စစ်ကောင်စီရဲ့ ညွှန်ကြားချက်နဲ့ ပြည်တွင်းရွှေဈေးကွက်မှာ အကယ်ဒမီ(မီးလင်း)အခေါက်ရွှေ တကျပ်သားကို ၂၇ သိန်း ၉ သောင်းနှုန်းနဲ့ပဲ ရောင်းချပေးဖို့ ထုတ်ပြန်ထားပေမဲ့ အဆိုပါဈေးနှုန်းနဲ့ ဘယ်ရွှေဆိုင်ကမှ ရောင်းချပေးတာမရှိဘူးလို့ ရွှေကုန်သည်တွေက ပြောပါတယ်။

စစ်ကောင်စီက ဖွဲ့စည်းထားတဲ့ ရွှေ နှင့် ငွေကြေးဈေးကွက် စောင့်ကြည့်၊ ထိန်းသိမ်း ကြပ်မတ်ရေးလုပ်ငန်းကော်မတီရဲ့ လမ်းညွှန်ချက်အရ အကယ်ဒမီ(မီးလင်း)အခေါက်ရွှေ တကျပ်သားကို ၂၇ သိန်း ၉ သောင်း ကျပ်နှုန်းနဲ့ ရွှေဆိုင်တွေ အပါအဝင် ရွှေကုန်သည်တွေ အားလုံးက တပြေးညီ ရောင်းချပေးဖို့ မေတ္တာရပ်ခံပန်ကြားအပ်ပါတယ်လို့ ရန်ကုန်တိုင်း ရွှေလုပ်ငန်းရှင်များအသင်းက ဖေဖော်ဝါရီ ၂၂ ရက် ညနေပိုင်းက သတင်းထုတ်ပြန်ထားပါတယ်။

ရန်ကုန်တိုင်းရွှေလုပ်ငန်းရှင်များအသင်းက အဆိုပါဈေးနှုန်းနဲ့ရောင်းချပေးဖို့ သတင်းထုတ်ပြန်ခဲ့တဲ့ ဖေဖော်ဝါရီ ၂၂ ရက် ညနေပိုင်းက အကယ်ဒမီ(မီးလင်း)အခေါက်ရွှေဈေးဟာ အပြင်ဈေးကွက်မှာ တကျပ်သားကို ၂,၈၅၅,၀၀၀ ကျပ် နဲ့ ဈေး ပေါက်နေတာပါ။

ဒါပေမဲ့ ရန်ကုန်တိုင်းရွှေအသင်းက နေ့စဉ်သတ်မှတ်ပေးတဲ့ ရည်ညွှန်းရွှေဈေးနှုန်းဟာ တကျပ်သား ကို ၂,၁၆၆,၅၀၀ ကျပ် သာရှိတာကြောင့် ဈေးနှုန်းကွာဟချက်က တကျပ်သားကို ၆၈၈၅၀၀ ကျပ် ရှိတဲ့အတွက် ၂၄ ရာခိုင်နှုန်းကျော် ဈေးကွာနေပါတယ်။ ကမ္ဘာ့ရွှေဈေးကတော့ တအောင်စကို အမေရိကန်ဒေါ်လာ ၁၈၃၉ ဒေါ်လာ ရှိခဲ့ပါတယ်။

ဒါကြောင့် ဒီသတင်းထုတ်ပြန်ချက်နဲ့ပတ်သတ်ပြီး ဒီဗွီဘီက ဒီနေ့ဆက်သွယ်ခဲ့ရာ ရန်ကုန်တိုင်း ရွှေလုပ်ငန်းရှင်များအသင်း အဆင့်မြင့် ပုဂ္ဂိုလ်တဦးက ဒီအကြောင်းအရာနဲ့ပတ်သတ်ပြီး လောလောဆယ်မှာ သတင်းထုတ်ပြန်ဖို့ မရှိသေးကြောင်းနဲ့ အသင်းဥက္ကဋ္ဌကလည်း  လောလောဆယ်မှာ ခွင့်ယူထားတယ်လို့ ပြောပါတယ်။

ဒါ့အပြင် လက်ရှိမှာဆိုရင်လည်း ပြည်တွင်းရွှေဈေးကွက်မှာ စစ်ကောင်စီရဲ့ ညွှန်ကြားချက်နဲ့ သတ်မှတ်ထားတဲ့ ဈေးနှုန်းနဲ့ ရွှေဆိုင်တွေ အပါအဝင် ရွှေကုန်သည်တွေအကြားမှာ ရောင်းချပေးနိုင်ခြင်း မရှိဘူးလို့ ရွှေလုပ်ငန်းရှင်တွေက ဆိုပါတယ်။

