မြန်မာကျပ်ငွေနဲ့ ရုရှားရူဘယ်ငွေတို့ကို တိုက်ရိုက်လဲလှယ် အသုံးပြုသွားဖို့အတွက် ဆောင်ရွက်နေတယ်လို့ စစ်ကောင်စီပြောရေးဆိုခွင့်ရှိသူ ဗိုလ်ချုပ်ဇော်မင်းထွန်းက ပြောပါတယ်။

ရုရှားငွေပေးချေရေး MIR card စနစ်ကို မြန်မာနိုင်ငံမှာ အသုံးပြုနိုင်ဖို့အတွက် ဆောင်ရွက်နေပြီး ရုရှားရူဘယ်နဲ့ မြန်မာကျပ်ငွေကို တိုက်ရိုက်လဲလှယ် အသုံးပြုဖို့အတွက် စစ်ကောင်စီက မျှော်လင့်နေကြောင်း ဒီနေ့ စက်တင်ဘာ ၂၀ ရက်က နေပြည်တော်မှာ ပြုလုပ်တဲ့ သတင်းစာရှင်းလင်းပွဲမှာ ပြောခဲ့တာပါ။ 

ဗိုလ်ချုပ်ဇော်မင်းထွန်းက “ရုရှားနိုင်ငံက အသုံးပြုတဲ့ MIR card စနစ်ကို လျင်မြန်စွာ အသုံးပြုနိုင်ရေးအတွက် ရုရှား ငွေရေးကြေးရေးအဖွဲ့အစည်းတွေက ကူညီဆောင်ရွက်ပေးသွားမှာ ဖြစ်ပြီး ရုရှားနိုင်ငံရဲ့ MIR card ကို မြန်မာနိုင်ငံရဲ့ ငွေပေးချေမှုစနစ်မှာ အသုံးပြုနိုင်ဖို့အတွက် ဆွေးနွေးလျက်ရှိပါတယ်” လို့ ပြောပါတယ်။

လာမယ့်နိုဝင်ဘာလအတွင်းမှာ ရုရှားနိုင်ငံနဲ့ မြန်မာနိုင်ငံတို့ ကုန်သွယ်မှုနဲ့ပတ်သက်ပြီး တတိယအကြိမ် ဆွေးနွေးသွားမှာဖြစ်ပြီး MIR card စနစ်ကနေတဆင့် ရူဘယ်နဲ့ ကျပ်ငွေကို တိုက်ရိုက်လဲလှယ် အသုံးပြုနိုင်ဖို့ မျှော်လင့်တယ်လို့လည်း ဗိုလ်ချုပ်ဇော်မင်းထွန်းက ပြောပါတယ်။

MIR card စနစ်ကို ရုရှားဗဟိုဘဏ်က ၂၀၁၇ ခုနှစ်မှာ စတင်အသုံးပြုခွင့်ပေးခဲ့တာဖြစ်ပြီး Mastercard နဲ့ Visa card တွေရဲ့ လွှမ်းမိုးမှုနဲ့ နိုင်ငံတကာရဲ့ ပိတ်ဆို့မှုတွေကို ကျော်လွှားနိုင်ဖို့အတွက် ဖြစ်တယ်လို့ ဆိုပါတယ်။ 

မြန်မာနိုင်ငံမှာတော့ နိုင်ငံတကာငွေပေးချေကတ်တွေ သုံးစွဲတာမှာ အကန့်အသတ်တွေ အများကြီးလုပ်လာပြီး ဝန်ဆောင်ခအပါအဝင် ငွေဖြတ်တောက်နှုန်း ပိုများလာတယ်လို့ သုံးစွဲသူတွေက ဝေဖန်နေကြတာပါ။ 

ဒါ့အပြင် စစ်ကောင်စီနဲ့ ဗဟိုဘဏ်တို့ရဲ့ ညွှန်ကြားချက်အမျိုးမျိုးတွေကြောင့်လည်း မြန်မာကျပ်ငွေတန်ဖိုး အဆမတန် ကျဆင်းလာသလို ဈေးကွက်ထဲမှာ အမေရိကန်ဒေါ်လာ အပါအဝင် နိုင်ငံခြားသုံးငွေတွေ ဝယ်လို့မရသလောက် ဖြစ်သွားခဲ့တာပါ။ 

MIR card စနစ်ကို ၂၀၂၂ ခုနှစ် ဇူလိုင်လ ၂၆ ရက်နေ့အထိ နိုင်ငံ ၁၀ နိုင်ငံမှာ အသုံးပြုနေပြီး သုံးစွဲသူ ၁၂၅ သန်းကျော်ရှိတယ်လို့လည်း ဆိုပါတယ်။ 

