မွန်ပြည်နယ်၊ ရေးမြို့မရဲစခန်းကို ဧပြီ ၁၇ ရက် မနက် ၈ နာရီလောက်က ပစ်ခတ်တိုက်ခိုက်ခံရတယ်လို့ မြို့ခံတယောက်က ပြောပါတယ်။

ရဲစခန်းကို ပစ်ခတ်ခံရအပြီး ရဲစခန်းဘက်က လမ်းတချို့ ပိတ်ဆို့ စစ်ဆေးတာတွေ လုပ်ခဲ့သလို ထိခိုက်မှုအခြေအနေကိုတော့ မသိရသေးဘူးလို့ မြို့ခံက ပြောပါတယ်။

ရေးမြို့မရဲစခန်းကို ၄၀ မမနဲ့ တိုက်ခိုက်ခဲ့တယ်လို့ ရေးဘီလူးအဖွဲ့ ခေါင်းဆောင်က ဧပြီ ၁၈ ရက်မှာ ပြောပါတယ်။

ရေးမြို့နယ်ကို စစ်ကောင်စီက စစ်အုပ်ချုပ်ရေးသတ်မှတ်ထားပြီး ဒေသကာကွယ်ရေးတပ်တွေနဲ့ စစ်ကောင်စီတပ်တွေအကြား မကြာခဏ တိုက်ခိုက်မှုတွေ ဖြစ်နေသလို လုံခြုံရေးလည်း တင်းကျပ်ခံထားရပါတယ်။

လက်ရှိမှာ ရေးဘီလူးထိန်းချုပ်နယ်မြေဘက်ဖြစ်တဲ့ ကျုံလောင်းရွာဟောင်းဘက်မှာ ဒေသခံတွေ ရွာမှာမနေရဲကြဘဲ စစ်ကောင်စီဘက်ကလည်း ကင်းပုန်းတွေ နေရာယူထားသလို PDF တွေဘက်ကလည်း စစ်ရေးလှုပ်ရှားလာတာကြောင့် နှစ်ဖက် စစ်ရေးတင်းမာနေပါတယ်။

ရေးမြို့နယ် ကျုံလောင်းရွာဟောင်းကို စစ်ကောင်စီတပ်တွေ စစ်ကြောင်းတက်လာလို့ ရေးဘီလူးအဖွဲ့သားတွေက ဧပြီ ၁၈ ရက်က နယ်မြေရှင်းလင်းရေး လုပ်ဆောင်သွားခဲ့တယ်လို့ ရေးဘီလူးအဖွဲ့က ပြောပါတယ်။

ကျုံလောင်းရွာဟောင်း ကျေးရွာအုပ်ချုပ်ရေးမှူးရုံးကိုလည်း ဝင်ရောက်ပြီး ရုံးသုံးစာရွက်စာတမ်းတွေကိုပါ မီးရှို့ဖျက်ဆီးခဲ့သလို ဒီနယ်မြေမှာ စစ်ကောင်စီတပ်တွေ နယ်မြေစိုးမိုးမှုမရအောင် ရေးဘီလူးဘက်က ဒီနယ်မြေကို ဆက်ပြီးထိန်းချုပ်ထားမယ်လို့ ဆိုပါတယ်။

မွန်ပြည်နယ်၊ သံဖြူဇရပ်မြို့နယ်မှာတော့ ပငကျေးရွာကားလမ်းမပေါ်မှာ ဧပြီ ၁၇ ရက်က  စစ်ကောင်စီတပ်က PDF ၂ ယောက်ကို ဒဏ်ရာတွေနဲ့ ဖမ်းဆီးရမိပြီးနောက် ပစ်ခတ်သတ်ဖြတ်လိုက်တယ်လို့ ဒေသကာကွယ်ရေးတပ်ဖွဲ့ဘက်က ပြောပါတယ်။

ဧပြီ ၁၇ ရက် မွန်းလွဲ ၂ နာရီကျော်လောက်က ပငကျေးရွာကို မစ်ရှင်သွားရင်း မတော်တဆ ဆိုင်ကယ်ထဲကဗုံး ထကွဲသွားလို့ ဒဏ်ရာအနည်းငယ်ရပြီး အဖမ်းခံထိသွားရာမှာ အခုတော့ ပစ်သတ်ခံခဲ့ရတယ်လို့ ဒေသကာကွယ်ရေးတပ်ဖွဲ့တွေဘက်က ပြောပါတယ်။

ပေါက်ကွဲမှုကြောင့် လူ၊ အဆောက်အဦ ထိခိုက်ပျက်စီးမှုမရှိဘဲ အခင်းဖြစ်နေရာကို ပငကျေးရွာအုပ်ချုပ်ရေးမှူး ဦးကျော်သူ ဦးစီး ပြည်သူ့စစ်အဖွဲ့တွေက ဝိုင်းဝန်းပိတ်ဆို့ ရှာဖွေဖမ်းဆီးခဲ့ပါတယ်။

