဘာသာရပ်မှာ သင်တန်းသား ၁၀၄ ဦးနဲ့ အများဆုံး ခေါ်ယူထားပြီး သင်တန်းသား အနည်းဆုံး ၁ ဦးနှုန်းနဲ့ မြန်မာမှုပညာနဲ့ မနုဿဗေဒ ပညာရပ်သင်တန်းတွေကို ဖွင့်လှစ်ထားတယ်လို့ သိရပါတယ်။

ရန်ကုန်တက္ကသိုလ်၊ ရန်ကုန်နည်းပညာတက္ကသိုလ်တို့ရဲ့ ၂၀၂၂-၂၃ ပညာသင်နှစ်အတွက် ကျောင်းအပ် နောက်ဆုံးရက်ဟာ နိုဝင်ဘာ ၂၇ ရက်အထိဖြစ်ပေမဲ့ ရန်ကုန်စည်ပင်သာယာ နယ်နိမိတ်အပြင်နဲ့ အကြောင်းအမျိုးမျိုးကြောင့် ကျောင်းအပ်ဖို့ နောက်ကျနေသူတွေအတွက် ရက်တိုးမြှင့်သတ်မှတ်ပေးမယ်လို့ စစ်ကောင်စီလက်အောက်ခံ အဆင့်မြင့်ပညာဦးစီးဌာနက ကြေညာထားပါတယ်။

၂၀၂၂ ခုနှစ်အတွင်းမှာ ဆယ်တန်းအောင်မြင်ခဲ့ကြတဲ့ ကျောင်းသားကျောင်းသူပေါင်း ၁၃၀,၀၀၀ ကျော်ရှိပြီး စစ်တပ်အာဏာသိမ်းထားတဲ့ နိုင်ငံရေးအခြေအနေကြောင့် ၂၀၂၂ ခုနှစ်မှာ စာမေးပွဲအောင်မြင်သူတွေကို ၂ နှစ်ကြာပြီးမှသာ ကျောင်းဖွင့်လှစ်ပေးနိုင်ခဲ့တာလည်း ဖြစ်ပါတယ်။

စစ်အာဏာသိမ်းမှုနဲ့ စစ်ကျွန်ပညာရေးကို ဆန့်ကျင်ကန့်ကွက်တဲ့အနေနဲ့ သန်းနဲ့ချီတဲ့ ကျောင်းသူ ကျောင်းသားတွေ စာမေးပွဲမဖြေဘဲ ဘဲ သပိတ်မှောက်နေကြတာရှိသလို တက္ကသိုလ် ဆက်မတက်တော့တဲ့ ကျောင်းသားတွလည်း ရှိပါတယ်။

ဒါအပြင် နိုင်ငံတဝန်း တက္ကသိုလ် ပါမောက္ခတွေ၊ ကထိကနဲ့ နည်းပြအပါအဝင် ဆရာ ဆရာမ ထောင်ပေါင်းများစွာဟာလည်း အာဏာဖီဆန် CDM လှုပ်ရှားမှုမှာ ပါဝင်နေကြပါတယ်။