အာဆီယံဒေသတွင်း ဗီယက်နမ်နိုင်ငံမှာလည်း အသုံးပြုနေပြီး မြန်မာနိုင်ငံမှာ မကြာခင်မှာ အသုံးပြုဖို့ မျှော်လင့်တယ်လို့ ရုရှားနိုင်ငံခြားရေးဝန်ကြီးက ပြီးခဲ့တဲ့ဩဂုတ်လက ပြောကြားထားပါတယ်။

ရုရှား ငွေကြေး ရူဘယ်ရဲ့ တန်ဖိုးဟာ အခုနှစ်ထဲမှာ အတက်အကျ မြန်နေပြီး အမေရိကန် ဒေါ်လာ၊ ယူရိုငွေကြေးတွေနဲ့ နှိုင်းယှဉ်ရင် ၇ နှစ် ကာလအတွင်း ငွေလဲနှုန်း အသီးသီး မြင့်တက်ခဲ့တာကို ဇွန် ၂၁ ရက် မော်စကို ငွေလဲနှုန်း အချက်အလက်တွေအရ သိရပါတယ်။

ယူကရိန်းမှာ ရုရှားက အထူးစစ်ဆင်ရေးကို စတင်ပြီးတဲ့နောက် ငွေလဲနှုန်းဟာ အနောက်နိုင်ငံတွေရဲ့ ပိတ်ဆို့အရေးယူမှုတွေ စခဲ့တဲ့ မတ်လအစောပိုင်းမှာ သမိုင်းဝင် အနိမ့်ဆုံးအမှတ်ကိုရောက်ခဲ့ပါတယ်။

ရုရှားနိုင်ငံရဲ့ ဘဏ္ဍာရေး ဈေးကွက်ကို တည်ငြိမ်စေတဲ့ တရားဝင်မူဝါဒ အမျိုးမျိုးကြောင့် ရူဘယ်တန်ဖိုး ပြန်တက်လာခဲ့တာပါ။

ဥရောပသမဂ္ဂနိုင်ငံ အားလုံးအပါအဝင်၊ သဘာဝဓာတ်ငွေ့အတွက် ပေးချေမှုတွေကို ဧပြီ ၁ ရက်နေ့ကစပြီး ရူဘယ်ငွေကို ပြောင်းလိုက်တဲ့နောက် ငွေတန်ဖိုး ပြန်မြင့်တက်လာခဲ့ပါတယ်။ 

ရုရှား-ယူကရိန်း ပဋိပက္ခကြားမှာ ရုရှားရဲ့ ယာယီငွေလုံးငွေရင်း ထိန်းချုပ်ရေး စီမံချက်တွေအပြင် နိုင်ငံတကာ ကုန်စည်စီးဆင်းမှု မြင့်တက်လာတာတွေကလည်း ရူဘယ်ငွေ တန်ဖိုး မြင့်တက်လာရတဲ့ နောက်ကွယ်က အကြောင်းရင်းတွေလို့ ကျွမ်းကျင်သူတွေက ပြောပါတယ်။

ဒါပေမယ့် အနောက်နိုင်ငံတွေက ပိတ်ဆို့အရေးယူမှုတွေ ဆက်လက်ပြင်းထန်လာနေပြီး ဥရောပဖောက်သည်တွေက ရုရှားစွမ်းအင်အပေါ် မှီခိုအားထားမှု လျှော့ချဖို့ ကြိုးစားနေတာကြောင့် ရုပ်ကြွင်းလောင်စာကို အဓိက ကျောထောက် နောက်ခံထားတဲ့ ငွေကြေးတန်ဖိုးဟာ ရေရှည်မှာ အတက်အကျရှိမယ်လို့ မျှော်လင့်ထားကြပါတယ်။

ရုရှားစွမ်းအင်အပေါ် ပိတ်ဆို့အရေးယူတာတွေ အကြိမ်ကြိမ်လုပ်ပြီးတဲ့နောက် ဥရောပသမဂ္ဂဟာ ငွေကြေးဖောင်းပွမှု မြင့်လာတာ၊ ထောက်ပံ့ရေးကွင်းဆက် အနှောက်အယှက် ဖြစ်တာနဲ့ စီးပွားရေး ဆိုးဆိုးရွားရွာ ရိုက်ခတ်လာပါတယ်။

စွမ်းအင်ကုန်ကျစရိတ်မြင့်မားတာ၊ ကုန်သွယ်မှုစည်းမျဥ်းတွေ ယိုယွင်းလာတာနဲ့ ငွေကြေးဖောင်းပွမှု မြင့်တက်လာတာတို့ အပါအဝင် မသေချာမရေရာမှုတွေနဲ့ ယူရိုဇုန် ရဲ့ စီးပွားရေးက ရင်ဆိုင်နေရတယ်လို့ ဥရောပဗဟိုဘဏ် (ECB) ရဲ့ ဥက္ကဋ္ဌ Christine Lagarde က ဇွန် ၂၀ ရက်နေ့မှာ ပြောဆိုခဲ့ပါတယ်။