ကချင်ပြည်နယ်၊ ဖားကန့်မြို့မှာ ဒီဇင်ဘာ ၂၂ မနက်ပိုင်းက မြေစာ ပုံပြိုကျပြီး ရေမဆေးကျောက် ရှာဖွေသူ ၁၀၀ ကျော်ပျောက်ဆုံးနေတယ်လို့ သိရပါတယ်။
ရေမဆေးကျောက် ရှာဖွေသူ ၁၀၀ ကျော်လောက်ဟာ မှော်ဆီစာသာယာကုန်းမှာ မနက် ၄ နာရီခွဲလောက်က ကျောက်ရှာဖွေနေစဉ် မြေစာပုံပြိုကျတဲ့အတွက် ပျောက်ဆုံးသွားတယ်လို့ ဒေသခံတွေက ဆိုပါတယ်။
“မနက် ၄ နာရီခွဲလောက်က မြေပြိုတယ်၊ အောက်မှာရှာနေတဲ့သူတွေလည်း ပါသွားတယ်။ ၁၀၀ ကျော်လောက်ရှိမယ်။ မနက် ကျနော်တို့ လှည့်ပတ်ပြီး လူရှာနေတုန်းတော့ ရှာဖွေ ကယ်ဆယ်ရေးတွေ ရောက်မလာသေးဘူး" လို့ မြေစာပုံအတွင်း လူပျောက်လိုက်ရှာသူ ဒေသခံ အမျိုးသားတစ်ဦးက ပြောပါတယ်။
မြေစာပုံပြိုကျမှုကြောင့် ဘယ်လောက်သေဆုံးတယ်ဆိုတာ သိရဖို့ ဒီဗွီဘီက စုံစမ်းမေးမြန်းနေဆဲဖြစ်ပြီး မြေစာပြိုကျတဲ့ ရေကန်အတွင်းကနေ ပြန်တက်လာတဲ့ သူတွေလည်း အနည်းငယ်ရှိတယ်လို့ သိရပါတယ်။
ဒီဇင်ဘာ ၁၉ ရက် မနက်ပိုင်းကလည်း ဖားကန့်မြို့နယ် မနမှော်မှာ မနက် ၂ နာရီလောက်က မြေစာပစ်ကားတွေ စွန့်ပစ်မြေစာလာသွန်နေချိန် ဘေးဘောင်ပြိုကျပြီး ကားမောင်းသမားနဲ့ ရေမဆေးကျောက်ရှာဖွေသူ ၁၀ ဦးထက်မနည်း ပျောက်ဆုံးခဲ့ပါတယ်။
ဖားကန့်မြို့နယ်မှာ သြဂုတ်လ ၂၀ ရက်နေ့ကစပြီး အင်တာနက်ဖြတ်တောက်ခံထားရပါတယ်။
ကချင်ပြည်နယ်၊ မိုးညှင်းခရိုင်၊ ဖားကန့်မြို့နယ်၊ လုံးခင်းကျေးရွာအုပ်စု ကထန်ကျေးရွာအနီးက မြေစာပုံအဟောင်းတခုမှာ ကျောက်စိမ်းအဟောင်း မြှုပ်နှံထားတဲ့ ကျောက်သိုက်တခု တွေ့ရှိခဲ့လို့ ရေမဆေးကျောက်ရှာဖွေသူတွေ တူးဖော်နေကြပါတယ်။
တချိန်က ကျောက်စိမ်းတူးဖော်ရေးကုမ္ပဏီတခုရဲ့ စွန့်ပစ်မြေစာပုံအဟောင်းမှာ တွေ့ရှိခဲ့တာပါ။ ယခင်က မက်စ်မြန်မာ (Max Myanmar ) ကုမ္ပဏီနေရာဖြစ်ပြီး နောက်ပိုင်းမှာ တစ်သုံးလုံး ကုမ္ပဏီက မြေစာစွန့်ပစ်တဲ့နေရာ ဖြစ်တယ်လို့ ရွာသားတွေက ဆိုပါတယ်။
ကုမ္ပဏီက မလိုချင်လို့ မြှုပ်ပစ်ခဲ့တဲ့ကျောက်တွေ ဖြစ်ဖို့များတယ်လို့လည်း ကထန်ရွာသား ကိုမျိုးဝင်းညွန့်က ပြောပါတယ်။
“အရင်က ကုမ္ပဏီတွေက ကောင်းပေ့ဆိုတဲ့ ရှယ်တွေပဲ ယူကြတာလေ။ သိန်းပေါင်း သောင်းထပ် သိန်းထပ်တန်တဲ့ ကျောက်ကောင်းတွေပဲ ယူကြတာလေ။ သိပ်မကောင်းလောက်တဲ့ ကျောက်ဆို မယူကြဘူးလေ။”
အခုနေရာမှာ အရင်က တန်ပေါင်းများစွာ အလေးချိန်ရှိတဲ့ ကျောက်စိမ်းတုံးကြီးကို ကုမ္ပဏီတခုက ရရှိခဲ့ဖူးတယ်လို့ သိရပါတယ်။
အခုတွေ့ရှိတဲ့ကျောက်ထဲမှာ သိန်းပေါင်း ရာပိုင်း၊ ထောင်ပိုင်း တန်တဲ့ ကျောက်တွေလည်း ပါရှိနိုင်ပြီး လောလောဆယ် သိန်းပေါင်း လေး ငါးဆယ်တန်တဲ့ ကျောက်တွေ ရောင်းနေရတာ တွေ့တယ်လို့လည်း သိရပါတယ်။
အမည်မဖော်လိုတဲ့ ဝယ်ရောင်းလောပန်းတဦးက “သိန်းပေါင်း ရာပိုင်း ထောင်ပိုင်း တန်တဲ့ ကျောက်တွေ ပါနိုင်တယ်ဗျ။ အခု ကျနော်တို့တောင် ဆယ်ကြီးရာပိုင်း ကျောက်တွေ ဝယ်နေရတာဗျ” လို့ ပြောပါတယ်။
သတင်း - ဇော်မိုးထက်(ဖားကန့်)
