အာဖရိကရဲ့ လူဦးရေအများဆုံးနိုင်ငံဖြစ်တဲ့ နိုင်ဂျီးရီးယားမှာ အာဏာရပါတီ ကိုယ်စားလှယ်လောင်း ဘိုလာတီနူဘူကို ရွေးကောက်ခံသမ္မတအဖြစ် လွတ်လပ်တဲ့အမျိုးသားရွေးကောက်ပွဲကော်မရှင် (INEC) က မတ်လ ၁ ရက်မှာ ကြေညာပါတယ်။
ကျင်းပပြီးစီးခဲ့တဲ့ရွေးကောက်ပွဲမှာ ဘိုလာတီနူဘူဟာ ဆန္ဒမဲ ၈ ဒသမ ၇၉ သန်း ရရှိခဲ့ပြီး၊ အဓိကအတိုက်အခံ အာတီကုအဘူဘာကာက မဲပေါင်း ၆ ဒသမ ၉၈ သန်း ရရှိခဲ့ကာ လူငယ်မဲဆန္ဒရှင်တွေအကြား ရေပန်းစားတဲ့ ပြင်ပကိုယ်စားလှယ် ပီတာအိုဘီက ဆန္ဒမဲ ၆ ဒသမ ၁ သန်း ရရှိခဲ့ပါတယ်။
လာဂို့စ်ပြည်နယ် အုပ်ချုပ်ရေးမှူးဟောင်းတီနူဘူဟာ နိုင်ငံအရှေ့မြောက်ဘက်ရှိ အစ္စလာမ္မစ် သောင်းကျန်းမှုတွေ၊ လက်နက်ကိုင်တိုက်ခိုက်မှုတွေ၊ သတ်ဖြတ်မှုတွေနဲ့ ပြန်ပေးဆွဲမှုတွေ၊ တိရစ္ဆာန်ထိန်းကျောင်းသူတွေနဲ့ လယ်သမားတွေကြားက ပဋိပက္ခတွေ၊ ငွေသားပြတ်လပ်မှု၊ လောင်စာဆီပြတ်လပ်မှုနဲ့ လျှပ်စစ်မီး ပြတ်တောက်မှုတွေအပြင် နှစ်ရှည်လများ အကျင့်ပျက်ခြစားမှုတွေနဲ့ ရုန်းကန်နေရတဲ့ နိုင်ငံရဲ့ ခေါင်းဆောင်မှုကို တာဝန်ယူမှာ ဖြစ်ပါတယ်။
သမ္မတနေရာကနေ ဆင်းသွားတဲ့ မူဟမ်မာဒူ ဘူဟာရီရဲ့ ပါတီကလည်း အဲဒါတွေကို လုပ်မယ်လို့ ကတိပြုထားခဲ့ပေမဲ့ အကောင်အထည်ဖော် လက်စသတ်ဖို့ ပျက်ကွက်ခဲ့တယ်လို့ အတိုက်အခံတွေက ပြောပါတယ်။
ပြီးခဲ့တဲ့သီတင်းပတ်က ရွေးကောက်ပွဲအပြီးမှာ အဓိက အတိုက်အခံပါတီတွေကတော့ မဲရလဒ်နဲ့ပတ်သက်လို့ အငြင်းပွားခဲ့ကြပါတယ်။
လွတ်လပ်တဲ့အမျိုးသားရွေးကောက်ပွဲကော်မရှင် (INEC) က နည်းပညာသစ်တွေ အသုံးပြုခဲ့တဲ့ ရွေးကောက်ပွဲမှာ နည်းပညာပိုင်းဆိုင်ရာ အခက်အခဲတွေ ကြုံခဲ့ရရပြီး ချို့ယွင်းချက်ရှိတဲ့ ရွေးကောက်ပွဲလုပ်ငန်းစဉ်ကြောင့် မဲရလဒ်တွေကို အတိုက်အခံ ပါတီတွေက ပယ်ချခဲ့ပါတယ်။
ရွေးကောက်ပွဲကော်မရှင် ဥက္ကဋ္ဌ မာမွဒ် ယာကုဘုကိုလည်း ရာထူးကနေ နုတ်ထွက်ပေးဖို့ တောင်းဆိုခဲ့ကြပါတယ်။
