မွန်ပြည်နယ်၊ ရေးမြောက်ပိုင်း PDF စခန်းကို စစ်ကောင်စီတပ်တွေက မေ ၇ ရက် ညက တကြိမ်၊ ဒီနေ့မနက် တကြိမ် လေယာဥ်နဲ့ ဗုံးကြဲတိုက်ခိုက်ခဲ့လို့ PDF ရဲဘော် ၃ ယောက် ကျဆုံးခဲ့တယ်လို့ ရေးမြောက်ပိုင်း PDF တာဝန်ခံ ဗိုလ်ရန်နိုင်က ပြောပါတယ်။

“ည ၁၁ နာရီ ၅၃ မိနစ်မှာ ဗုံး ၂ လုံး လာကြဲသွားတယ်။ ဒီနေ့မနက် ၁၁ နာရီ ၄၅ မိနစ်မှာ ရဟတ်ယာဉ်နဲ့ ပတ်ပြီး လာပစ်သွားတယ်။ ဒီနေ့မနက်ဘက်က သတင်းကြိုရထားတော့ ထိခိုက်မှုမရှိဘူး။ ညက အခင်းဖြစ်တဲ့နေရာမှာ တဦးကျ၊ နောက်ထပ် သွေးလွန်ပြီး ၂ ဦးထပ်ကျပြီး မကွဲတဲ့ဗုံးတလုံး ကျန်နေတယ်။”

စစ်ကောင်စီဘက်က လွန်ခဲ့တဲ့  လေးငါးရက်က ကင်းထောက်လေယာဥ်နဲ့ လာဝဲပြီး စခန်း တည်နေရာကို သိကာ လေယာဥ်နဲ့ ဗုံးလာကြဲ တိုက်ခိုက်သွားခဲ့တာလို့ ဆိုပါတယ်။

ဒေသခံတယောက်က “ရေးမြို့နယ်ထဲကို ညဘက်ဆို ကင်းထောက်လေယာဥ်သံ၊ ဂျက်ဖိုက်တာ လေယာဥ်သံတွေ ပျံဝဲနေတာ နေ့တိုင်းလိုလိုပါပဲ။ အခုရက်မှာ ဒေသကာကွယ်ရေးတပ်နဲ့ တိုက်ပွဲတွေမရှိပေမဲ့ လေယာဥ်သံတွေကြောင့် စိုးရိမ်မကင်းဖြစ်ရတယ်” လို့ ပြောပါတယ်။

ရေးမြောက်ပိုင်းမှာ စစ်ကောင်စီတပ်နဲ့ ဒေသကာကွယ်ရေးတပ်တွေအကြား မကြာခဏ တိုက်ပွဲတွေ ဖြစ်ပွားခဲ့ပြီး စစ်ကောင်စီဘက်က မြေပြင်မှာ အထိအခိုက် အကျအဆုံးတွေ များပြားနေပါတယ်။

မွန်ပြည်နယ် သံဖြူဇရပ်မြို့နယ်  သင်္ကြန်မဏ္ဍပ်တွေအနီးမှာ ဧပြီ ၁၄ ရက်နေ့ သင်္ကြန်အကျနေ့က မိုင်း၂ လုံးခွဲပြီး သတိပေးလိုက်တယ်လို့ ပျံလွှာအထူးတပ်ဖွဲ့က ပြောပါတယ်။

မနက် ၁၁ နာရီ ကျော်က သံဖြူဇရပ်မြို့ ဓနသဟာရစစ်သင်္ချိုင်းရှေ့ သင်္ကြန်မဏ္ဍပ်အနီး မိုင်း ၁ လုံးခွဲပြီး သတိပေးခဲ့သလို ဖြစ်စဥ်အပြီးမှာ လူငယ် ၃ ယောက်ကို ရဲတပ်ဖွဲ့ဝင်တွေက ဖမ်းဆီးခေါ်ဆောင်သွားခဲ့တယ်လို့ ဆိုပါတယ်။

