ရန်ကုန်သုသာန် ၄ ခုမှာ ဇူလိုင် ၂၉ ရက်နေ့ အတွက် မီးသင်္ဂြိုဟ်ခဲ့ရတဲ့ ရုပ်အလောင်း ၈၀၀ နီးပါးရှိခဲ့တယ်လို့ နာရေး အကူအညီပေးနေတဲ့ ပရဟိတသမားတွေကပြောပါတယ်။

ဇူလိုင်ရေဝေးသုသာန်မှာ  ရုပ်အလောင်း ၃၆၀ ကျော်၊ ထိန်ပင်မှာ ၃၀၀ ကျော်၊ ကျီစုမှာ ၃၀ ကျော်၊ ကျူချောင်းမှာ ၁၀၀ ဝန်းကျင် စုစုပေါင်း ရုပ်အလောင်း ၈၀၀နီးပါး မီးသင်္ဂြိုဟ်ခဲ့ရတာဖြစ်ပါတယ်။

ကျူချောင်းသုသာန်မှာ မီးသင်္ဂြိုဟ်ရတဲ့ရုပ်အလောင်းအရေအတွက် ၁၀၀ ဝန်းကျင်ပုံမှန်ဖြစ်နေပြီး ကျီစုသုသာန်မှာတော့ အရင်ရက်တွေကထက် မီးသင်္ဂြိုဟ်ရတဲ့ရုပ်အလောင်းအရေအတွက် သိသိသာသာကျသွားတယ်လို့ ကျူချောင်း ပရဟိတသမားတစ်ဦးက ပြောပါတယ်။ 

သုသာန်တွေမှာ မီးသင်္ဂြိုဟ်ရတဲ့ရုပ်အလောင်းအရေအတွက် ကျသွားသလို နာရေးအတွက် အကူအညီတောင်းတဲ့သူလည်း နည်းသွားတယ်လို့ ပရဟိတသမားတွေကပြောပါတယ်။

သုသာန်တွေမှာ ရုပ်အလောင်းတွေ ပိုမို မီးသင်္ဂြိုဟ်နိုင်ဖို့  မီးဖိုအသစ်တွေကို စစ်ကောင်စီက ဆက်လက်ဆောက်လုပ်နေတာတွေ့ရတယ်လို့ဆိုပါတယ်။

ရေ​ဝေးသုသာန်  ခန်းမ ၁(က) နဲ့ ၁(ခ)  နှစ်ခုအကြား၊ အ​နောက်ဘက်မှာ စစ်ကောင်စီက မီးသင်္ဂြိုဟ်အသစ်တည်ဆောက်​နေ​တာဖြစ်ပါတယ်။ လက်ရှိ မီးသင်္ဂြိုဟ်စက်ဖြစ်​တဲ့  အမှတ်(A) မီးသင်္ဂြိုဟ်စက်ရဲ့ အနောက်ဘက်မှာ ဖြစ်ပါတယ်။

ရန်ကုန်သုသာန်တွေမှာ တရက်ကို ရုပ်အလောင်း ၃၀၀၀ ကျော်အထိ မီးသင်္ဂြိုဟ်နိုင်မယ့် မီးဖို ၁၀ လုံးကို တပြိုင်တည်းတည်ဆောက်နေတယ်လို့ ဇူလိုင် ၂၇ ရက်နေ့မှာ စစ်ကောင်စီ မီဒီယာတွေကနေ ကြေညာခဲ့ပါတယ်။ 

ရေဝေးသုသာန် တစ်ခုတည်းမှာ ၅ ပေါက်တွဲ ၂တွဲပါဝင်တဲ့ မီးဖို ၅လုံးအသစ်တည်ဆောက်နေပြီး လူ ၅၀ကို ၁ နာရီအတွင်း မီးသင်္ဂြိုဟ်နိုင်မယ်လို့ ဆိုပါတယ်။ ရေဝေး တစ်နေရာထဲမှာ တစ်ရက်ကို ရုပ်အလောင်း ၁၀၀၀ ကျော်အထိ မီးသင်္ဂြိုဟ်နိုင်မယ်လို့လည်းဆိုပါတယ်။

