မကွေးတိုင်း၊ ရေစကြိုမြို့နယ်ထဲက ဒေသကာကွယ်ရေးတပ်ဖွဲ့တခုဖြစ်တဲ့ Southern YSO PDF က ရဲဘော်တွေအတွက် ရိက္ခာပြတ်လပ်နေပြီး စားသောက်ရေးအတွက် ပြည်သူလူထုရဲ့ အကူအညီတွေ လိုအပ်နေတယ်လို့ သိရပါတယ်။
ပြည်သူတွေရဲ့ ထောက်ပံ့ငွေတွေကို တိုက်ပွဲတွေ ဖော်ဆောင်ဖို့ လက်နက်နဲ့ တိုက်ခိုက်ရေး လိုအပ်ချက်တွေမှာပဲ ဖြည့်ဆည်းနေရလို့ လက်ရှိမှာ အဖွဲ့အတွက် စားနပ်ရိက္ခာပြတ်လပ်နေပြီး ပထမဆုံးအကြိမ်အဖြစ်နဲ့ အခုလို အကူအညီတောင်းခံရတာဖြစ်တယ်လို့ Southern YSO PDF အဖွဲ့ တာဝန်ခံ ကိုအောင်မောင်းက ပြောပါတယ်။
“ကျနော်တို့က လက်ရှိ တော်လှန်ရေးအရှိန်မြင့်လာနဲ့အမျှ ပြည်တွင်း ပြည်ပက ထောက်ပို့အလှူငွေတွေကို လက်နက်အနောက်ကို တကောက်ကောက်လိုက်ရတယ်။ လက်နက်ရှိတော့လည်း ကျည်က လုံလောက်တာမရှိဘူး။ ကျည် ၁၀၀ ကို ၁၁ သိန်း၊ ကျည် ၁,၀၀၀ ကို သိန်း ၁၁၀ ဖြစ်နေချိန်မှာ ကျနော်တို့က အစားအသောက်ကို ချွေတာတယ်။ အာ့လို တိုက်ပွဲအခြေအနေအပေါ် မူတည်ပြီး လက်နက်တွေ ဖြည့်တင်းနေရတော့ ကျနော်တို့မှာ အခုဆို အစားအသောက် ရိက္ခာတွေ လိုအပ်ချက်တွေ ရှိလာတာပါ။ အခုချိန်ထိ ရပ်တည်လာနိုင်တယ် ဆိုတာကလည်း ကျနော်တို့က ထုတ်လုပ်ရေးပိုင်းကို အားစိုက်ခဲ့လို့ပါ။ တခါမှ စားနပ်ရိက္ခာနဲ့ပတ်သက်လို့ အကူအညီ မတောင်းခဲ့ပေမဲ့ အဆင်မပြေတဲ့ ပြည်သူတွေကို အားနာနာနဲ့ပဲ ကျနော့်အနေနဲ့ အခုလို အကူအညီတောင်းရတာပါ။”
Southern YSO PDF အဖွဲ့က လက်နက်ကိုင်တော်လှန်ရေး စတင်ခဲ့ကတည်းက ပြည်သူနဲ့အတူ ၂ နှစ်နီးပါးကြာအောင် တိုက်ပွဲဝင်ခဲ့တဲ့ မကွေးတိုင်း ရေစကြိုမြို့နယ် ကာကွယ်ရေးတပ်ဖွဲ့တခု ဖြစ်ပါတယ်။ ငွေကြေးလိုအပ်ချက်တွေက များနေပြီး ပြီးခဲ့တဲ့ ၃ လလောက်ကတည်းက စားနပ်ရိက္ခာ ပြတ်လပ်တာကို ကြုံတွေ့နေခဲ့တာလို့ ဆက်ပြောပါတယ်။
