ပဲခူးတိုင်း၊ ရေတာရှည်မြို့နယ်၊ မန္တလေး-ရန်ကုန်လမ်းဟောင်း၊ မိုင်တိုင်အမှတ် ၁၈၀/၃၊ သပြေတန်းရွာနဲ့ ကုန်းကြီးလမ်းဆုံကြားမှာ ဧပြီ ၂၇ ရက် မနက်က စက္ကူတင်ကား မီးလောင်ပြီး လူတဦး သေဆုံးခဲ့တယ်လို့ မြို့ခံကယ်ဆယ်ရေးအသင်းက ပြောပါတယ်။

အဲ့ဒီနေ့ မနက် ၇ နာရီဝန်းကျင်က လမ်းဟောင်းပေါ်မှာ မောင်းလာတဲ့ ဖောကားနောက်ခန်း စက္ကူဂျပ်ဖာတွေရှိတဲ့နေရာကို ယာဉ်မောင်းလွှင့်ပစ်လိုက်တဲ့ ဆေးလိပ်တိုနဲ့ မီးပွားစင်ပြီး မီးလောင်ခဲ့တာပါ။

“လမ်းမှာ ကားကြုံစီးလာကြတာ၊ ကုန်းကြီးလမ်းဆုံနားမှာ ကားပေါ်က စက္ကူတွေ မီးထလောင်တော့ ကောင်မလေးက လန့်ပြီးခုန်ချတာ ထင်တယ်၊ တွေ့ရတာတော့ လမ်းပေါ်ပါပဲ၊ အသင်းကရောက်တော့ DB ဖြစ်နေပြီ။ သူ‌တို့ရွာကလူတွေနဲ့တော့ အဆက်အသွယ်ရပြီ” လို့ မြို့ခံကယ်ဆယ်ရေးအသင်းက ပြောပါတယ်။

အဆိုပါ ကားနောက်ခန်းမှာ အမျိုးသမီး ၂ ဦး ကားကြုံလိုက်စီးလာတာဖြစ်ပြီး စက္ကူဂျပ်ဖာတွေ မီးစလောင်တာကြောင့် အသက် ၁၇ နှစ်အရွယ် အမျိုးသမီးက လန့်ကာ လမ်းမပေါ် ခုန်ချတာကြောင့် သေဆုံးသွားတယ်လို့ သိရပါတယ်။

မီးလောင်မှုကို ရေတာရှည်မြို့နယ်က မီးသတ်ယာဉ် ၂ စီးနဲ့ မြို့ခံကယ်ဆယ်ရေးအသင်းတို့က မီးငြှိမ်းသတ် ကယ်ဆယ်ခဲ့ကြပြီး ဖောကားရဲ့ နောက်ဘက်ခြမ်းတခုလုံး မီးလောင်ကျွမ်းသွားပါတယ်။

သေဆုံးသူအမျိုးသမီး ရုပ်အလောင်းကို ရေတာရှည်ဆေးရုံ ပို့ဆောင်ထားပြီး ယာဉ်မောင်းအမျိုးသားကို ရေတာရှည်ရဲစခန်းမှာ အမှုဖွင့် စစ်ဆေးနေတယ်လို့ သိရပါတယ်။

ပဲခူးတိုင်း ရေတာရှည်မြို့နယ်၊ ၁၂၅ မိုင်၊ သာဂရ-ကိုးပင် ရိုးမဖြတ်လမ်း၊ ဖိုးကျားဆင်စခန်းအနီးမှာ ဧပြီ ၇ ရက် ညပိုင်းက တက္ကစီယာဉ်မောင်းကို ခရီးသည် ၂ ဦးက စကေဘာနဲ့ထိုး ကားလုယက်မှု ဖြစ်ပွားခဲ့ပြီး လုယက်သူ ၂ ဦးအနက် တဦးကို ကားနဲ့အတူ ဖမ်းဆီးရမိပြီလို့ ကားပိုင်ရှင်နဲ့ နီးစပ်သူဆီက သိရပါတယ်။

