ရန်ကုန်တိုင်း၊ မှော်ဘီမြို့နယ်၊ လိပ်ပုတ်ကျေးရွာက အကျယ် ပေ ၅၀၀၊ အနက် ပေ ၁၀၀ ရှိ ရေပြည့်နေတဲ့ကန်ထဲ ရေဆင်းကူးပြီး ရေနစ်သေဆုံးသွားတဲ့ အသက် ၂၀ အရွယ် အမျိုးသမီး ၂ ဦးကို ဆယ်ယူရရှိပြီလို့ ပုလဲမြို့နယ် အရန်မီးသတ်ဌာနကနေ သိရပါတယ်။

သေဆုံးသူ အမျိုးသမီး ၂ ဦးဟာ မတ် ၆ ရက် ညနေ ၄ နာရီကတည်းက ရေထဲနစ်မြုပ်သွားတာဖြစ်ပြီး မတ် ၇ ရက် မနက် ၉ နာရီ ၃၅ မိနစ်နဲ့ ၁၀ နာရီ ၁၅ မိနစ်တို့မှာ ရှာဖွေဆယ်ယူနိုင်ခဲ့တာပါ။

ပုလဲမြို့နယ် အရန်မီးသတ်ဌာန တာဝန်ရှိသူက “သူတို့က မနေ့က ၄ နာရီလောက်ကတည်းက ရေနစ်ပျောက်ဆုံးတာပေါ့။ သူတို့ မှော်ဘီမီးသတ်ဌာနကို အကူအညီတောင်းတာ၊ လာရှာပေးချိန်မှာ အလောင်း ၂ လောင်းကို မတွေ့ဘူးပေါ့။ ‌ဒီနေ့မနက်မှာ အကူအညီ တောင်းလာတော့ ရှာဖွေကယ်ဆယ်ရေးကို မနက် ၈ ခွဲလောက်မှာ စလုပ်တယ်၊ ကန်က မြေကြီးတွေတူးထားပြီး ရေဝင်နေတဲ့ ကန်အသေပါ။ ဆင်းဆင်းချင်းကို ပေ ၃၀ လောက် နက်တယ်။ ကန်အလယ်မှာ ပေ ၁၀၀ ကျော်ပါတယ်။ ၉ နာရီ ၃၅ မှာ ပထမဆုံး အလောင်းစတွေ့တယ်။ ၁၀ နာရီ ၁၅ မှာ နောက်ထပ်တလောင်းကို ထပ်တွေ့တယ်။ သေဆုံးသူ အမျိုးသမီး ၂ လောင်းကို ပြင်ပဒဏ်ရာမရှိနဲ့ တွေ့ရှိပါတယ်။ သေဆုံးသူတွေကို မှော်ဘီဆေးရုံကို ပို့ဆောင်ပေးထားပါတယ်” လို့ ပြောပါတယ်။

ရေနစ်သေဆုံးသူ အမျိုးသမီး ၂ ဦးစလုံးဟာ ရွှေပြည်သာမြို့နယ်က အလှပြင်ဆိုင်တခုမှာ ဝန်ထမ်းလုပ်ကိုင်နေသူတွေဖြစ်ကြပြီး တဦးက မြိတ်ဇာတိလို့ သိရပါတယ်။

လက်ရှိမှာ သေဆုံးသူတွေရဲ့ မိသားစုဝင်တွေနဲ့ အဆက်အသွယ်ရရှိထားပြီး ရုပ်အလောင်းတွေကို မှော်ဘီဆေးရုံ ပို့ဆောင်ထားတယ်လို့ သိရပါတယ်။

မကွေးတိုင်း၊ ပခုက္ကူမြို့က နယူးဒေးဆီဆိုင်မှာ ဖေဖော်ဝါရီ ၁၈ ရက် ညပိုင်းက ဆီဘောက်ဆာကား ညအိပ်ရပ်နားချိန် ယာဉ်မောင်းရဲ့သားဖြစ်သူ အသက် ၆ နှစ်အရွယ်ကလေးငယ်ဟာ ပျောက်ဆုံးသွားခဲ့တာဖြစ်ပြီး ၄ ရက်အကြာ ဖေဖော်ဝါရီလ ၂၂ ရက်ရောက်မှ ဆီဆိုင်ရှေ့က ရေကန်ထဲမှာ သေဆုံးလျက် ပြန်ရှာတွေ့ထားတယ်လို့ ပခုက္ကူအခြေစိုက် လူမှုကူညီရေးအသင်း တာဝန်ရှိသူက ပြောပါတယ်။

ကလေးငယ်နဲ့ သူ့မိဘတွေက ပဲခူးကနေ ဖေဖော်ဝါရီလ ၁၈ ရက်နေ့မှာ ပခုက္ကူမြို့ နယူးဒေးဆီဆိုင်ကို ဆီဘောက်ယာဉ်နဲ့ မိသားစုအလိုက် ရောက်ခဲ့ပြီး ဆီဆိုင်မှာ ညအိပ်ကားရပ်နားချိန် ကလေးငယ်ကို ယာဉ်အကူနှစ်ဦးနဲ့အတူ ကားအောက်မှာ သိပ်ထားရာမှ ပျောက်ဆုံးသွားခဲ့တာပါ။

