ဗြိတိန်ရဲ့ စီးပွားရေးတည်ငြိမ်ရေးနဲ့  တိုင်းပြည်ညီညွတ်ရေး လုပ်ဆောင်သွားမယ်လို့  ဝန်ကြီးချုပ်သစ် ရီရှီဆူးနတ်ခ်က ကတိပေးပြောကြားလိုက်ပါတယ်။

ဗြိတိန်ဘဏ္ဍာရေးဝန်ကြီးဟောင်း ရီရှီဆူးနတ်ခ်ဟာ အောက်တိုဘာ ၂၅ ရက် မနက်က  ဘာကင်ဟမ်နန်းတော်မှာ ချားစ်ဘုရင်ကြီးနဲ့တွေ့ဆုံပြီးနောက် လန်ဒန်မြို့ အမှတ် ၁၀ ဒေါင်းနင်းလမ်း ရုံးရှေ့မှာ  ဝန်ကြီးချုပ်အဖြစ် ပထမဆုံး မိန့်ခွန်းပြောကြားရာမှာ ပြောဆိုခဲ့တာပါ။ 

သူ့အအစိုးရအဖွဲ့ လုပ်ဆောင်မယ့် အစီအစဉ်တွေထဲမှာ စီးပွားရေးတည်ငြိမ်အောင်လုပ်ဖို့ အဓိက ဖြစ်ပြီး ခက်ခဲတဲ့ ဆုံးဖြတ်ချက်တွေ ချက်မှတ်လုပ်ဆောင်ရဖို့ရှိနေတယ်လို့  ဆူးနတ်ခ်က ပြောပါတယ်။

“အခုဆိုရင် ကျနော်တို့ နိုင်ငံဟာ နက်ရှိုင်းတဲ့ စီးပွားရေးအကျပ်အတည်းနဲ့ ရင်ဆိုင်ကြုံတွေ့နေရတယ်။ ကိုဗစ်ရောဂါကပ်ဘေးပြီးသွားပေမဲ့ ရောဂါကူးစက်မှုတွေ ဆက်ရှိနေတုန်းပဲ။ ပူတင်ရဲ့ ယူကရိန်းစစ်ပွဲဟာ စွမ်းအင်ဈေးကွက်နဲ့  ကမ္ဘာပေါ်က ကုန်စည်စီးဆင်းမှု ကွင်းဆက်တွေ မတည်မငြိမ်ဖြစ်စေတယ်” လို့ ဝန်ကြီးချုပ်က ပြောပါတယ်။ 

သူ့ရင်တာဝန်ယူခဲ့တဲ့ ဝန်ကြီးချုပ် လစ်ဇ်ထရပ်စ်ကိုလည်း ချီးကျူးဂုဏ်ပြုတဲ့အကြောင်း၊ တိုင်းပြည်ကို တိုးတက်စေချင်တဲ့နေရာမှာ လစ်ဇ်ကမမှားခဲ့ကြောင်း၊ ဒါဟာ မြင့်မြတ်တဲ့ ရည်ရွယ်ချက်ဖြစ်ပြီး အပြောင်းအလဲဖြစ်ဖို့ လစ်ဇ်ရဲ့  မနားမနေကြိုးပမ်းဆောင်ရွက်ချက်တွေ အတွက် လေးစားတဲ့အကြောင်း၊ ဒါပေမဲ့ အမှားအယွင်းတချို့ပြုလုပ်ခဲ့ပြီး ဒါဟာလည်း မကောင်းတဲ့ ရည်ရွယ်ချက်နဲ့ ပြုလုပ်ခဲ့တာမဟုတ်ဘူးလို့လည်း ဆူးနတ်ခ်က ပြောပါတယ်။. 

