close

ရွှေနွယ်မောင်

close

April 29, 2023

အာဏာရှင်ကို အမြစ်ဖြုတ် ပြောင်းလဲသင့်တာတွေ လုပ်ဆောင်ကြစို့

“အာဏာရှင်ကို တော်လှန်ပုန်ကန်ခြင်းသည် ထာဝရဘုရား၏ အမိန့်တော်ကို နာခံခြင်းဖြစ်ပြီး ယာယီလုံခြုံမှုလေး ရယူမှုဖြင့် မိမိ၏လွတ်လပ်ခြင်းကို ဆုံးရှုံးခံလိုက်ရသူသည် လုံခြုံခြင်းနှင့်ရော လွတ်လပ်ခြင်းနှင့်ပါ မထိုက်တန်ဘူး”လို့ အမေရိကန် တော်လှန်ရေးခေါင်းဆောင် ဘင်ဂျမင်ဖလင်ကလင်က ပြောခဲ့ဖူးတယ်။

ယနေ့ ကျနော်တို့ရဲ့ လက်နက်ကိုင်တော်လှန်မှုက ၂ နှစ်ကျော်သို့ ချဉ်းနင်းဝင်ရောက်လာပြီ ဖြစ်ပါတယ်။ PDF ရဲဘော်အချို့လည်း တိုင်းပြည်အတွက် အသက်စွန့်သွားကြသလို စစ်တလင်းကြားမှ အဓိကအားဖြင့် ချင်းပြည်နယ်၊ ကချင်ပြည်နယ်နဲ့ အထက်အညာဘက်မှာ ပြည်သူ မူလတန်းကလေးအရွယ်ကအစ အသက်ပေါင်းများစွာ စတေးခဲ့ရတယ်။

ပထမကမ္ဘာစစ်မှာ စစ်ဘက်၊ အရပ်ဘက်နဲ့ ပြည်သူ စုစုပေါင်း ၃၈ သန်းကျော်၊ ဒုတိယကမ္ဘာစစ်အတွင်းမှာ စာရင်းလေ့လာတွေ့ရှိချက်အရ ပထမကမ္ဘာစစ်ရဲ့ နှစ်ဆအထိ လူ့အသက်တွေ ဆုံးရှုံးခဲ့ရတယ်။ ဒုတိယကမ္ဘာစစ်မှာ ခေတ်မီလက်နက်ကြီးများ လေယာဥ်၊ စစ်သင်္ဘောတွေ အဆင့်မြင့်တိုက်ခိုက်လာပေမဲ့ ဘာလို့ လူ့အသက်များစွာ ဆုံးရှုံးလာရလဲ ဆိုတော့ အာဏာရှင်တွေရဲ့ အစုလိုက်အပြုံလိုက် သတ်ဖြတ်မှုတွေကြောင့်လည်း ပြည်သူများစွာ အသက်ဆုံးရှုံးခဲ့ရတယ်။ ဟစ်တလာရဲ့ ဂျူးလူမျိုး ၆ သန်းကျော် သတ်ဖြတ်မှုက ပြင်သစ်တော်လှန်ရေးမှာ အစုလိုက် သတ်ဖြတ်မှုထက် အဆပေါင်းများစွာ ရက်စက်ကြမ်းကြုတ်လာခဲ့တယ်။ အာဏာရှင် အာဏာရူးတွေကြောင့် ကမ္ဘာကြီးဟာ ကမ္ဘာစစ်ကြီးတွေ ပြီးပေမဲ့ သတ်ဖြတ်မှုတွေကတော့ ယနေ့အထိ ရှိလာခဲ့တယ်။ အာရှတိုက်ဆိုရင် မားကို့စ်ရဲ့ ကိုယ့်ပြည်သူချင်း အစုလိုက်သတ်ဖြတ်မှုက ကမ္ဘာမှာ စံချိန်တင်ခဲ့တယ်။ ထို့အတူ မြန်မာနိုင်ငံမှာလည်း ၁၉၆၂ စစ်အာဏာသိမ်းပြီးတည်းက လူမသိ သူမသိ အာဏာရှင်က ပြည်သူတွေကို သတ်ဖြတ်မှုတွေ အရေးတော်ပုံအလိုက် သတ်ဖြတ်ခံရမှု ယနေ့ နွေဦးတော်လှန်ရေးအထိ စစ်ကောင်စီ ယုတ်မာမှုက အရေးအခင်းတွေအလိုက် နှစ်သန်းကျော်အထိ ရှိနေပြီလို့ နိုင်ငံရေးသုတေသီအချို့က စစ်တမ်းကောက် သုံးသပ်ပြောဆိုပါတယ်။

