ရုရှားသမ္မတ ဗလာဒီမာပူတင်ကိုသတ်ဖို့ မအောင်မြင်တဲ့ ကြိုးပမ်းမှုမှာ ရုရှားသမ္မတနန်းတော်ကို ဒရုန်းတွေနဲ့ ညတွင်းချင်း တိုက်ခိုက်ခဲ့တယ်လို့ ရုရှားက မေလ ၃ ရက်မှာ စွပ်စွဲလိုက်ပါတယ်။

ယူကရိန်းမှာ အထူးစစ်ရေးစစ်ဆင်ရေးလို့ ခေါ်တဲ့ ၁၄ လကျော်အတွင်း ရုရှားအစိုးရက ယူကရိန်းမှာ အဆိုးရွားဆုံးအဆင့် ချေမှုန်းခဲ့အပြီး ခုလိုစွပ်စွဲလိုက်တာပါ။

စွပ်စွဲချက်ကို ယူကရိန်းသမ္မတရုံး အကြီးတန်းအရာရှိတဦးက ငြင်းဆိုလိုက်ပြီး ရုရှားအစိုးရက အကြမ်းဖက်ရန်စဖို့ အဓိကပြင်ဆင်နေတယ်လို့ ဖော်ပြခဲ့ပါတယ်။

ရုရှားက လက်တုံ့ပြန်ပိုင်ခွင့်ကို သီးသန့်ထားတယ်လို့ ပြောပြီး သဘောထားတင်းမာသူတွေက ယူကရိန်းသမ္မတ ဗိုလိုဒီမာ ဇလန်းစကီးကို အမြန်လက်စားချေဖို့ တောင်းဆိုခဲ့ပါတယ်။

ယူကရိန်းသမ္မတ အကြံပေး မိုင်ခေးလို ပိုဒိုလယက်က “ရုရှားသမ္မတနန်းတော်ကို မောင်းသူမဲ့လေယာဉ်နဲ့ တိုက်ခိုက်မှုနဲ့ ယူကရိန်းက ဘာမှ မသက်ဆိုင်ပါဘူး။ ကရင်မလင်ကို တိုက်ခိုက်တာ မဟုတ်ပါဘူး။ ဘာလို့လဲဆိုတော့ ပထမအနေနဲ့ စစ်ရေးကိစ္စကို ဖြေရှင်းနိုင်မှာ မဟုတ်လို့ဘဲ” လို့ ရိုက်တာသတင်းဌာနကို ပေးတဲ့ မှတ်ချက်ထဲမှာ ပြောပါတယ်။

ရုရှားအောက်လွှတ်တော်က သြဇာကြီးတဲ့ ဥက္ကဋ္ဌ ဗီယာချက်စ်လဗ်ဗိုလိုဒင်က ယူကရိန်း အကြမ်းဖက်အစိုးရကို ရပ်တန့်ဖျက်ဆီးနိုင်တဲ့ လက်နက်တွေသုံးဖို့ တောင်းဆိုတယ်လို့ ကြေညာချက် ထုတ်ပြန်ခဲ့ပါတယ်။

ရုရှားသမ္မတနန်းတော် အဆောက်အအုံရဲ့ ပိုင်နက်နယ်မြေမှာ ဒရုန်းအပိုင်းအစတွေ ပြန့်ကျဲနေခဲ့တယ်လို့ သမ္မတရုံးရဲ့ထုတ်ပြန်ချက်မှာ ဖော်ပြထားပေမဲ့ ထိခိုက်သေဆုံးမှုနဲ့ ပစ္စည်းအထိအခိုက် မရှိဘူးလို့ ဆိုပါတယ်။

ရုရှားအခြေစိုက် RIA သတင်းဌာနက ပူတင်ဟာ နန်းတော်တိုက်ခိုက်ခံရချိန် ဗုဒ္ဓဟူးနေ့က ကရင်မလင်နန်းတော်ဆီ မရောက်သေးဘဲ မော်စကိုမြို့အပြင်ဘက်က သူ့ရဲ့ နိုဗို အိုဂါယိုဗို နေအိမ်မှာ အလုပ်လုပ်နေတယ်လို့ ဆိုပါတယ်။

ယူကရိန်း အာဏာပိုင်တွေဟာ ဒီတိုက်ခိုက်မှုတွေကို လျှို့ဝှက်တဲ့ ဒါမှမဟုတ် လှောင်ပြောင်တဲ့ မှတ်ချက်တွေ မကြာခဏ ပေးလေ့ရှိပါတယ်။

ဒါပေမဲ့ ယူကရိန်းဟာ ရုရှား ဒါမှမဟုတ် ရုရှားတို့သိမ်းပိုက်ထားတဲ့ ခရိုင်းမီးယားကို တိုက်ခိုက်မှုတွေအတွက် တာဝန်ရှိကြောင်း ထုတ်ဖော်ပြောဆိုဖို့ ငြင်းဆိုလေ့ရှိပါတယ်။