ရေစကြိုမြို့နယ်ထဲက PDF စခန်းတခုကို ဒီနေ့ စစ်တပ်က ဝင်ရောက်တိုက်ခိုက်ခဲ့ပြီးနောက် မင်္ဂလာဆောင်မယ့် PDF ရဲဘော်စုံတွဲ သတ်ဖြတ်မီးရှို့ခံခဲ့ရတယ်လို့ အဖွဲ့က ထုတ်ပြန်ပါတယ်။
ဖေဖော်ဝါရီ ၁၇ ရက် မနက်ပိုင်းက ရေစကြိုမြို့နယ် သဲတောကျေးရွာကို အကြမ်းဖက်စစ်သားတွေ ဝင်ရောက်ပြီး အပြစ်မဲ့ပြည်သူတွေကို ဓားစာခံလုပ်ဖမ်းဆီးခဲ့ပြီးနောက် သဲတောရွာနဲ့ ၁ မိုင်လောက်ဝေးတဲ့ Southern YSO PDF အခြေပြု ကင်းစခန်းငယ်တခုဆီကို ဝင်ရောက်ခဲ့တယ်လို့ ဆိုပါတယ်။
အဲဒီအချိန်မှာ အသင့်စောင့်ဆိုင်းနေတဲ့ Southern YSO PDF၊ Urban Underground Revolution Force (UURF-YSO) ဗိုလ်ရာဟု တပ်ခွဲ၊ Shwe Nyar Myae People Defence Force(YSO)၊ Yesagyo Revolution Force (YRG)၊ ညီနောင်သုံးဖော်၊ Zarmani Blood Guerilla Army Myaing အဖွဲ့တို့က မိုင်း ၃ လုံး၊ ရှေ့ထွက်ပြောင်း ၃ လုံးတို့နဲ့ တိုက်ခိုက်ခဲ့တာကြောင့် စစ်သားနဲ့ ရဲ ၂ ယောက် နေရာမှာပဲ သေဆုံးပြီး ၃ ယောက် ဒဏ်ရာရတယ်လို့ ဆိုပါတယ်။
Urban Underground Revolution Force (UURF-YSO)ဗိုလ်ရာဟု တပ်ခွဲက ရဲဘော်နဲ့ ရဲမေတို့ဟာ ဖေဖော်ဝါရီ ၁၈ ရက်မှာ မင်္ဂလာဆောင်ဖို့ ပြင်ဆင်ထားလို့ သဲတောရွာမှာ ခဏသွားနေတုန်း စစ်တပ်ရဲ့ဖမ်းဆီးခံခဲ့ရတာ ဖြစ်ပါတယ်။
PDF အဖွဲ့တွေ မိုင်းခွဲချိန်မှာ ထွက်ပြေးခဲ့ပေမယ့် စစ်တပ်ကပစ်ခတ်လို့ အမျိုးသားဖြစ်သူ ဒဏ်ရာရသွားပြီး အမျိုးသမီးက ဆက်မပြေးတာကြောင့် အတူသတ်ဖြတ်ခံလိုက်ရတာလို့ သိရပါတယ်။
သူတို့ကို PDF ရဲ့ ကင်းစခန်းနဲ့အတူ စစ်တပ်က မီးရှို့ထားခဲ့ပြီး PDF စခန်းက Glock အတို ၁ လက်၊ ကျည်ဆန် ၆၅ တောင့်၊ ထုတ်လုပ်ရေး ပစ္စည်းတွေ၊ ဆိုင်ကယ်တွေ၊ ရဲဘော်အသုံးအဆောင်ပစ္စည်းတွေ၊ ဆိုလာ၊ ဘက်ထရီ၊ အင်ဗာတာ၊ ရိက္ခာပစ္စည်းတွေလည်း မီးရှို့ခံခဲ့ရတယ်လို့ အဖွဲ့က ထုတ်ပြန်ပါတယ်။
မကွေးတိုင်း၊ ရေစကြိုမြို့နယ်မှာ သြဂုတ် ၁၆ ရက် မနက် ၈ နာရီလောက်က ရေစကြို-PDF အခြေခံစစ်ပညာသင်တန်း အမှတ်စဥ် ၈ သင်တန်းဆင်းပွဲကျင်းပခဲ့ တယ်လို့ ရေစကြို-PDF ကနေ သိရပါတယ်။
ရေစကြို-PDF တာဝန်ခံ ဗိုလ်မှိုင်းတေဇက “ကျနော်တို့ ရေစကြိုမြို့နယ်ဆိုတာက တပ်မ ၁၀၁ လက်အောက်ခံ တပ်ရင်း ၃ ရင်းထိုင်ထားပြီး အနောက်မြောက်တိုင်းစစ်ဌာနချုပ်နဲ့ကလည်း ကပ်နေတယ်။ ခဏနေရင် လေယာဥ်သံကြားလိုက်၊ ခဏနေရင် စစ်ကြောင်းထိုးမယ်ကြားလိုက်၊ ခက်ခက်ခဲခဲ ပြုလုပ်ခဲ့ရတာ” လို့ ဒီဗွီဘီကို ပြောပါတယ်။
ရဲဘော်ရဲမေတွေကို အခြေခံစစ်ပညာ သင်တဲ့နေရာမှာ လက်နက်ကြီး၊ လက်နက်ငယ်တွေနဲ့ သင်ခန်းစာတွေသင်တဲ့နေရာမှာ လက်တွေ့သင်ကြားပြသပေးဖို့အတွက် သင်ထောက်ကူ လက်နက်ကြီး၊ လက်နက်ငယ်တွေ နည်းပါးတယ်လို့ ဆိုပါတယ်။
ဗိုလ်မှိုင်းတေဇက “စစ်ကောင်စီစစ်ကြောင်းတွေရှိနေလို့ ကျနော်တို့က သင်တန်းအတွက် စည်းတွေထားထားရတယ်။ ပထမစည်းမှာဆိုရင် နည်းနည်းသတိထားရမယ်။ ဒုတိယစည်းမှာ တပ်လှန့်ထားပြီး တတိယစည်းမှာတော့ သင်တန်းအားလုံးကို ရပ်နားပြီး စစ်ပြင်ဆင်ဖို့ စီစဥ်ရတယ်” လို့ ပြောပါတယ်။
အခုအပတ်စဥ် ၈ မှာတော့ စစ်ကြောင်းနဲ့ မကြုံတွေ့ခဲ့ဘဲ အခြေခံစစ်ပညာသင်တန်း အပတ်စဥ် ၄ တုန်းကတော့ စစ်ကောင်စီတပ်တွေ စစ်ကြောင်းထိုးလာလို့ သင်တန်းရပ်နားလိုက်ရပြီး အစကနေ ပြန်လည်စတင်ခဲ့ရတာ ကြုံဖူးခဲ့တယ်လို့ ဆိုပါတယ်။
ရေစကြို-PDF အခြေခံစစ်ပညာသင်တန်း အမှတ်စဥ် ၈ ကို သြဂုတ်လ ပထမပတ်မှာ စတင်ခဲ့ပြီး သင်တန်းကာလ ၁၀ ရက် သင်ကြားပို့ချပေးခဲ့ကာ မွမ်းမံသင်တန်းတွေလည်း ထပ်မံပို့ချဖို့ ရှိနေပါတယ်။
