စစ်ကိုင်းတိုင်း၊ ကလေးမြို့အနီးက လေးအိမ်စုကျေးရွာကို စစ်ကောင်စီက လေကြောင်းပစ်ခတ်ခဲ့တာကြောင့် ဒေသခံတွေ ထွက်ပြေး တိမ်းရှောင်နေကြရပါတယ်။
တိုက်ပွဲမဖြစ်ဘဲ မေ ၉ ရက် ညနေ ၃ နာရီဝန်းကျင်က စစ်ကောင်စီရဲ့ Mi 35 ဂျက်ဖိုက်တာနဲ့ ရုတ်တရက် လာရောက်ပစ်ခတ်ခဲ့တာကြောင့် ရွာသားတွေအားလုံး ဘေးလွတ်ရာ ဒေသတွေနဲ့ မြို့ပေါ်တွေထိ တိမ်းရှောင်နေကြရတယ်လို့ ဆိုပါတယ်။
လေးအိမ်စုရွာသားတဦးက “ဂျက်လေယာဉ်က ပထမ ရွာပေါ်ကနေ ပျံသွားပြီး အပြန်လှည့်ပစ်တာ။ ရွာထဲကို တည့်တည့်ပစ်တာပါ။ တရွာလုံးတော့ ပြေးနေကြတယ်။ ရွာကလူတွေ ထိခိုက်ဒဏ်ရာရတာတွေတော့ မရှိကြဘူး” လို့ ဒီဗွီဘီကို ပြောပါတယ်။
အဆိုပါလေးအိမ်စုကျေးရွာမှာ PDF တွေရှိတယ် အထင်နဲ့ စစ်ကောင်စီက လေကြောင်းကနေ ပစ်တာဖြစ်နိုင်တယ်လို့ ရွာခံတွေ ခန့်မှန်းနေကြပြီး လက်ရှိ တိမ်းရှောင်နေရတဲ့ ဒေသခံတွေကတော့ နေထိုင်စားသောက်ရေး အကူအညီလိုအပ်နေတယ်လို့လည်း ပြောပါတယ်။
လေးအိမ်စုကျေးရွာမှာ အိမ်ခြေ ၂၀၀ ဝန်းကျင်ရှိပြီး ဒေသခံ ၇၀၀ ဝန်းကျင် နေထိုင်တယ်လို့ သိရပါတယ်။
ပြီးခဲ့တဲ့နှစ်ကလည်း စစ်ကောင်စီက လေးအိမ်စုရွာထဲကို စစ်ကြောင်းထိုးပြီး ဒေသခံနေအိမ်အချို့ကို မီးရှို့ ဖျက်ဆီးခဲ့ပါတယ်။
ကလေးမြို့၊ မြို့သာရပ်ကွက်က ဒေသခံ ကျော်ဇေယျာမျိုးကို စစ်ကောင်စီလက်အောက်ခံ မြို့နယ်တရားရုံးက ရာဇသတ်ကြီးပုဒ်မ ၅၀၅ (က) အရ အလုပ်နဲ့ ထောင်ဒဏ် ၂ နှစ်ချမှတ်ခဲ့တယ်လို့ မိသားစုဝင်နဲ့ နီးစပ်သူတွေက ပြောပါတယ်။
ကိုကျော်ဇေယျာမျိုးကို ဆန္ဒပြပွဲတွေမှာ ပါဝင်ကာ အကြမ်းဖက်မှုလုပ်ငန်းတွေ ဆောင်ရွက်ခဲ့တယ်စွပ်စွဲပြီး စစ်ကောင်စီက မေ ၈ ရက်က ထောင်ဒဏ်ချမှတ်ခဲ့တာလို့ ဆိုပါတယ်။
စစ်ကောင်စီ စွပ်စွဲသလို ကိုကျော်ဇေယျာမျိုးဟာ ဆန္ဒပြပွဲတွေမှာ မပါဝင်ခဲ့ဘူးလို့ မိသားစုဝင်နဲ့နီးစပ်သူတဦးက ဒီဗွီဘီကို ပြောပါတယ်။
"၈ ရက်နေ့ရုံးချိန်းမှာ အမိန့်ချပြီး မော်လိုက်ထောင်ကို ရောက်သွားပါပြီ။ သူကျန်းကျန်းမာမာရှိပါတယ်။"
ကိုကျော်ဇေယျာမျိုးဟာ မတ် ၁၁ ရက်က သာစည်ရွာကိုသွားစဉ် မြို့သာရပ်ကွက် အဖွဲ့စက် စစ်ဆေးရေးဂိတ်မှာ စစ်ကောင်စီရဲ့ ဖမ်းဆီးခံခဲ့ရတာလို့ သိရပါတယ်။
ရေဦးမြို့နယ်၊ တင်းတိမ်ရံကျေးရွာက ထန်းတော ဗောတိ အ.ထ.က စာသင်ကျောင်းကို စစ်ကောင်စီတပ်က မေ ၉ ရက် နေ့လယ် ၂ နာရီကျော်က တိုက်လေယာဉ်နဲ့ ဗုံးချတိုက်ခိုက်ခဲ့တယ်လို့ ဒေသခံရွာသားတွေက ပြောပါတယ်။
