စစ်တပ်အာဏာသိမ်းတဲ့ ၂ နှစ်တာကာလအတွင်း စစ်ကိုင်းတိုင်း၊ ရေဦးမြို့နယ်ထဲမှာရှိတဲ့ ကျေးရွာ ၅၀ က ဒေသခံတွေရဲ့ နေအိမ် ၃,၁၇၁ လုံးကို စစ်ကောင်စီတပ်က မီးရှို့ဖျက်ဆီးခဲ့တယ်လို့ ရေဦးမြို့နယ် ပြည်သူ့ကာကွယ်ရေးတပ်မတော်က ဖေဖော်ဝါရီ ၁၆ ရက်မှာ သတင်းထုတ်ပြန်ပါတယ်။
အဲဒီစာရင်းတွေက ရေဦးမြို့နယ်ထဲမှာရှိတဲ့ ပကဖ၊ ပအဖ၊ PDF တွေက မြေပြင်ကွင်းဆင်းပြီး စာရင်းကောက်ယူထားတာဖြစ်ကာ အခုစာရင်းတွေမှာ မီးဖိုဆောင်၊ စတိုဆောင်၊ နွားတဲတွေ မီးရှို့ဖျက်ဆီးခံရတာကို ထည့်သွင်းထားတာ မရှိဘူးလို့လည်း ဆိုပါတယ်။
လက်ရှိမှာတော့ မြို့နယ်တွင်းကလူတွေက ကူညီလှူဒါန်းဖို့ လုံလောက်တဲ့ အနေအထား မရှိတာကြောင့် ပြန်လည်ထူထောင်ရေးလုပ်ငန်းတွေ လုပ်ဆောင်ဖို့ အခက်အခဲတွေရှိနေပြီး မကြာခင်မှာလည်း နွေရောက်တော့မှာဖြစ်လို့ ပူပြင်းတဲ့ ဒေသဖြစ်တဲ့အတွက် အမိုးအကာတွေ လိုအပ်နေပြီး အဝေးရောက် ကင်းလွတ်နယ်မြေတွေမှာရှိတဲ့ ပြည်သူတွေက ကူညီလှူဒါန်းပေးဖို့ကိုလည်း မေတ္တာရပ်ခံထားပါတယ်။
ပြည်သူမှ ပြည်သူဆိုတဲ့ အစီအစဉ်မှာပဲ သက်ဆိုင်ရာ ဒေသခံ ကျေးရွာတွေကို တိုက်ရိုက်လှူလို့ရသလို မြို့နယ် လူသားစာနာတာဝန်ခံတွေကိုလည်း တိုက်ရိုက်ချိတ်ဆက်ပြီး လှူလို့ရတယ်လို့လည်း သက်ဆိုင်ရာ တာဝန်ရှိသူတွေက ပြောပါတယ်။
စစ်ကိုင်းတိုင်း၊ ရေဦးမြို့နယ်မှာ စက်တင်ဘာ ၁၆ ရက်ညနေပိုင်းက ရေဦးကထွက်လာတဲ့ စစ်ကောင်စီကား ၃ စီးကို ရေဦး-သပိတ်ကျင်းလမ်းပိုင်းမှာ မိုင်းဆွဲတိုက်ခိုက်ခဲ့သလို ရေဦးကနေ ဆိုင်ကယ်နဲ့ ထွက်လာတဲ့ စစ်ကောင်စီတပ်သား ၄ ဦးကို မိုင်းဆွဲတိုက်ခိုက်ခဲ့ရာမှာ ၃ ဦးနေရာတင်သေဆုံးခဲ့တယ်လို့ ရေဦးမြို့နယ်ပြည်သူ့ကာကွယ်ရေးတပ် ရွှေဘိုခရိုင်PDF တပ်ရင်း(၁၄) တပ်ခွဲမှူး ဗိုလ်ရာမက ပြောပါတယ်။
