ရန်ကုန်မြို့အခြေစိုက် တော်လှန်ရေး ထောက်ပို့အဖွဲ့တခုဖြစ်တဲ့ YELL BAW - ရဲဘော် ထောက်ပို့အဖွဲ့မှ အမှုဆောင်ဒါရိုက်တာ ၁ ဦး ဖမ်းဆီးခံရပြီးနောက် ယာယီရပ်နားထားခဲ့တဲ့ ထောက်ပို့လုပ်ငန်းစဉ်တွေကို ပြန်လည်လုပ်ဆောင်တော့မယ်လို့ YELL BAW - ရဲဘော် ထောက်ပို့အဖွဲ့ကနေ သိရပါတယ်။
YELL BAW - ရဲဘော် ထောက်ပို့အဖွဲ့မှ အမှုဆောင်ဒါရိုက်တာ ရဲဘော်လောင်မြိုက်ဟာ ပြီးခဲ့တဲ့ ဒီဇင်ဘာ ပထမပတ်မှာ စစ်ကောင်စီရဲ့ မတရားဖမ်းဆီးခံလိုက်ရတာကြောင့် YELL BAW - ရဲဘော် ဖေ့စ်ဘွတ်ခ်စာမျက်နှာကို စိတ်ချရအောင်နဲ့ တခြား ကျန်ရှိနေတဲ့ Admin တွေရဲ့ လုံခြုံရေးအတွက် ခဏရပ်နားထားခဲ့တာလို့ သိရပါတယ်။
ရဲဘော် ထောက်ပို့အဖွဲ့မှ တာဝန်ရှိသူတဦးက “ကျနော်တို့ ထောက်ပို့အဖွဲ့ကို ရပ်နားလိုက်ရင် တော်လှန်ရေးအတွက် ထောက်ပို့အင်အား လျော့နည်းသွားစေမှာ စိုးရိမ်လို့ပါ။ ဒီ ၂၀၂၃ ဆိုတာ အဆုံးအဖြတ်နှစ်မို့ တတ်နိုင်တဲ့အားနဲ့ ရုန်းကြဖို့ဆိုတာ ကျနော်တို့မှမဟုတ်ပါဘူး၊ တဦးတယောက်ချင်းစီမှာ တာဝန်ရှိပါတယ်။ ဒီနေရာမှာ တာဝန်ဆိုတာကို ဖြည့်ပြီးပြောချင်တာက ‘ဟင်! မင်းတို့ကို ဘယ်သူက တာဝန်ပေးလို့လဲ’ မေးလာရင် ခေတ်ကြီးက ကျနော်တို့ပခုံးပေါ် မလိုချင်လည်း လာတင်ပေးလိုက်ပါပြီ။ ထမ်းကိုထမ်းရမယ့် အခြေအနေမို့ မြန်မာနိုင်ငံသားတိုင်း တယောက်ချင်းစီနဲ့ ဆိုင်တယ်လို့ ပြောတာပါ။ ဒါကြောင့် ကျနော်တို့က ခြောက်လည်း မကြောက်ပါဘူး။ တယောက်ကျရင် နောက်ထပ်တယောက် ထပ်တက်နေဦးမှာပဲ။ နိုင်ရာတာဝန် ကျရာတာဝန်ကို ထမ်းဆောင်ရင်း ဒီတော်လှန်ရေး ဒီအဆုံးဖြတ်နှစ်မှာ ရဲဘော်က Donor တွေနဲ့အတူ ဆက်လက်ပါဝင်နေဦးမှာမို့ စိတ်ချယုံကြည်စွာနဲ့ YELL BAW - ရဲဘော်ဖေ့စ်ဘွတ်ခ်ပေ့ခ်ျကို ပြန်ဆက်သွယ် ထောက်ပို့လို့ရပြီဆိုတာ အသိပေးချင်ပါတယ်” လို့ ဒီဗွီကို ပြောပါတယ်။
