ပဲခူးတိုင်း၊ ရေတာရှည်မြို့နယ်မှာ ဇန်နဝါရီ ၁၆ ရက်ကနေ ၁၇ ရက်နေ့အထိ မိုင်းတကြိမ်ဆွဲကာ တိုက်ပွဲ ၃ ကြိမ်ဖြစ်ပွားပြီး စစ်ကောင်စီဘက်က အရာရှိစစ်သည်တွေ သေဆုံး ဒဏ်ရာရရှိခဲ့တယ်လို့ NUG ရဲ့ ရေတာရှည်မြို့နယ်အခြေစိုက် တပ်ရင်း ၃၅၀၁၊ တပ်ခွဲ ၄ က ထုတ်ပြန်ပါတယ်။
ရေတာရှည်မြို့နယ် နဂျပ်တောင်ဘက်ကို ဇန်နဝါရီ ၁၆ ရက်နေ့မှာ စစ်ကြောင်းထိုးလာတဲ့ စစ်ကောင်စီတပ် အင်အား ၁၀၀ လောက်ကို တပ်ခွဲ ၄၊ တပ်စု ၂ က မိုင်းဆွဲတိုက်ခိုက်ခဲ့လို့ စစ်ကောင်စီဘက်က ၂ ယောက်ထက်မနည်း သေဆုံးပြီး ၆ ယောက်ထက်မနည်း ဒဏ်ရာရရှိကာ ပြန်ဆုတ်သွားကြတယ်လို့ တပ်ရင်း ၃၅၀၁၊ တပ်ခွဲ ၄ ရဲ့ သတင်းနဲ့ ပြန်ကြားရေးတာဝန်ခံက ပြောပါတယ်။
“နဂျပ် အရှေ့မြောက်ဘက် ဝက်ပုပ်လမ်းအတက်မှာလည်း ဇန်နဝါရီလ ၁၇ ရက်နေ့ မနက် ၅ နာရီလောက်မှာ စစ်ကောင်စီဘက်က ထပ်မံ စစ်ကြောင်းထိုးလာလို့ ကျနော်တို့တပ်ခွဲရဲ့ တပ်စု ၃ က ကင်းပုန်းဝပ်ပြီး တိုက်ခိုက်ခဲ့လို့ မိနစ် ၂၀ လောက် တိုက်ပွဲဖြစ်ပွားခဲ့တယ်။ အဲဒီ ဝက်ပုပ်လမ်းဘက်ကို မနက် ၁၀ နာရီလောက်မှာ စစ်(...)အင်အား ၁၅၀ လောက်နဲ့ တပ်ဖြန့်ပြီး တက်လာလို့ တပ်စု ၂ နဲ့ တပ်စု ၃ တို့ ပူးပေါင်းတိုက်ခိုက်ခဲ့လို့ နာရီဝက်ကျော်ကြာ တိုက်ပွဲဖြစ်ပွားပြီး နေ့လယ် ၁၂ နာရီလောက်မှာလည်း နဂျပ်-ကွန်းချောင်းလမ်း ကျောက်ပုံကုန်းမှာ မဟာမိတ်ပူးပေါင်းတပ်ဖွဲ့တွေက တိုက်ခိုက်ခဲ့လို့ ၁ နာရီကျော်ကြာအောင် တိုက်ပွဲဖြစ်ပွားခဲ့တယ်။”
အဲဒီတိုက်ပွဲတွေအတွင်းမှာ စစ်ကောင်စီဘက်က အရာရှိ ၃ ယောက် အပါအဝင် ၄၀ ကျော် သေဆုံးပြီး အများအပြား ဒဏ်ရာရရှိကာ အလောင်းတွေ လူနာတွေကို ကားတွေနဲ့ သယ်ထုတ်သွားကြပြီး တပ်ခွဲ ၃ က ရဲဘော်တယောက် ကျဆုံးကာ တယောက် ဒဏ်ရာရရှိခဲ့တယ်လို့ ဆိုပါတယ်။
စစ်ကောင်စီတပ်ဘက်က ထိခိုက်သေဆုံးသူ များပြားလို့ ထွက်ပြေးတဲ့အချိန်မှာ ကျကျန်ခဲ့တဲ့ ကျောပိုးအိတ် ၂ လုံးကို ဖွင့်ဖောက်စစ်ဆေးကြည့်ရာ အမြောက်တပ် တံဆိပ်နဲ့ ဝတ်စုံတွေ တွေ့ရတယ်လို့ ပြောပါတယ်။
