ယူကရိန်းအရေး ဆွေးနွေးညှိနှိုင်းဖို့  သမ္မတ ဗလာဒီမာပူတင်က လမ်းဖွင့်ထားကြောင်း ကရင်မလင်နန်းတော်က ဒီဇင်ဘာ ၂ ရက်မှာ ပြောပါတယ်။

“အကျိုးစီးပွားအတွက် အကောင်းဆုံးနည်းလမ်းကတော့ ငြိမ်းချမ်းတဲ့ သံတမန်ရေးနည်းလမ်းပဲ ဖြစ်ပြီး ပူတင်အနေနဲ့လည်း ဆက်သွယ်ပြောဆိုဖို့၊ ဆွေးနွေးညှိနှိုင်းဖို့ တံခါးဖွင့်ထားဆဲဖြစ်တယ်”လို့ ရုရှားသမ္မတရဲ့ ပြောရေးဆိုခွင့်ရှိသူ ပက်စ်ကို့ဗ် က ပြောပါတယ်။

ပူတင်ဟာ နယ်ချဲ့သိမ်းပိုက်မှုပုံစံ စစ်ပွဲအဖြစ် သူတို့လုပ်ဆောင်ခဲ့တာတွေအတွက် ဘာတရားမျှတမှုမှ မရှိကြောင်း ယူကရိန်းနဲ့ အနောက်နိုင်ငံတွေက ပြောကြပါတယ်။

ယူကရိန်းကတော့ သူ့ပိုင်နက်အတွင်းက နောက်ဆုံးရုရှားစစ်သားကို တိုက်ထုတ်ပြီးတဲ့အထိ တိုက်ပွဲဝင်သွားမယ်လို့ ဆိုပါတယ်။ 

ရုရှားဟာ ယူကရိန်းရဲ့ ဆိုဗီယက်ခေတ်လွန် နယ်မြေရဲ့ ၅ ပုံ ၁ ပုံကို အခိုင်အမာ တောင်းဆိုထားပြီး အနောက်နဲ့ ယူကရိန်းတို့ကတော့ ဒီကျူးကျော်သိမ်းယူမှုကို သူတို့ ဘယ်တော့မှ လက်ခံမှာ မဟုတ်ကြောင်း ပြောထားပါတယ်။

ရုရှားသိမ်းယူထားတဲ့ နယ်မြေအသစ်တွေကို အမေရိကန်က အသိအမှတ်မပြုဘဲ ငြင်းဆိုနေတာ ကြောင့် ရုရှားအနေနဲ့ ဖြစ်နိုင်ချေ အလားအလာရှိတဲ့ အပေးအယူတွေကို ရှာဖွေဖို့ နှောင့်နှေး နေရတယ်လို့လည်း ပက်စ်ကို့ဗ်က ပြောပါတယ်။

ရုရှားစစ်တပ်အနေနဲ့ ယူကရိန်းမှာ စစ်ဆင်ရေးကို ဆက်လုပ်သွားမှာဖြစ်ကြောင်းလည်း ပက်စ်ကို့ဗ်က ပြောပါတယ်။ 

ကနေဒါအခြေစိုက် စီဘီစီသတင်းဌာနရဲ့ မော်စကိုဌာနခွဲကို ပိတ်ပစ်ပြီး သတင်းထောက်တွေကို ပြည်ဝင်ခွင့်ဗီဇာနဲ့ တရားဝင် အသိအမှတ်ပြုလွှာကို ရုပ်သိမ်းလိုက်ပြီလို့ ရုရှား နိုင်ငံခြားရေးဝန်ကြီးဌာနက မေ ၁၈ ရက်မှာ ပြောလိုက်ပါတယ်။

ကနေဒါအစိုးရက ရုရှားအစိုးရရုပ်သံဖြစ်တဲ့ Russia Today သတင်းဌာနကို ပိတ်လိုက်လို့ လက်တုံ့ပြန်တာလို့လည်း ရုရှားနိုင်ငံခြားရေးဝန်ကြီးဌာနပြောခွင့်ရ မာရီယာ ဇာခါရိုဗာက ပြောပါတယ်။

စီဘီစီသတင်းဌာနရဲ့ မော်စကိုဗျူရိုကတော့ မှတ်ချက်အတွက် မေတ္တာရပ်ခံချက်ကို ချက်ချင်း မတုံ့ပြန်သေးပါဘူး။ ဇာခါရိုဗာကတော့ ကနေဒါအစိုးရဟာ ရုရှားအကြောက်လွန်ရောဂါ လမ်းကြောင်းကို ရွေးခဲ့တယ်လို့ ပြောပါတယ်။

ကနေဒါအစိုးရဟာ ရုရှားသမ္မတ ဗလာဒီမာပူတင်နဲ့ သူ့ရဲ့ အစိုးရနဲ့ စစ်တပ်ကအဖွဲ့ဝင် အယောက် ၁၀၀၀ လောက်ကို ကနေဒါနိုင်ငံအတွင်း ပြည်ဝင်ခွင့်ပိတ်ပင်မယ့် ဥပဒေမူကြမ်းကို အထက်လွှတ်တော်မှာ မေ ၁၇ ရက်က တင်သွင်းလိုက်ပါတယ်။

ကနေဒါဟာ ရုရှားရဲ့ ယူကရိန်းကို ကျူးကျော်မှုနဲ့ ပတ်သက်လို့ ဆက်ပြီး ပိတ်ဆို့ အရေးယူနေပါတယ်။