တရုတ်နိုင်ငံဟာ ငြိမ်းချမ်းရေးကို တည်ဆောက်သင့်တဲ့ စည်းမျဉ်းစည်းကမ်းတွေကို အားဖြည့်ပေးမယ့် အခွင့်အလမ်းကို ကိုယ်စားပြုကြောင်း ယူကရိန်းသမ္မတ ဗိုလိုဒီမာဇလန်းစကီးက တရုတ်သမ္မတ ရှီကျင့်ဖျင်နဲ့ ဖုန်းပြောပြီးနောက် ဧပြီ ၂၆ ရက်မှာ ပြောလိုက်ပါတယ်။

ယူကရိန်းနဲ့ တရုတ်တို့ဟာ ကမ္ဘာ့လူများစုတွေလိုပဲ နိုင်ငံတွေရဲ့ အချုပ်အခြာအာဏာနဲ့ နယ်မြေစိုးမိုးရေးအင်အားကို တန်းတူညီမျှ စိတ်ဝင်စားကြောင်းလည်း ဇလန်းစကီးကသူ့ရဲ့ ညနေခင်း ရုပ်သံမိန့်ခွန်းထဲမှာ ပြောပါတယ်။

ယူကရိန်းနဲ့ တရုတ်ခေါင်းဆောင် ၂ ဦးတို့ဟာ ယူကရိန်းကို ရုရှားက ကျူးကျော်ပြီးနောက်ပိုင်း ပထမဆုံးအကြိမ်အဖြစ် ဧပြီ ၂၆ ရက်က အချိန်အတော်ကြာ ကျိုးကြောင်းသင့် ပြောဆိုခဲ့တာဖြစ်ပြီး လနဲ့ချီပြီး လူသိရှင်ကြား နည်းလမ်းရှာနေခဲ့တဲ့ ကိယဗ်ရဲ့ ကာလရှည် ရည်မှန်းချက် ပြည့်ဝသွားခဲ့တာပါ။

တရုတ်နိုင်ငံဟာ ယူကရိန်းကို အထူးကိုယ်စားလှယ်တွေ စေလွှတ်ပြီး ငြိမ်းချမ်းရေးကို ရှာဖွေနေတဲ့ အဖွဲ့အားလုံးနဲ့ တွေ့ဆုံဆွေးနွေးမှာဖြစ်ကြောင်း ရှီကဇလန်းစကီးကို ပြောကြားခဲ့တယ်လို့ တရုတ်နိုင်ငံပိုင်မီဒီယာက ဖော်ပြပါတယ်။

ဇလန်းစကီးကလည်း သူ့ရဲ့ ပင်လယ်နက်ဆိပ်ကမ်းတွေကနေ ယူကရိန်းစပါးတင်ပို့မှု သဘောတူညီချက်ကို သက်တမ်းတိုးခြင်းအတွက် ရှီက အားပေးစကားတွေ ပြောကြားခဲ့ကြောင်း ပြောဆိုပါတယ်။

မော်စကိုကတော့ ရုရှားစပါးနဲ့ ဓာတ်မြေသြဇာ တင်ပို့မှုမှာ အနောက်နိုင်ငံတွေက အတားအဆီးတွေကို ဖယ်ရှားမပေးရင် အဲဒီစာချုပ်ကို မေလ ၁၈ ရက်ထက် ကျော်လွန်သက်တမ်းတိုးမှာ မဟုတ်ကြောင်း ပြောထားပါတယ်။

ရုရှားရဲ့ကျူးကျော်မှုကို မရှုတ်ချဘဲ ရှောင်လွှဲနေတဲ့ သြဇာအရှိဆုံး ခေါင်းဆောင် ရှီဟာ ပြီးခဲ့တဲ့လက မော်စကို ကို သွားရောက်ခဲ့ပါတယ်။ ဖေဖော်ဝါရီလကတည်းက တရုတ်သမ္မတရှီဟာ အချက် ၁၂ ချက်ပါ ငြိမ်းချမ်းရေး အစီအစဉ်ကို မြှင့်တင်ခဲ့ပါတယ်။ သူ့ရဲ့အစီအစဉ်ကို အနောက်နိုင်ငံတွေက သံသယနဲ့ နှုတ်ဆက်ခဲ့ပေမဲ့ ကိယဗ်ကတော့ စစ်ပွဲကို အဆုံးသတ်ဖို့ တရုတ်ရဲ့စိတ်ဝင်စားမှု လက္ခဏာတရပ်အဖြစ် သတိကြီးကြီးနဲ့ ကြိုဆိုခဲ့ပါတယ်။

