ပါကစ္စတန် ဝန်ကြီးချုပ်ဟောင်း အင်မ်ရန်ခန်းကို ဖမ်းဆီးပြီးတဲ့နောက်မှာ မေ ၁၀ ရက်က ဆန္ဒပြသူတွေနဲ့ ရဲတွေ ရုန်းရင်းဆန်ခတ် ဖြစ်ခဲ့ပြီးနောက် အနည်းဆုံး လူ ၅ ဦး သေဆုံးခဲ့ပါတယ်။

ပါကစ္စတန် အနောက်မြောက်ပိုင်း ပက်ရှ်ဝါမြို့မှာ ဖြစ်ပွားခဲ့တဲ့ အကြမ်းဖက်မှုမှာ ၃ ဦး သေဆုံးပြီး ဒဏ်ရာရရှိသူ ၇၇ ဦးကို ဆေးရုံပို့ဆောင်ထားကြောင်း ဒေသခံ ဆေးဘက်ဆိုင်ရာ စေတနာ့ဝန်ထမ်းတဦးက ပြောပါတယ်။

စစ်တမ်းတွေအရ ပါကစ္စတန်ရဲ့ ရေပန်းအစားဆုံး နိုင်ငံရေးခေါင်းဆောင် ခန်းဟာ အင်္ဂါနေ့က မြေယာလိမ်လည်မှုနဲ့ ဖမ်းဆီးခံခဲ့ရတာပါ။

သူ့ကို ထောက်ခံသူတွေဟာ စစ်ဘက်အဆောက်အအုံတွေကို ဝင်ရောက်စီးနင်းပြီး အရှေ့ဘက် လာဟိုးမြို့ရှိ ထိပ်တန်းစစ်ဗိုလ်ချုပ်တဦးရဲ့ နေအိမ်ကို လုယက်ခဲ့ကြပါတယ်။

ဆန္ဒပြသူတွေဟာ တခြား နိုင်ငံပိုင်အဆောက်အအုံတွေနဲ့ ပိုင်ဆိုင်မှုတွေကို တိုက်ခိုက်ကာ မီးရှို့ဖျက်ဆီးခဲ့ပါတယ်။

ပါကစ္စတန်ရဲ့ ပြည်နယ် ၄ ခုထဲက ခန်းရဲ့ အမာခံနယ်မြေ ၂ ခုဖြစ်တဲ့ ပန်ဂျပ်ဘ်၊ ခိုင်ဘာပက်ထွန်ခွာနဲ့ ဖက်ဒရယ်မြို့တော် အစ္စလာမ္မာဘတ်တို့မှာ တရားဥပဒေ ပြန်စိုးမိုးစေဖို့ တပ်တွေချထားဖို့ တောင်းဆိုချက်တွေကို အစိုးရက ဗုဒ္ဓဟူးနေ့မှာ အတည်ပြုခဲ့ပါတယ်။

လမ်းတွေပေါ်မှာ ဆန္ဒပြမှုတွေ ပြင်းပြင်းထန်ထန် ဖြစ်ပွားနေချိန်မှာ ပါကစ္စတန်တရားရုံးက အသက် ၇၀ အရွယ် ခန်းကို နောက်ထပ် မေးမြန်းမှုတွေအတွက် ပါကစ္စတန်နိုင်ငံရဲ့ အကျင့်ပျက်ခြစားမှု တိုက်ဖျက်ရေးအဖွဲ့ (NAB) ရဲ့ အောက်မှာ ၈ ရက်တာ ချုပ်နှောင်ထားဖို့ လွှဲပြောင်းပေးခဲ့ကြောင်း အစိုးရအကြံပေး အာတာအူလာ တားရာက ပြောပါတယ်။

နိုင်ငံတကာ ခရစ်ကက်ကစားသမားဟောင်းလည်းဖြစ်တဲ့ ဝန်ကြီးချုပ်ဟောင်း ခန်းကို အခုတော့ ရဲတပ်ဖွဲ့ ဧည့်ခန်းမဆောင်မှာ ထိန်းသိမ်းထားပါတယ်။

တခြားတရားရုံးတခုကလည်း ခန်းကို သူ အာဏာရခဲ့ချိန် ၄ နှစ်တာ ကာလအတွင်း နိုင်ငံတော် လက်ဆောင်ပစ္စည်းတွေကို ရောင်းချမှု ပြစ်ချက်တွေနဲ့ ဗုဒ္ဓဟူးနေ့အစောပိုင်းက စွဲချက်တင်ခဲ့ပါတယ်။

ပါကစ္စတန်နိုင်ငံ အနောက်မြောက်ပိုင်း ခိုက်ဘာပက်ထွန်ခွာပြည်နယ်ရှိ ဆွက်ထ်ခရိုင်မှာ ဧပြီ ၂၄ ရက် နှောင်းပိုင်းက အင်အားပြင်း ပေါက်ကွဲမှု ၂ ခု ဖြစ်ပွားခဲ့ရာ လူ ၁၂ ဦးထက်မနည်း သေဆုံးပြီး ၅၅ ဦးထက်မနည်း ဒဏ်ရာရရှိခဲ့ကြောင်း ရဲတပ်ဖွဲ့နဲ့ ကယ်ဆယ်ရေး တာဝန်ရှိသူတွေက ပြောပါတယ်။