မြန်မာနိုင်ငံ စစ်အာဏာသိမ်းခြင်း နှစ်ပေါင်း ၆၁ နှစ်မှာ (၂၀၀၈ ဖွဲ့စည်းပုံနှစ်ကိုပါ တွက်ချက်ပါတယ်။) အာဏာရှင်ရယ်က နေဝင်း၊ သန်းရွှေနဲ့ မင်းအောင်လှိုင် သုံးဦးတည်းပါ။ ရတနာနတ်မယ် မကွယ်လွန်ခင် အင်တာဗျူးတခုမှာ ပြောဖူးတယ်။ အာဏာသိမ်းတာ ဗိုလ်နေဝင်း တယောက်တည်းနဲ့ မဟုတ်ဘူး။ သူ့ဘေးမှာ မြှောက်ပေးနေသူတွေလည်း ရှိတယ်ဆိုတော့ ဒေဝဒတ်က သူ့အပေါင်းအသင်းနဲ့သူပါပဲ။ သို့သော် ဒေဝဒတ်တွေက အသက်ကို ၈၀ ကျော် ၉၀ အထိ နေသွားကြတယ်။ အသက်ရှည်ကြတယ်။ အပေါင်းအဖော်ကို မြှောက်ပင့်ခိုင်းတတ်တယ်။ မိမိထိုင်ခုံလာလုမှသာ ခေါင်းမထောင်နိုင်အောင် ပြုလုပ်ပစ်တယ်။ ဥပမာ ဗိုလ်ခင်ညွန့်လိုမျိုးပေါ့။ မည်သို့ပင်ဆိုစေကာမူ ဒေဝဒတ်တွေမှာ ကျွန်ခံချင်သူ​တွေက ဒုနဲ့ဒေး။

ထို့နည်းတူ အရေးအခင်းတိုင်းမှာ အနုပညာရှင်တွေ ပါတယ်။ ဒါပေမဲ့ အရေးအခင်းတခု ပြီးသွားရင် ပြည်သူနဲ့တသားတည်း အနုပညာရှင် လက်ချိုးရေလို့ရတယ်။ ပြည်သူထဲမှ ပြည်သူကိုယ်စားမဟုတ် မိမိကိုယ်သာ ကိုယ်စားပြုသူများကတော့ တက်လာတဲ့အစိုးရ ငါ့အစိုးရ လုပ်နေသူတွေကလည်း တပုံကြီးပါ။ ဒီတော့ ပြောချင်တာက ယနေ့ နွေဦးတော်လှန်ရေးဟာ အရင်က အရေးတော်ပုံတွေနဲ့ မတူ အာဏာရှင်ကို အောင်ပွဲယူမယ့် ပွဲပါပဲ။

ပြည်ပ စစ်ရေး နိုင်ငံရေး ပညာရှင်တွေက သုံးသပ်ပြော​ဆိုကြတယ်။ ပြည်တွင်း ပြည်ပ ပြည်သူတွေရဲ့ ထောက်ခံချက်၊ ရန်ပုံငွေအင်အား၊ PDF တွေရဲ့ အရိုးကြေကြေ အရေခန်းခန်း တိုက်ပွဲစိန်ခေါ်သံတွေကြောင့် နွေဦးတော်လှန်ရေးသည် အောင်ကို အောင်မြင်ရမယ်။ လက်ဗလာနဲ့ လာတဲ့သူကို လက်နက်တပ်ဆင်မှု၊ စစ်အမိန့် တပ်ဖွဲ့အတိုင်း ဖွဲ့စည်းတည်ထောင်မှု၊ စစ်ရေးကျွမ်းကျင်မှုတွေအတွက် အချိန်အတိုင်းတာတခု ကြာရင်ကြာမယ်၊ နွေဦးက အာဏာရှင်အမြစ်ဖြုတ် အောင်နိုင်တဲ့ပွဲပါပဲတဲ့။

