နော်ဝေနိုင်ငံမှာ ခိုလှုံခွင့်တောင်းခံထားတဲ့ ရုရှားဝဂ္ဂနာကြေးစားအုပ်စုမှ တပ်မှူးဟောင်းတဦးဟာ အော်စလို ဘားတခုရဲ့ အပြင်ဘက်က ရန်ပွဲမှာ ပါဝင်ပတ်သက်ပြီးတော့ လူမြင်ကွင်းမှာ လေသေနတ်တလက်ကို ကိုင်ဆောင်ထားတဲ့အတွက် အပြစ်ရှိကြောင်း ဧပြီ ၂၅ ရက်က ဝန်ခံလျှောက်လဲခဲ့ပါတယ်။
အသက် ၂၆ နှစ်အရွယ် အန်ဒရေမဒ်ဗီဒဗ်ဟာ ဖေဖော်ဝါရီ ၂၂ ရက်က အော်စလိုဘား အပြင်ဘက်မှာ ရန်ဖြစ်မှုနဲ့ ရဲအရာရှိတဦးကို တားဆီးနှောင့်ယှက်မှုတို့မှာ အပြစ်ရှိကြောင်း ဝန်ခံခဲ့ပြီး မတ်လ ၁၄ ရက်ကလည်း လူမြင်ကွင်းမှာ လေသေနတ်ကိုင်ဆောင်ထားမှုနဲ့ အပြစ်ရှိကြောင်း ဝန်ခံခဲ့တာပါ။
ထောင်ဒဏ် ၃ နှစ်အထိ အမြင့်ဆုံးပြစ်ဒဏ်ချနိုင်တဲ့ အပြင်းထန်ဆုံး စွဲချက်ဖြစ်တဲ့ ရဲအရာရှိတဦးအပေါ် ကျူးလွန်မိတဲ့ အကြမ်းဖက်မှုမှာတော့ အပြစ်မရှိကြောင်း သူက လျှောက်လဲပါတယ်။
မဒ်ဗီဒဗ်ရဲ့ရှေ့နေ ဘရင်န်ယုဖ်ရစ္စ်နက်စ်ကတော့ သူ့ရဲ့အမှုသည်ဟာ အရက်အလွန်အကျွံ သောက်ပြီး ရန်ဖြစ်ခဲ့ကြောင်း လက်ခံခဲ့ပေမဲ့ ရဲအရာရှိကို စော်ကားခြင်းမရှိကြောင်း ချေပထားပါတယ်။
တကယ်လို့ ပြစ်မှုထင်ရှားခဲ့ရင် မဒ်ဗီဒဗ်ဟာ နော်ဝေနိုင်ငံကနေ နှင်ထုတ်ခံရမှာတော့ မဟုတ်ပါဘူး။ ခိုလှုံခွင့်တောင်းခံသူဟာ အကြမ်းဖက် ရာဇဝတ်မှုနဲ့ ပြစ်ဒဏ်ချမှတ်ခံရရင် ယာယီနေထိုင်ခွင့်ကို ပေးထားနိုင်သေးကြောင်း လူဝင်မှုကြီးကြပ်ရေး အာဏာပိုင်တွေက ရိုက်တာသတင်းဌာနကို ပြောကြားခဲ့ပါတယ်။
နော်ဝေလူဝင်မှုကြီးကြပ်ရေးဌာန ပြောရေးဆိုခွင့်ရှိသူကတော့ မဒ်ဗီဒဗ်ရဲ့အမှုနဲ့ ပတ်သက်ပြီး အထူးတလည် မှတ်ချက်ပေးဖို့ ငြင်းဆိုခဲ့ပါတယ်။
မဒ်ဗီဒဗ်ဟာ ဇန်နဝါရီလက ရုရှား-နော်ဝေ နယ်စပ်ကို ဖြတ်ကျော်ဝင်ရောက်လာခဲ့တာဖြစ်ပြီး သူ ယူကရိန်းမှာ ဝဂ္ဂနာကြေးစားတပ်ဖွဲ့နဲ့ ရှိနေတုန်းက အကြောင်းတွေကို နော်ဝေ ရာဇဝတ်မှုခင်း ရဲတပ်ဖွဲ့ရဲ့ အထူးအေဂျင်စီတခုဖြစ်တဲ့ စစ်ရာဇဝတ်မှု စုံစမ်းစစ်ဆေးရေးအဖွဲ့ (Kripos) နဲ့ ပြောဆိုခဲ့ပါတယ်။
ပဋိပက္ခအတွင်း စစ်ရာဇဝတ်မှု စွပ်စွဲချက်တွေကို ရုရှားက ငြင်းဆိုထားတာကြောင့် Kripos က သူ့ကို မျက်မြင်သက်သေအဖြစ် ဆက်ပြီးမေးမြန်းချင်ကြောင်း ရိုက်တာကို ထုတ်ပြန်ချက်မှာ ပြောထားပါတယ်။
မဒ်ဗီဒဗ်ဟာ ရုရှားနဲ့ ယူကရိန်းတပ်ဖွဲ့တွေကြား လပေါင်းများစွာ ပြင်းထန်တဲ့ တိုက်ပွဲတွေ ဖြစ်ပွားနေတဲ့ ဘာ့ခ်မုထ် ဝန်းကျင်ဒေသ အပါအဝင် ယူကရိန်းမှာ သူ ပါဝင်တိုက်ခိုက်ခဲ့ဖူးကြောင်း ရိုက်တာကို ဖေဖော်ဝါရီလက ပြောခဲ့ပါတယ်။