အဲဒီနေ့လယ် ၂ နာရီ ၃၀ မိနစ်လောက်က ရန်ကုန်၊ အောင်ဇေယျအိမ်ရာကနေ အသက် ၃၀ အရွယ် အမျိုးသားနဲ့ အမျိုးသမီးတို့က အမြန်လမ်း ၁၆၅ မိုင်ကို တက္ကစီငှားခဲ့တာဖြစ်ပြီး ည ၉:၃၀ လောက် အမြန်လမ်းမှာ တက္ကစီယာဉ်မောင်းရဲ့ လည်ပင်း၊ ရင်ဘတ်နေရာတွေကို စကေဘာနဲ့ ထိုးသွင်း ကားလုယက်ခဲ့တာပါ။ 

ယာဉ်မောင်းမိသားစုနဲ့ နီးစပ်သူတဦးက "ကားမလုခင် ရက်လောက်က အဲ့အမျိုးသမီးက ရွှေတိဂုံကနေ ကားငှားစီးဖူးတယ်၊ ဖုန်းနံပါတ်တောင်းပြီး ညကျတော့ အမြန်လမ်း ၁၆၅ မိုင် သွားချင်လို့ဆိုပြီး ဖုန်းဆက်တာ၊ သူနဲ့ ကလေးတယောက်ပါမယ်၊ မိဘတွေကို သွားကန်တော့ချင်လို့ ပြောပြီးငှားတာပါ၊ အောင်ဇေယျအိမ်ရာက‌နေ အမျိုးသားတစ်ဦးနဲ့ အမျိုးသမီးတစ်ဦးပါတယ်၊ ၂ နာရီခွဲလောက် ရန်ကုန်ကနေ ထွက်သွားကြတာ၊ ည ၉ နာရီခွဲ လောက်မှာ အမြန်လမ်းမှာ ကားအလုခံရတယ် လည်ပင်းကို ထိုးသွားတယ်လို့ ကြားရတာ၊ အဲဒီ ညပိုင်းပဲ တစ်ဦးဖမ်းမိပါတယ်၊ ကားက ပြန်ရပါပြီ " လို့  ပြောပါတယ်။   

အသက်  ၃၃ နှစ်အရွယ် ယာဉ်မောင်းဖြစ်သူမှာ အဆုတ် သွေးရောက်နေပြီး လည်ပင်း ထိုးသွင်းဒဏ်ရာကြောင့် ဆွာဆေးရုံကနေ နေပြည်တော်ကုတင် ၁၀၀၀ ဆေးရုံကို အရေး ပေါ်ပို့ဆောင်ခဲ့ရတယ်လို့ သိရပါတယ်။

လုယက်ခံရတာကြောင့် အဖြူရောင် ပရိုဘောက်တက်စီ YGN 7E- 4003 ၊ ဖုန်း၊ ပိုက်ဆံအိတ် ယူဆောင်သွားခံရပြီး  ကိုးပင်လမ်းဘက် မောင်းပြေးသွားခဲ့တာလို့ သိရပါတယ်။

အခင်းဖြစ်ပွားတဲ့ နေရာနဲ့ မိုင် ၅၀ ခန့်အကွာမှာ စစ်ကောင်စီစစ်ဆေးရေးဂိတ်ကနေ လုယက်သူ အမျိုးသားနဲ့ အမျိုးသမီးကို ဖမ်းမိခဲ့တာဖြစ်ပြီး အမျိုးသားဖြစ်သူက စစ်ကောင်စီဂိတ်မှာ ‌ဖြေရှင်းမယ်လို့ ဆိုကာ ထွက်ပြေးသွားတာကြောင့် တက္ကစီနဲ့ လုယက်သူ အမျိုးသမီးကိုသာ ဖမ်းမိခဲ့တယ်လို့ သိရပါတယ်။ 

လုယက်သူ အမျိုးသမီးကို သာဂရအမြန်လမ်းရဲစခန်းမှာ ဖမ်းဆီးစစ်ဆေးနေတယ်လို့ သိရတဲ့ အပြင် ရန်ကုန်၊ မင်္ဂလာဒုံမြို့နယ်မှာ တက္ကစီလုယက်ပြီး ယာဉ်မောင်းကို အုပ်စုဖွဲ့ဓားထိုးရိုက်နှက်သူ အဖွဲ့ဝင် ၂ ဦးကို အရပ်ဘက်အဖွဲ့အစည်းတွေက ဖမ်းဆီးပြီး မြောက်ဒဂုံရဲစခန်းအပ်နှံထားတယ်လို့ သိရပါတယ်။