လှိုင်မြစ်ထဲမှာ ဖေဖော်ဝါရီ ၁၆ ရက်နေ့ ညနေပိုင်းက ရေနစ်ပြီး ပျောက်ဆုံးသွားတဲ့ အင်းစိန် အမှတ် ၁ အခြေခံပညာအထက်တန်းကျောင်းက ၇ တန်းကျောင်းသား ၂ ဦးကို ခုထိ ပြန်မတွေ့သေးဘူးလို့ ဒေသခံတွေက ပြောပါတယ်။
၇ တန်းကျောင်းသား ၄ ဦးဟာ ဖေဖော်ဝါရီ ၁၆ ရက် ညနေက ခြင်းခတ်ပြီး ရေဆင်းကူးရာမှ ၂ ဦးရေနစ်ပျောက်ဆုံးနေတာလို့ အခင်းဖြစ်နေရာအနီး နေသူတဦးက ဒီဗွီဘီကို ပြောပါတယ်။
"ကောင်လေးတယောက် ရေနစ်လို့ နောက်တယောက်က ဆင်းကယ်တာ။ နောက်ကလေးတဦးက ခုန်ဆင်းသွားတယ်၊ ဆင်းသွားတဲ့ ကလေးရေမကူးတတ်ဘူး၊ ဆင်းကယ်တဲ့ ကောင်လေးက မတွေ့လို့ ပြန်တက်လာတော့ အရင်နစ်တဲ့ ကလေးရော နောက်ခုန်ချတဲ့ ကလေးရော မတွေ့တော့ဘူး၊ နောက်မှ လူကြီးတွေကိုခေါ်တာ။"
ကလေးငယ် ၄ ဦးဟာ မုဒိတာအိမ်ရာ ၂ ဆန်စက်လမ်းအနီး အင်းစိန်ကမ်းနား လှိုင်မြစ်အတွင်းမှာ ရေဆင်းကူးရင်း ၂ ဦးရေနစ်သွားပြီး အခုချိန်ထိရှာမတွေ့သေးတာလို့ မိသားစုဝင်တဦးကဒီဗွီဘီကို ပြောပါတယ်။
"ဖြစ်စဥ်က သူငယ်ချင်းတွေနဲ့ ကမ်းနားမှာခြင်းခတ်ပြီး ရေဆင်းကူးပြီးပြန်အတက် ဒေသခံရဲ့ ပြောပြချက်အရနော် ကျမတို့က အိမ်မှာပဲရှိတာ။ အောင်ပြည်စုံက မျက်နှာသစ်မယ်ဆိုပြီး ထပ်ဆင်းရင်းနစ်သွားတာ။ ကိုရဲဆိုတဲ့ကောင်လေးက လိုက်ကယ်တယ် မရဘူး၊ ကိုရဲပြန်တက်လာတော့ ချစ်ထူးအောင်ဆိုတဲ့ ကောင်လေးပါ ခုန်ချသွားတယ်ဆိုတာ သိတာ၊ ၂ ဦးစလုံး နစ်သွားတာ။"
ကလေး ၂ ဦးရေနစ်ပြီးနောက် ကျန်ကလေး ၂ ဦးက နီးစပ်ရာ လူကြီးတွေကို အသိပေးပြီး မီးသတ်တပ်ဖွဲ့ကို အကြောင်းကြား ရှာဖွေခဲ့ပေမဲ့ မတွေ့သေးဘူးလို့ ရပ်မိရပ်ဖတဦးက ဒီဗွီဘီ ကို ပြောပါတယ်။
လှိုင်မြစ်ထဲမှာ ရေနစ်ပျောက်ဆုံးနေသူ ၂ ဦးမှာ အင်းစိန်အမှတ် ၁ အခြေခံပညာအထက်တန်းကျောင်းမှ ၇ တန်ေကျောင်းသားတွေဖြစ်ပြီ ဖော့ကန်ရပ်ကွက်နေ မောင်အောက်ပြည်စုံနဲ့ မုဒိတာအိမ်ရာအနီးနေ မောင်ချစ်ထူးအောင်တို့ ဖြစ်တယ်လို့ မိသားစုဝင်တွေဆီက သိရပါတယ်။
လက်တလောမှာ မိသားစုဝင်တွေဟာ ရေငုပ်သမားတွေနဲ့ စက်လှေနှစ်စီးကို ငှားရမ်းကာ ကြည့်မြင်တိုင်နဲ့ ဘုရင့်နောင်တံတားဘက်မှာ ဒီနေ့မနက် ရှာဖွေနေတယ်လို့ သိရပါတယ်။