"အဲ့ဒီနေ့က သူတို့က ဆီလာချတာ၊ နယူးဒေး ဆီဆိုင်ကို ၊ ညကို ဆီဆိုင်မှာ အိပ်ရင်းနဲ့ ည ၁၀ နာရီလောက်မှာ အားလုံး အိပ်ပျော်သွားကြတယ်လို့ ပြောတယ်၊ ကလေးက ဘယ်အချိန်ထသွားလဲတော့ မသိဘူး၊ စပယ်ယာရော အတူအိပ်နေတာ ၊ မနက် ၄ နာရီလောက်မှ ကြည့်မိတာတဲ့၊ အဲ့အချိန် လိုက်ရှာတော့ မရှိတော့ဘူး၊ အဲ့ကတည်းက ရှာတာ၊ ၃ ရက်ကျော် ၄ ရက်လောက်ကျမှ ဆီဆိုင်ရဲ့ အရှေ့ဖက်က ကန်ထဲမှာ တွေ့တာ၊ ဒီနေ့မနက် သိသိချင်း လှမ်းဆက်တာတော့ ၈ နာရီဝန်းကျင်ပဲ၊ ကလေးက ၆ နှစ်နဲ့ ၁ လပဲ ရှိသေးတယ် " လို့ ပခုက္ကူမြို့ပုညမုဒိတာအသင်းက ပြောပါတယ်။

ကလေးငယ်ရဲ့ ရုပ်အလောင်းကို ဖေဖော်ဝါရီလ ၂၂ ရက်၊ မနက် ၈ နာရီခန့်မှာ နယူးဒေးဆီဆိုင်ရှေ့က ရေကန်ထဲမှာဒေသခံတွေက တွေ့ရှိခဲ့လို့ မိဘဖြစ်သူတွေကို ဆက်သွယ်ပြီး ရုပ်အလောင်းကို ပုညမုဒိတာနိဗ္ဗာန်ယာဥ်နဲ့ ပခုက္ကူဆေးရုံ ပို့ဆောင်ထားပါတယ်။

ဓာတ်ပုံ ( ပုညမုဒိတာ )

မန္တလေး၊ စဉ့်ကိုင်မြို့နယ်၊ ပလိပ်မြို့ရှိ ဒုဋ္ဌဝတီမြစ် လှေဆိပ်မှာ ဖေဖော်ဝါရီ ၂၁ ရက် နေ့လယ် ၁၂ နာရီခွဲလောက်က ရေဆင်းကူးတဲ့ အသက် ၁၈ နှစ်အရွယ် လူငယ်အမျိုးသားတဦး ရေနစ်သေဆုံးခဲ့တယ်လို့ မန္တလေးတိုင်း ရေငုပ်ကယ်ဆယ်ရှာဖွေရေးအဖွဲ့ကနေ သိရပါတယ်။

အဆိုပါ လူငယ်အမျိုးသားဟာ ပလိပ်မြို့က မိုတယ်ဝန်ထမ်းတဦး ဖြစ်တယ်လို့ သိရပြီး ဒုဋ္ဌဝတီမြစ်က လှေဆိပ်မှာ ရေဆင်းကူးရာကနေ နစ်မြုပ်သွားတဲ့အတွက် ဒေသခံတွေက ကယ်ဆယ်ရေးအဖွဲ့တွေကို အကူအညီ တောင်းခဲ့တာကြောင့် အဲ့ဒီနေ့ မွန်းလွဲ ၂ နာရီခွဲလောက်မှာပဲ ရေနစ်တဲ့ ရေချိုးဆိပ်ကနေ ပေ ၂၀၀ ခန့်အကွာမှာ သေဆုံးလျက် ပြန်လည်ဆယ်ယူနိုင်ခဲ့ကာ မိသားစုဝင်တွေကို အပ်နှံခဲ့တယ်လို့ သိရပါတယ်။

“ရေနစ်ပြီး မြုပ်သွားတာက ၁၂ ‌နာရီခွဲအကျော်လောက်မှာ ဖြစ်တာ။ ကျနော်တို့က ၁ နာရီ ၁၅ မိနစ်လောက်မှာ ရောက်ပြီးတော့ ရှာဖွေကယ်ဆယ်မှုတွေ လုပ်တယ်။ ၂ နာရီခွဲမှာ ရေနစ်တဲ့နေရာနဲ့ ပေ ၂၀၀၊ ၃၀၀ အကွာအဝေးလောက်မှာ အလောင်းကို ပြန်တွေ့ပါတယ်။ အသက်က ၁၈ နှစ်၊ မိုတယ်ဝန်ထမ်း၊ နစ်တာက လှေဆိပ်၊ ရေချိုးဆိပ်လို့လည်း ခေါ်ပါတယ်” လို့ မန္တလေးတိုင်း ရေငုပ်ကယ်ဆယ်ရှာဖွေရေးအဖွဲ့က ပြောပါတယ်။

‌ပြီးခဲ့တဲ့ ဖေဖော်ဝါရီ ၁၉ ရက်ကလည်း အမရပူရမြို့နယ်၊ ဥယျာဉ်တော်ကျေးရွာက ကိုရင် ၅ ပါး ဒုဋ္ဌဝတီမြစ်ထဲ ရေဆင်းကူးရာက ၅ ပါးစလုံး ရေနစ်ခဲ့ပြီး ၄ ပါးဆယ်ယူနိုင်ပေမဲ့ ၁ ပါး ရေနစ်သေဆုံးခဲ့တယ်လို့ သိရပါတယ်။

ဓာတ်ပုံ ( မန္တလေးရေငုပ် ကယ်ဆယ်ရှာဖွေရေးအဖွဲ့ )