စစ်ကောင်စီက ပြည်သူတွေအတွက် ကာကွယ်ကုသရေးမဆောင်ရွက်ဘဲ အခုလိုစီစဉ်တာကို ကြားသိရတဲ့အတွက် အံ့ဩစိတ်ပျက်မိတယ်လို့ ကျန်းမာရေးဝန်ထမ်းတွေနဲ့ ပရဟိတသမားတွေက ဝေဖန်နေကြပါတယ်။

ဇူလိုင် ၂၈ ရက်နေ့ကလည်း  ရန်ကုန်သုသာန်လေးခုမှာ မီးသင်္ဂြိုဟ်ရတဲ့ရုပ်အလောင်း ၈၀၀ နီးပါးရှိခဲ့ပြီး သေဆုံးနှုန်း မကျသေးတဲ့အတွက် ပြည်သူတွေအနေနဲ့ ကိုဗစ်ကာကွယ်ကုသရေးကို ဂရုစိုက်ပြီးဆောင်ရွက်ရမယ်လို့ ပရဟိတသမားတွေက ပြောပါတယ်။

ရန်ကုန်မြို့က သုသာန်တွေမှာ မီးသင်္ဂြိုဟ်တဲ့ ရုပ်အလောင်းတွေ များပြားနေဆဲဖြစ်ပြီး ကိုဗစ်ကြောင့် သေဆုံးနှုန်းမကျသေးဘူးလို့ အကူအညီပေးနေတဲ့ ပရဟိတအဖွဲ့တွေကပြောပါတယ်။ 

ဇူလိုင် ၁၇ ရက်နေ့မှာ ရန်ကုန်မြို့က ထိန်ပင်၊ ရေဝေး၊ ကျီစု၊ ကျူချောင် သုသာန်တွေမှာ မီးသင်္ဂြိုဟ်တဲ့ ရုပ်အလောင်းတွေ များပြားနေဆဲဖြစ်ပြီး သေဆုံးသူအများစုဟာ ကိုဗစ်ကြောင့် အောက်စီဂျင်မရဘဲ သေဆုံးတာတွေ့ရတယ်လို့ အကူအညီပေးနေတဲ့ အရပ်ဘက်အဖွဲ့တွေက ပြောပါတယ်။ 

ထိန်ပင်မှာ တစ်ရက်ကို ရုပ်အလောင်း ၃၀၀ ကျော်၊ ရေဝေးမှာ ၂၀၀ ကျော်၊ ကျီစုမှာ ၁၀၀ ကျော်၊ ကျူချောင်မှာ တစ်ရက်ကို ရုပ်အလောင်း ၂၀နီးပါး မီးသင်္ဂြိုဟ်နေရတာဖြစ်ပြီး စုစုပေါင်း တစ်ရက်ကို ရုပ်အလောင်း ၆၀၀ ကျော် ၇၀၀ နီးပါး ရှိနေတယ်လို့ ပရဟိတသမားတဦးက ပြောပါတယ်။

မီးသင်္ဂြိုဟ်နေတဲ့ ရုပ်အလောင်းအရေအတွက်ကို သုသာန်တာဝန်ရှိသူတွေဆီကို ဆက်သွယ်မေးမြန်းပေမယ့် အထက်ဌာနတွေက ခွင့်မပြုတာကြောင့် ဖြေဆိုခွင့်မရှိဘူးလို့ ဆိုကြပါတယ်။ 

ပရဟိတအဖွဲ့တွေ ခန့်မှန်းတဲ့စာရင်းဟာ အဖွဲ့အချင်းချင်း အကူအညီပေးခဲ့ရတဲ့အခြေအနေကို မေးမြန်းပြီး ခန့်မှန်းတွက်ချက်ထားတာ ဖြစ်ပါတယ်။ ပရဟိတအဖွဲ့တွေဟာ မနိုင်ဝန်ထမ်းနေရပြီး အားလုံး ကိုကူညီနိုင်ဖို့အချိန်မလုံလောက်ဘဲ အခက်အခဲရှိနေပါတယ်။ သေဆုံးနှုန်းမကျသေးတာကတော့ မျက်မြင်ဖြစ်တဲ့အတွက် သေချာတယ်လို့ ပရဟိတသမားတဦးက ပြောပါတယ်။