ရွှေလုပ်ငန်းရှင်ကြီးတဦးက “သူတို့ကတော့ အခေါက်ရွှေ တကျပ်သားကို ၂,၇၉၀,၀၀၀ ကျပ်နဲ့ လုပ်ပေးပါပေါ့နော်။ ဒါပေမဲ့ ဒီဈေးနဲ့ ဘယ်သူမှ အရောင်းအဝယ် မလုပ်ကြဘူး။ ဘာလို့လဲဆို အပြင်ဈေးနဲ့က တကျပ်သားကို ခြောက်သောင်းလောက် ကွာနေတော့ ဘယ်သူက အရှုံးခံပြီး ရောင်းမှာလဲ။ မဟုတ်ဘူးလား။ ပြီးတော့ ရွှေဈေးကို ဘယ်ဈေးနဲ့ ရောင်းပေးပါ ညာဈေးနဲ့ ရောင်းပေးပါ ဆိုပြီး ညွှန်ကြားချက်တွေ တခုပြီး တခု မကြာခဏ ထုတ်နေတာကလည်း မှန်ကန်တဲ့ ဖြေရှင်းနည်း မဟုတ်ဘူးနော်။ ဘာလို့လဲဆို သူတို့က စာတွေသာ ထုတ်တာလေ၊ ဈေးက ကျသွားတာမှ မရှိတာ။ ရွှေဈေးကျစေချင်ရင် သူတို့ ပိုင်တဲ့ ရွှေတွေကို အရှုံးခံပြီး ထုတ်ရောင်းပေးလိုက်ပေါ့ဗျာ” လို့ ဒီဗွီဘီကို ပြောပါတယ်။

ဖေဖော်ဝါရီ ၂၃ ရက် ဒီနေ့လယ်ခင်းအချိန် ရန်ကုန်တိုင်းရွှေလုပ်ငန်းရှင်များအသင်းက နေ့စဉ်ထုတ်ပြန်ပေးနေတဲ့ ရည်ညွှန်းရွှေဈေးနှုန်းက ပြည်တွင်းအကယ်ဒမီ(မီးလင်း)အခေါက်ရွှေ တကျပ်သားကို ၂,၁၅၄,၈၀၀ ကျပ်သတ်မှတ်ပေးထားပြီး ၂,၇၉၀,၀၀၀ ကျပ်နဲ့ ရောင်းချပေးဖို့ မေတ္တာရပ်ခံထားပါတယ်။ 

ဒါပေမဲ့ အပြင်ဈေးကွက်မှာတော့ ပြည်တွင်းအကယ်ဒမီ(မီးလင်း)အခေါက်ရွှေ တကျပ်သား ဈေးနှုန်းဟာ ၂,၈၅၁,၀၀၀ ကျပ် ဈေးပေါက်တာကြောင့် စစ်ကောင်စီရဲ့သတ်မှတ်ဈေးနဲ့ယှဉ်ရင် တကျပ်သားကို ၆၁,၀၀၀ ကျပ် ဈေးကွာနေတဲ့အပြင် ရန်ကုန်တိုင်းရွှေအသင်းရဲ့ ရည်ညွှန်းဈေးနှုန်းနဲ့ယှဉ်ရင် တကျပ်သားကို ၆၉၆,၂၀၀ ကျပ် ဈေးကွာနေပါတယ်။

ဖေဖော်ဝါရီ ၂၃ ရက် နေ့လယ်အချိန် ကမ္ဘာ့ရွှေဈေးက တအောင်စကို အမေရိကန်ဒေါ်လာ ၁၈၂၉ ဒေါ်လာ ရှိတာကြောင့် မနေ့က ဈေးနှုန်းနဲ့ယှဉ်ရင် တအောင်စကို အမေရိကန်ဒေါ်လာ ၁၀ ဒေါ်လာ ပြန်ကျလာတာ တွေ့ရပါတယ်။