လက်ရှိအခြေအနေမှာ နှစ်ဖက်တပ်တွေ ထိပ်တိုက် စစ်ဆိုင်ထားပြီး တိုက်ပွဲတွေ ထပ်မံဖြစ်ပွားနိုင်လို့ မိဘပြည်သူတွေအနေနဲ့ စစ်ကောင်စီတပ်သားတွေနဲ့ အဝေးဆုံးမှာ နေထိုင်ကြဖို့ သတိပေးထားပါတယ်။
အဲဒီတိုက်ပွဲအတွင်းမှာ စစ်ကောင်စီဘက်က ထိခိုက်သေဆုံးတဲ့ အခြေအနေကို ဒီဗွီဘီက သီးခြားအတည်မပြုနိုင်သေးသလို စစ်ကောင်စီဘက်ကလည်း သတင်းထုတ်ပြန်ထားတာ မတွေ့ရသေးပါဘူး။
ပဲခူးတိုင်း၊ ရေတာရှည်မြို့နယ်၊ သိုင်းဝကျေးရွာအုပ်စု၊ ဥယျာဉ်စုကျေးရွာမှာ နေတဲ့ ကျောင်းအုပ်ဆရာမ လင်မယားဟာ အောက်တိုဘာ ၁၈ ရက် ည ၈ နာရီခွဲဝန်းကျင်က နေအိမ်မှာ ပစ်သတ်ခံလိုက်ရတယ်လို့ သိရပါတယ်။
ပစ်သတ်ခံရတဲ့ လင်မယားဟာ ကျောင်းအုပ်ဆရာမ ဒေါ်သက်သက်ခိုင်နဲ့ ခင်ပွန်းဖြစ်တဲ့ ဦးမောင်ဦး တို့ဖြစ်ပြီး ကျောင်းအုပ်ဖြစ်တဲ့ ဒေါ်သက်သက်ခိုင်ဟာ Non CDM ပညာရေးဝန်ထမ်းတဦး ဖြစ်တယ်လို့ ဒေသခံတွေဆီက သိရပါတယ်။
ဒေသခံတဦးက “ညက သူတို့နေအိမ်မှာဘဲ ပစ်သတ်ခံရတာ။ ဆိုင်ကယ်နဲ့ လာပစ်သွားတာတဲ့။ သူတို့မှာ ၅ နှစ်အရွယ် သမီး ၁ ယောက်တော့ရှိတယ်။ အဲဒီကလေးကတော့ ဘယ်လိုဖြစ်တယ် မသိဘူး” လို့ ပြောပါတယ်။
ပစ်သတ်ခံရတဲ့ ဦးမောင်ဦးနဲ့ ဒေါ်သက်သက်ခိုင်တို့ရဲ့ ၅ နှစ်အရွယ် သမီးတဦးပါ အသတ်ခံရတယ်လို့ ဒေသခံတွေက ပြောပြပေမဲ့ ဒီဗွီဘီက သီးခြားအတည်ပြုနိုင်ဖို့ ဆက်လက်စုံစမ်းနေပါတယ်။
“အဲဒီကျောင်းအုပ်က သူ့ကျောင်းက CDM ဝင်တဲ့ ပညာရေးဝန်ထမ်းတွေကိုလည်း ဖိအားပေးတယ်။ ခြိမ်းခြောက်တယ်။ ကျောင်းသားတွေကိုလည်း စစ်ကျွန်ပညာရေးမှာ ကျောင်းတက်ဖို့ ဖိအားပေးနေတယ်။ PDF တွေရဲ့ သတင်းတွေစုံစမ်းပြီးတော့လည်း စစ်ကောင်စီကို သတင်းပေးနေသူဖြစ်လို့ ဒလန်ရဲ့မိသားစုလိုက် ရှင်းလိုက်တာပါ” လို့ ရေတာရှည် ပြည်သူ့ကာကွယ်ရေးတပ်မတော် (YPDF) က တာဝန်ခံက အတည်ပြုပြောပြပါတယ်။
YPDF ဟာ ရေတာရှည်မြို့နယ်က အကြမ်းဖက်စစ်ကောင်စီ လက်အောက်ခံ ရပ်ကျေး အုပ်ချုပ်ရေးမှူးတွေကိုလည်း အောက်တိုဘာ ၃၀ ရက်နေ့ နောက်ဆုံးထား နုတ်ထွက်ကြဖို့နဲ့ ရာထူးကနေ မနုတ်ထွက်သူနဲ့ မိသားစုတွေရဲ့ အသက်အန္တရာယ်ကို တာဝန်မယူကြောင်း ထုတ်ပြန်ထားတယ်လို့လည်း သိရပါတယ်။