တရုတ်နိုင်ငံဟာ ငြိမ်းချမ်းရေးဆွေးနွေးပွဲတွေကို မြှင့်တင်ဖို့ အာရုံစိုက်သွားမှာဖြစ်ပြီး အပစ်အခတ်ရပ်စဲရေးကိုလည်း တတ်နိုင်သမျှ အမြန်ဆုံး ကြိုးပမ်းသွားမှာဖြစ်ကြောင်း ရှီက ဇလန်းစကီးကို ပြောကြားခဲ့တယ်လို့ တရုတ်အစိုးရ မီဒီယာက ဖော်ပြပါတယ်။

ဆွီဒင်နိုင်ငံရဲ့ နေတိုးမဟာမိတ်အဖွဲ့ဝင်အဖြစ် လျှောက်ထားမှုကို အဖွဲ့ဝင်နိုင်ငံပေါင်း ၃၀ စလုံးက အတည်ပြုလက်မှတ်ရေးထိုးခဲ့ပြီးနောက် မတ်လ ၂၂ ရက်မှာ ဒီ ဝင်ခွင့်ဆိုင်ရာ ဥပဒေမူကြမ်းကို ဆွီဒင်ပါလီမန်လွှတ်တော်ကလည်း တရားဝင် သဘောတူ ခွင့်ပြုလိုက်ပါတယ်။

လက်ရှိအချိန်မှာ နောက်ဆုံးအတည်ပြု ထောက်ခံချက်အပေါ် စောင့်ဆိုင်းနေတဲ့ လုပ်ငန်းစဉ်အထိ ရောက်ရှိနေပါပြီ။

ဆွီဒင် အပါအဝင် အိမ်နီးချင်း ဖင်လန်နိုင်ငံတို့ဟာ ယူကရိန်းအပေါ် ရုရှားကျူးကျော်မှုကို တုံ့ပြန်တဲ့အနေနဲ့ မြောက်အတ္တလန္တိတ် စစ်ရေးမဟာမိတ်အဖွဲ့မှာ ပါဝင်ခွင့်ရဖို့အတွက် ပြီးခဲ့တဲ့နှစ်က တောင်းဆိုခဲ့တာပါ။

ဒါပေမဲ့ နေတိုးအဖွဲ့ဝင်အဖြစ် နောက်ဆုံးအတည်ပြုမယ့် လုပ်ငန်းစဉ်အပေါ်မှာ တူရကီနဲ့ ဟန်ဂေရီနိုင်ငံတို့က တုံ့ဆိုင်းနေပါတယ်။

ဆွီဒင်နိုင်ငံလွှတ်တော်မှာ ဒီဝင်ရောက်ခွင့်ဆိုင်ရာ ဥပဒေမူကြမ်းကို ထောက်ခံမဲ ၂၉၆ မဲ၊ ကန့်ကွက်မဲ ၃၇ မဲ ရလဒ်နဲ့အတူ မျှော်မှန်းထားတဲ့အတိုင်း အတည်ပြုနိုင်ခဲ့ပါတယ်။ ဒီဥပဒေကြမ်းအပေါ်မှာ လက်ဝဲပါတီငယ်နဲ့ ဂရင်းစ်ပါတီတို့ကသာ ဆန့်ကျင်ခဲ့ကြတာပါ။

အကယ်၍ မဟာမိတ်အဖွဲ့ဝင်အဖြစ် ဆွီဒင်နိုင်ငံကိုသာ လက်ခံလိုက်မယ်ဆိုရင် နိုင်ငံအတွက် ရာစုနှစ် ၂ ခုအကြာ စစ်ဘက်ဆိုင်ရာ ပူးပေါင်းဆောင်ရွက်မှု မရှိခြင်းကို အဆုံးသတ်နိုင်မှာ ဖြစ်ပါတယ်။