ရခိုင်ပြည်နယ်၊ စစ်တွေမြို့မှာ ရေနစ်ပျောက်ဆုံးနေတဲ့ စတုတ္ထတန်းကျောင်းသား ၃ ဦးထဲမှ ၂ ဦးရဲ့ ရုပ်အလောင်းကို အောက်တိုဘာ ၂၄ ရက်နေ့ မနက် ၁၀ နာရီနဲ့ ၁၂ နာရီခွဲမှာ ပြန်တွေ့ခဲ့တယ်လို့ မိသားစုဝင်တွေက ပြောပါတယ်။
စစ်တွေမြို့ ဘုမေရွာ စစ်တွေတက္ကသိုလ် လေးထပ်ဆောင်မှ မောင်ဇွဲဘုန်းခန့် (၁၁) နှစ်နဲ့ ပြည်တော်သာရပ်ကွက်နေ မောင်ဟိန်းထက်ဝင်းနိုင် (၁၁) နှစ်တို့အလောင်းအား ပြန်တွေ့ခဲ့ပြီး မနေ့ ညနေပိုင်း စစ်တွေမြို့မှာ သင်္ဂြိုဟ်ခဲ့ပါတယ်။
ပြီးခဲ့တဲ့ အောက်တိုဘာ ၂၂ ရက်နေ့ ကတည်းက ကလေးငယ် ၃ ဦး ပျောက်ဆုံးသွားတာဖြစ်ပြီး ကျောင်းသား အောင်လင်းသူကိုတော့ မနေ့ညအထိ ရှာမတွေ့ရှိသေးဘူးလို့ လူမူကူညီရေးအဖွဲ့တွေဆီက သိရပါတယ်။
အောင်လင်းသူရဲ့မိခင် ဒေါ်ခင်စုက "နှစ်ဦးရဲ့ ရုပ်အလောင်းတော့တွေ့ပါပြီ။ ကျမသားလေးကတော့ အခုအချိန်အထိ မတွေ့သေးပါဘူ။ ဖြစ်စဥ်ကတော ကလေးတဦး ရေနစ်တာကို နောက်သူငယ်ချင်း ၂ ဦးက ကယ်ဆယ်ရင်း သုံးဦးလုံး သေဆုံးခဲ့ရတာပါ။ ပွိုင့်က အဲ့ဒီသဲသောင်ပြင်က အန္တရယ်များတဲ့အတွက် သတိပေးတားမြစ်မှုတွေ လုပ်ထားသင့်တယ်။ အဲ့ဒီနေရာက လူသေတဲ့သမိုင်းလည်း ရှိတယ်။ အဝေးကလာရောက်လည်ပတ်သူတွေကတော့ ဘယ်သိနိုင်ပါမလဲ" လို့ ပြောပါတယ်။
မောင်ဇွဲဘုန်းခန့်ရဲ့ ရုပ်အလောင်းအား စစ်တွေမြို့နယ် ကျေးတောရွာမ ချောင်းနားမှာတွေ့ရှိခဲ့ပြီး ဟိန်းထက်ဝင်းနိုင်ရဲ့ ရုပ်အလောင်းအား စစ်တွေနေဗီဆိပ်မှာ တွေ့ရှိခဲ့တာပါ။
စစ်ကောင်စီလက်အောက်ခံ ပြည်နယ်မီးသတ်ဦးစီးဌာန လက်ထောင်ညွှန်ကြားရေးမှူး ဦးဟန်မြင့်ကျော်က လက်ရှိလေမုန်တိုင်းနဲ့ လေပြင်းတိုက်လှိုင်းကြီးနေတာကြောင့် ကျန်ရှိကလေးအား ရှာဖွေရာမှာ အခက်အခဲရှိတယ်လို့ ပြောပါတယ်။
"အခုတော့ အလောင်းတွေ ကျေးတောဘက်မှာတွေ့တာရှိတယ်။ ပွိုင့်ကမ်းခြေမှာတော့ အဖွဲ့တဖွဲ့ကျန်နေခဲ့မယ်။ ဒီနေအနေအထားအရကတော့ လေမုန်တိုင်းကြောင်း လေပြင်းတွေ တိုက်ခတ်နေတာကြောင့် ပင်လယ်ပြင်ကို ဆင်းနိုင်ဖို့အခြေအနေမရှိပါဘူး။"
အောက်တိုဘာ ၂၂ရက်နေ့ ညနေပိုင်းက စစ်တွေမြို့ ပွိုင့်အရှေ့ရှိ CCTV မှတ်တမ်းအရ ကလေးငယ် ၃ ဦးမှာ စစ်တွေမြို့ ပွိုင့်အရှေ့ရှိ ပွိုင့်အနီး ကျောက်ဆောင်မှာ ရေကစားရာက ၃ ဦးလုံး ရေထဲကျသွားကြောင်း တွေ့ရှိထားတယ်လို့ ဆိုပါတယ်။