စစ်ကောင်စီရဲ့ ဖမ်းဆီးခြင်းခံထားရတဲ့ YELL BAW ထောက်ပို့အဖွဲ့မှ ဒါရိုက်တာအမှုဆောင် ရဲဘော်လောင်မြိုက်နဲ့ ပတ်သက်ပြီး “ကျနော် ကိုလောင်မြိုက်ကိုယုံတယ်။ သူက တော်တယ်ဗျ။ ဒါကြောင့် သူအဆင်ပြေအောင် နေနိုင်မယ်လို့ ကျနော်ယုံကြည်တယ်။ ဆုတောင်းပေးတာမျိုးတော့ ကျနော်မလုပ်တတ်ဘူး။ ကျနော်တို့နိုင်ရင် မတရား ဖမ်းဆီးခံထားရတဲ့လူမှန်သမျှ အကုန်ပြန်လွတ်မှာပဲ။ သူတို့ဟာ သူတို့ ကြိုက်တဲ့ပုဒ်မတပ်ပြီး ဘယ်နှနှစ်ချချပေါ့။ ဟုတ်တယ်မလား၊ ဖမ်းချင်လို့ဖမ်းထားတာ ဆုတောင်းလည်း ထူးပြီးဖြစ်လာစရာမှ မရှိတာ။ ဒီတော်လှန်ရေးမှာ Mother Teresa ရဲ့စကား ငှားသုံးရရင် ဆုတောင်းပေးတဲ့ ပါးစပ်တွေထက် အကူအညီပေးတဲ့ လက်တွေပဲ ပိုလိုချင်တယ်ခင်ဗျ” လို့ ပြောပါတယ်။
YELL BAW - ရဲဘော် ထောက်ပို့အဖွဲ့ကို ၂၀၂၁ ခုနှစ် စက်တင်ဘာက လက်နက်ဆွဲကိုင် တော်လှန်ဖို့ လိုအပ်လာတဲ့အတွက် လက်နက်ခဲယမ်းတွေဝယ်ဖို့ Fund ရှာရမယ်ဆိုတဲ့ ရည်ရွယ်ချက်နဲ့ စတင်ဖွဲ့စည်းခဲ့ပြီး ပြီးခဲ့တဲ့ ဒီဇင်ဘာလအတွင်း ကျပ် ၅,၄၁၀,၀၀၀ ထောက်ပံ့ထားနိုင်တယ်လို့ သိရပါတယ်။
မြန်မာ့နွေဦးတော်လှန်ရေးကာလ စစ်အာဏာရှင်ဖြုတ်ချရေးတိုက်ပွဲကို ပြည်သူတွေနဲ့အတူ လှုပ်ရှားဆောင်ရွက်နိုင်ဖို့ ရန်ကုန်အခြေစိုက် တက္ကသိုလ်ကျောင်းသားသမဂ္ဂများ (တကသများ -ရန်ကုန်) Alliance of Students’ Unions (ASU-Yangon) ကို မတ် ၃၁ ရက်မှာ ဖွဲ့စည်း လိုက်ပါတယ်။
တကသများ-ရန်ကုန် အနေနဲ့ စစ်အာဏာရှင် ဖြုတ်ချရေး၊ စစ်အုပ်စုမပါဝင်တဲ့ အစိုးရတရပ်ထူ ထောင်နိုင်ရေးနဲ့ ဖက်ဒရယ်ဒီမိုကရေစီအပြည့်အဝရရှိရေးစတဲ့ မူဝါဒ ၃ ရပ်အပေါ် ရပ်တည်အကောင်အ ထည်ဖော်ဆောင်ရွက်သွားမယ်လို့ ဆိုပါတယ်။
ခုလိုပူးပေါင်းဖွဲ့စည်းလိုက်တဲ့ထဲမှာတော့ ရန်ကုန်အခြေစိုက် တက္ကသိုလ်၊ ကောလိပ်၊ သိပ္ပံ ၁၅ ခုက ကျောင်းသားသမဂ္ဂတွေပါဝင်ပြီး အဆိုပါ ကျောင်းတွေကတော့ ဒဂုံ တက္ကသိုလ်၊ ရန်ကုန်အရှေ့ပိုင်းတက္ကသိုလ်၊ ရန်ကုန်နိုင်ငံခြားဘာသာတက္ကသိုလ်၊ ရန်ကုန် စီးပွားရေးတက္ကသိုလ်များ(ရွာသာကြီးနယ်မြေနဲ့ လှိုင်နယ်မြေ)၊ ရန်ကုန်နည်းပညာတက္ကသိုလ်၊ သန်လျင်နည်းပညာတက္ကသိုလ်၊ ရန်ကုန်အနောက်ပိုင်းနည်းပညာတက္ကသိုလ်၊ မှော် ဘီနည်းပညာတက္ကသိုလ်၊ ရန်ကုန်ကွန်ပြူတာတက္ကသိုလ်၊ သတင်းအချက်အလက်နည်းပ ညာတက္ကသိုလ်၊ မြန်မာနိုင်ငံရေကြောင်းပညာတက္ကသိုလ်၊ မြန်မာနိုင်ငံလေကြောင်းနှင့် အာကာသပညာတက္ကသိုလ်၊ စက်မှုလက်မှုသိပ္ပံ(အင်းစိန်)နဲ့ စက်မှုလက်မှုသိပ္ပံ(ရွှေပြည် သာ)ကျောင်းတွေ ဖြစ်ပါတယ်။
