ရွာချင်းဆက်တံတား

January 28, 2023

ရခိုင်ပြည်သူနှင့် အေအေပူးပေါင်းပြီး ရွာချင်းဆက်တံတား ၁ စင်း ပထမဆုံးတည်ဆောက်ဖွင့်လှစ်

ရခိုင်ပြည်နယ်၊ ရသေ့တောင်မြို့နယ်မှာ ဒေသခံပြည်သူတွေနဲ့ ရက္ခိုင့်တပ်တော်(အေအေ)တို့ပူး ပေါင်းပြီး ကျေးရွာချင်းဆက်တံတားတစ်စင်းကို ပထမဆုံးတည်ဆောက်ဖွင့်လှစ်နိုင်ခဲ့ပါတယ်။

ရသေ့တောင်မြို့နယ် လိုင်ဂွင်ချေကျေးရွာနဲ့ လမုန့်တိုင်ကျေးရွာအကြား ရွာချင်းဆက်လမ်းပေါ်မှာ တည်ရှိထားတဲ့ တံတားတစ်စင်းကို အခု ဇန်နဝါရီအတွင်းတည်ဆောက်ခဲ့ပြီး တံတားဖွင့်ပွဲကိုတော့ ဇန်နဝါရီ ၂၅ ရက်မှာ ရက္ခိုင့်တပ်တော် (ULA/AA)က ဦးစီးပြီး ဖွင့်ပွဲကျင်းပခဲ့တာလို့ ဒေသခံ တဦးက ပြောပါတယ်။

"ရက္ခိုင်တပ်တော်နဲ့ ရခိုင်ပြည်သူနဲ့လက်တွဲပြီး ပထမဆုံးတည်ဆောက်တဲ့ တံတားတစ်ခုဖြစ်တယ်။ လက်ရှိအစိုးရအဆက်ဆက် မလုပ်ပေးနိုင်ခဲ့တဲ့ တံတားဆိုလည်း မမှားဘူဗျ။ အနာဂတ်မှာ ရခိုင်တပ်တော်နဲ့ ရခိုင်ပြည်သူတွေအခုလို လက်တွဲပြီး ဒေသဖွံ့ဖြိုးရေးအတွက် လုပ်ဆောင်လာဖို့ မျော်လင့်ရမှာပါ။"

အဆိုပါတံတားကို "လိုင်ဂွင်ချေတံတား"လို့ အမည်ပေးထားပြီး အလျား ၅၈ ပေ၊ အနံ ၁၂ ပေ ရှည်လျားကာ တန်ဖိုး ကျပ်သိန်း ၃၄၀ လောက် ကုန်ကျခဲ့တယ်လို့လည်း ဒေသခံတွေထံက သိရပါတယ်။ တံတားဖွင့်ပွဲအခမ်းအနားကို ဘောလုံးပွဲနဲ့ ဇာတ်ပွဲတွေနဲ့အတူကျင်းပခဲ့ပါတယ်။

