ရန်ကုန်-မန္တလေးအမြန်လမ်းမကြီး မိုင်တိုင်အမှတ် ၂၉၆/၆ မှာ ဒီနေ့ညနေငါးနာရီခွဲက တိုရိုတာဒိုင်နာ ယာဥ်တစီး အရှိန်မထိန်းနိုင်ဘဲ တိမ်းမှောက်ခဲ့ရာ အမျိုးသားတဦးနဲ့ အမျိုးသမီးနှစ်ဦး သေဆုံးခဲ့ပြီး ဆယ်ဦး ဒဏ်ရာရရှိခဲ့တယ်လို့ ပရဟိတအဖွဲ့တွေဆီက သိရပါတယ်။
အရှိန်နဲ့မောင်းလာတဲ့ တိုရိုတာဒိုင်နာယာဥ်မှာ မိုင်တိုင်အမှတ် ၂၉၆/၆ အရောက် အရှိန်မထိန်းနိုင်ဘဲ မှောက်သွားတာလို့ သွားရောက်ကူညီရာမှာ ပါဝင်သူတဦးက ဒီဗွီဘီကို ပြောပါတယ်။
"ကားပေါ်မှာ ၁၄ ယောက်ပါလာတာ သုံးဦးသေတယ်၊ ကိုးဦးဒဏ်ရာရတယ်။ ဒဏ်ရာရတဲ့အထဲမှာ တဦးက စိုးရိမ်ရတယ်။"
ယာဥ်တိမ်းမှောက်ရာကို သီးကုံးအမြန်လမ်းမီးသတ်တပ်ဖွဲ့နဲ့ ဝန်ဇင်းလူငယ်အသင်း၊ သုခမေတ္တာအသင်း၊ ပြည်သာယာ လူငယ်လူမှုကူညီရေးအသင်းတွေက ဆေးရုံကို ပို့ဆောင်ပေးခဲ့တယ်လို့ မီးသတ်ဦးစီးဌာန တာဝန်ရှိသူတဦးက ဒီဗွီဘီကိုပြောပါတယ်။
သေဆုံးသူသုံးဦး၊ ဒဏ်ရာရရှိသူ အမျိုးသားသုံးဦး နဲ့ အမျိုးသမီးခြောက်ဦးကို မိတ္တီလာဆေးရုံကို ပရဟိတအဖွဲ့တွေက ပို့ဆောင်ပေးလိုက်တယ်လို့ သူကရှင်းပြပါတယ်။
ဓာတ်ပုံ- ပြည်သာယာ လူမှုကူညီရေးအသင်း
ရန်ကုန်-မန္တလေးအမြန်လမ်းမကြီး မိုင်တိုင် ၂၈၀(ဝ/၁)အကြား ဆည်ကုန်းရွာအနီးမှာ ဇွန်လ ၂၃ ရက်မနက်က လိုက်ထရပ်ကား နောက်ဘီးပေါက်ပြီး တိမ်းမှောက်ရ ၁၀ ဦးဒဏ်ရာရသွားပါတယ်။
“ကားကတော့ ပက်လက်လန်သွားတယ်။ ကားပေါ်မှာ ဦးပဉ္စင်းတပါး၊ ကိုရင်တပါးအပါ ၁၈ ဦး ပါတယ် ၁၀ ဦးဒဏ်ရာရသွားတယ်။ အမြန်လမ်းရဲတပ်ဖွဲ့ကကားနဲ့ပဲ မိတ္ထီလာဆေးရုံကိုပို့ လိုက်ရတယ်” လို့ ဒေသခံတစ်ဦးက ပြောပါတယ်။
လယ်ဝေးမြို့နယ် အင်ပင်အုပ်စု တောင်စင်အေးရွာနေ ကိုရဲမင်းသူ မောင်းလာတဲ့လိုက်ထရပ်ကားဟာ မန္တလေးဘက်မှ နေပြည်တော်သို့ ဦးတည်မောင်းလာရာ ကားနောက်ဘီးပေါက်ပြီး အရှိန်လွန်တိမ်းမှောက်သွားခဲ့တာပါ။
ကားပေါ်မှာ အမျိုးသမီး ၁၀ ဦး နဲ့ အမျိုးသား ၆ ဦး၊ ဦးပဥ္စင်း ၁ ပါး၊ ကိုရင် ၁ ပါး စုစုပေါင်း ၁၈ ဦး လိုက်ပါလာတဲ့အထဲ ဦးပဥ္စင်း ၁ ပါး၊ ကိုရင် ၁ ပါးနဲ့ အမျိုးသား ၄ ဦးဒဏ်ရာရပြီး အမျိုးသမီး ၆ ဦး ထိခိုက်ဒဏ်ရာရသွားပါတယ်။
ယာဉ်မဆင်မခြင်မောင်းလို့ သာမန်ဒဏ်ရာ ပြင်းထန်ဒဏ်ရာတွေရခဲ့တာကြောင့် ယာဉ်မောင်း ကိုမျိုးသူရကို သီးကုန်းအမြန်လမ်းရဲစခန်းမှာ ရာဇသတ်ကြီးပုဒ်မ ၃၃၇/၃၃၈နဲ့ အမှုဖွင့် အရေးယူထားပါတယ်။