မြေပြင်မှာ အိမ်တိုင်ရာရောက် ဆေးကုသမှုပေးနေတဲ့ ပရဟိတဆရာဝန်တစ်ယောက်ကတော့ သေဆုံးနှုန်းမြင့်တက်နေတာနဲ့ပတ်သက်ပြီး ရောဂါလက္ခဏာပြင်းထန်တဲ့ လူနာတွေကို ဆေးရုံတွေက လက်မခံဘဲ အိမ်ပြန်လွှတ်နေတဲ့အခြေအနေအပေါ် မေးခွန်းထုတ်ပါတယ်။ 

သူ့ရဲ့လေ့လာတွေ့ရှိချက်တွေအရ တချို့ဆေးရုံတွေဟာ အမှန်တကယ်နေရာမရှိလို့ လက်မခံတာဖြစ်ပေမယ့် တချို့ဆေးရုံတွေကတော့ အမိန့်တစုံတရာကြောင့် မရိုးမသားဆောင်ရွက်နေတာလို့ ရွှေသမီး Medical Team ဉီးဆောင်ဆရာဝန်ကဝေဖန်ပါတယ်။ 

အောက်ဆီဂျင်ရဖို့အခက်အခဲရှိနေသလို ပရဟိတအဖွဲ့တွေက ပြည်သူကို အကူအညီပေးဖို့ လိုအပ်တဲ့ ဆေးဝါးနဲ့ အထောက်အကူပြုပစ္စည်းတွေ ဝယ်ယူရတာလည်း အခက်အခဲရှိနေတယ်လို့ ဆိုပါတယ်။

ရန်ကုန်မြို့မှာ ဇူလိုင် ၁၀ ရက်နေ့ကစပြီး အောက်ဆီဂျင်ပြတ်လပ်တာကြောင့် ကိုဗစ်လူနာသေဆုံးနှုန်း ဆက်တိုက်မြင့်တက်ခဲ့တာပါ။

စစ်ကောင်စီလက်အောက်ခံကျန်းမာရေးဌာနက ထုတ်ပြန်တဲ့ ပိုးကူးစက်နှုန်းနဲ့ သေဆုံးနှုန်းထက် မြေပြင်မှာ အခြေအနေပိုဆိုးနေတယ်လို့ ပရဟိတအဖွဲ့တွေက ခန့်မှန်းပါတယ်။ 

ရန်ကုန်မြို့က သုသာန်တွေမှာ ဇူလိုင် ၁၃ ရက်နဲ့ ၁၄ရက်နေ့တွေတုန်းက ကြမ်းပြင်မှာရုပ်အလောင်းတွေ တန်းစီပြီး မီးသင်္ဂြိုဟ်ရတဲ့အထိ အခြေအနေဆိုးရွားခဲ့ပါတယ်။ 

ဇူလိုင် ၁၅ ရက်နေ့မှာတော့ ရုပ်အလောင်းတွေကို မြို့နယ်အလိုက်ခွဲပြီး သင်္ဂြိုဟ်ဖို့ စစ်ကောင်စီက စီစဉ်ခဲ့ပြီး အခြေအနေကို ထိန်းသိမ်းဖို့ကြိုးစားခဲ့ပါတယ်။

ဒီဗွီဘီက ပရဟိတသားတွေကို စုံစမ်းမေးမြန်းချက်အရ ဇူလိုင် ၁၆ ရက်နေ့က တရက်တည်း အလောင်း ၆၀၀ ကျော် ၇၀၀ ကြား သင်္ဂြိုဟ်ပေးခဲ့ရတယ်လို့ သိရပါတယ်။