ရန်ကုန်၊ မြောက်ဥက္ကလာပမြို့နယ်၊ င ရပ်ကွက် အုပ်ချုပ်ရေးမှူးရုံး ဧပြီ ၅ ရက် ဒီနေ့မနက် ၅ နာရီခွဲက ဗုံးနဲ့အပစ်ခံရပြီး ပေါက်ကွဲမှုဖြစ်ခဲ့တယ်လို့ ရပ်ကွက်နေသူတွေဆီက သိရပါတယ်။
င ရပ်ကွက် အုပ်ချုပ်ရေးမှူးရုံးမှာ စစ်ကောင်စီတပ် ရောက်ရှိနေချိန် လမ်းမပေါ်ကနေ ဗုံးနဲ့ပစ်သွားတာလို့ ရပ်ကွက်နေသူတဦးက ပြောပါတယ်။
“တယောက်ထိတယ်လို့ ကြားတယ်။ စစ်တပ်ကထိတာလား၊ အုပ်ချုပ်ရေးဘက်က ထိတာလား မသိဘူး။ အခု လမ်းကိုပိတ်ပြီး စစ်နေတယ်။”
ဗုံးပေါက်ပြီးနောက် စစ်ကောင်စီတပ်က ရုံးနဲ့အနီးတဝိုက်လမ်းတွေကို ပိတ်ဆို့စစ်ဆေးခဲ့ပြီးနောက် ဆိုင်ကယ် ကယ်ရီသမားတချို့ကို ခေါ်ယူမေးမြန်းခဲ့တယ်လို့ ရပ်ကွက်နေသူတွေဆီက သိရပါတယ်။
င ရပ်ကွက် အုပ်ချုပ်ရေးမှူးရုံးမှာ မကြာခဏ ဗုံးနဲ့အပစ်ခံရလို့ ပေါက်ကွဲမှုတွေဖြစ်ခဲ့ပြီး အခုနှစ် ဖေဖော်ဝါရီ ၂၃ ရက်မှာ ဗုံးပေါက်ခဲ့တယ်လို့ အုပ်ချုပ်ရေးနဲ့ နီးစပ်သူတဦးက ပြောပါတယ်။
“ခဏခဏဗုံးပေါက်တော့ CCTV တော့ တပ်ထားတယ်။ မီးပျက်တဲ့အချိန် လာပစ်တော့ ဖမ်းလို့မရဘူး။ ဘယ်နေ့ ဘယ်သူတွေ ဗုံးနဲ့အပစ်ခံရလို့ သေမလဲတော့မသိဘူး။”
မြောက်ဥက္ကလာပမြို့နယ်အတွင်းရှိ အုပ်ချုပ်ရေးမှူးရုံး၊ စရဖရုံးနဲ့ EPC ရုံးတွေ မကြာခဏ ဗုံးနဲ့အပစ်ခံရပြီးနောက် စောင့်ကြည့်လုံခြုံရေးအဖွဲ့ ဖွဲ့ထားပေမဲ့ ပစ်ခတ်မှုတွေဖြစ်ပြီးနောက် အဆိုပါအဖွဲ့မှာ ပါဝင်သူမရှိတော့ဘူးလို့ အုပ်ချုပ်ရေးနဲ့ နီးစပ်သူတွေဆီက သိရပါတယ်။
မွန်ပြည်နယ်၊ သံဖြူဇရပ်မြို့၊ မြို့မရဲစခန်းအနီးက ကျောင်းပိုင်းရပ်ကွက်အုပ်ချုပ်ရေးမှူးရုံး မိုင်းခွဲတိုက်ခိုက်ခံရတာကြောင့် အဆောက်အဦ တခုလုံးနီးပါး ထိခိုက်ပျက်စီးခဲ့တယ်လို့ ဒေသခံတွေက ဒီဗွီဘီကို ပြောပါတယ်။
သံဖြူဇရပ်မြို့မရဲစခန်းအနီးရှိ အုပ်ချုပ်ရေးမှူးဟာ ဒီနေ့ ဖေဖော်ဝါရီ ၂၃ ရက် မနက် ၅ နာရီခွဲလောက်မှာ မိုင်းထောင် ဖောက်ခွဲခံလိုက်ရတာ ဖြစ်ပါတယ်။
မိုင်းထောင်ဖောက်ခွဲခံရတာကြောင့် အဆောက်အဦ တခုလုံးနီးပါး ပြိုကျပျက်စီးခဲ့ပေမဲ့ လူထိခိုက်ဒဏ်ရာရတာတော့ မရှိပါဘူး။
“မနက်က အသံအကျယ်ကြီးပဲ မိုင်းပေါက်တာ၊ ပြီးမှ အုပ်ချုပ်ရေးမှူးရုံးမှာ မိုင်းကွဲတာလို့ သိရပါတယ်။ ဒီအုပ်ချုပ်ရေးမှူးရုံးက ရဲစခန်းနဲ့နီးနီးလေး လှမ်းကြည့်မြင်ရတယ်။ အခုတော့ ရဲတွေ ခြေရှုပ်နေတယ်” လို့ မြို့ခံတဦးက ပြောပါတယ်။
အုပ်ချုပ်ရေးမှူးရုံး မိုင်းထောင်ဖောက်ခွဲခံရပြီးနောက် စစ်ကောင်စီတပ်ဖွဲ့ဝင်တွေက သံဖြူဇရပ်မြို့ အဝင်အထွက်နေရာတွေမှာ ပိတ်ဆို့ရှာဖွေ စစ်ဆေးတာတွေ လုပ်ဆောင်နေတယ်လို့ သိရပါတယ်။