သူ့အနေနဲ့ကွန်ဆာဗေးတစ်ပါတီရဲ့ ရွေးကောက်ခံခေါင်းဆောင် အဖြစ်နဲ့ရော ဝန်ကြီးချုပ်တယောက် အနေနဲ့ပါ အမှားအယွင်းတွေကို  ချက်ချင်းစတင်ပြုပြင်သွားမယ်လို့ ပြောပါတယ်။

ဒါ့အပြင် သူခေါင်းဆောင်တဲ့ အစိုးရအဖွဲ့ဟာ နောက်မျိုးဆက်သစ်တွေ၊ ကလေးတွေနဲ့ မြေးတွေကို အကြွေးတွေနဲ့ ထားခဲ့မှာမဟုတ်ဘူးလို့လည်း ကတိပေးပြောကြားသွားပါတယ်။ 

နိုင်ငံကို ညီညွတ်အောင် အပြောနဲ့မဟုတ် အလုပ်နဲ့ သက်သေပြသွားမယ်၊ အစိုးရအဖွဲ့ အဆင့်တိုင်းမှာ ဂုဏ်သိက္ခာရှိရှိ၊ ပညာရှင်ဆန်ဆန်နဲ့ တာဝန်ခံမှုရှိရှိ ဆောင်ရွက်သွားမယ်လို့လည်း ဝန်ကြီးချုပ်သစ် ဆူးနတ်ခ်က ကတိပြုပြောကြားသွားပါတယ်။

ရီရှီဆူးနတ်ခ်ဟာ အောက်တိုဘာ ၂၄ ရက်မှာ အာဏာရကွန်ဆာဗေးတစ်ပါတီရဲ့ ခေါင်းဆောင်သစ်အဖြစ် အတည်ပြုရွေးချယ်ခံရပြီးတဲ့နောက်  အခု ၂၀၂၂ နှစ်တနှစ် အတွင်း ဗြိတိန်ရဲ့ တတိယမြောက် ဝန်ကြီးချုပ် ဖြစ်လာတာပါ။

အသက် ၄၂ နှစ်အရွယ် ရီရှီဆူးနတ်ခ်ဟာ နှစ်ပေါင်း ၂၀၀ အတွင်း    ဗြိတိန်နိုင်ငံရဲ့   အသက်အငယ်ဆုံးနဲ့ ပထမဆုံးသော အာရှနွယ်ဖွား ၀န်ကြီးချုပ်အဖြစ်လည်း မှတ်တမ်းဝင်သွား ပါတယ်။

လက်ရှိငွေကြေးမတည်မငြိမ်ဖြစ်နေပြီး  သန်းနဲ့ချီတဲ့ ပြည်သူတွေ အစားအစားနဲ့ စွမ်းအင်အသုံးစရိတ်အတွက် အခက်အခဲကြုံနေရတဲ့ တိုင်းပြည်မှာ စီးပွားရေး အကျပ်အတည်းကို ထိန်းချုပ်ဖြေရှင်းဖို့  အရေးတကြီး တာဝန်အဖြစ် လုပ်ဆောင်ရဖို့ရှိနေပါတယ်။ 

ဝန်ကြီးချုပ်သစ် ဆူးနတ်ခ်ဟာ အစိုးရအဖွဲ့ဝင် ဝန်ကြီးတွေကိုလည်း ချက်ချင်း ခန့်အပ်ဖို့ရှိနေပြီး ဘဏ္ဍာရေးဝန်ကြီးအဖြစ်  အရင်ဝန်ကြီးချုပ် လစ်ထရပ်ဇ် ခန့်အပ်ထားခဲ့တဲ့ ဂျရယ်မီဟန့်ကိုပဲ ဆက်လက် တာဝန်ပေးသွားမယ်လို့ ဆူးနတ်ခ်က ပြောပါတယ်။  လစ်ဇ်ထရပ်စ် ခန့်ထားတဲ့ ဝန်ကြီး တဒါဇင်လောက်ကို ဖယ်ရှားလိုက်ပြီး  ဂျရယ်မီဟန့် အပါအဝင် နိုင်ငံခြားရေးဝန်ကြီး ဂျိမ်းစ်ကလီဗာလေနဲ့  ကာ‌ကွယ်ရေးဝန်ကြီး ဘန်ဝယ်လေ့စ်တို့ကိုတော့ ဆက်လက်ခန့်ထားဖို့ ရှိနေပါတယ်။