ပြည်တွင်းနိုင်ငံခြားငွေကြေးရောင်းဝယ်ရေးဈေးကွက်မှာလည်း အမေရိကန် ၁ ဒေါ်လာ တန်ဖိုးက ၂၈၆၀ ကျပ်နှုန်းဖြင့် အပြင်မှာ ဈေးပေါက်နေတာပါ။ ဗဟိုဘဏ်ရည်ညွှန်းငွေလဲနှုန်းကတော့ အမေရိကန် ၁ ဒေါ်လာကို ၂၁၀၀ ကျပ်နှုန်း သတ်မှတ်ပေးထားပေမဲ့ ပြည်ပရောက် မြန်မာနိုင်ငံသားတွေရဲ့ လုပ်ခလစာအတွက် အမေရိကန် ၁ ဒေါ်လာကို ၂၈၇၅ ကျပ်နှုန်းနဲ့ ပုဂ္ဂလိက ဘဏ်ကြီးတချို့က သတ်မှတ်ဝယ်ယူပေးနေတာ ရှိပါတယ်။

စစ်ကောင်စီက ပြည်တွင်းရွှေဈေးနှုန်းကို ဈေးကွက်ပေါက်ဈေးအပေါ် အခြေမခံဘဲ တဖက်သတ် ကန့်သတ်ထားပြီး ဝင်ရောက်စွက်ဖက်နေတာဟာ မှောင်ခိုဈေးကွက်ပေါ်လာဖို့ တွန်းအားဖြစ်စေတယ်လို့ ရွှေလုပ်ငန်းရှင်တွေက ပြောပါတယ်။

အကြောင်းရင်းက စစ်ကောင်စီလက်အောက်ခံ ရန်ကုန်တိုင်းရွှေလုပ်ငန်းရှင်များအသင်းက ပြည်တွင်းရွှေဈေးနှုန်းကို နေ့စဉ် ထုတ်ပြန်ပေးနေပေမဲ့ ဈေးကွက်ပေါက်ဈေးနဲ့အညီ သတ်မှတ်တာမဟုတ်ဘဲ စစ်ကောင်စီရဲ့ ညွှန်ကြားချက်အရ ရည်ညွှန်းဈေးနှုန်းဆိုပြီး ခေါင်းစဉ်တပ်ကာ ရွှေဈေးနှုန်းကို ထုတ်ပြန်ပေးနေပါတယ်။

ဒါဟာ ဈေးကွက်ပေါက်ဈေးအပေါ် အခြေမခံဘဲ တဖက်သတ် ကန့်သတ်လိုက်တဲ့ ဆိုးကျိုးကြောင့် ပြည်တွင်းရွှေဈေးကွက်မှာ တရားဝင် အရောင်းအဝယ်လုပ်တာ မရှိတော့တဲ့အကြောင်း ရွှေလုပ်ငန်းရှင်တွေက ဆိုပါတယ်။

ရွှေကုန်သည်တဦးက “ဒါက သူသူငါငါ မည်သူမဆို ဈေးမှန်မရဘူးဆိုရင် ရောင်းကြ ဝယ်ကြ ဘယ်လုပ်တော့မလဲ။ မလုပ်ဘူးဆိုတာ တရားဝင် ရောင်းကြ ဝယ်ကြတာကို ပြောတာနော်။ အဲ့တော့ ဘာဖြစ်သွားလဲ၊ မမြင်ကွယ်ရာမှာ ရောင်းကြ ဝယ်ကြပဲ လုပ်ကြတော့မှာပေါ့။ မဟုတ်ဘူးလား။ အခုပဲကြည့်လေ။ ရန်ကုန်တိုင်းရွှေအသင်းရုံးမှာ အရောင်းအဝယ် မရှိတော့ဘူး။ မဖြစ်နိုင်တဲ့ဈေးနဲ့ဆိုတော့ ဘယ်သူကရောင်းမှာလဲ။ သူတို့ကသာ ရွှေဈေးနှုန်း တည်ငြိမ်ရေးဆိုပြီး လုပ်နေပေမဲ့ ဈေးကွက်က ကသောင်းကနင်းတွေ ဖြစ်ကုန်ပြီ။ အရင်ကလည်း စစ်အုပ်ချုပ်ရေးအောက်မှာ ဈေးနှုန်းကို အခုလိုမျိုး လိုက်ပြီး ကန့်သတ်ခဲ့တာ ရှိတယ်။ ရွှေဆိုင်တွေမှာ ယနေ့ရွှေဈေးနှုန်း တကျပ်သား ၅၄,၀၀၀ ဆိုပြီး ဆိုင်းဘုတ်တော့ ထောင်ထားတယ်။ ဒါပေမဲ့ အဲ့ဈေးနဲ့သွားဝယ် ဘယ်သူမှမရောင်းဘူး။ ဘာလို့လဲဆို ဈေးကွက်ပေါက်ဈေးနဲ့ ကွာနေတာလေ” လို့ ဒီဗွီဘီကို ပြောပါတယ်။

