မန္တလေးတိုင်း၊ ပုသိမ်ကြီးမြို့နယ်၊ အောင်ချမ်းသာရွာ၊ အောင်ချမ်းသာ ဓာတ်အားပေးခွဲရုံက တာဝန်ကျ ရဲဒုတပ်ကြပ်တဦး ကွမ်းယာထွက်ဝယ်စဉ် အမည်မသိ လက်နက်ကိုင်တစုက ပစ္စတိုသေနတ်နဲ့ ပစ်ခတ်ခဲ့လို့ နေရာတင် ပွဲချင်းပြီးသေဆုံးခဲ့တယ်လို့ မြို့ခံတွေထံက သိရပါတယ်။
ဧပြီ ၆ ရက် ညနေ ၆ နာရီလောက်မှာ အမည်မသိ လူနှစ်ဦးက ဆိုင်ကယ်ပေါ်ကနေ ပစ်ခတ်ခဲ့ပြီး နားထင်ကျည်ထိမှန်ဒဏ်ရာနဲ့ သေဆုံးခဲ့တာလို့ ဆိုပါတယ်။
ရပ်ကျေးအဖွဲ့ဝင်ဟောင်းတဦးက “ခွဲရုံတာဝန်ကျ ရဲတပ်ကြပ်၊ သူ့ဂျူတီပြီးခါနီး ထမင်းစားပြန်တော့မှာ၊ အဲ့ဒါ ကွမ်းထွက်ဝယ်တာ။ သူ့မှာလည်း သေနတ်အရှည်ပါတယ်၊ ဆိုင်ကယ်နဲ့ဖြတ်သွားတဲ့ လူငယ်နှစ်ယောက်က အနီးကပ် တချက်တည်းပစ်သွားတာ၊ နားထင်မှန်ပြီး အဲ့နေရာမှာပဲ ဆုံးသွားတယ်” လို့ ဒီဗွီဘီကို ပြောပါတယ်။
ပစ်ခတ်ခံရသူ ရဲဒုတပ်ကြပ် ကိုအောင်နွယ်စိုးဟာ ဝဲနားထင် ကျည်ဖောက်ဒဏ်ရာနဲ့ နေရာတင် သေဆုံးခဲ့ကာ MA-3 လက်နက်နဲ့ ကျည်ကတ်နှစ်ခု၊ ကျည် ၁၀ တောင့်လည်း ယူဆောင်သွားတယ်လို့ သိရပါတယ်။
အခုတိုက်ခိုက်မှုကို ဘယ်အဖွဲ့က လုပ်ဆောင်တယ်ဆိုတာ သတင်းထုတ်ပြန်ထားတာ မတွေ့ရသေးပါဘူး။
အခုလ ၃ ရက် မနက်ကလည်း ပြည်ကြီးတံခွန် (ဆ) ရပ်ကွက် အုပ်ချုပ်ရေးမှူး ပစ်ခတ်ခံခဲ့ရပြီး သေဆုံးခဲ့ပါတယ်။
Photo CJ
မကွေးတိုင်း၊ တောင်တွင်းကြီးမြို့မှာ မြို့နယ်ရဲတပ်ဖွဲ့မှူး ကားမောင်းတဲ့ ရဲဒုတပ်ကြပ် ဇင်ကိုဦး သေနတ်နဲ့ ပစ်သတ်ခံရတယ်လို့ ဗိဿနိုး PDF က ဒီကနေ့ ဖေဖော်ဝါရီ ၂ ရက်နေ့ မနက်ပိုင်းမှာ ထုတ်ပြန်ပါတယ်။
တောင်တွင်းကြီးမြို့နယ်ရဲတပ်ဖွဲ့မှူးရဲ့ ကားကိုမောင်းတဲ့ ယာဥ်မောင်းရဲဒုတပ်ကြပ်တစ်ယောက် ဇန်နဝါရီ ၃၁ ရက်က ကားနဲ့ ပြန်လာစဥ် လမ်းခုလပ်တစ်နေရမှာ ဗိဿနိုးPDF က သေနတ်နဲ့ ပစ်ခတ်သုတ်သင်လိုက်တာလို့ ဗိဿနိုး PDF ရဲ့ ပြန်ကြားရေးတာဝန်ခံ ဗိုလ်ထန်ထွဋ်က ပြောပါတယ်။
“သေနတ်နဲ့ ပစ်ခတ်ခဲ့တာပါ၊ အချက်ရေများတယ်။ သူက စစ်ကောင်စီသတင်းပေးတွေနဲ့ ပေါင်းပြီးတော့ မြို့ပေါ်မှာ အကျင့်ပျက်ခြစား ပြည်သူတွေကို ဒုက္ခပေးနေလို့ သုတ်သင်လိုက်တာ။”
သေဆုံးသွားတဲ့ ရဲဒုတပ်ကြပ်ဇင်ကိုဦးရဲ့ အလောင်းကို မနေ့က ညနေ ၃ နာရီကျော်လောက်မှာ သင်္ဂြိုဟ်လိုက်တယ်လို့ တောင်တွင်းကြီး မြို့ခံတစ်ယောက်က ပြောပါတယ်။
“အဲဒီကောင်က အပြင်မှာတော့ နာမည်သိပ်မထွက်ဘူးဗျ။ စစ်ကြောရေးမှာတော့ နာမည်တော်တော်ကြီးတယ်”လို့ မြို့ခံက ပြောပါတယ်။
ဗိဿနိုး PDF အနေနဲ့ စစ်အုပ်စုရဲ့ဒေါက်တိုင်တွေကို ဖြိုဖျက်နေတာဖြစ်လို့ မိဘပြည်သူတွေအနေနဲ့ စစ်အုပ်စုနဲ့ ဝေးတဲ့နေရာတွေမှာ ရှောင်နေပြီး စစ်ယာဥ်တန်းနောက်တွေကို ကပ်မလိုက်ကြဖို့ သတိပေးထားပါတယ်။
ဗိဿနိုး PDF အနေနဲ့ ပြည်သူ့ကာကွယ်ရေး ညီနောင်မဟာမိတ်တပ်တွေနဲ့ ပူးပေါင်းကာ စစ်အာဏာရှင်စနစ် အမြစ်ပြုတ်တဲ့အထိ တိုက်ခိုက်သွားမှာဖြစ်လို့ ပြည်သူလူထုအနေနဲ့ ပူးပေါင်းပါဝင်ပေးကြဖို့ တိုက်တွန်းထားပါတယ်။
အဲဒီဖြစ်စဥ်ကို အတိအကျသိရှိနိုင်ဖို့ တောင်တွင်းကြီး မြို့နယ်ရဲတပ်ဖွဲ့မှူးရုံးကို တယ်လီဖုန်းနဲ့ အကြိမ်ကြိမ်ဆက်သွယ်ခဲ့ပေမယ့် ဖုန်းလက်ခံဖြေကြားခြင်း မရှိပါဘူး။