“ရေဦးမြို့ထွက်မှာတစ်စီး၊ မုတ်စီရွာထိပ်မှာ တစ်စီး၊ မုဒုံမှာတစ်စီး လက်ယာကုန်းက စစ်သားတွေကို ကြိုတာ။ သူတို့ကို ရေဦး-သပိတ်ကျင်းလမ်းပိုင်းမှာ မိုင်းခွဲတိုက်ခိုက်ခဲ့တယ်။ မုဒုံကတော့ မိုင်းအရင်ခွဲတယ် ပြီးတော့ ရဲဘော်တွေက လက်နက်ကြီးနဲ့ တစ်ချက်ပစ်တယ်။ ပြီးတော့ ပြန်ဆုတ်တယ်။ ပြန်ဆုတ်တဲ့အချိန်မှာ ရေဦးဘက်က စစ်သား ၄ယောက် ဆိုင်ကယ်နဲ့ပတ်တဲ့အချိန် မိုင်းဆွဲတိုက်ခိုက်တာ ၃ယောက် နေရာတင်သေသွားတယ် တစ်ယောက်ကတော့ ခြေပြတ်လက်ပြတ်ဖြစ်သွားတယ်။”
စစ်ကောင်စီတပ်တွေ မိုင်းဆွဲတိုက်ခိုက်ခံရပြီးနောက် စစ်ရဟတ်ယာဥ်တွေနဲ့ လာရောက် ပစ်ခတ်တိုက်ခိုက်ခဲ့တယ်လို့ လည်းပြောပါတယ်။
မနေ့ကလက်ယာကုန်းရွာမှာ လေယာဥ်နဲ့ ပစ်ခတ်ခံရပြီးနောက် ရဲဘော်တွေပိတ်မိနေခဲ့ပြီး မနက်ပိုင်း အဆက်အသွယ်ရချိန်မှာ တော်လှန်ရေး ရဲဘော်တယောက် ပစ်ခတ်ခံရလို့ ကျဆုံးသွားတယ်လို့ဆိုပါတယ်။
ဒါ့အပြင် ည ၈ နာရီလောက်မှာ ကျေးရွာမှာရှိတဲ့ ၈ တန်း၊ ၉တန်းအရွယ် ကျောင်းသားအယောက် ၂၀ လောက်ကို ရေဦးမြို့တိုင်းရင်းဆေးရုံထဲ ဓားစာခံအဖြစ် ဖမ်းဆီးခေါ်ဆောင်သွားခဲ့တယ်လို့ ဗိုလ်ရာမက ပြောပါတယ်။
“ကျောင်းသားကလေး အယောက်၂၀ကိုလည်း ဖမ်းပြီးတော့ ရေဦးမြို့တိုင်းရင်းဆေးရုံထဲမှာ ဓားစာခံအဖြစ်ထားတာပေါ့။ အခုချိန်ထိ ခေါ်ထားတုန်းပဲ။ တိုင်းရင်းဆေးရုံထဲမှာ အင်အား အယောက် ၁၀၀ လောက်ထပ်တိုးတယ်။ လက်ယာကုန်းမှာချတဲ့ စစ်သားတွေအကုန်လုံးကို ရေဦးမှာပြန်ပြီးတော့ မနေ့ညနေပိုင်းက ပြန်ခေါ်ပြီးတော့ တိုင်းရင်းဆေးရုံထဲမှာ ဝင်သွားတာ။”
ရေဦးမြို့နယ်တိုင်းရင်းဆေးရုံမှာ စစ်ကောင်စီတပ်သားတွေ အင်အားအများအပြားနဲ့ လုံခြုံရေးယူထားပါတယ်။
စက်တင်ဘာ ၁၃ ရက်ကလည်း ရေဦးပြည်သူ့ကာကွယ်ရေးတပ်ဖွဲ့က သွားရောက်ပစ်ခတ်ခဲ့စဥ် စစ်ကောင်စီတပ်သား ၄ ဦးသေဆုံးခဲ့တယ်လို့ သိရပါတယ်။
လက်ရှိအချိန်မှာတော့ ရေဦးမြို့နယ်တစ်ဝိုက်လုံခြုံရေးတင်းကျပ်ထားပြီး ရေဦးမြို့ဝင် မြို့ထွက်တွေမှာလည်း အင်အားအလုံးအရင်းနဲ့ လုံခြုံရေးယူထားတယ်လို့ ဒေသခံပြည်သူ့ကာကွယ်ရေးတပ်ဖွဲ့တွေက သိရပါတယ်။
