ရှမ်းပြည်နယ်တောင်ပိုင်း၊ ရပ်စောက်မြို့နယ် ဘုရားဖြူကျေးရွာအတွင်းရှိ ဘုန်းကြီးကျောင်း တကျောင်း မီးလောင်ပျက်စီးပြီး ဆရာတော်တပါး ပျံလွန်တော်မူသွားပါတယ်။
ဧပြီ ၁၉ ရက် ည ၉ နာရီဝန်းကျင်လောက်က ဘုရားဖြူကျေးရွာ ဘုန်းကြီးကျောင်း မီးလောင်မှုဖြစ်ပွားပြီး သက်တော် ၇၀ ဝန်းကျင်ရှိ ဆရာတော်တပါး ပျံလွန်တော်မူကာ ကိုရင်တပါးမှာ မီးလောင်နေစဉ် ကျောင်းပေါ်မှ ခုန်ချခဲ့တာကြောင့် ခြေထောက်ကျိုးဒဏ်ရာ ရရှိသွားတယ်လို့ သွားရောက်ကူညီပေးခဲ့တဲ့ မဇ္စျိမအသင်းထံက သိရပါတယ်။
မဇ္စျိမအသင်း တာဝန်ရှိသူက “ကျနော်တို့ကို ဆက်သွယ်လာတော့ ည ၉ နာရီကျော်ပြီ။ ဟိုရောက်သွားတော့ ကျောင်းတိုင်တွေပဲ ကျန်တော့တယ်။ မီးလောင်သွားတာက ပင်မကျောင်းဆောင်ကြီးပါ။ ကျောင်းမှာရှိတဲ့ ဆရာတော်တပါး ပျံလွန်တော်မူသွားပြီး ကျောင်းပေါ်ကခုန်ချလို့ ကိုရင်တပါး ခြေထောက်ကျိုးသွားတယ်။ ကိုရင်ကိုတော့ ဆေးရုံပို့ထားပေးတယ်” လို့ ဒီဗွီဘီကို ပြောပါတယ်။
ဘုရားဖြူကျေးရွာ ဘုန်းကြီးကျောင်း မီးလောင်တာဟာ အခုနှစ်အတွင်း ရပ်စောက်မြို့အတွက် ပထမဆုံးအကြိမ် အဆိုးရွားဆုံးဖြစ်ပွားခဲ့တာဖြစ်ပြီး မီးလောင်တဲ့ အကြောင်းရင်း အသေးစိတ် အချက်အလက်ကို မသိရသေးပါဘူး။
ရှမ်းပြည်နယ်တောင်ပိုင်း၊ ရပ်စောက်မြို့မှာ မနေ့က သေဆုံးသွားသူကို စစ်ဆေးတဲ့အခါ ကိုဗစ် တွေ့ခဲ့ရတယ်လို့ မဇ္ဈိမ လူမှုကူညီရေးအသင်းဆီက သိရပါတယ်။
ရပ်စောက်မြို့ မြို့ကုန်းရပ်ကွက်မှာ ဦးနှောက်သွေးကြောပေါက်ပြီး မနေ့က နေအိမ်မှာ ဆုံးပါးသွားတဲ့ အသက် ၄၄ နှစ်အရွယ် အမျိုးသားကို RTD နဲ့ စစ်ဆေးခဲ့ရာ ကိုဗစ်ပိုး တွေ့ရှိခဲ့တာ ဖြစ်ပါတယ်။
မဇ္စျိမ လူမှုကူညီရေးအသင်း တာဝန်ရှိသူက “သေဆုံးသူက ဆေးရုံဆင်းလာတဲ့ လူနာပါ။ ဆေးရုံမှာ ကူးတာလား၊ ဘယ်က ကူးစက်လာတယ်ဆိုတာတော့ မသိရသေးဘူး။ မိသားစုဝင်တွေကိုတော့ တခါတည်း ကွာရန်တင်းဝင်ခိုင်းထားပါပြီ။ ကျနော်တို့အနေနဲ့ ရပ်စောက်မြို့ထဲမှာ Mask ကမ်ပိန်းတွေ အမြဲလုပ်ပါတယ်” လို့ ဒီဗွီဘီကို ပြောပါတယ်။
ရပ်စောက်မြို့မှာ ပြီးခဲ့တဲ့ စက်တင်ဘာလ ၁ ရက်နေ့ကလည်း ရေဖြူကျေးရွာက အသက် ၅၂ နှစ်အရွယ် အမျိုးသားတယောက် ကိုဗစ် ၁၉ ကူးစက်ရောဂါနဲ့ ကွယ်လွန်ခဲ့ပါတယ်။