“အကြောင်းမဲ့ကို လာပစ်ခတ်တာဗျ။ ပစ်တာက ၂ ခေါက်ပစ်တာ။ ပထမက ဗုံးသီး ၈ လုံးချ ပစ်ခတ်တယ်။ နောက်တခေါက်ကျတော့ စက်လက်နက်တွေနဲ့ပစ်တာ။ ဘာကြောင့် ပစ်တာလဲတော့မသိဘူး။ မြေပြင်မှာ စစ်ရေးတင်းမာမှုလည်း မရှိဘူး။ စစ်ကြောင်းလည်း မရှိဘဲကို လာပစ်တာ။ ကံကောင်းတာက ကျောင်းသားတွေ နေအရမ်းပူလို့ ကျောင်းကို တနေကုန်မဟုတ်ဘဲ နေ့တပိုင်းပဲတက်ပြီး ကျောင်းဆင်းချိန်စောသွားလို့ အသေအပျောက်မရှိခဲ့တာဗျ။ တနေကုန်သာ ကျောင်းတက်မယ်ဆိုရင်တော့ မတွေးရဲစရာဘဲ။ ဒုတိယ ပဇီကြီးကျေးရွာဖြစ်သွားနိုင်တယ်။ သူတို့ အခုလို မိုင်းချပြီး ပစ်ခတ်တာတွေ လုပ်တာကြောင့် နေပူပူမှာ ဒေသခံသောင်းနဲ့ချီ နေရပ်စွန့်ခွာထွက်ပြေးနေကြရတယ်” လို့ တင်တိမ်ရံရွာသားတဦးက ပြောပါတယ်။
ဗုံးချတိုက်ခိုက်ခံရတာကြောင့် ကျောင်းဝင်းအတွင်း ၄ လုံးနဲ့ ကျောင်းအုတ်တံတိုင်းဘေး ၄ လုံး ကျပေါက်ကွဲခဲ့ပြီး စာသင်ကျောင်းမုခ်ပေါက်၊ အမိုးနဲ့ သွပ်အမိုးတွေ ပေါက်ထွက်ပျက်စီးသွားတယ်လို့ ဒေသခံတွေက ပြောပါတယ်။
စစ်ကိုင်းတိုင်း၊ ရွှေဘိုခရိုင်၊ ရေဦးမြို့နယ်၊ မီးမောင်းကုန်းကျေးရွာက စစ်ကောင်စီတပ်ရဲ့ မီးရှို့ခံရတဲ့ နေအိမ်တွေက မိသားစုတွေ လိုအပ်နေတဲ့ စောင်၊ ခြင်ထောင်နဲ့ စားနပ်ရိက္ခာတွေကို S&C မီးဘေး၊ စစ်ဘေး၊ ပညာရေးစောင့်ရှောက်မှုအဖွဲ့က ဇန်နဝါရီ ၃၀ ရက်မှာ သွားရောက်လှူဒါန်းခဲ့ပါတယ်။
စစ်ကောင်စီတပ်ဖွဲ့ရဲ့ နှစ်ကြိမ်တိတိ မီးရှို့ဖျက်ဆီးခံထားရတဲ့ မီးမောင်းကုန်းကျေးရွာက အိမ်ထောင်စု ၁၆၀ စာအတွက် စောင်၊ ခြင်ထောင်၊ ကော်ဖီမစ်၊ ခေါက်ဆွဲထုပ်နဲ့ လက်ဖက်ခြောက် စတာတွေကို လှူဒါန်းခဲ့တယ်လို့ S&C မှ တာဝန်ရှိသူက ပြောပါတယ်။
“တအိမ်ထောင်ကို ၄၅,၀၀၀ နှုန်း ကျပါတယ်။ မီးနှစ်ခါတောင် အရှို့ခံထားရတာဆိုတော့ သူတို့မှာ ဘာမှမကျန်သလောက်ပါပဲ။ သူတို့မှာ တောင်ယာတွေပဲ လုပ်ကိုင်စားကြရတာဆိုတော့ အခုချိန် တော်တော်လေး ခက်ခဲနေကြပါတယ်။ အားလုံး စိတ်ဓာတ်အကျပိုင်းရောက်နေလို့ အားတင်းထားကြဖို့နဲ့ ဘာမှအားမငယ်ပါနဲ့၊ ကျနော်တို့ အကုန်လုံးကို ကူနိုင်ဖို့ အတတ်နိုင်ဆုံး ကြိုးစားနေတယ်လို့မှာချင်တယ်။ သူတို့အားလုံးရဲ့ အခက်အခဲတွေကို သိပါတယ်။ အင်တာနက်မရှိ၊ လျှပ်စစ်မီးမရှိ။ ရှိတဲ့အိမ်လေးတောင် မီးရှို့ခံရတော့ သူတို့မှာ အရာရာဟာ အဆက်ပြတ်ပြီး သူတို့ဘဝရှေ့ရေး ဘာမှမသိကြတော့တဲ့အထိ ကျွေးရင်စားမယ်၊ မရှိရင် အငတ်နေမယ်၊ အလုပ်အကိုင်ကလည်း တောင်ယာသိမ်းတော့ ဘာအလုပ်အကိုင်မှမရှိ၊ အားလုံး အားငယ်နေကြတယ်” လို့ ပြောပါတယ်။
ပြီးခဲ့တဲ့နှစ် ဇူလိုင် ၁၀ ရက်က ရေဦးမြို့နယ်ထဲမှာရှိတဲ့ စည်သာမြေ၊ လိန်ကုန်းနဲ့ မီးမောင်းကုန်းရွာတွေကို စစ်ကြောင်းထိုးဝင်ရောက် ရွာတွေကို မီးရှို့ပြီး နယ်မြေရှင်းလင်းရေး ပြုလုပ်ခဲ့တာကြောင့် မီးမောင်းကုန်းရွာမှ အိမ်ခြေ ၇၀ ဝန်းကျင် မီးလောင်ပျက်စီးကာ အသက် ၈၇ နှစ်အရွယ် သက်ကြီးရွယ်အိုတဦး မီးလောင်သေဆုံးခဲ့ပါတယ်။
