ရုရှားကာကွယ်ရေးဝန်ကြီး ဆာဂီရွှိုင်ဂူဟာ ရုရှား ထိပ်တန်းလက်နက် ထုတ်လုပ်ရေးစက်ရုံကို သူ့ရဲ့ တိကျမှုမြင့်မားတဲ့ ဒုံးလက်နက်တွေ နှစ်ဆတိုးထုတ်လုပ်ဖို့ မတ်လ ၁၄ ရက်က အမိန့်ပေးခဲ့ကြောင်း TASS သတင်းဌာနက ဖော်ပြပါတယ်။

မော်စကိုမြို့ရှိ လက်နက်ထုတ်လုပ်ရေးစက်ရုံကနေ ရွှိုင်ဂူက ပြောကြားရာမှာ ထုတ်လုပ်မှု တိုးမြှင့်ခြင်းဟာ ထုံးစံအတိုင်း အလုပ်သမားကုန်ကျစရိတ်ကို အဓိကအားဖြင့် လျှော့ချပေးမှာဖြစ်ပြီး အပိုထုတ်ကုန်အသစ်တွေကိုလည်း ရရှိနိုင်မှာဖြစ်ကြောင်း ပြောကြားခဲ့ပါတယ်။

နှစ်ဆတိုး ထုတ်လုပ်ခိုင်းရတဲ့ ပစ္စည်းတွေကလည်း မဖြစ်မနေ လိုအပ်တဲ့ပစ္စည်းတွေ ဖြစ်တာကြောင့် ၂၀၂၃ ခုနှစ်မှာ တာဝန်ယူလုပ်ဆောင်လိုက်ရင် ၂၀၂၄ ခုနှစ် အစီအစဉ်အောက်မှာ ပြည့်စုံလာမယ်လို့လည်း သူကဆိုပါတယ်။

ကိုယ့်ဆီမှာ ရှိထားပြီးသားတွေအပြင် ဒီကနေ့ ရန်သူဆီမှာ မရှိသေးတဲ့ အသစ်တွေကိုလည်း ထုတ်လုပ်ရရှိနိုင်မယ်လို့ ရုရှားကာကွယ်ရေးဝန်ကြီးက ပြောပါတယ်။

ဝန်ကြီးဟာ ဒီအမိန့်ကို နည်းဗျူဟာဆိုင်ရာ ဒုံးပျံကော်ပိုရေးရှင်းကို လာရောက်ချိန်အတွင်း အမိန့်ထုတ်ပြန်သွားတာဖြစ်ကြောင်း TASS သတင်းဌာနက ထုတ်ပြန်ပါတယ်။

ရုရှားအစိုးရဟာ ယူကရိန်းမှာ ကြုံတွေ့ခဲ့ရတဲ့ ပြဿနာတွေကို သင်ခန်းစာယူပြီး ဖြေရှင်းဖို့ လိုအပ်တာကြောင့် လက်နက်ကိုင်တပ်ဖွဲ့ကို ၃၀ ရာခိုင်နှုန်းကျော် တိုးမြှင့်မယ့် အစီအစဉ်ကို ရုရှားသမ္မတ ဗလာဒီမာပူတင်က ဒီဇင်ဘာ ၂၁ ရက်မှာ ထောက်ခံပေးခဲ့ပါတယ်။

ကာကွယ်ရေးဝန်ကြီး ဆာဂီလ် ရွှိုင်ဂူက ရုရှားလက်နက်ကိုင်တပ်ဖွဲ့တွေထဲမှာ တိုက်ခိုက်ရေးတပ်သား ၁ ဒသမ ၁၅ သန်းကနေ ၁ ဒသမ ၅ သန်းအထိ တိုးမြှင့်ပေးဖို့ ရုရှားနိုင်ငံရဲ့ ထိပ်တန်းစစ်ဘက်ဆိုင်ရာ နှစ်ကုန်ပိုင်းညီလာခံမှာ အဆိုပြုခဲ့တာပါ။

ရုရှားရဲ့ စစ်ရေးလုံခြုံရေးနဲ့ပတ်သက်တဲ့ ပြဿနာတွေကို ဖြေရှင်းရေး အာမခံဖို့ ဒီလို အင်အားတိုးဖို့ လိုအပ်တယ်လို့ ရွှိုင်ဂူက ပူတင်ကို ရုပ်မြင်သံကြား အစီအစဉ်ထဲမှာ ပြောခဲ့ပါတယ်။

တိုက်ခိုက်ရေးသမား ၆၉၅,၀၀၀ ဟာ စစ်မှုမထမ်းမနေရ ဥပဒေအရ အချိန်အကန့်အသတ်နဲ့  စစ်မှုထမ်းရုံသာမက စာချုပ်ချုပ်ထားတဲ့ ပညာရှင်စစ်သည်တွေ ဖြစ်သင့်တယ်လို့လည်း သူက ပြောပါတယ်။

ဒါ့အပြင် ရွှိုင်ဂူဟာ အသက် ၂၁ နှစ်ကနေ ၃၀ အတွင်း ရုရှားနိုင်ငံသားတွေ အကျုံးဝင်တဲ့ မဖြစ်မနေ စစ်မှုထမ်းရမယ့် အသက်အပိုင်းအခြားကို မြှင့်တင်ဖို့လည်း အဆိုပြုခဲ့ပါတယ်။

လက်ရှိစနစ်အရ အသက် ၁၈ နှစ်ကနေ ၂၇ နှစ်ကြား ရုရှားနိုင်ငံသားတွေကို မဖြစ်မနေ စစ်မှုထမ်းဖို့ ဆင့်ခေါ်နိုင်ပါတယ်။