ဒေသခံတယောက်က “မိုင်းပေါက်ကွဲအပြီးမှာ သင်္ကြန်ရေကစားသူတွေရော၊ ယိမ်းအကတွေပါ မကတော့ဘဲ ရပ်နားသွားကြပြီး ဘယ်သူ့မှ ရေဆက်မကစားကြရဲဘူး” လို့ ပြောပါတယ်။

အကျနေ့ည ၇ နာရီလောက်ကလည်း လုံခြုံရေးတွေ တင်းကျပ်ထားတဲ့ သံဖြူဇရပ်မြို့လယ်က ဗဟိုဏ္ဍပ်အနီးရှိ ကိုက် ၁၀၀ အတွင်းမှာ ယိမ်းကနေစဥ် မိုင်းခွဲခဲ့တယ်လို့ ပျံလွှာအထူးတပ်ဖွဲ့က ပြောပါတယ်။

မွန်ပြည်နယ်အတွင်းမှာတော့ စစ်ကောင်စီရဲ့သင်္ကြန်ကို ပြည်သူတွေကို ဆန့်ကျင်သပိတ်မှောက်ထားကြဖို့ သတိပေးထားတာကြောင့် စစ်ကောင်စီ ရေကစားမဏ္ဍပ်တွေမှာ ရေကစားသူတွေအနေနဲ့ ထိခိုက်ပျက်စီးမှုရှိခဲ့ပါက တာဝန်ယူသွားမှာမဟုတ်ဘူးလို့ တော်လှန်ရေးအဖွဲ့တွေက ပြောထားပါတယ်။

အခုသံဖြူဇရပ်ရေးကစားမဏ္ဍပ်တွေကို မိုင်းခွဲသတိပေးခဲ့တာဟာ ပျံလွှာအထူးတပ်ဖွဲ့ နဲ့ မိုင်းနှင့် လက်နက်ထုတ်လုပ်ရေးပူးပေါင်းအဖွဲ့တွေက ပူးပေါင်းလုပ်ခဲ့တာလို့ ဆိုပါတယ်။

တော်လှန်သကြင်္န် အကျနေ့ ည ၆ နာရီ မိနစ် ၅၀ လောက်မှာလည်း ရေးမြို့နယ် ကျောက်မိချောင်းကျေးရွာ (တောင်) နဲ့ ကျုံလောင်းရွာဟောင်းအကြားရှိ ဖက်ဆစ်တပ်စီးပွားရေးထောက်တိုင် Mytel တာဝါတိုင်အား ရေးမြို့ ပြည်သူ့ကာကွယ်ရေး YSTF က ဖျက်ဆီးလိုက်တယ်လို့ YSTF ခေါင်းဆောင် စောသာစေးက ပြောပါတယ်။

“စစ်တပ်အပိုင် စီးပွားရေးလုပ်ငန်းတွေကို ဒီနွေဦး‌တော်လှန်ရေးကာလမှာသာ မဖြိုချနိုင်ရင် နောက်ဘယ်တော့မှ စစ်အာဏာရှင်ကို တွန်းလှန်နိုင်မှာမဟုတ်တော့ဘူး၊ ဒါကြောင့် သူတို့ရဲ့ ပင်မအသက်သွေးကြောစီးပွားရေး လုပ်ငန်းမှန်သမျှကို အခြားအခြားသော တော်လှန်ရေး အင်အားစုတွေက နည်းအမျိုးမျိုးနဲ့ ဖြိုချပစ်ဖို့လိုတယ်။” 

ရေးမြို့နယ်မှာ စစ်အုပ်စုရဲ့ ဝင်ငွေကို ပိတ်ဆို့တဲ့အနေနဲ့ မိုင်တဲလ်တာဝါတိုင် အနည်းဆုံး ၅ ခုလောက် ဖျက်ဆီးခဲ့တယ်လို့ တော်လှန်ရေးအင်အားစုတွေက ပြောပါတယ်။

မြန်မာတနိုင်ငံလုံးမှာ အာဏာသိမ်းပြီးကတည်းကစပြီး စစ်အုပ်စုရဲ့ မိုင်တဲလ်တာဝါတိုင်တွေ ဖျက်ဆီးခံထားရတာ ဒီနေ့အထိ  ၂၀၀၀ ကျော် ရှိပြီလို့ သိရပါတယ်။