ဆွက်ထ်ခရိုင် ကာဘားလ်နယ်မြေရှိ အကြမ်းဖက်မှုနှိမ်နင်းရေးဌာန (CTD) ရဲစခန်းအတွင်း ဖြစ်ပွားခဲ့တဲ့ အဲဒီပေါက်ကွဲမှု ၂ ခုမှာ ရဲတပ်ဖွဲ့ဝင် ၈ ဦးထက်မနည်း သေဆုံးခဲ့ကြောင်း ခရိုင်ရဲအရာရှိ ရှာဖီယူလာ ဂန်ဒါပူရ်က အသေအပျောက်တွေကို အတည်ပြု ပြောကြားခဲ့ပါတယ်။

ပဏာမ သတင်းအစီရင်ခံချက်တွေအရ ဒါဟာ အသေခံဗုံးခွဲမှုဖြစ်တယ်လို့ ဆိုပေမဲ့ အာဏာပိုင်တွေဟာ ဒီကိစ္စကို စုံစမ်းစစ်ဆေးနေပြီး ပေါက်ကွဲမှုရဲ့ သဘောသဘာဝကို တိတိကျကျ သိရှိနိုင်ဖို့ မှုခင်းဆိုင်ရာ အထောက်အထားတွေကို စုဆောင်းနေကြောင်း ရဲအရာရှိ ဂန်ဒါပူရ်က ပြောပါတယ်။

ဒီပေါက်ကွဲမှုတွေဟာ အကြမ်းဖက်မှုနှိမ်နင်းရေးဌာနရဲ့ ခဲယမ်းမီးကျောက် သိုလှောင်ရုံမှာ ဖြစ်ပွားခဲ့ပြီး ပြင်ပကနေ တိုက်ခိုက်တဲ့ အထောက်အထား မတွေ့ရသေးကြောင်းနဲ့ လက်နက်တွေ မီးလောင်သွားတာဟာ လျှပ်စစ်ဝါယာရှော့ကြောင့် ဖြစ်နိုင်ကြောင်း ပြည်နယ်ရဲချုပ် အခ်ထာ ဟာယက်ရဲ့ ပြောရေးဆိုခွင့်ရှိသူက နောက်ပိုင်းမှာ ထုတ်ပြန်တဲ့ ကြေညာချက်ထဲမှာ ပြောပါတယ်။

ဗုံးပေါက်ကွဲမှုရဲ့ တခြားရှုထောင့်တွေကိုလည်း စုံစမ်းစစ်ဆေးနေကြောင်း ဆိုပါတယ်။

ဗုံးခွဲမှုအတွင်း သေဆုံးခဲ့သူ အများစုမှာ အကြမ်းဖက်နှိမ်နင်းရေးရဲတပ်ဖွဲ့မှ အရာရှိတွေ ဖြစ်ကြောင်း  ပြည်နယ်ရဲချုပ် ဟာယက်က ပြောပါတယ်။

အဆောက်အဦထဲကနေ ဖြတ်သွားတဲ့ အမျိုးသမီးတဦးနဲ့ သူ့ရဲ့ ကလေးငယ်တဦးလည်း သေဆုံးခဲ့ကြောင်း သိရပါတယ်။

ဒဏ်ရာရရှိသူ အများအပြား ဆေးကုသမှု ခံယူခဲ့ရပြီး တချို့ဟာ စိုးရိမ်ရတဲ့ အခြေအနေမှာ ရှိနေကြောင်း ဆေးရုံအုပ်ချုပ်ရေးအဖွဲ့က ပြောပါတယ်။

ပေါက်ကွဲမှုတွေကြောင့် CTD ရဲစခန်း အဆောက်အဦ လုံးဝပျက်စီးသွားပြီး ပေါက်ကွဲမှုတွေရဲ့ သက်ရောက်မှုကြောင့် အနီးနားရှိ အဆောက်အဦတွေရဲ့ ပြတင်းပေါက်တွေလည်း ကွဲအက်ကုန်ကြောင်း ရဲတပ်ဖွဲ့က ပြောပါတယ်။

လုံခြုံရေးတပ်ဖွဲ့ဝင်တွေနဲ့ ကယ်ဆယ်ရေးအဖွဲ့တွေဟာ အဆောက်အအုံရဲ့ အပျက်အစီးတွေအောက်မှာ ပိတ်မိနေသူတွေကို ကယ်ဆယ်ဖို့နဲ့ ဒဏ်ရာရသူတွေကို ခရိုင်အတွင်းရှိ နီးစပ်ရာဆေးရုံတွေဆီ ပို့ဆောင်ပေးခဲ့ပါတယ်။

ခရိုင်အတွင်းရှိ ဆေးရုံတွေ အားလုံးမှာလည်း အရေးပေါ်အခြေအနေ ထုတ်ပြန်ထားပါတယ်။ ဒီတိုက်ခိုက်မှုအတွက် ဘယ်ပုဂ္ဂိုလ်၊ ဘယ်အဖွဲ့ကမှ တာဝန်ရှိကြောင်း ထုတ်ဖော်ပြောဆိုခြင်း မရှိပါဘူး။

ပါကစ္စတန်ဝန်ကြီးချုပ် ရှာဘတ်ဇ် ရှာရစ်ဖ်ကတော့ ဒီဖြစ်ရပ်ကို ရှုတ်ချခဲ့ပါတယ်။ အသက်ဆုံးရှုံးမှုအတွက် ဝမ်းနည်းကြေကွဲကြောင်း ပြောကြားပြီးတော့ ဒဏ်ရာရသူတွေကို အကောင်းဆုံး ဆေးဝါးအကူအညီပေးဖို့ သက်ဆိုင်ရာ အာဏာပိုင်တွေကို ညွှန်ကြားခဲ့ပါတယ်။