ဝိုင်းဝန်းရှာဖွေရာမှာ KNU

မွန်ပြည်နယ် ကျိုက်ထိုမြို့နယ် တပ်မ ၄၄ လက်အောက်ခံ ဒတရ ၆၀၂ တပ်ရင်းကို ကျိုက်ထိုတော်လှန်ရေးအင်အားစုနဲ့ ပူးပေါင်းအဖွဲ့တို့က ဧပြီ ၄ ရက် ညနေ ၃ နာရီ ၄၅ မိနစ်လောက်မှာ လက်နက်ကြီးတွေနဲ့ နာရီဝက်နီးပါးကြာ ပစ်ခတ်တိုက်ခိုက်ခဲ့တယ်လို့ ကျိုက်ထို PDF တာဝန်ရှိသူက ပြောပါတယ်။

တိုက်ခိုက်မှုအတွင်း စစ်ကောင်စီတပ်ဘက်က ထိခိုက်သေဆုံးမှုကို မသိရသေးဘဲ တော်လှန်ရေးအင်အားစုတွေဘက်ကတော့ ထိခိုက်မှုမရှိခဲ့ဘူးလို့ ဆိုပါတယ်။

ဒေသခံတယောက်က “စစ်ကောင်စီတပ်စခန်းတွေ PDF တွေက ဝင်ရောက်ပစ်ခတ်တာ ခံရပြီဆိုရင် တပ်စခန်းကနေ လက်နက်ကြီးနဲ့ ပြန်ပစ်လေ့ရှိတယ်။ သာမန်အရပ်သားတွေ ထိခိုက်သေဆုံးတာလည်း ရှိပါတယ်။ စစ်တပ်ကပစ်ပြီဆို လွတ်အောင်ပြေးရတာ။ တချို့ရွာတွေဆို လူတောင်မနေရဲကြတော့တဲ့ အခြေအနေမှာ ရှိနေတယ်” လို့ ပြောပါတယ်။

ကျိုက်ထို၊ သထုံ၊ ဘီလင်းဘက်တွေမှာ အခုရက်ပိုင်းတွေအတွင်း စစ်ကောင်စီတပ်စခန်းတွေ တိုက်ခိုက်ခံရတာကြောင့် သေဆုံးဒဏ်ရာရသူ များတယ်လို့ သိရပါတယ်။

ကျိုက်ထိုမြို့နယ် အင်္ဂဘိုလက်ပံပင်သုသာန်မှာ တပ်စွဲထားတဲ့ စစ်ကောင်စီတပ်ရဲ့ လက်နက်ကြီးတာဝန်ခံ တပ်ကြပ်ကြီး ဆန်းထက် ဧပြီ ၅ ရက် မနက်က သေနတ်ပစ်ခံရပြီး သေဆုံးခဲ့တယ်လို့ ဒေသခံတွေက ပြောပါတယ်။

တပ်ကြပ်ကြီးဆန်းထက်ကို ရန်ကုန်-မော်လမြိုင်ကားလမ်းမကြီး ထက်ဆီဆိုင်အနားက ကွမ်းယာဆိုင်မှာ သေနတ်သမားတွေက အနီးကပ် အချက်ပေါင်းများစွာ ပစ်ခတ်တာလို့ ဆိုပါတယ်။

အဲဒီနေရာကို စစ်တပ်က လုံခြုံရေးအများပြားနဲ့ ရောက်လာပြီး အလောင်းကို ကျိုက်ထိုဆေးရုံ သယ်ယူသွားခဲ့တယ်လို့ ဒေသခံတွေက ပြောပါတယ်။

တပ်ကြပ်ကြီး လုပ်ကြံသတ်ဖြတ်ခံရတာနဲ့ ပတ်သက်ပြီး တော်လှန်ရေးတပ်ဖွဲ့တွေက သတင်းထုတ်ပြန်တာ မရှိသေးပါဘူး။

မွန်ပြည်နယ် ရေးမြို့နယ်ရှိ စစ်ကောင်စီတပ်ဖွဲ့ ကင်းပုန်းနေရာကို ဧပြီ ၄ ရက် မနက် ၂ နာရီလောက်မှာ ရေးဘီလူးအဖွဲ့က ဝင်ရောက်ပစ်ခတ်ခဲ့တယ်လို့ ရေးဘီလူးအဖွဲ့ ခေါင်းဆောင်က ပြောပါတယ်။

“သူတို့ ကင်းပုန်းချထားတဲ့နေရာကို မနက် ၂ နာရီမှာ ဝင်ရောက်ပစ်ခတ်တာ။ သူ့တို့ဘက်က ၂ ယောက် ကျဆုံးခဲ့တယ်။ အရှင် တယောက်ဖမ်းဆီးရမိခဲ့ပြီး အပြန်မှာ သူတို့ဘက်က ပြန်လည်ပစ်ခတ်တာရှိပေမဲ့ ထိခိုက်မှုမရှိဘဲ ပြန်ဆုတ်ခွာလာရတယ်။”

