ရန်ကုန်အခြေစိုက် ရေဘဝဲ ပြည်သူ့အကျိုးပြု လူငယ်အဖွဲ့အစည်းက စစ်အာဏာရှင်ဆန့်ကျင်ရေး သပိတ်တိုက်ပွဲတွေမှာ ပါဝင်လိုသူတွေကို ဖိတ်ခေါ်နေပါတယ်။

မေ ၁၀ ရက် ဒီနေ့ရက်စွဲနဲ့ ထုတ်ပြန်ချက်ထဲမှာတော့ လိုအပ်ချက်တွေအနေနဲ့ နွေဦးတော်လှန်ရေးနဲ့ အဖွဲ့အစည်းအပေါ် သစ္စာရှိနိုင်သူ၊ ရန်ကုန်မြို့တွင်း နှံ့စပ်စွာသွားလာနိုင်သူ၊ တပတ်ကို ၃ ရက် အချိန်ပေးနိုင်သူ၊ ချမှတ်ထားတဲ့ စည်းမျဥ်းစည်းကမ်းတွေကို တိကျစွာ လိုက်နာနိုင်သူတွေ ဖြစ်ရမယ်လို့ ဖော်ပြထားပါတယ်။

ဆက်သွယ်လိုသူတွေအနေနဲ့ တယ်လီဂရမ်လင့်ခ် @OCTOPUSoffice ကတဆင့် ဆက်သွယ်နိုင်ပြီး နှစ်ဦးနှစ်ဖက် လုံခြုံရေးဆိုင်ရာ ဦးစားပေးပြီးတော့ အချိန်ယူကာ အွန်လိုင်းကနေ အဆင့်ဆင့် စိစစ်ရွေးချယ်သွားမယ်လို့ ဆိုပါတယ်။

ရေဘဝဲ ပြည်သူ့အကျိုးပြု လူငယ်အဖွဲ့အစည်းဟာ လာမယ့် ၂၀၂၃ ဇန်နဝါရီ ၂၈ ရက်မှာ ၂ နှစ်တိုင် ရပ်တည်နိုင်ခဲ့ပြီ ဖြစ်ပါတယ်။

ဒီကာလတွေအတွင်းမှာ ရေဘဝဲအဖွဲ့ဝင် ရဲဘော်ပေါင်း ၁၅ ယောက်လောက် စစ်ကောင်စီရဲ့ ဖမ်းဆီး ထောင်ချမှုခံထားရပြီး အဲဒီထဲမှာ အမျိုးသား၊ အမျိုးသမီး အပါအဝင် လိင်စိတ် ခံယူမှုကွဲပြားသူ LGBTIQ တွေအပါအဝင် ဖြစ်တယ်လို့ ရေဘဝဲအဖွဲ့ရဲ့ တာဝန်ရှိသူတွေက ပြောထားပါတယ်။

ဒါ့အပြင် ပြီးခဲ့တဲ့ ဇန်နဝါရီလတုန်းကလည်း ရန်ကုန်မြို့၊ အင်းစိန်ထောင်ကနေ တိတ်တဆိတ် ထောင်ပြောင်းရွှေ့ခံထားရတဲ့ အကျဉ်းသား ၇၀၀ လောက်ထဲမှာ ရေဘဝဲအဖွဲ့က နိုင်ငံရေး အကျဉ်းသားလူငယ် ၃ ယောက် ပါဝင်ခဲ့တယ်လို့ သိရပါတယ်။

ဒါပေမဲ့ အဲဒီလို အခက်အခဲတွေကြားကနေ ပြည်သူလူထုရဲ့ ပါဝင်ကူညီမှုနဲ့ ရန်ကုန် ပြောက်ကျားသပိတ်ပေါင်း ၇၀ ကျော် ဆင်နွှဲနိုင်ခဲ့ပြီ ဖြစ်တယ်လို့လည်း ဆိုပါတယ်။

အာဏာသိမ်း အကြမ်းဖက်စစ်ကောင်စီဟာ မြန်မာ့နိုင်ငံရေးဗဟိုချက်ဖြစ်တဲ့ ရန်ကုန်နဲ့ မန္တလေးက ပြောက်ကျားသပိတ်တွေကို နည်းမျိုးစုံသုံးပြီး နှိမ်နင်းဖြိုခွဲနေပေမဲ့ ပြောက်ကျားတပ်ဖွဲ့တွေဘက်ကလည်း နှိမ်နင်းနေတဲ့ကြားထဲက ဆန္ဒပြမှုတွေ ပြုလုပ်နေကြတာ လည်း ဖြစ်ပါတယ်။

နိုင်ငံရေးအကျဉ်းသားများ ကူညီစောင့်ရှောက်ရေးအသင်း (အေအေပီပီ) ရဲ့ နောက်ဆုံး ထုတ်ပြန်ချက်မှာတော့ နွေဦးတော်လှန်ရေးကာလအတွင်း ဒီနေ့အထိ ၁၇,၇၆၆ ယောက် လက်ရှိ ချုပ်နှောင်ခံထားရဆဲဖြစ်ပြီး အဲဒီထဲက ၅,၈၁၁ ယောက်ကတော့ ထောင်ဒဏ် ချမှတ်ခံထားရတယ်လို့ ဆိုပါတယ်။