“ကျနော်တို့က တစိုက်မတ်မတ် တော်လှန်ရေးကို လုပ်ခဲ့တာမှာ ၁၂ လပိုင်းမှာ ကျနော့်ရဲဘော်တွေ ကျတယ်။ အဲဒီနောက်ပိုင်း တောက်လျှောက် စခန်းမီးရှို့ခံရတယ်။ ၂ လပိုင်းမှာ ထပ်ပြီး ရဲဘော်တွေကျဆုံးတယ်။ ကား ၂ စီး ဖျက်ဆီးခံရတယ် ဆိုတော့ စခန်းအသစ် ဆောက်ရတယ်၊ အိုးခွက်ပန်းကန်ကအစ အကုန်အသစ်ဝယ်ရတယ် ဆိုတော့ အဲဒီမှာ ငွေက တော်တော်ပန်းသွားတာ။ လစဉ်ထောက်ပံ့ကြေးတွေရှိပေမဲ့ အဘက်ဘက်ကနေ ငွေကြေးလိုအပ်ချက်တွေ၊ လက်နက်ခဲယမ်း၊ မစ်ရှင်ဖော်ဆောင်မှု၊ ထုတ်လုပ်ရေး စတာတွေ ဘက်မှာလည်း ငွေကြေးက လိုအပ်နေတာဆိုတော့ ကျနော်တို့က စားသောက်ရေးကို အလေးအနက်ထားခဲ့တာ မဟုတ်ပါဘူး။ ပြီးခဲ့တဲ့ ၂ လ ၃ လလောက်ကတည်းက စားနပ်ရိက္ခာ ပြတ်လပ်တာကို ကြုံခဲ့ရတာပါ” လို့ ကိုအောင်မောင်းက ဆက်ပြောပါတယ်။
ပြီးခဲ့တဲ့ ဖေဖော်ဝါရီ ၁၈ ရက်က သဲတောကျေးရွာကို ဝင်လာတဲ့ စစ်ကောင်စီစစ်ကြောင်းက Southern YSO PDF စခန်းကို မီးရှို့ဖျက်ဆီးခဲ့ပြီး တပ်ဖွဲ့ထဲ အတူရှိနေတဲ့ Urban Underground Revolution Force က တပ်ဖွဲ့ဝင် စုံတွဲတတွဲလည်း မီးရှို့သတ်ဖြတ်ခဲ့ပါတယ်။
မကွေးတိုင်း ရေစကြိုမြို့နယ်မှာ စစ်ကောင်စီတပ်သားတွေကို သြဂုတ် ၂၉ နဲ့ ၃၀ နှစ်ရက်ဆက် မိုင်းဆွဲတိုက်ခိုက်ခဲ့ပြီး ထိခိုက်ကျဆုံးသူများတယ်လို့ ရေစကြို-PDF က ပြောပါတယ်။
ရေစကြိုမြို့မှာ သြဂုတ် ၂၉ ရက်နေ့ မနက်ပိုင်းက ပျူစောထီးခေါင်းဆောင် ထွန်းအောင်ကျော် အပါအဝင် ၆ ယောက်ကို တော်လှန်ရေးတပ်ဖွဲ့တခုက ရှင်းလင်းလိုက်လို့ ပခုက္ကူ တပ်မ ၁၀၁ ကနေ အင်အား ၇၀ ကျော်လောက်နဲ့ လာရောက်တဲ့ စစ်ကောင်စီကား ၃ စီးကို သြဂုတ် ၂၉ရက်နေ့ မွန်းလွဲ ၂ နာရီလောက်က ရေစကြိုမြို့အဝင် စိုက်ပျိုးရေးရုံးရှေ့မှာ မိုင်းဆွဲတိုက်ခိုက်ခဲ့တာလို့ ရေစကြို-PDF ရဲ့ ပြန်ကြားရေးတာဝန်ခံ ဗိုလ်အာကာက ဒီဗွီဘီကိုပြောပါတယ်။