တဖက်မှာလည်း စိုးရိမ်စရာရှိလာတာက ပြည်တွင်းရွှေဈေးနှုန်းဟာ ဈေးကွက်ပေါက်ဈေးနဲ့ ကွာဟချက်ရှိနေတဲ့အပြင် အိမ်နီးချင်းနိုင်ငံတွေရဲ့ ဈေးနှုန်းအောက် ရောက်နေပါက ပြည်ပဈေးကွက်ဆီ စီးထွက်သွားနိုင်တယ်လို့ မန္တလေးအခြေစိုက် ရွှေလုပ်ငန်းရှင်တဦးကလည်း အခုလို မှတ်ချက်ပေးပါတယ်။

“ဈေးနှုန်းကို ဈေးကွက်ကပဲ ဦးဆောင်တာ ကောင်းတယ်ဗျ။ လူပုဂ္ဂိုလ်က ဦးဆောင်လိုက်ပြီ ဆိုရင်တော့ ပျက်ပြီလို့သာ မှတ်တော့။ အခုလည်း ကျနော်တို့ရွှေဈေးက အခြားကုန်စည်တွေလိုပဲ အခြေခံတွက်ချက်ပြီးတော့မှ ဝယ်သူနဲ့ရောင်းသူအကြားမှာ ဈေးနှုန်းဆိုတာ ပေါ်လာတာလေ။ ဘယ်အပေါ်မှာ အခြေခံတွက်ချက်လဲဆိုတော့ ကမ္ဘာ့ရွှေဈေးနဲ့ ပြည်တွင်းငွေလဲနှုန်းအပေါ်မှာ အခြေခံပြီး တွက်ရတာ။ အဲ့လိုမတွက်ဘဲနဲ့ ကိုယ်ဖြစ်ချင်ရာ လျှောက်လုပ်လို့ မရဘူး။ အဲ့လိုလျှောက်လုပ်နေရင် ဘာဖြစ်လာနိုင်လဲ ဆိုတော့ဗျာ ပြည်တွင်းဈေးက အိမ်နီးချင်းနိုင်ငံတွေက ဈေးနဲ့ယှဉ်လို့ နိမ့်နေပြီဆိုရင် သူ့သဘာဝအရ မြင့်ရာဆီ စီးထွက်သွားမှာနော်။ ဒါကြောင့် ကုန်သည်က ကုန်သည်အလုပ် လုပ်ပြီး ကိုယ့်နေရာနဲ့ကိုယ် နေကြတာပဲ ကောင်းတယ်။”

စစ်ကောင်စီလက်အောက်ခံ ရန်ကုန်တိုင်းရွှေလုပ်ငန်းရှင်များအသင်းက ဒီကနေ့ ဇန်နဝါရီ ၁၉ ရက် နေ့လယ်ခင်းအချိန် ထုတ်ပြန်တဲ့ ရည်ညွှန်းရွှေဈေးနှုန်းမှာ အကယ်ဒမီ (မီးလင်း) အခေါက်ရွှေ တကျပ်သားကို ၂,၂၅၀,၀၀၀ ကျပ်ရှိပြီး ကမ္ဘာ့ရွှေဈေးက တအောင်စကို အမေရိကန်ဒေါ်လာ ၁,၉၁၀ ရှိပါတယ်။

အပြင်ဈေးကွက်မှာ ကြားသိရတဲ့ ပြည်တွင်းရွှေဈေးနှုန်းက အကယ်ဒမီ (မီးလင်း) အခေါက်ရွှေ တကျပ်သားကို ၂,၈၁၀,၀၀၀ ရှိပြီး ပြည်တွင်းနိုင်ငံခြားငွေလဲနှုန်းကလည်း အမေရိကန် တဒေါ်လာကို ၂,၈၅၀ ကျပ်နဲ့ အရောင်းအဝယ် ရှိနေပါတယ်။ ဒါကြောင့် လက်ရှိဖြစ်ပေါ်နေတဲ့ ကမ္ဘာ့ရွှေဈေးနဲ့ ပြည်တွင်းနိုင်ငံခြားငွေလဲနှုန်းတို့ကို အခြေခံပြီး တွက်ချက်ပါက ပြည်တွင်းရွှေဈေးနှုန်းဟာ တကျပ်သားကို ၂၈ သိန်းခွဲ နီးပါးရှိတာ တွေ့ရပါတယ်။