ရေးဘီလူး PDF အဖွဲ့ဟာ အာယုတောင် ပြည်သူ့စစ်အဖွဲ့ဝင်တဦးကို ဖမ်းဆီးခေါ်ဆောင်သွားကြောင်း စစ်တပ်တယ်လီဂရမ်တွေဘက်က သတင်းအတည်ပြု ပြောထားပေမဲ့ ၂ ယောက်သေဆုံးတာကိုတော့ ထုတ်ဖော်ပြောဆိုထားတာ မရှိသေးပါဘူး။

ဧပြီ ၁ ရက် ညနေ ၆ နာရီခွဲလောက်ကလည်း ဘေးလမိုင်းရွာအနီး အရပ်သားကား ၁ စီးနဲ့ လာတဲ့ စစ်ကောင်စီတပ်ဖွဲ့ဝင်တွေကို တောင်ညို ပြည်သူ့ပြောက်ကျားတပ်ဖွဲ့က မိုင်းဆွဲပစ်ခတ်ခဲ့ရာ စစ်ကောင်စီတပ်ဖွဲ့ဝင် ၁ ဦး သေဆုံးပြီး ၂ ဦး ဒဏ်ရာရရှိခဲ့တယ်လို့ ဆိုပါတယ်။

ဧပြီ ၂ ရက် မနက် ၉ နာရီ ၂၅ မိနစ်လောက်ကလည်း ကနင်ကမော့ရွာအနီးမှာ စစ်ကောင်စီ ကမ်းရိုးတန်းတပ် ယာဉ်တန်းကို တောင်ညိုပြည်သူ့ပြောက်ကျားတပ်ဖွဲ့နဲ့ ပူးပေါင်းတပ်ဖွဲ့တွေက ချုံခိုတိုက်ခဲ့တာကြောင့် စစ်ကောင်စီတပ်ဖွဲ့ဝင် ၁၀ ဦးနဲ့အထက် သေဆုံးပြီး အများအပြား ဒဏ်ရာရကာ ကား ၂ စီး ပျက်စီးခဲ့တယ်လို့  တောင်ညိုပြောက်ကျားတပ်က ထုတ်ပြန်ပါတယ်။

တိုက်ခိုက်ခံရပြီးနောက် စစ်ကောင်စီတပ်က ဒေသခံ ရာဘာခြံ၊ ကွမ်းသီးခြံ ၅ ခြံနဲ့ တဲ ၃ လုံး၊ ဆိုင်ကယ်စီးလာသူတဦးတို့အား သတ်ဖြတ် မီးရှို့ခဲ့တယ်လို့ ဆိုပါတယ်။

ဧပြီ ၂ ရက် မနက် ၁၁ နာရီလောက်ကလည်း ပိန်နဲတောရွာအနီးမှာ စစ်ကောင်စီ ကင်းပုန်းအဖွဲ့ကို တောင်ညို ပြည်သူ့ပြောက်ကျားတပ်ဖွဲ့က တိုက်ခိုက်ခဲ့ရာ ၂ ဦး သေဆုံးပြီး ၂ ဦး ဒဏ်ရာရခဲ့တယ်လို့ ဆိုပါတယ်။

အဆိုပါတိုက်ပွဲတွေအတွင်း အရပ်သား ခရီးသွားလင်မယား ၂ ယောက် သေနတ်ဒဏ်ရာရရှိပြီး ဒေသခံ ခြံသမား ၂ ယောက် သေဆုံးခဲ့တယ်လို့ ဒေသခံတွေက ပြောပါတယ်။

မတ် ၃၁ ရက် နေ့လယ် ၁၂ နာရီခွဲလောက်ကလည်း ရေး-သံဖြူဇရပ်ကားလမ်း အောင်သပြေရွာအနီးမှာ အင်အား ၂၀ ခန့်ရှိ စစ်ကောင်စီတပ် ကင်းပုန်းအဖွဲ့ကို တောင်ညို ပြည်သူ့ပြောက်ကျားတပ်နဲ့ ပူးပေါင်းတပ်ဖွဲ့တွေက ချုံခိုတိုက်ခိုက်ခဲ့ရာ သေဆုံးဒဏ်ရာရသူတွေကို လူနာတင်ယာဉ် ၂ စီးနဲ့ သယ်သွားတယ်လို့ တောင်ညိုပြောက်ကျားတပ်ဖွဲ့က ထုတ်ပြန်ထားပါတယ်။

မွန်ပြည်နယ်အတွင်း နေရာမရွေး အချိန်အခါမရွေး တိုက်ပွဲတွေ ဖြစ်လာနိုင်တာကြောင့် ပြည်သူတွေအနေနဲ့ အသွားအလာ သတိရှိကြဖို့ ဒေသကာကွယ်ရေးတပ်ဖွဲ့တွေက သတိပေးထားပါတယ်။