“စစ်(...)တွေက စစ်ကား ၂ စီးနဲ့ လိုက်ထရပ်ကား ၁ စီးပါလာတဲ့အနက် ကျနော်တို့ဘက်က မိုင်းအလုံး ၂၀ ပါတဲ့ ပဒေသာတွဲနဲ့ဆွဲလိုက်လို့ အလယ်က လိုက်ထရက်ကားနဲ့နောက်က စစ်ကား ၁ စီး စုတ်ပြတ်သတ်သွားပြီး စစ်(...)ဘက်က အယောက် ၂၀ လောက် သေဆုံးပြီး ၃၀ လောက် ဒဏ်ရာရှိတယ်၊ ၁၈ ယောက်လောက်ကတော့ ဒဏ်ရာပြင်းထန်တယ်။ သေဆုံးသွားတဲ့ စစ်(...)အလောင်းတွေကိုတော့ ပခုက္ကူ တပ်မ ၁၀၁ ကို သယ်သွားတယ်လို့ မျက်မြင်ပြည်သူတွေနဲ့ အတွင်းသတင်းတွေဆီက သိရတယ်။ မနေ့က သြဂုတ်လ ၃၀ ရက်နေ့မှာ အဲဒီမိုင်းဆွဲခံရတဲ့ စစ်(...) ၇ ယောက်က ခြေလျင်လာပြီး မိုင်းရှင်းလင်းရေးလုပ်တဲ့အချိန် ကျနော်တို့ဘက်က မိုင်း ၆ လုံးခွဲလိုက်တော့ ၅ ယောက်သေဆုံးပြီး ၂ ယောက် ဒဏ်ရာရရှိခဲ့တယ်။”
အဲဒီစစ်ဆင်ရေးဟာ မဟာမိတ်ပူးတွဲစစ်ဆင်ရေး အမှတ်စဥ် ၁၁ ဖြစ်ပြီး ရေစကြို-PDF၊N-YSO ပြောက်ကျားတပ်၊ သံမဏိသိန်းငှက်တပ်ဖွဲ့နဲ့ MRGF တပ်ဖွဲ့တို့ ညီနောင်မဟာမိတ်အဖွဲ့တွေ ပူးပေါင်းတိုက်ခိုက်ခဲ့ကြတာလို့ ဆိုပါတယ်။
ပျူစောထီးခေါင်းဆောင် ထွန်းအောင်ကျော်နဲ့အဖွဲ့ အသတ်ခံခဲ့ရတဲ့ ရေစကြိုဘောလုံးကွင်း ပျံကျစျေးက ပြည်သူတွေရဲ့ ကုန်ပစ္စည်းတွေကိုလည်း စစ်ကောင်စီတပ်က မီးရှို့ဖျက်ဆီးခဲ့တယ်လို့ ရေစကြိုမြို့ ဒေသခံတယောက်က ပြောပါတယ်။
“စစ်ကောင်စီတပ်တွေ လာဝိုင်းတော့ တနေ့စာ တနေ့ ရှာဖွေစားသောက်နေရတဲ့ ပျံကျစျေးသည်တွေရဲ့ ကုန်ပစ္စည်းတွေအားလုံး ဆုံးရှုံးခဲ့ရတယ်။ ပစ္စည်းတွေကို သယ်ခွင့်ပေးဖို့ ညှိနှိုင်းတာကို မရဘူး။ ဘောလုံးကွင်း တံခါးပိတ်ပြီး အကုန်မီးရှို့ဖျက်ဆီးလိုက်ကြတာ။”
နှစ်ဖက်တိုက်ပွဲအတွင်းမှာ စစ်ကောင်စီဘက်က ထိခိုက်သေဆုံးတဲ့အခြေအနေကို ဒီဗွီဘီက သီးခြား အတည်မပြုနိုင်သေးသလို စစ်ကောင်စီဘက်ကလည်း သတင်းထုတ်ပြန်ထားတာ မတွေ့ရသေးပါဘူး။