အုပ်ချုပ်ရေးမှူးရုံး မိုင်းထောင်ဖောက်ခွဲမှုနဲ့ပတ်သက်ပြီး သံဖြူဇရပ်မြို့နယ် ပြည်သူ့ကာကွယ်ရေးတပ်ဖွဲ့ အပါအဝင် တော်လှန်ရေးအင်အားစုတွေဘက်က တစုံတရာ ထုတ်ပြန်ထားတာ မရှိသေးပါဘူး။
သံဖြူဇရပ်မြို့နယ်မှာ စစ်တပ်အာဏာသိမ်းပြီးနောက် ရပ်ကွက်ကျေးရွာ အုပ်ချုပ်ရေးမှူးရုံး ၆ ရုံးထက်မနည်း မိုင်းထောင်ဖောက်ခွဲခံထားရပါတယ်။
ရန်ကုန်တိုင်း၊ ဒဂုံဆိပ်ကမ်းမြို့နယ်၊ အမှတ် ၉၄ ရပ်ကွက် အုပ်ချုပ်ရေးမှူးရုံး ပစ်ခတ်ခံရပြီးနောက် ကံ့ကော်စျေးလမ်းမကြီး လမ်းဘေးဝဲယာက စျေးဆိုင်တွေကို စစ်ကောင်စီတပ်နဲ့ အုပ်ချုပ်ရေးအဖွဲ့ပေါင်းပြီး ဖျက်ပစ်ခဲ့တယ်လို့ ရပ်ကွက်နေသူတွေဆီက သိရပါတယ်။
ကံ့ကော်စျေးလမ်းမကြီး လမ်းဘေးဝဲယာရှိ စျေးဆိုင်ခန်းတွေကို ဖေဖော်ဝါရီ ၂၂ ရက်က စတင်ဖျက်ခဲ့ပြီး ဒီနေ့မနက်မှာတော့ စစ်ကောင်စီတပ်က ဘူဒိုဇာနဲ့ပါ လာရောက်ထိုးကော်ပြီး ဖြိုပစ်ခဲ့တယ်လို့ ရပ်ကွက်နေသူတဦးက ဒီဗွီဘီကို ပြောပါတယ်။
“ပြောရရင် ရပ်ကွက်ရုံး အပစ်ခံရတယ်။ အဲ့ဒါနဲ့ပတ်သက်ပြီး စစ်တပ်နဲ့ သူတို့ကို သတင်းမပေးလို့ ဖျက်ပစ်တာ။ မရှိလို့ လမ်းဘေးစျေးရောင်းစားပါတယ်ဆို ဖျက်ပစ်တော့ ဘာသွားလုပ်စားရမှာလဲ။”
မနေ့က မနက် ၁၁ နာရီကစတင်ကာ ကံ့ကော်စျေးလမ်းမကြီး လမ်းဘေးဝဲယာ စျေးဆိုင်ခန်းတွေဖျက်ဖို့ စစ်ကောင်စီတပ်နဲ့ လူမိုက်တွေ ရောက်လာပြီး ည ၁၂ နာရီ မတိုင်ခင် ဖျက်ဖို့ အမိန့်ပေးခဲ့တာဖြစ်တယ်လို့ စျေးသည်တဦးက ဒီဗွီဘီကို ပြောပါတယ်။
“မနေ့ကတည်းက ဖျက်ခိုင်းတာ၊ မဖျက်ရင် ပစ်သတ်မယ်လို့ပြောတယ် စစ်တပ်က။ တချို့ကလည်း ဖျက်တယ်၊ တချို့ကလည်း မဖျက်ဘူး၊ စောင့်ကြည့်မယ်ပေါ့။ ဒီမနက် ဘူဒိုဇာတွေပါ ခေါ်လာပြီး စစ်တပ်က ရောက်လာတာ။”
ကံ့ကော်စျေးလမ်းမကြီးရှိ လမ်းဘေးဝဲယာဆိုင်ခန်းတွေ မဖျက်ခင် စစ်ကောင်စီတပ်က ဖော်ဖော်ဝါရီ ၂၀ ရက်မှာ ကျူးကျော်တဲက လူငယ်သုံးဦးကို ဖမ်းဆီးခဲ့တာလည်း ရှိပါတယ်။
ဒီနေ့ စစ်ကောင်စီတပ်က ဖြိုဖျက်ပစ်တဲ့ စျေးဆိုင်တွေဟာ ရန်ကုန်မှာ အိမ်ငှားခစျေးနှုန်း ကြီးမြင့်လာတာကြောင့် လမ်းဘေးဝဲယာမှာ တဲထိုးပြီး စျေးရောင်းကာ စာဝတ်နေရေး ပြဿနာကို ဖြေရှင်းနေရသူတွေ ဖြစ်ပါတယ်။
ဒဂုံဆိပ်ကမ်းမြို့နယ်၊ အမှတ် ၉၄ ရပ်ကွက် အုပ်ချုပ်ရေးမှူးရုံးကို ဖေဖော်ဝါရီ ၁၉ ရက် ညနေပိုင်းက ပြည်သူ့ကာကွယ်ရေးတပ်တွေက ဝင်ရောက်ပစ်ခတ်ခဲ့ရာ ရာအိမ်မှူးနှစ်ဦး သေဆုံးပြီး ရာအိမ်မှူးသုံးဦးနဲ့ ကယ်ရီသမားတဦး ဒဏ်ရာရရှိခဲ့ပါတယ်။