အတိုက်အခံလေဘာပါတီ အမတ် ရိုဆီနာအယ်လ်လင်ခန်းကတော့ ဆူးနတ်ခ်ရဲ့ အစိုးရအဖွဲ့ဟာ အသစ်စက်စက်စတင်လိုက်တဲ့အစိုးရအဖွဲ့သစ်မဟုတ်ဘဲ အရင် ဖရိုဖရဲ ကွန်ဆာဗေးတစ်အစိုးရအဖွဲ့နဲ့ အတူတူပါဘဲလို့ လူမှုကွန်ရက် မှာဝေဖန်ရေးသားထားပါတယ်။ 

ဆူးနတ်ရဲ့ ဇနီးဖြစ်သူအက်ခ်ရှာတာမာတီရဲ့ ဖခင်ဟာ အိန္ဒိယ အိုင်တီကုမ္ပဏီ Infosys ရဲ့ တည်ထောင်သူ ဘီလီယံနာသူဌေးကြီးဖြစ်ပြီး  ဆူးနတ်ခ်တို့ ဇနီးမောင်နှံရဲ့ ပိုင်ဆိုင်မှုဟာ စတာလင်ပေါင် သန်း ၇၃၀  ( ဒေါ်လာ သန်း ၈၂၀ ) လောက်ရှိမယ်လို့ ဗြိတိသျှသတင်းစာတွေက ခန့်မှန်းပါတယ်။

စီးပွားရေးနဲ့ နိုင်ငံရေး မတည်မငြိမ်ဖြစ်နေတဲ့ ဗြိတိန်နိုင်ငံမှာ ပြည်သူတွေက ရွေးကောက်ပွဲ စောစောကျင်းပဖို့ ဖိအားပေးတောင်းဆိုတာမရှိရင် ၂၀၂၄ နှစ်ကုန်ပိုင်းအထိ ရွေးကောက်ပွဲကျင်းပဖို့ မလိုသေးတာကြောင့် ဝန်ကြီးချုပ်သစ် ဆူးနတ်ခ်အနေနဲ့  ဒီကြားထဲမှာ ပြဿနာကြီးကြီးမားမားနဲ့ မကြုံတွေ့ရင်  အချိန် ၂ နှစ်လောက် တာဝန်ထမ်းဆောင်ခွင့်ရနိုင်မှာ ဖြစ်ပါတယ်။

ဗြိတိန်ဘဏ္ဍာရေးဝန်ကြီးဟောင်း ရီရှီဆူးနတ်ခ်ဟာ အောက်တိုဘာ ၂၄ ရက်မှာ အာဏာရကွန်ဆာဗေးတစ်ပါတီရဲ့ ခေါင်းဆောင်သစ်အဖြစ် အတည်ပြုရွေးချယ်ခံရပြီးတဲ့နောက် ဗြိတိန်နိုင်ငံရဲ့ ပထမဆုံးသော အာရှနွယ်ဖွား ၀န်ကြီးချုပ် ဖြစ်လာဖို့ရှိနေပါတယ်။

ဗြိတိန်ကွန်ဆာဗေးတစ်ပါတီ ခေါင်းဆောင် ဝန်ကြီးချုပ်လောင်းအဖြစ် ဆူးနတ်ခ်ရဲ့ အဓိက ပြိုင်ဘက် ပန်နီ မားဒေါင့်က ဆူးနတ်ခ်ကို အပြည့်အဝ ထောက်ခံတယ်လို့ ပြောအပြီး အောက်တိုဘာ ၂၄ ရက်မှာ ပြိုင်ပွဲကနေ နုတ်ထွက်သွားတဲ့အတွက် ဆူးနတ်ခ်က ပါတီခေါင်းဆောင်ဖြစ်လာတာပါ။

သူ့ရဲ့ ပါတီနဲ့ ယူကေနိုင်ငံ ညီညွတ်ရေးအတွက် အစွမ်းကုန် ဦးစားပေးလုပ်ဆောင်သွားမှာဖြစ်ပြီး အရေးကြီးတဲ့ စီးပွားရေးဆိုင်ရာ စိန်ခေါ်မှုတွေကို ရင်ဆိုင်သွားမယ်လို့  ပါတီခေါင်းဆောင်ဖြစ်လာပြီးနောက် ပြောကြားတဲ့ ပထမဆုံးမိန့်ခွန်းမှာ ဆူးနတ်ခ်က ပြောပါတယ်။

