ပွဲကစားဖို့ရှိတဲ့နေ့မှာ ရာမဒန်ဥပုသ်စောင့်တဲ့ ကစားသမားကို ပြင်သစ်ကလပ် နန့်တက်စ်အသင်းက လူစာရင်းကနေ ချန်လှပ်ခဲ့ပါတယ်။
နန့်တက်စ်အသင်းနည်းပြ ကွန်ဘွာဟာ ပွဲကစားရမယ့်နေ့မှာ အစ္စလာမ်ဘာသာဝင် မွတ်စလင်ကစားသမားတွေအနေနဲ့ ရာမဒန်ဥပုသ်သီလစောင့်တည်တာကို မလုပ်ဖို့ တောင်းဆိုခဲ့ပြီး မလိုက်နာတဲ့ ကစားသမားကို ပွဲကစားမယ့် လူစာရင်းကနေ ချန်လှပ်ခဲ့တာပါ။
အယ်လ်ဂျီးရီးယားနောက်ခံလူ ဟတ်ဂျမ်ဟာ ပွဲကစားရမယ့်နေ့မှာ ရာမဒန်ဥပုသ်စောင့်ခဲ့တဲ့အတွက် ရီယမ်စ်အသင်းကို ၃ ဂိုး ဂိုးမရှိနဲ့ရှုံးနိမ့်ခဲ့တဲ့ပွဲစဉ်မှာ ပါဝင်ခွင့်မရခဲ့ပါဘူး။
ကစားသမားတွေအနေနဲ့ ရာမဒန်ဥပုသ်သီလစောင့်မယ်ဆိုရင် ကိစ္စမရှိဘဲ လိုအပ်မယ်ဆိုရင် မိမိကိုယ်တိုင် ပံ့ပိုးပေးနိုင်ပေမဲ့ ပွဲကစားတဲ့နေ့မှာတော့ အစာရေစာ စားသောက်ဖို့ လိုအပ်ကြောင်း နန့်တက်စ်နည်းပြ ကွန်ဘွာကပြောပါတယ်။
ဒီလိုလုပ်ဆောင်တာဟာ ဒဏ်ရာမရရှိစေဖို့ဖြစ်ပြီး ရာမဒန်ဥပုသ်စောင့်လို့ အပြစ်ပေးအရေးယူတာမျိုးမဟုတ်ကြောင်း နည်းပြကွန်ဘာက ရှင်းလင်းသွားပါတယ်။
ရာမဒန်ဥပုသ်ကာလမှာ မွတ်စလင်လူမျိုးတဦးဖြစ်သူ ကန်တေရဲ့ ခြေစွမ်း ထခိုက်နိုင်တယ်လို့ ချဲလ်ဆီးနည်းပြ တူချယ်က သတိပေးသွားပါတယ်။
မွတ်စလင်တွေဟာ ရာမဒန်ဥပုသ်ကာလမှာ နေထွက်ချိန်ကနေ နေဝင်ချိန်အထိ အစားအသောက်ရှောင်ကျဉ်ပြီး နေဝင်ချိန်မှသာ ပြန်လည်အား ဖြည့်ကြတာပါ။
ချဲလ်ဆီးအသင်းက မွတ်စလင်တစ်ဦးဖြစ်သူ ကန်တေဟာလည်း ဘာသာရေးကိုင်းရိူင်းသူဖြစ်တာကြောင့် အားကစားသမားဖြစ်ပေမယ့် အစာနဲ့ရေမသောက်ဘဲ လေ့ကျင့်မှုတွေ ပြုလုပ်နေတာပါ။
ဒီလိုဥပုသ်စောင့်မှုဟာ အားကစားသမားဖြစ်တဲ့ ကန်တေအတွက်တော့ ခြေစွမ်းကို ထိခိုက်နိုင်တယ်လို့ နည်းပြတူချယ်ကပြောပါတယ်။
“ကျနော်တို့ဟာ သူဒဏ်ရာပြန်ကောင်းဖို့အတွက် အချိန်များစွာစောင့်ဆိုင်းခဲ့ရတယ်။ ခုချိန်မှာတော့ သူ့ရဲ့ဘာသာရေးနဲ့ ယုံကြည်မှု ဒါမှမဟုတ် တခြား အကြောင်းပြချက်တခုခုကြောင့် ဥပုသ်စောင့်နေပါတယ်။ ဒါက သူ့အတွက် ပထမဆုံးမဟုတ်ပေမယ့်လည်း ခြေစွမ်းကို ထိခိုက်နိုင်ပါတယ်” လို့ နည်းပြတူချယ်ကပြောပါတယ်။
ကန်တေရဲ့ပြင်သစ် အသင်းဖော် ပေါ့ဘာဟာလည်း ရာမဒန်ကာလမှာ ဥပုသ်စောင့်နေပေမယ့် အာဟာရဗေဒပညာရှင်နဲ့ တိုင်ပင်ပြီး နေထိုင်စားသောက်သလို အရင်နှစ်တွေကလည်း လုပ်ဆောင်ခဲ့ဖူးတာကြောင့် အသားကျနေပြီးဖြစ်ကြောင်း ပြောပါတယ်။
