ယူကရိန်းနိုင်ငံတောင်ပိုင်း မိုင်ကိုလေ့ဗ်မြို့ရှိ တိုက်ခန်းတွဲနဲ့ နေအိမ်တွေကို ဧပြီ ၂၇ ရက်  အစောပိုင်းက ရုရှားဒုံးကျည်နဲ့ ပစ်ခတ်မှုကြောင့် လူ ၁ ဦး သေဆုံးပြီး ကလေး ၁ ဦး အပါအဝင် လူ ၂၃ ဦး ဒဏ်ရာရရှိခဲ့ကြောင်း တာဝန်ရှိသူတွေက ပြောကြားခဲ့ပါတယ်။ 

သမ္မတ ဇလန်းစကီးက“ညတုန်းက ရုရှားဟာ ပင်လယ်နက်ကနေ ပစ်လွှတ်လိုက်တဲ့ ကာလီဘာ ဒုံးကျည် ၄ စင်းနဲ့ မိုင်ကိုလေ့ဗ် ကို ဗုံးကြဲခဲ့ပါတယ်”လို့ တယ်လီဂရမ် အက်ပ်မှာပြောကြားခဲ့ပါတယ်။ 

ပစ်မှတ်တိကျတဲ့ လက်နက်တွေက ကိုယ်ပိုင်အိမ်တွေ၊ သမိုင်းဝင်အဆောက်အအုံနဲ့ အထပ်မြင့် အဆောက်အအုံတွေကို ရည်ရွယ်တာလို့ ဆိုပါတယ်။ 

ယူကရိန်းအရေးပေါ် အဖွဲ့တွေမှ ထုတ်လွှင့်တဲ့ ဗီဒီယိုထဲမှာ မီးသတ်သမားတွေဟာ ပျက်စီးနေတဲ့ အဆောက်အအုံတွေရှိရာမှာ ဆောင်ရွက်လုပ်ကိုင်နေကြပုံတွေကို ပြသထားပါတယ်။

အရေးပေါ်ဝန်ဆောင်မှု အဖွဲ့တွေဟာ ဒုံးကျည်အပျက်အစီးတွေကြောင့် ဖြစ်ရတဲ့ မီးလောင်ကျွမ်းမှု အများအပြားကို ငြိမ်းသတ်နိုင်ခဲ့ပြီး အပျက်အစီးများကို ရှင်းလင်းနေကြောင်း ဒေသဆိုင်ရာ အုပ်ချုပ်ရေးမှူးက ပြောပါတယ်။ 

ရုရှားကတော့ လူပေါင်းထောင်ချီ သေဆုံးခဲ့ပြီး သန်းနဲ့ချီတဲ့ ယူကရိန်းတွေ နေအိမ်မြို့ရွာတွေ စွန့်ပြေးကြရပြီးတော့ မြို့ကြီးမြို့ငယ်တွေ စိစိညက်ညက် ကြေခဲ့ရတဲ့ သူ့ရဲ့ အလုံးစုံ ကျူးကျော် စစ်မှာ အရပ်သားတွေကို တမင်တကာ ပစ်မှတ်ထား တိုက်ခိုက်တယ်ဆိုတာကို ဗြောင်ကျကျ ငြင်းဆိုထားပါတယ်။ 

ယူကရိန်းတောင်ပိုင်း ကရီဗီယီရီမြို့ရှိ လူနေအဆောက်အအုံတလုံးကို  ဒီဇင်ဘာ ၁၆ ရက်က ရုရှားဒုံးကျည် တစ်စင်း ထိမှန်ခဲ့ရာမှာ လူ ၃ ဦး သေဆုံးပြီး အနည်းဆုံး ၁၃ ဦး ဒဏ်ရာရရှိခဲ့ကြောင်း ဒေသဆိုင်ရာ အုပ်ချုပ်ရေးမှူးက ပြောပါတယ်။ 