စက်တင်ဘာလက ဝန်ကြီးချုပ်ရာထူးအတွက်ယှဉ်ပြိုင်မှုမှာ ရာထူးကနုတ်ထွက်သွားတဲ့ လစ်ဇ် ထရပ်စ်ကို ရှုံးနိမ့်ပြီးတဲ့နောက် အသက် ၄၂ နှစ်အရွယ်ရှိ ဟိန္ဒူဘာသာဝင် ဆူးနတ်ခ်ဟာ ဒီပါဝလီပွဲတော်နေ့မှာ ခေါင်းဆောင်သစ်အဖြစ် အတည်ပြုခံခဲ့ရတာပါ။

ဆူးနတ်ခ် အခုလို  ဗြိတိသျှနိုင်ငံရေးရဲ့ အထွတ်အထိပ်ထိ တက်လာတာနဲ့ ပတ်သက်ပြီး ဗြိတိန်ပြည်သူတွေကြားမှာ ခံစားချက်တွေ ရောထွေးနေကြပါတယ်။

တချို့လူတွေက ဝက်စ်မင်စတာမှာ အချမ်းသာဆုံး နိုင်ငံရေးသမားတစ်ဦးဖြစ်တဲ့ ဘဏ္ဍာရေးဝန်ကြီး ဟောင်း ဆူးနတ်ခ်ရဲ့ အမွေအနှစ်တွေ အကြောင်းကို ဂုဏ်ယူပြောဆိုကြပြီး တချို့က သူရဲ့မူဝါဒနဲ့ ထိရောက်မှုက လူမျိုးစုထက် အများကြီး ပိုအရေးကြီးတယ်လို့ ပြောဆိုကြပါတယ်။

ဆူးနတ်ခ် ဝန်ကြီးချုပ်ဖြစ်လာဖို့ဆိုတာ လွန်ခဲ့တဲ့ ၁၀ နှစ် ဒါမှမဟုတ် အနှစ် ၂၀ လောက်က ဖြစ်နိုင်ခြေ နည်းတယ်လို့ ထင်ရတယ်လို့ ဗြိတိန်အနာဂတ် တတ်သိပညာရှင် အဖွဲ့က ဒါရိုက်တာ ဆန်ဒါ ကတ်ဝါလာက ရိုက်တာ သတင်းဌာနကို ပြောပါတယ်။

ဒီသတင်းဟာ ဗြိတိန်ရဲ့လူထုဘဝနဲ့ အသက်မွေးဝမ်းကြောင်းဆိုင်ရာ ကျယ်ပြန့်တဲ့ အပြောင်းအလဲတွေကို ကိုယ်စားပြုတယ်လို့လဲ ကတ်ဝါလာက ပြောပါတယ်။

ဆူးနတ်ခ်ဟာ အာဏာရ ကွန်ဆာဗေးတစ်ပါတီကို ဦးဆောင်ဖို့ တခြားကိုယ်စားလှယ်လောင်းတွေ အပြိုင်အဆိုင် နုတ်ထွက်ပြီးတဲ့နောက်မှာ ဗြိတိန်ဝန်ကြီးချုပ် ဖြစ်လာဖို့ရှိနေပြီး နိုင်ငံလက်ရှိကြုံနေရတဲ့ စီးပွားရေးအကျပ်အတည်းကို ဖြတ်ကျော်ဖို့ ကြိုးပမ်းအားထုတ်ရမှာ ဖြစ်ပါတယ်။

ဆူးနတ်ခ်ဟာ ချားလ်ဘုရင်ရဲ့ တရားဝင်ခန့်အပ်လွှာရပြီးရင်  အင်္ဂါနေ့မှာ ဝန်ကြီးချုပ်တာဝန်စယူမှာဖြစ်ပြီး   ပထမဆုံး အိန္ဒိယနွယ်ဖွား ဝန်ကြီးချုပ်နဲ့ နှစ်ပေါင်း ၂၀၀ ကျော်အတွင်း အသက်အငယ်ဆုံး ဝန်ကြီးချုပ် ဖြစ်လာတော့မှာပါ။