ယူကရိန်းနိုင်ငံအရှေ့ပိုင်း လူဟန့်စ်ဒေသမှာ ရုရှားက ကျောထောက်နောက်ခံ ပေးထားတဲ့ သူပုန်တွေက နေရာတော်တော်များများကို ပစ်ခတ်ခဲ့တယ်လို့ ယူကရိန်းအစိုးရက ဖေဖော်ဝါရီ ၁၇ ရက်က စွပ်စွဲပါတယ်။
မူလတန်းကျောင်း တကျောင်းကို ပစ်ခတ်ခဲ့လို့ အရပ်သား၂ ယောက် ကျည်စတွေ ထိမှန်ခဲ့သလို ကျောင်း တကျောင်းကို အမြောက်မှန်ခဲ့လို့ တပည့်တွေ စာသင်ခန်းတွေထဲကနေ ထွက်ပေးခဲ့ ရတယ်လည်း ပြောပါတယ်။
“ကျနော်တို့ သိနေလို့ အားလုံး စိတ်ပူ တုန်လှုပ်နေကြတယ်။ ဒီတချီတော့ တကယ့်ကို ကျူးကျော်တာတချို့ လာပြီလို့ မျှော်လင့်ထားတယ်။ စစ်ပွဲ တကယ်ကို စခဲ့ပြီလို့ ထင်တယ်”လို့ ဒေသခံ ဒမစ်ထရိုက ပြောပါတယ်။
ယူကရိန်းနယ်စပ်မှာ ရုရှားစစ်သည်အင်အား တသိန်းကျော် တပ်ချထားလို့ စစ်ပွဲ အလားအလာကို တကမ္ဘာလုံးက စိုးရိမ်နေချိန်မှာ ခုလို ပစ်ခတ်ခဲ့တာပါ။ ရုရှားအစိုးရကတော့ ကျူးကျော်ဖို့ ပြင်နေတယ်ဆိုတဲ့ စွဲချက်ကို ငြင်းပါတယ်။
ဒီသီတင်းပတ်ထဲမှာ စစ်ရေးလေ့ကျင့်နေတဲ့ စစ်တပ်တချို့ကို အခြေစိုက်စခန်းဆီ ပြန်ဆုတ်နေပြီလို့ ပြောပေမဲ့ အနောက်နိုင်ငံတွေကတော့ မယုံဘူးလို့ ပြောနေကြပါတယ်။