ဒါ့အပြင် တကသများ-ရန်ကုန် အနေနဲ့ ဖက်ဒရယ်ဒီမိုကရေစီကို အမှန်တကယ်လိုလားတဲ့ ပြည်တွင်းပြည်ပအဖွဲ့အစည်းတွေနဲ့ ချိတ်ဆက်ဆောင်ရွက်ပြီး နွေဦးတော်လှန်ရေး တိုက်ပွဲအောင်မြင်ဖို့အတွက် ကျောင်းသားပြည်သူတရပ်လုံးနဲ့ တိုက်ပွဲဝင်သွားမှာဖြစ်တယ်လို့လည်း ကြေညာချက်မှာ ဖော်ပြပါတယ်။
မြန်မာနိုင်ငံမှာ ဖေဖော်ဝါရီ ၁ ရက်က နိုင်ငံတော် သမ္မတ ဦးဝင်းမြင့်၊ နိုင်ငံတော်အတိုင်ပင်ခံပုဂ္ဂိုလ် ဒေါ်အောင်ဆန်းစုကြည်နဲ့ အစိုးရခေါင်းဆောင် ပိုင်းတချို့ကို စစ်တပ်ကဖမ်းဆီးလိုက်ကာ နိုင်ငံတော်အာဏာသိမ်းယူလိုက်ပြီးနောက် တနေ့မှာပဲ ပြည်သူတွေဟာ ညစဉ်သံပုံးတီးဆန့်ကျင်တာတွေ၊ ဖယောင်းတိုင်မီးထွန်းဆု တောင်းပွဲတွေ၊ လူမဲ့သပိတ်၊ လမ်းမပေါ်က ကားဟွန်းတီးသပိတ်စတဲ့ နည်းလမ်းအမျိုးမျိုး အသုံးပြုကာ အကြမ်းမဖက်တဲ့နည်းတွေနဲ့ ဆန္ဒပြနေကြတာပါ။
တဆက်တည်းမှာပဲ စစ်တပ်ရဲ့ အာဏာသိမ်းလုပ်ရပ်ကို ကန့်ကွက်ရှုတ်ချတဲ့အနေ နဲ့ ဆေးလောကသားတွေက စတင်ကာ အာဏာဖီဆန်ရေးလှုပ်ရှားမှု(Civil Disobedience Movement)ကို လုပ်ဆောင်နေကြတာ ဖြစ်ပြီး လက်ရှိမှာတော့ တခြား ကဏ္ဍအသီးသီးက ပြည်သူ့ဝန်ထမ်းတွေ၊ အနုပညာရှင်တွေ၊ ပြည်သူတွေကပါ ပူးပေါင်း ပါဝင်လှုပ်ရှားနေကြတာပါ။
နောက်ပိုင်းမှာတော့ နိုင်ငံတဝန်း စစ်အာဏာရှင်ဆန့်ကျင်ရေး ဆန္ဒပြပွဲတွေမှာ ပြည်သူတွေ မြို့ရွာအနှံ့ ပါဝင်နေခဲ့ကြပြီး စစ်တပ်နဲ့ ရဲတပ်ဖွဲ့ဝင်တွေက အကြမ်းဖက် ပစ်ခတ်နှိမ်နင်းမှုတွေနဲ့ ကျဆုံးမှုတွေ၊ ဖမ်းဆီးထိန်းသိမ်း တရားစွဲဆိုခံရတာတွေနဲ့အတူ အခြေအနေတွေ ပိုမိုတင်းမာလာနေခဲ့တာ ဖြစ်ပါတယ်။
ပြည်သူတရပ်လုံးက လက်မခံပဲ ဝိုင်းဝန်းဆန့်ကျင်ခဲ့ကြတဲ့ စစ်အာဏာရှင်ဆန့်ကျင် နွေဦးတော်လှန်ရေး ကာလဟာ ၂ လတင်းတင်းပြည့်ခဲ့ပြီဖြစ်ကာ မတ် ၃၁ ရက် နေ့အထိ ကျဆုံးသူပေါင်း ၅၃၀ ကျော် ရှိနေခဲ့ပြီ ဖြစ်ပါတယ်။
