မြန်မာနိုင်ငံ စက်မှုလက်မှုနှင့်ဝန်ဆောင်မှုလုပ်ငန်းပေါင်းစုံ အလုပ်သမားသမဂ္ဂများအဖွဲ့ချုပ် (MICS-TUsF) ရဲ့ အထွေထွေအတွင်းရေးမှူးချုပ် ကိုသက်နှင်းအောင်ကို ဩဂုတ် ၈ ရက်နေ့မှာ စစ်ကောင်စီက မတရားအသင်းဆက်သွယ်မှုပုဒ်မ ၁၇ (၁) နဲ့ အမှုဖွင့်ပြီး စတင်ရုံးထုတ်စစ်ဆေးနေတယ်လို့ သိရပါတယ်။
ကိုသက်နှင်းအောင်ဟာ ပြီးခဲ့တဲ့နှစ်ဇွန်လမှာ စစ်ကောင်စီရဲ့ ဖမ်းဆီးတာခံရပြီး ဖမ်းဆီးချိန်ကစလို့ အဆက်သွယ်ပြတ်တောက်နေရာက အခုမှ အဆက်သွယ်ပြန်ရတာလို့ MICS-TUsF လက်ထောက်အတွင်းရေးမှူး ကိုနေလင်းအောင်က ပြောပါတယ်။
“အခု သူ့ကို တနင်္လာနေ့တိုင်း ရုံးထုတ်နေပြီလို့ သိရတယ်။ မိသားစုနဲ့တွေ့ခွင့်ရ၊ မရတော့ မသိသေးဘူး။ ကျန်းမာရေးလည်း ကောင်းတယ်လို့ သိရတယ်။”
ကိုသက်နှင်းအောင်ကို မူလက အင်းစိန်ထောင်မှာ ဖမ်းဆီးထားတာဖြစ်ပြီး အခု သထုံမြို့၊ စျေးမသွယ်အကျဥ်းထောင်ကို ရွှေ့ပြောင်းထားတယ်လို့ သိရပါတယ်။
စစ်ကောင်စီဟာ အာဏာသိမ်းပြီးလပိုင်းအကြာမှာ MICS-TUsF ရုံးကို ဝင်ရောက်စီးနင်းခဲ့တာကြောင့် ကိုသက်နှင်းအောင်ဟာ ထွက်ပြေးတိမ်းရှောင်နေခဲ့တာလို့ ဆိုပါတယ်။
အဲဒီလို တိမ်းရှောင်နေရင်း နယ်စပ်တနေရာမှာ ဖမ်းမိတာဖြစ်ပြီး ဘာပြစ်မှုမှ ကျူးလွန်ထားတာ မရှိဘူးလို့ ကိုနေလင်းအောင်က ပြောပါတယ်။
“ပုဒ်မလျှောက်တပ်တာလို့ပဲ ယူဆတယ်။ ကိုသက်နှင်းအောင်က အလုပ်သမားအရေးပဲ လုပ်တာ။ လုပ်တာလည်း တရားဝင်အဖွဲ့အစည်းအနေနဲ့ လုပ်တာ။ အခု ဖမ်းဆီးပုဒ်မတပ်ထားတာ ယုတ္တိမရှိဘူး။ တခြားဘာပုဒ်မတွေ တပ်ထားသေးလဲဆိုတာတော့ မသိရသေးဘူး။”
လက်ရှိမှာ MICS-TUsF က ခေါင်းဆောင်တွေအပါအဝင် အခြားအလုပ်သမားအဖွဲ့ချုပ်က တာဝန်ရှိသူတွေ၊ အလုပ်သမားအရေး လှုပ်ရှားသူတွေကို စစ်ကောင်စီက ဝရမ်းထုတ်ထားတာကြောင့် တိမ်းရှောင်နေကြရတယ်လို့ သိရပါတယ်။
ရဟတ်ယာဉ်၀ယ်ယူ၊ ငှားရမ်းအသုံးပြုမှုအတွက် နိုင်ငံတော်သမ္မတဦး၀င်းမြင့်နဲ့ နိုင်ငံတော်အတိုင်ပင်ခံပုဂ္ဂိုလ် ဒေါ်အောင်ဆန်းစုကြည်တို့အပေါ် စွဲဆိုထားတဲ့ အဂတိအမှုတွေကို မတ် ၃ ရက်နေ့မှာ ဆက်လက်ရုံးထုတ်စစ်ဆေးခဲ့တယ်လို့ တရားရုံးနဲ့ နီးစပ်တဲ့အသိုင်းအဝိုင်းကနေ သိရပါတယ်။
ဒီနေ့ရုံးချိန်းမှာ ရဟတ်ယာဉ်၊ ၀ယ်ယူ၊ ငှားရမ်း တာနဲ့ပတ်သက်ပြီး စွဲဆိုထားတဲ့ အဂတိ ၅ ငါးမှုထဲက ရဟတ်ယာဉ်ပြုပြင်ထိန်းသိမ်းတာ နဲ့ ပတ်သက်တဲ့အမှုကို တရားလိုက သက်သေထွက်ဆိုခဲ့ပြီး နောက်ရုံးချိန်းမှာ ပြန်လှန်စစ်မေးမယ်လို့ တရားရုံးနဲ့နီးစပ်သူတဦးက ပြောပါတယ်။
၂၀၂၁ ခုနှစ်အတွင်းမှာ သဘာဝဘေးအန္တရာယ် ကာကွယ်ရေးလုပ်ငန်းတွေ ဆောင်ရွက်တာမှာ အသုံးပြုဖို့ ရဟတ်ယာဉ်တစ်စီး ၀ယျယူအသုံးပြုတာ၊ ငှားရမ်းတာ၊ သက်တမ်းတိုးတာ၊ ပြုပြင်ထိန်းသိမ်းတာတွေ နဲ့ ပတ်သက်ပြီး စစ်ကောင်စီက နိုင်ငံတော်သမ္မတ ဦး၀င်းမြင့်နဲ့ နိုင်ငံတော်အတိုင်ပင်ခံပုဂ္ဂိုလ် ဒေါ်အောင်ဆန်းစုကြည်နဲ့ ဒေါက်တာ၀င်းမြတ်အေးတို့ကို အဂတိလိုက်စားမှုတိုက်ဖျက်ရေးဥပဒေ ပုဒ်မ ၅၅ နဲ့ တရားစွဲဆိုထားတာပါ။
ဒီနေ့ရုံးချိန်းမှာ ကျန်တဲ့အမှုတွေကို မစစ်ဆေးဖြစ်ဘဲ နောက်ရုံးချိန်းကို ပြန်လည်ချိန်းဆို လိုက်တယ်လို့လည်း သိရပါတယ်။
ရုံးချိန်းကို လာရောက်တဲ့ နိုင်ငံတော်သမ္မတဦး၀င်းမြင့်နဲ့ နိုင်ငံတော်အတိုင်ပင်ခံပုဂ္ဂိုလ်ဒေါ်အောင်ဆန်းစုကြည်တို့ ကျန်းမာရေးကောင်းမွန်တယ်လို့လည်း အဆိုပါတရားရုံးနဲ့နီးစပ်သူက ဆိုပါတယ်။