33 mins Ago

February 23, 2020

1.3K

ကန်ကြီးထောင့်တွင် ရွာချင်းဆက် တံတားပျက်စီးနေသဖြင့် ဒေသခံများ အခက်ကြုံ

ဧရာဝတီတိုင်း ကန်ကြီးထောင့်မြို့နယ် လက်ဆောင်ကွင်းကျေးရွာအုပ်စုက ရွာ ၅ ရွာကို ဆက်သွယ်ထားတဲ့ ရွာချင်းဆက်တံတားပျက်စီးနေတာကြောင့် အခက်အခဲဖြစ်နေတယ်လို့ ဒေသခံတွေက ပြောပါတယ်။ လက်ဆောင်ကွင်းရွာ နဲ့ အလယ်စုကို ဆက်သွယ်ထားတဲ့ အလျားပေ ၁၀၀၊ အကျယ် ၆ ပေလောက်ရှိတဲ့ သိုင်းချောင်းတံတားပေါ်ကနေ နေ့စဉ် မောင်းတီး၊ လက်ဆောင်ကွင်း၊ အလယ်စု၊ အရှေ့စု၊ စစ်ကုန်း စတဲ့ရွာက ဒေသခံတွေ ဖြတ်သန်းသွားလာနေရတာဖြစ်ပြီး တံတားက ပျက်စီးနေ တော့ သွားလာရေး အခက်အခဲတွေဖြစ်နေတယ်လို့ ကျေးရွာရာအိမ်မှူး ဦးချစ်ကိုက ပြောပါတယ်။ "ဒီတံတားက ခုနောက်ပိုင်း သွားရလာရတာ တော်တော်ခက်ခဲလာပါတယ်။ ကလေးတွေ အတွက် စိတ်ပူမိတယ်။ မိုးတွင်းဆို ကလေးတွေ ချောကျတာတွေ အပေါက်ကျွံတာတွေဖြစ်လို့ ကျောင်းမသွားနိုင်ဘဲ အိမ်ကိုပြန်သွားရတာမျိုးတွေ ခဏခဏဖြစ်ပါတယ်။မိုးတွင်းဘက်ဆို ပိုအန္တရာယ်များပါတယ်” လက်ရှိအချိန်မှာတော့ သိုင်းချောင်းတံတားဟာ တံတားလက်ရန်းတွေ ကျိုးပျက်နေပြီး တံတားအောက်ကြမ်းခင်းမှာ ဆွေးမြေ့ပျက်စီးနေတာကြောင့် တံတားပေါ်က သွားလာဖို့ အခက်အခဲ တွေရှိနေတယ်လို့ ဒေသခံတွေက ဆိုပါတယ်။ "ဒီတံတားပေါ်ကနေ နေ့စဉ် ကျောင်းသား ကျောင်းသူ ဦးရေ ၈၀ လောက်ဖြတ်သွားရတာ၊ ဒီလိုရာသီမှာတောင် သူတို့အတွက် စိတ်မချရဘူး။ တံတားက လက်ရမ်းတွေ မရှိတဲ့အပြင် ကြမ်းခင်းတွေပါ ပေါက်နေတော့ အန္တရာယ်ဖြစ်မှာဆိုးလို့ စိတ်ပူပန်နေရတယ်" လို့ ဒေသခံအမျိုးသမီးတဦးက ပြောပါတယ်။ ၂၀၁၇ ခုနှစ်က ကျေးရွာချင်းဆက် တံတားပျက်စီးနေလို့ တခြားကျေးရွာကို စက်လှေနဲ့ ကျောင်းသွားတက်ချိန်မှာ စက်လှေပေါ်ပါသူ ကျောင်းသား၊ ကျောင်းသူ ၁၄ ဦးအနက် ၈ တန်း ကျောင်းသားတယောက်နဲ့ စက်လှေမောင်းသူ အမျိုးသား ရေနစ်သေဆုံးခဲ့လို့ မိုးရာသီမတိုင်ခင် တံတားကို ပြုပြင်ပေးဖို့ ဒေသခံတွေက လိုလားနေကြတာပါ။ လက်ဆောင်ကွင်းကျေးရွာအုပ်စုအတွင်းမှာ ရွာ ၅ ရွာရှိပြီး တံတားဆက်သွယ်ထားတဲ့ ကျေးရွာ ၂ ရွာမှာ အိမ်ခြေ ၃၀၀ နီးပါရှိကာ လူဦးရေ ၉၀၀ ဝန်းကျင်လောက် နေထိုင်ကြပါတယ်။ လူမှုရေး၊ စီးပွားရေး၊ ပညာရေး၊ ကျန်းမာရေး ကိစ္စတွေအတွက် နေ့စဉ် တံတားပေါ်ကဖြတ်သန်းသွားလာရချိန်မှာ ဒေသခံတွေရော၊ ကျောင်းသားကျောင်းသူတွေအတွက်ပါ အန္တရာယ်ဖြစ်လာနိုင်တာကြောင့် သက်ဆိုင်ရာတာဝန်ရှိသူတွေကို ပြုပြင်ပေးဖို့ တင်ပြတာတွေ လည်း ပြုလုပ်သွားမယ်လို့ ဒေသခံတွေက ဆိုပါတယ်။ ဒေသခံပြည်သူတွေ သွားလာရေ အခက်အခဲဖြစ်နေတဲ့ အဲဒီတံတားကို ၂၀၁၅ ခုနှစ်ကဆောက်လုပ်ခဲ့တာဖြစ်ပြီး ၂၀၁၆ ခုနှစ်မှာတံတားပျက်စီးခဲ့တဲ့အတွက် ၂၀၁၇ ခုနှစ်မှာ ကျေးလက်ဦးစီးဌာနက တာဝန်ရှိသူတွေ လာရောက်ကြည့်ရှုခဲ့ပြီး ပြန်လည်ပြုပြင်ပေးခဲ့ပါတယ်။ ဒါပေမဲ့ ၂၀၁၉ ခုနှစ် နှစ်ကုန်ပိုင်းကစတင်ကာ တံတား အောက်ခြေကြမ်းခင်းတွေ ပေါက်ပြဲတာတွေနဲ့ လက်ရန်းတွေ ပျက်စီးလာတယ်လို့ ဒေသခံတွေက ပြောပါတယ်။ မင်းထက်မုန်း (ပုသိမ်)

3 years Ago