စစ်ကိုင်းတိုင်း၊ ကန့်ဘလူမြို့နယ်၊ ရီးဒွေးကျေးရွာမှာ ပျူစောထီး အဖွဲ့ဝင်တယောက် အသတ်ခံရပြီးနောက် ဒီဇင်ဘာ ၁၀ ရက် မနက် ၈ နာရီခွဲမှာ တခြားပျူစောထီးတွေက ရွာနေအိမ်တွေကို မီးရှို့သွားကြတယ်လို့ ဒေသခံ PDF တွေက ပြောပါတယ်။ 

ဒီဇင်ဘာ ၈ ရက်  ညပိုင်းမှာ ရီးဒွေးရွာက ဒလန်ပျူစောထီးအဖွဲ့ဝင်ဆိုသူ မောင်ဆန်းကို Kanbalu Underground Warriors (KBU-UG) အဖွဲ့က သတ်လိုက်ပြီးနောက် အခုလို မီးရှို့တာတွေလို့ ဒေသခံ တဦးကပြောပါတယ်။

"ရွာမှာက ပျူတွေ သောင်းကျန်းလွန်းလို့ ရွာသားတွေ ထွက်ပြေးကြတာ ကြာပြီ။ အခုလည်း အိမ်တွေ မီးရှို့တဲ့အပြင် ရေစုပ်စက်၊  မော်တာ၊  လှည်းတွေပါ သူတို့ ယူသွားတယ်။” 

ဒါ့အပြင် စပါးတင်း ၅၀၀ ကိုလည်း တုံဖုံကားနဲ့ ရိက္ခာအတွက် သယ်သွားကြသေးတယ်လို့ ပြောပါတယ်။ 

လွန်ခဲ့တဲ့ တစ်လခွဲလောက်ကလည်း ရီးဒွေးရွာမှာ လူနေအိမ်တွေ မီးရှို့ခံရမှု ဖြစ်ပွားခဲ့ပါတယ်။ 

ကန့်ဘလူမြို့နယ် ရီးဒွေးကျေးရွာကို စစ်တပ်က ၄ ကြိမ်လာရောက် အကြမ်းဖက်ပြီးနောက် မေ ၂၂ ရက်ကစပြီး တပ်စွဲထားတယ်လို့ သိရပါတယ်။ 

ရွာက တက်ကြွလှုပ်ရှားသူတွေဟာ စစ်တပ်ရဲ့ အကြိမ်ကြိမ် လုယူသောင်းကျန်းမှုတွေကြောင့် ရွာမှာ မနေနိုင်ကြတော့ဘဲ မိမိ နေအိမ်တွေကို စွန့်ခွာပြီး ထွက်ပြေးနေကြရပြီ ဖြစ်ပါတယ်။

ရွာမှာ လူဦးရေ ၆ ပုံ ၁ ပုံသာ ကျန်ခဲ့တာဖြစ်ပြီး အကြမ်းဖက်စစ်သားတွေက ရွာသားတွေကို စစ်ဝတ်စုံဝတ်ခိုင်းပြီး ရွာပေါက်တွေမှာ ကင်းချထားတယ်လို့ သိရပါတယ်။ 

နေအိမ်ပိုင်ဆိုင်မှုတွေ စွန့်ခွာပြေးကြရတာကြောင့် ရွာသားတွေရဲ့ မွေးမြူရေးတိရစ္ဆာန်တွေ ရွာမှာ ကျန်နေခဲ့ပြီး အစာရေစာ ပြတ်လပ်ကာ ဒီကနေ့မှာတင် နွား ၂၅ ကောင်၊ ဝက် ၈ ကောင် သေဆုံးသွားပြီဖြစ်ပါတယ်။ 

ကျန်နေသေးတဲ့ နွားတွေ၊ ဝက်တွေဟာလည်း  အားအင်ပြတ်လပ်ကာ သေခါနီးဖြစ်နေပြီလို့ သိရပါတယ်။ 

အဲဒီလို သေသွားတဲ့ နွားတွေနဲ့ သေအံ့ဆဲဆဲနွားတွေကို စစ်ကောင်စီတပ်သားတွေက စားသောက်နေကြတာပါ။ 

မေ ၂၁ က အကြမ်းဖက်အဖမ်းခံလိုက်ရတဲ့ ရီးဒွေးရွာသား ၄ ဦးထဲက မိပြုံး၊ မချောတင်နဲ့ မသန်းဝင်းတို့ဟာ အာမခံနဲ့ပြန်လွတ်လာပြီဖြစ်ပြီး ကိုကျော်တင့်ကတော့ လက်ရှိအချုပ်ထဲမှာ နှိပ်စက်ခံနေရကာ ပုဒ်မ ၅၀၅ က နဲ့ တရားစွဲခံထားရပါတယ်။