ထိုင်းနိုင်ငံအလယ်ပိုင်း၊ ပထုန်ဌာနီမြို့က ဆံပင်ညှပ်ဆိုင်တဆိုင်မှာ ဆံပင်ပုံစံမှားပြီး ညှပ်ပေးမိတာကြောင့် ဖောက်သည်နဲ့ ဆိုင်ရှင် အချင်းများပြီး လူသတ်မှုဖြစ်ပွားခဲ့ပါတယ်။ 

ရုပ်ရှင်ဇာတ်ရံသရုပ်ဆောင် နန်းဝရီဆလာ (၄၁ နှစ်) ဟာ ပြီးခဲ့တဲ့ ရက်ပိုင်းက ခင်ပွန်းဖြစ်သူ နိုင်းဝီရဖုန်း (၄၀ နှစ်) နဲ့ အတူ ပထုန်ဌာနီမြို့ ဘန်ကဒီရပ်ကွက် Tesco Lotus ကုန်တိုက်ထဲက PIMMY Hair Salon ဆိုင်မှာ ဆံပင်လာညှပ်ခဲ့ပါတယ်။

ဆံပင်ညှပ်ပြီးတဲ့အခါမှာ နန်းဝရီဆလာက သူပြောတဲ့ပုံစံမဟုတ်ကြောင်း၊ ဒီလောက်ထိတိုတဲ့ဆံပင် တခါမှ မထားဖူးကြောင်းပြောဆိုပြီး  ဆံပင်ညှပ်တဲ့ဝန်ထမ်းနဲ့စကားများကြပါတယ်၊ ဝန်ထမ်းက ကျေနပ်အောင် ဆံပင်ပြန်ဖြောင့်ပေးမယ်၊ ဒါပေမဲ့ ဒီဆိုင်မှာပစ္စည်းမစုံလို့ နောက်ဆိုင်ခွဲတခုကို ညွှန်းလိုက်တယ်လို့ ဆိုပါတယ်။ ဒီကိစ္စ နန်းဝရီဆလာက မကျေနပ်ဘဲ ဆိုင်ရှင်နဲ့ပြောမယ်ဆိုပြီး ဆိုင်ရှင်နဲ့ ဖုန်းထဲမှာ အခြေအတင်စကားများကြတယ်လို့ ဆိုပါတယ်။

နောက်တနေ့ ဩဂုတ် ၂၀ ရက်မှာတော့ နန်းဝရီဆလာက ခင်ပွန်းနဲ့ ၈ နှစ်ရွယ်သမီးနဲ့အတူ ဆံပင်ညှပ်ဆိုင်ကို တခေါက်ပြန်လာခဲ့ကြောင်း၊ ဝန်ထမ်းနဲ့ ပြောဆိုစဉ် ဆိုင်ရှင်က သူ့ဆိုင်ထဲက နေ ခုထွက်သွား၊ မထွက်ရင်လာခဲ့မယ် သေသွားချင်သလားဆိုပြီး ဖုန်းထဲကနေခြိမ်းခြောက်တယ်လို့ ဆိုပါတယ်။

ခဏအကြာမှာ ဆိုင်ရှင်ကတကယ်ဝင်လာပြီး အသင့်ပါလာတဲ့ မီးဖိုချောင်သုံးဓားနဲ့ နန်းဝရီဆလာကို တချက်ထိုးလိုက်ကြောင်း၊ ယောကျ်ားဖြစ်သူက ဝင်ဆွဲရာ သူ့ကိုပါထပ် ထိုးထည့်လိုက်ပြီး လင်ရောမယားပါ သမီးလေးရှေ့မှာ သေဆုံးသွားခဲ့တယ်လို့ ဆိုပါတယ်။

ဆိုင်ရှင်ဖြစ်သူ နိုင်းပဆတ်လန့်ယိုင် (၅၁ နှစ်) မှာ အစကထွက်ပြေးတိမ်းရှောင်နေပြီး မနေ့ကတော့ ရဲစခန်းမှာ လာရောက်အဖမ်းခံခဲ့ပါတယ်။ သူက စီစီကင်မရာပြန်ဖွင့်ရာမှာ အဆိုပါလင်မယားမှာ ဆံပင်ညှပ်ဆိုင်ထဲမဝင်ခင် အပြင်မှာအတန်ကြာတိုင်ပင်နေကြောင်း၊ ဆံပင်ညှပ်ခ ဘတ် ၂၅၀ မပေးချင်လို့ ပြဿနာရှာတာ၊ သူဟာ ဆိုင်ဖွင့်ဖို့ ဘတ်သန်းနဲ့ချီရင်းနှီးထားတာ ဒီလိုအကြောမခံနိုင်လို့ စကားများကြောင်း၊ ဒေါသအလျောက် ဓားနဲ့ထိုးခဲ့ပေမယ့် သေတဲ့အထိ ဖြစ်သွားမယ်မထင်ဘူးလို့ ဖွင့်ဟဝန်ခံထားပါတယ်။

ရဲစခန်းက သူ့ကိုအချုပ်ထဲထည့်ထားလိုက်ပြီး ဒီကနေ့ ဩဂုတ် ၂၂ မှာ သူ့မိန်းမက ဘတ်ငွေ ၁ သန်း ပိုက်ကာ အာမခံနဲ့ပြန်ထုတ်ဖို့ ကြိုးစားပေမယ့် တရားရုံးက အာမခံခွင့်မပြုဘဲ ရဲစခန်းအချုပ်ခန်း ကနေ တရားရုံးအချုပ်ခန်းကို ဆက်လက်ပို့လိုက်တယ်လို့ သနေးရှင်းထိုင်းသတင်းမှာ ဖော်ပြပါတယ်။  

ကိုးကား- Nation TV