စစ်ကိုင်းတိုင်း၊ ရေဦးမြို့က လွှတ်တော်ကိုယ်စားလှယ်နဲ့ လျှပ်စစ်ဦးစီးမှူးအပါအဝင် ၄ ဦးကို နိုဝင်ဘာ ၃၀ ရက် ညနေပိုင်းက ရေဦးမီးပွိုင့်အနီးမှာ ဗွီနိုင်းတွေထောင်ပြီး စစ်ကောင်စီက ဖမ်းဝရမ်းထုတ်ပြန်ကြေညာထားပါတယ်။
မြို့ခံတစ်ဦးက “ဦးမြင့်ထွေးကိုတော့ CRPH, NUG, PDF တွေကို ထောက်ပံ့ဦးဆောင်လို့တဲ့၊ လူငယ်တစ်ဦးကတော့ အလှူငွေကောက်ခံပြီး PDF တွေ ထောက်ပံ့လို့ လို့ပါတယ်။ စစ်ကောင်စီက မီတာခကောက်ခိုင်းတာ မကောက်လို့ ဆိုပြီး ၅၀၅-က နဲ့ တရားစွဲခံရတဲ့ လျှပ်စစ်ဦးစီးမှူးကိုတော့ အစိုးရ အတွင်းသတင်းတွေ အပြင်ပေးလို့ဆိုတာပါတယ်ဗျ။ တစ်ဦးကတော့ မကျီးတောဥက္ကဋ္ဌ သတ်ဖြတ်ရာ ပါဝင်လို့ဆိုပြီး ပါတယ်။ ရေဦးမြို့လယ်မီးပွိုင့်မှာ ဗွီနိုင်း ထောင်ထားတာ” လို့ ပြောပါတယ်။
စစ်ကိုင်းတိုင်းဒေသကြီး လွှတ်တော်ကိုယ်စားလှယ် ဦးမြင့်ထွေး၊ ကိုပြည့်မှူးအောင်၊ ဦးဝင်းရွှေနဲ့ မြို့နယ်လျှပ်စစ်ဦးစီးမှူး ဦးထွန်းမြင့်မော်တို့ကို ရေဦးမြို့မရဲစခန်းက ဖမ်းဝရမ်းထုတ် ကြေညာထားတာပါ။
စစ်ကိုင်းတိုင်း ရေဦးမြိုက တိုင်းလွှတ်တော်ကိုယ်စားလှယ် ဦးမြင့်ထွေးရဲ့ ချိပ်ပိတ်ထားတဲ့ နေအိမ်ကို အောက်တိုဘာ ၃၁ ရက်မနက် ၁ နာရီလောက်က စစ်အင်အား ၃၀ ခန့်လာရောက်ပြီး သော့ဖွင့်ဝင်ကာ ပရိဘောဂပစ္စည်းတွေကို ရိုက်ခွဲဖျက်ဆီးသွားတယ်လို့ မြို့ခံတွေဆီက သိရပါတယ်။
“သော့ဖွင့်ဝင်ပြီး ဖျက်ဆီးသွားတာ။ တံခါးမကြီးရယ်၊ မှန်ပြတင်းတွေရယ် အတွင်းထဲရှိတဲ့ မှန်ကောင်တာ၊ မှန်ဗီရိုတွေကို ရိုက်ခွဲသွားတာပါ။ အခုတံခါးသော့ပြန်ပိတ်သွားတယ်” လို့ ပြောပါတယ်။
ရေဦးမြို့နယ် အမှတ် ၂ တိုင်းဒေသကြီး လွှတ်တော်ကိုယ်စားလှယ် ဦးမြင့်ထွေးရဲ့နေအိမ်ကို အောက်တိုဘာ ၂၅ ရက် ညနေပိုင်းက အကြမ်းဖက် PDF နဲ့ပတ်သက်တယ်ဆိုပြီး နိုင်ငံပိုင်သိမ်းဆည်းကြောင်း စစ်ကောင်စီတပ်ဖွဲ့တွေက လာရောက်ချိပ်ပိတ်သွားတာပါ။
