စစ်ကိုင်းတိုင်း၊ ယင်းမာပင်မြို့နယ်အရှေ့ခြမ်း၊ ထန်းတောကြီးအုပ်စု၊ ရွှေပေကုန်းကျေးရွာကို စစ်ကောင်စီလက်အောက်ခံ ရဲတပ်ရင်း အမှတ် ၂၈ စခန်းကနေ ဧပြီ ၁၂ ရက် မနက်အစောပိုင်း ၁ နာရီလောက် လက်နက်ကြီးနဲ့ ပစ်ခတ်ခဲ့တာကြောင့် ကလေးငယ် ၁ ဦးသေဆုံးပြီး အဘွားအို ၁ ဦး ဒဏ်ရာရရှိခဲ့တယ်လို့ ဒေသခံတွေက ပြောပါတယ်။
“သူတို့ စခန်းထဲကနေ ပစ်လိုက်လို့ ကျနော်တို့ရွာထဲက အိမ်ပေါ်ကျပြီး ကလေးငယ်သေရတာဗျ။ ကလေးအသက်က ၁၁ နှစ်ကျော်ကျော်ပါ၊ အတန်းက ၅ တန်းပဲရှိသေးတယ်။ အဘွားကတော့ အသက် ၈၀ ကျော်ပါ။ အမည်တွေတော့ လုံခြုံရေးအရမပြောတော့ဘူးဗျ။ အိပ်နေတဲ့အချိန် အိမ်ပေါ်ကျပေါက်ကွဲတာဆိုတော့ ကလေးခန္ဓာကိုယ်တခုလုံးရစရာမရှိအောင် ဒဏ်ရာရပြီး ပွဲချင်းပြီး သေဆုံးသွားတယ်။ အဘွားကလည်း ဒဏ်ရာပြင်းထန်ရထားတယ်။ ဆေးကုသမှုတော့ ပေးထားတယ်” လို့ ဒေသခံရွာသားတဦးက ပြောပါတယ်။
ရဲတပ်ရင်း ၂၈ ဟာ မုံရွာ-ပုသိမ်သွားကားလမ်မပေါ် အောင်မိုးရွာနဲ့ ထန်းတောကြီးရွာကြား၊ ရွှေပေကုန်းရွာအရှေ့ဘက်မှာ တည်ရှိတယ်လို့ ဆိုပါတယ်။
အဆိုပါရဲတပ်ရင်း ၂၈ ဟာ အနီးအနားက ကျေးရွာတွေစီ လက်နက်ကြီးနဲ့ပစ်ခတ်တာတွေ လုပ်ဆောင်သလို မုံရွာ-ပုသိမ်ကားလမ်းမပေါ်ကနေ ဖြတ်သန်းသွားတဲ့ ပြည်သူတွေကို စစ်ဆေးတား စီးကာ ငွေကြေးတောင်ယူတာတွေလည်း လုပ်ဆောင်နေတယ်လို့ ဒေသခံတွေက ပြောပါတယ်။
ဧပြီ ၁၁ ရက် ညနေကလည်း မုံရွာမြို့ကနေ အလုပ်လုပ်ပြန်လာတဲ့ အရပ်သား လူငယ်တယောက်အား သေနတ်နဲ့ပစ်ခတ်ခဲ့တာကြောင့် ပေါင်ကျည်ထိမှန်ဒဏ်ရာရခဲ့တယ်လို့ ဒေသခံတွေက ပြောပါတယ်။
လက်နက်ကြီး ကျရောက်ပေါက်ကွဲတဲ့ ရွှေပေကုန်းကျေးရွာဟာ အိမ်ခြေ ၆၀ လောက်ရှိပြီး ရဲတပ်ရင်း ၂၈ နဲ့ တမိုင်လောက်သာ ဝေးကွာတယ်လို့ ဆိုပါတယ်။
မန္တလေးတိုင်း၊ စဉ့်ကိုင်မြို့နယ်၊ ပလိပ်မြို့ရဲစခန်းအနီးမှာရှိတဲ့ ရဲတပ်ရင်း ၁၄ ကို ဧပြီ ၁၄ ရက်၊ သင်္ကြန်အကြိုနေ့ မနက်အစောပိုင်းက ဝင်ရောက်တိုက်ခိုက်ခဲ့ရာမှာ ရဲ ၄ ဦး သေဆုံးခဲ့တယ်လို့ ဒေသခံကာကွယ်ရေးတပ်ဖွဲ့တွေထံက သိရပါတယ်။
ဒီမနက်အစောပိုင်း ၃ နာရီ ၄၅ မိနစ်မှာ ညီနောင်မဟာမိတ်တွေဖြစ်တဲ့ မြစ်ငယ် Local PDF၊ စဉ့်ကိုင် Local PDF၊ နဲ့ တပ်ကုန်း Local PDF တို့ ပူးပေါင်းပြီး တိုက်ခိုက်ခဲ့ရာမှာ ရဲ ၄ ယောက် ပွဲချင်းပြီး သေဆုံးကာ တယောက်ဆေးရုံတင်ပို့ထားရတယ်လို့ စဉ့်ကိုင် PDF က သတင်းထုတ်ပြန်ထားပါတယ်။
LPDF မြစ်ငယ် ရဲ့ တာဝန်ရှိသူတစ်ဦးက "ကျနော်တို့သုံးဖွဲ့ပေါ့ဗျာ၊တပ်ကုန်း PDFရယ်၊LPDF စဉ့်ကိုင်ရယ်၊ MN PDF မြစ်ငယ်ရယ် သွားတိုက်ကြတာ လက်နက်ကြီးနှစ်ချက်နဲ့ ကျနော်တို့ကျန်တာကတော့၊ အရှည်တွေနဲ့ ဆွဲခဲ့တာ၊ သူတို့တော့ ဘာမှကိုပြန်မခုခံနိုင်ဘူး၊ သူတို့ဘက်က လေးဦးကျတယ်၊ တစ်ဦး ဒဏ်ရာပြင်းထန်တယ်"လို့ ပြောပါတယ်။
ရဲကင်းဘက်က ပြန်လည်တုံ့ပြန်နိုင်ခြင်း မရှိခဲ့ဘဲ ညီနောင်မဟာမိတ်တပ်ဖွဲ့တွေဘက်က အထိအခိုက် အကျအဆုံးလုံးဝမရှိ ဆုတ်ခွာနိုင်ခဲ့တယ်လို့ သိရပါတယ်။
စစ်အုပ်စုရဲ့ ဒေါက်တိုင်တွေကို ရှေ့ဆက်ပြီး တိုက်ခိုက်သွားမယ်လို့လည်း ဒေသခံကာကွယ်ရေးတပ်ဖွဲ့တွေထံက ပြောပါတယ်။
