ဘင်္ဂလားဒေ့ရှ်နိုင်ငံ တက်ခ်နပ်ဖ်မြို့ရှိ ချက်ခ်မာကူလ် မွတ်စလင်ဒုက္ခသည်စခန်း အမှတ် ၂၁ မှာ ဧပြီ ၂၄ ရက် ည ၉ နာရီက မီးလောင်မှုဖြစ်ပွားပြီး လူနေအိမ်ခြေ ရာကျော် မီးလောင်ပျက်စီးခဲ့ပါတယ်။
မီးလောင်မှုဖြစ်ပွားရတဲ့ အကြောင်းရင်းနဲ့ပတ်သက်ပြီး စခန်းအတွင်းနေထိုင်သူ ရိုဟင်ဂျာ ဒုက္ခသည်တဦးက “မီးလောင်မှုဖြစ်တာက ရုတ်တရက်ဖြစ်လာတာ။ မီးသတ်တပ်ဖွဲ့တွေ လာရောက် မီးငြှိမ်းသတ်ခဲ့ကြပါသေးတယ်။ ဒါပေမဲ့ တဲအိမ်တွေ ရာနဲ့ချီ မီးလောင်ခဲ့တယ်” လို့ ပြောပါတယ်။
အဆိုပါမီးလောင်မှုကြောင့် ပျက်စီးမှု အတိုင်းအတာ အတိအကျ မသိရသေးဘဲ အိမ်ခြေ ၆၀ မှ ၇၀ အထိ မီးလောင်ပြာကျခဲ့ရတာပါ။
ဘင်္ဂလားဒေ့ရှ်နိုင်ငံ ကော့ဇ်ဘဇားနဲ့ တက်ခ်နပ်ဖ်ရှိ ရိုဟင်ဂျာဒုက္ခသည်စခန်းတွေ မီးလောင်မှု ဆက်တိုက်ဖြစ်ပွားနေတယ်လို့ ရိုဟင်ဂျာဒုက္ခသည်တွေက ဒီဗွီဘီကို ပြောပါတယ်။
“ဒုက္ခသည်စခန်းတွေမှာ မီးလောင်မူဖြစ်တာ အခုဆိုရင် ၃ ကြိမ်ရှိပြီ။ မတ်လ ၅ ရက်နေ့က ဘာလုခါလီ စခန်းအမှတ် ၁၁ မှာ မီးလောင်မှု ဖြစ်ပွားခဲ့တယ်။ အိမ်ခြေထောင်ချီ မီးလောင်ခဲ့ရတယ်။ နောက်ပြီး ဧပြီလ ၁၈ ရက်နေ့ ညနေပိုင်းမှာ မီးလောင်မှုဖြစ်ပွားခဲ့ပြီး အိမ်ခြေသိန်းနဲ့ချီ ပျက်စီးဆုံးရှုံးခဲ့ရတယ်။ အခုတကြိမ်မှာလည်း လူနေအိမ် ၁၀၀ လောက် မီးလောင်ခဲ့တယ်။ မီးလောင်တာ ၃ ကြိမ်ရှိနေပြီ။”
ပြီးခဲ့တဲ့ ၂၀၂၃ ခုနှစ် ဇန်နဝါရီ ၁၈ ရက်က မြန်မာ-ဘင်္ဂလားဒေ့ရှ်နယ်စပ်မှာ ရှိနေတဲ့ Zero Line ဒုက္ခသည်စခန်းမှာ ခိုအောင်းနေကြတဲ့ အာရကန်ရိုဟင်ဂျာကယ်တင်ရေးတပ်မတော် (ARSA) တပ်ဖွဲ့တွေကို ရိုဟင်ဂျာသွေးစည်းညီညွတ်ရေးအဖွဲ့ (RSO) နဲ့ ဘင်္ဂလားဒေ့ရှ် ကာကွယ်ရေးတပ်ဖွဲ့ (RAB) တို့ ပူးပေါင်းတိုက်ခိုက်ရာမှာ Zero line ရှိ နေအိမ် ၃၀၀ ကျော် မီးရှို့ခံခဲ့ရပါတယ်။
ဘင်္ဂလားဒေ့ရှ်နိုင်ငံ၊ ကော့ဇ်ဘဇားခရိုင်၊ တက္ကနာ့ဖ်မြို့နယ်ရှိ လေဒါ ရိုဟင်ဂျာဒုက္ခသည်စခန်း ၂ ခုမှာ ဧပြီ ၁၈ ရက် ည ၁၂ နာရီလောက်က မီးလောင်မှုဖြစ်ပွားတာကြောင့် နေအိမ် ၃၀ နီးပါး ပျက်စီးဆုံးရှုံးခဲ့ပါတယ်။
ရိုဟင်ဂျာဒုက္ခသည်တွေ ဝိုင်းဝန်းငြှိမ်းသတ်လိုက်တာကြောင့် မီးငြိမ်းသွားခဲ့ပြီး မီးလောင်ကျွမ်းမှုကြောင့် လေဒါဒုက္ခသည်စခန်း အမှတ် ၂၄ မှာ နေအိမ်အလုံး ၃၀ နီးပါးနဲ့ အမှတ် ၂၆ မှာ နေအိမ် ၁ လုံး ပျက်စီးဆုံးရှုံးသွားတယ်လို့ ဒုက္ခသည်တွေက ပြောပါတယ်။
လောလောဆယ်မှာ မီးလောင်မှုနဲ့ပတ်သက်ပြီး ဘာကြောင့် မီးလောင်ကျွမ်းမှုဖြစ်တယ် ဆိုတာကို အသေးစိတ် မသိရသေးပါဘူး။
ပြီးခဲ့တဲ့ မတ်လ ၅ ရက်ကလည်း ကော့ဇ်ဘဇားခရိုင်ရှိ ရိုဟင်ဂျာဒုက္ခသည်စခန်းမှာ မီးလောင်ပြီး လူနေအိမ် ၂,၈၀၀၊ ဆေးရုံနဲ့ ပညာသင်ကြားရေးစင်တာ အပါအဝင် အဆောက်အဦ ၉၀ ကျော် မီးလောင်ပျက်စီးခဲ့ကာ လူပေါင်း ၁၂,၀၀၀ ကျော် အိုးမဲ့အိမ်မဲ့ ဖြစ်ခဲ့ကြရပါတယ်။