တော်လှန်ရေးနဲ့ဆက်စပ်ပြီး သေဒဏ်ချမှတ်ခံထားရကာ အကျဉ်းထောင်တွေထဲ ထိန်းသိမ်းခံနေရသူ အရေအတွက်ကတော့ ၁၁၂ ယောက် ရှိနေပြီး မျက်ကွယ် သေဒဏ် ချမှတ်ခံထားရသူ ၄၂ ယောက်အပါအဝင် ၁၂၁ ယောက်ကတော့ မျက်ကွယ်ပြစ်ဒဏ်ချ မှတ်ခံထားရတာကြောင့် သေဒဏ်ချမှတ်ခံထားရသူ စုစုပေါင်း ၁၅၄ ယောက် ရှိလာခဲ့ပြီ ဖြစ်ပါတယ်။

လတ်တလောအချိန်ထိ ဖမ်းဆီးခံရပြီး ပြန်လည်လွတ်မြောက်လာသူဦးရေကတော့ ၄,၂၂၄ ယောက် ရှိခဲ့တယ်လို့ ဆိုပါတယ်။

အကြမ်းဖက်စစ်ကောင်စီရဲ့ လုံခြုံရေးတိုးမြှင့်ထားတဲ့ မြို့နယ်တခုဖြစ်တဲ့ ရန်ကုန်မြို့၊ စမ်းချောင်းမြို့နယ်ထဲက တော်လှန်ရေးပန်းခြံအနီးမှာ ရေဘဝဲ (ပြည်သူ့အကျိုးပြု လူငယ်အဖွဲ့အစည်း)က တော်လှန်သင်္ကြန်အတွက် နှိုးဆော်မှု ပြုလုပ်ခဲ့ကြပါတယ်။

“မိဘပြည်သူများရှင်၊ တော်လှန်သင်္ကြန်အချိန်အခါသမယကို ရောက်ရှိလာပြီ ဖြစ်ပါတယ်။ နွေဦးတော်လှန်ရေးနဲ့ယှဥ်တွဲပြီး ရိုးရာယဥ်ကျေးမှုအမွေအနှစ် ပွဲတော်များကို ထိန်းသိမ်းကြတဲ့အခါမှာ - မအေ (-) မင်းအောင်လှိုင်၊ မင်းအောင်လှိုင် မအေ (-) ကြောင့် အိုးပစ်၊ အိမ်ပစ်၊ သေကွဲ၊ ရှင်ကွဲကွဲနေကြတဲ့ ကျနော်တို့ နိုင်ငံသူနိုင်ငံသားတွေအတွက် ကိုယ်ချင်းစာစိတ်အပြည့်နဲ့ တိတ်တိတ်လေးပျော်ပေးကြဖို့ ရေဘဝဲက နှိုးဆော်တိုက်တွန်းလိုက်ပါတယ်”

ဒီလှုပ်ရှားမှုမှာတော့ မကြာသေးခင်က ထွက်ရှိထားတဲ့ သရုပ်ဆောင်၊ အဆိုတော် မင်းမော်ကွန်းရဲ့ CDM သင်္ကြန်သီချင်းကို တော်လှန်ယိမ်းအကနဲ့ ကပြဖျော်ဖြေတင်ဆက်ကာ စစ်အာဏာရှင် ဆန့်ကျင်ရေးလူထုလှုံ့ဆော်မှု ပြုလုပ်ခဲ့ကြတာဖြစ်ပြီးတော့ ဒီလှုပ်ရှားမှုကို Youth Scout for Democracy (Y.S.D) ကနေ မြေပြင်ကင်းထောက်အဖြစ် ကူညီဆောင်ရွက်ပေးခဲ့တယ်လို့ ဆိုပါတယ်။

အာဏာသိမ်း အကြမ်းဖက်စစ်ကောင်စီကတော့ ဒီနှစ် ၂၀၂၃ သင်္ကြန်ကို ရန်ကုန်၊ မန္တလေး၊ နေပြည်တော် မြို့ကြီးတွေ အပါအဝင် သူတို့ ထိန်းချုပ်လို့ရတဲ့ မြို့တွေမှာ သင်္ကြန်မဏ္ဍပ်တွေနဲ့ လမ်းလျှောက်သင်္ကြန်ပွဲတွေ စည်စည်ကားကားကျင်းပဖို့ ပြင်ဆင်နေပါတယ်။

စစ်ကောင်စီ အာဏာသိမ်းထားတဲ့ကာလမှာ ပြည်သူတွေသင်္ကြန် ဖြတ်သန်းတဲ့အခါ စစ်တပ်နဲ့ ဆက်စပ်ထုတ်ကုန်တွေ အသုံးမပြုဖို့၊ စစ်တပ် လက်အောက်ခံ စီးပွားရေးလုပ်ငန်းတွေကို အားမပေးကြဖို့ တော်လှန်ရေး အင်အားစုတွေက တိုက်တွန်းထားပါတယ်။

စစ်ကောင်စီတပ်ဖွဲ့တွေဟာ တဖက်မှာ တော်လှန်‌ရေးအားကောင်းတဲ့ ဒေသတွေက ပြည်သူတွေရဲ့ နေအိမ်တွေကို မီးရှို့ဖျက်ဆီးတာ၊ သတ်ဖြတ်တာနဲ့ ဖမ်းဆီးနှိပ်စက်တာတွေ ပြုလုပ်နေပြီး တဖက်မှာလည်း တိုင်းပြည်အေးချမ်းနေတာကို ပြချင်တဲ့အတွက် ပျော်ပွဲရွှင်ပွဲတွေ အတင်းအကျပ် ဖန်တီးနေပါတယ်။