ဒီလိုနဲ့ ၂၀၂၃ ကို ရောက်တဲ့အခါ စစ်အာဏာရှင် မင်းအောင်လှိုင်က တိုင်းရင်းသား နယ်မြေတွေက စစ်ရေးဦးဆောင်သူတွေကို ပြောင်းလဲကစားခဲ့တယ်။ မြေပြင်မှာ စစ်ကောင်စီ တပ်သားတွေထက် ဗိုလ်ကြီး၊ ဗိုလ်မှူးကျပြီ၊ အထိနာပြီဆိုတာနဲ့ လေယာဥ်က တနာရီအတွင်း အရောက်လာနိုင်ခဲ့တယ်။ မြင်မြင်သမျှ အကုန်ကြဲ အကုန်ပစ်စနစ်၊ သူ့ဘက်က စစ်ခွေးသေလည်း ရောပစ်ချမယ်ဆိုသော လေကြောင်းထိုးဖောက်အဖွဲ့ပါ။ ဒီလို လေကြောင်းကို အမှီပြုနေရသော စစ်ကောင်စီက 9 မမ ကျည်ကနေ စကတ်ဒုံးကျည် 122. 144 အထိ ထုတ်လုပ်နိုင်သော ကပစစက်ရုံတွေ ရှိပါတယ်။ ကျည်ကို ဖောဖောသုံးနိုင်သော အနေအထားဖြစ်ပြီး မြေပြင်မှာ တိုက်ပွဲဖြစ်တဲ့နေရာတခုကို နှစ်နာရီအတွင်း ချက်ချင်း အယောက် ၁၀၀ နီးပါး စစ်ကူလာနိုင်သော အခြေအနေ ရှိပါတယ်။ ဒေါက်တာဒေါ်မီမီဝင်းဘက် ပြောသလို လေယာဥ်ပစ်လက်နက်တွေ မရနိုင်သေးခင် လေယာဥ်ပျံတက်လို့ မရနိုင်သော ထောက်ပို့များကို ပစ်မှတ်ထား ဆော်နိုင်ရင်လည်း လေကြောင်းရန် အကောင်းဆုံး တိုက်ခိုက်မှုပါပဲလို့ ဆိုပါတယ်။

ဟုတ်ပြီ ဒါဆို ကျနော်တို့ တော်လှန်ရေးအင်အားစုတွေ စစ်ရေးကို ဦးဆောင်သူ နွေဦးတော်လှန်ရေးတပ်ဖွဲ့တွေ ဘက်ကရော ဘာတွေများ ထပ်မံပြင်ဆင်ဖွဲ့စည်းသင့်လဲ။ သုံးသပ်မှုတွေကို တိုက်ပွဲဝင်ရင်း ဆက်တိုက် ပြောင်းလဲအစားထိုးမှုတွေ လုပ်ငန်းစဥ် အချိန်းအပြောင်းတွေ လုပ်လာရတော့မှာ ဖြစ်ပါတယ်။

စစ်ကောင်စီတပ်ပျက်ဖို့က တိုက်ခိုက်ရေးနဲ့အတူ CDM သိပ်အရေးကြီးပါတယ်။ အဓိကပစ်မှတ်တွေ ရှိကြတယ်။ ၆၀ မမ၊ ၁၂၀ မမ ပစ်ဖို့ လူမရှိ မင်းအောင်လှိုင် ဆင်းပစ်လည်း ရတယ်။ အဲ တခုပဲ ဇော်မဲလုံး ဘယ်လောက်တက်ကြွတက်ကြွ လေယာဥ်တော့ တွေ့တဲ့သူတက်မောင်းလို့မရပါဘူး။ ဒါကြောင့် ပစ်မှတ်တိုက်ခိုက် ရှင်းလင်းမှုတွေနဲ့အတူ CDM လက်နက်ကိုင်တွေကို ထပ်မံဖိတ်ခေါ်ပြီး စနစ်တကျ နေရာချထားမှု၊ မိသားစုအလိုက် ပါလာပါက လက်လွတ်စပယ်မဟုတ်ဘဲ စောင့်ရှောက်ထားမှု၊ လူသားတိုင်းရဲ့ လူ့အခွင့်အရေးအတွက် CDM လက်နက်ကိုင်တွေအပေါ် သူတို့ စိတ်သဘောထား မှတ်ချက်တွေကို အသိအမှတ်ပြု လုပ်ဆောင်ကူညီမှုတွေ ပြန်လုပ်သင့်ပါတယ်။

