ရခိုင်ပြည်နယ်၊ မောင်တောမြို့ အမှတ်(၁) နယ်ခြားစောင့်တပ်ဖွဲ့ ကျီးကန်းပြင်စစ်ဆေးဂိတ်မှာ ဖေဖော်ဝါရီ ၁၇ ရက် နေ့လယ်ပိုင်းက ကာလတန်ဖိုး သိန်း ၃၅၀၀ ကျော်တန်ဖိုးရှိ ရွှေချောင်းတွေ ဖမ်းဆီးမိခဲ့တယ်လို့ အမည်မဖော်လိုတဲ့ အရာရှိတစ်ဦးက ပြောပါတယ်။

"မောင်တောကနေ မောင်တောမြောက်ဘက်ကိုယူသွားတာ၊ မင်္ကာလို့ စစ်ဆေးရာမှာ ရွှေ ၂ ပိဿာရှိတဲ့ ရွှေချောင်း ၂၀ ဖမ်းမိတာ။" 

ရွှေချောင်းတွေနဲ့အတူ မောင်တောမြို့နယ်မြောက်ပိုင်း အောင်သပြေ​ကျေးရွာက မောင်နှမနှစ်ဦး ဖမ်းဆီးမိခဲ့ပြီး ပြင်ဖြူနယ်မြေစခန်းမှာ လက်ရှိ ထိန်းသိမ်းထားပြီး ရွှေချောင်းတွေကိုတော့ တောကျီးကန်းပြင်ဌာနချုပ်မှာ သိမ်းဆည်းထားတယ်လို့ သိရပါတယ်။

ရွှေအရောင်းအဝယ်လုပ်နေသူ စီးပွားရေးသမားတစ်ဦးက "မြန်မာနိုင်ငံရွှေရောင်းဝယ်ရေး အသင်းဝင်ကတ်ပြနိုင်ရင် မြန်မာပြည်မှာ ကြိုက်တဲ့နေရာ သယ်ယူခွင့်ရှိတယ်လေ။ အခုက အထောင်အထားပါလား မပါဘူးလား၊ ကယ်ရီသယ်ပေးတာလား ဆိုတာ မသိရသေးဘူး” လို ပြောပါတယ်။

ပြီးခဲ ၂၀၂၁ ခုနှစ် သြဂုတ် ၁၅ ရက်ကလည်း မောင်တောမြို့ဝင်စစ်ဆေးရေးဂိတ်မှာ ရွှေကျပ် ၃၉၀ နဲ့ ငွေသား သိန်း ၂၀၀၀ နဲ့အတူ လူ ၂ ဦးအား ဖမ်းဆီးမိခဲ့ပြီး မောင်တောမြို့မရဲစခန်းမှာ ပို့ကုန်သွင်းကုန်ဥပဒေပုဒ်မ ၈ နဲ့ အမူဖွင့်လှစ်ထားဆဲ ဖြစ်တယ်လို့ သိရပါတယ်။

ထိုင်း-မြန်မာနယ်စပ် တာ့ခ်ခရိုင် မဲဆောက်မြို့ နယ်စပ်ကုန်တင်ကုန်ချဂိတ်တစ်ခုမှာ မြန်မာနိုင်ငံဘက်ကို  တရားမဝင် တင်ပို့မယ့် ထိုင်းဘတ်ငွေ  ၄၁၀၀,၀၀၀  အမေရိကန်ဒေါ်လာ ၁ သိန်းနဲ့ ရွှေချောင်း ၅ ချောင်းတို့ကို သိမ်းဆည်းရမိတယ်လို့ မဲဆောက်သတင်းဌာနက ထုတ်ပြန်ပါတယ်။ 

မေလ ၂၅ ရက် ညနေပိုင်းက ထိုင်းစစ်တပ်၊ ရဲနဲ့ အကောက်ခွန်တွေပါတဲ့ ပူးပေါင်းအဖွဲ့ဟာ မဲဆောက်မြို့ ထာ့ဆိုင်လွတ်အုပ်စု ထာ့အတ်ရပ်ကွက်တွင်းရှိ နယ်စပ်ကုန်ပစ္စည်းဖလှယ်ရေး ဂိတ်အမှတ် ၂၄ မှာတာဝန်ထမ်းဆောင်စဉ် မသင်္ကာစရာ လူတစ်ယောက်က ဂိတ်နားရပ်ထားတဲ့ အဖြူရောင် အီဇူးစူးဟိုင်းလပ်ကားတစ်စီးပေါ်သို့ အထုတ်တစ်ထုပ် လာချထားကြောင်း၊ အဆိုပါ ကားမှာ ထိုင်းဘက်ကထွက်တဲ့ သစ်သီးဝလံတွေကို မြန်မာပြည်ပို့ဆောင်ဖို့ တင်ဆောင်ထားတာလို့ ဆိုပါတယ်။ 

တာဝန်ရှိသူတွေက သူလာချသွားတဲ့အထုပ်ကို စစ်ဆေးရာမှာတော့ အထုတ်ထဲမှာ ထိုင်းငွေ၊ ဒေါ်လာငွေနဲ့ ရွှေချောင်းတွေကို တွေ့ရတာလို့ ဆိုပါတယ်။

တာဝန်ရှိသူတွေက အထုပ်လာချထားသူကို စုံစမ်းရှာဖွေရာမှာ အသက် ၂၇ နှစ်ရွယ်ရှိ အောင်သူ ဆိုသူ မြန်မာနိုင်ငံသားတစ်ဦးဖြစ်ပြီး သူကတော့ အထဲမှာ ငွေတွေပါတာ မသိရကြောင်း၊ မဲဆောက်မှာရှိတဲ့ မြန်မာ ၁ ဦးက သူ့ကို အဆိုပါအထုပ်ကို မြန်မာဘက်ကမ်းပို့ပေးဖို့ ပြောတာကြောင့် သယ်လာတာလို့ ဆိုပါတယ်။ 

တာဝန်ရှိသူတွေက အဆိုပါ ငွေလာရာလမ်းကြောင်း ကွင်းဆက်တွေကို ဆက်လက်စုံစမ်းဖော်ထုတ်ပြီး ဥပဒေအရ အရေးယူသွားမယ်လို့ ဆိုပါတယ်။

ကိုးကား - nakornmaesotnews