သူတို့ဖာသာ အိမ်ထဲမှာ ခပ်ရိုးရိုးရှင်းရှင်း နေထိုင်ကြတဲ့ အသက် ၆၄ နှစ် အရွယ် အမျိုးသမီးတဦးနဲ့ လူငယ်စုံတွဲတတွဲ သေဆုံးသွားတာဖြစ်ပြီး သူတို့ရဲ့သားငယ်လေးကတော့ အပျက်အစီးတွေ အောက်ကို ရောက်နေတာလို့ အုပ်ချုပ်ရေးမှူး ဗာလန်တင် ရဇ်နီချန်ကို က တယ်လီဂရမ်မှာ ရေးသားခဲ့ပါတယ်။

ဒွန်းနက်စ်ခ်ဒေသကို သွားရောက်ခဲ့တဲ့ ယူကရိန်း ဒုတိယပြည်ထဲရေးဝန်ကြီး ယက်ဗ်ဟံန်ယဲ့နင် ကလည်း သူ့ခရီးစဉ်အတွင်း ဒီဇင်ဘာ ၁၆ ရက် မနက်ပိုင်းမှာ ရုရှားက ယူကရိန်းကို ဒုံးကျည်အစင်း ၅၀ လောက် ပစ်လွှတ်ခဲ့ကြောင်း ပြောကြားခဲ့ပါတယ်။ 

“ကျနော်တို့ရဲ့ ဒုံးခွင်းဒုံးစနစ်က အတော်လေး ကောင်းမွန်ပါတယ်၊ ဒါပေမဲ့ ရုရှားဖက်ဒရေးရှင်းက ပစ်လွှတ်တဲ့ ခရုဇ်ဒုံးကျည် အရေအတွက် များပြားတာကြောင့် အခက်အခဲတချို့နဲ့ ရင်ဆိုင်နေရဆဲဖြစ်ပါတယ်”လို့ သူက ပြောဆိုပါတယ်။ 

ရုရှားက ပစ်ခတ်ခဲ့တဲ့ ဒုံးကျည် ၇၆ လုံးထဲက ၆၀ ကို ယူကရိန်းစစ်တပ်က ပစ်ချခဲ့တယ်လို့ ယူကရိန်းကာကွယ်ရေးဦးစီးချုပ်က ဒီဇင်ဘာ ၁၆ ရက် နှောင်းပိုင်းမှာ ပြောပါတယ်။ 

ရုရှားနိုင်ငံဟာ ယူကရိန်းနိုင်ငံတဝန်း စွမ်းအင်ဆိုင်ရာ အဆောက်အအုံတွေကို ဒီဇင်ဘာ ၁၆ ရက် မနက်ပိုင်းက ဒုံးကျည် ဒါဇင်နဲ့ချီပြီး ပစ်ခတ်ခဲ့လို့ အနည်းဆုံး လူနှစ်ဦး သေဆုံးပြီး စွမ်းအင်စက်ရုံ ၉ ခုလည်း ပျက်စီးသွားတာကြောင့် တချို့နေရာတွေမှာ လျှပ်စစ်မီးပြတ်တောက်ခဲ့ရပါတယ်။

ဆောင်းရာသီကာလမှာလည်း နိုင်ငံအနှံ့ အရေးပေါ် ဓာတ်အားဖြတ်တောက်မှုတွေကို မဖြစ်မနေ ကြုံရဖို့ရှိနေတာပါ။ 

"ကျနော်တို့ရဲ့ စွမ်းအင်အခြေခံ အဆောက်အအုံတွေကို တိုက်ခိုက်တာ၊ ဆောင်းရာသီမှာ ပြည်သူတွေကို ဒုက္ခရောက်အောင်လုပ်တာတွေဟာ ယူကရိန်းနိုင်ငံကို လူမျိုးတုံးသတ်ဖြတ်မှု ကျူးလွန်တာပဲ " လို့ ယဲ့နင် က ပြောကြားခဲ့ပါတယ်။