ထို့အတူ တိုင်းရင်းသား လက်နက်ကိုင်တွေမှာ တပ်မဟာအလိုက်ကို မတူညီတဲ့ စစ်ရေးဦးဆောင်မှုတွေ ရှိတယ်။ ဒါတွေကိုလည်း PDF စစ်ရေးတာဝန်ခံတွေက ပုံသေတခုတည်း မသတ်မှတ်ဘဲ တိုင်း၊ ပြည်နယ် လက်နက်ကိုင် အဖွဲ့အစည်းတွေအလိုက် တော်လှန်ရေးကို လက်တွဲဆင်နွှဲနိုင်ရမယ်။ PDF တွေမှာ ၉၀ ရာခိုင်နှုန်းက တိုက်ပွဲအတွေ့အကြုံ အသာထား၊ လက်နက်တောင် ၂၀၂၁ မတ်လမှ ကိုင်ဖူးသူတွေပါ။ စစ်ရေးတာဝန်ခံတွေလည်း ထို့အတူပါပဲ။

နွေဦးက စုပေါင်းအားနဲ့ တိုက်တဲ့ပွဲမှာ အောက်ခြေ PDF တွေကို ကျနော်တို့ကတော့ ဒီ ရဲဘော်လေးတွေ ဦး ရေး ထောက်မှာ ဘယ်နေရာ တာဝန်ပေးရင်ရမယ်။ သူက PDF လုပ်နေပေမဲ့ လက်နက်ကိုင်ပြီး တိုက်ပွဲဝင်တာထက် ထောက်ပို့၊ ကျန်းမာရေး၊ ရုံးအကူ၊ ထုတ်လုပ်ရေး စတဲ့ တခြားဌာနများမှာ ဝင်လုပ်နေရင်လည်း နွေဦးမှာ ပါဝင်ခွင့်ပေးရမှာ ဖြစ်ပါတယ်။ နွေဦးမှာ ဦးဆောင်သူတွေကလည်း သူ့တာဝန်နဲ့ သူကျွမ်းကျင်ရာအလိုက် အံဝင်ခွင်ကျရင် တော်လှန်ရေးက သိပ်မကြာပါဘူး။

ပြီးတော့ ၂ နှစ်တာကာလအတွင်း NUG မှာလည်း ကိုယ်ဦးဆောင်ခဲ့တဲ့ လုပ်ငန်းစဥ်တွေ အလိုက်လည်း ပြန်လည်သုံးသပ်ကြပါ။ အဖူးရေ အတီးရေ လုပ်နေရုံနဲ့ မပြီးဘဲ ကိုယ်ဦးဆောင်မှုက အားနည်းနေလား၊ အင်အားထပ်ဖြည့်ပါ။ ထပ်ဖြည့်ရဲ့သားနဲ့ အဆင်မပြေ အောင်မြင်မှု ဘယ်အထိပဲ ရှိနေတယ်လို့ ပြန်သုံးသပ်ရင် မိမိယူနိုင်တဲ့ တာဝန်ကိုသာ ဌာနတခုခုမှာ ပြောင်းလဲလုပ်ကိုင်သင့်ပါတယ်။ အုပ်စုဖွဲ့မှုတွေကို ရှောင်ရှားရင်း စစ်ဏာရှင် အမြစ်ဖြုတ်ရေး နွေဦးအောင်ပွဲ မကြာခင် ဆင်နွှဲနိုင်ရေး ပြောင်းလဲသင့်တာတွေကို ပြောင်းလဲကြပါစို့လို့ တိုက်တွန်းရင်း အရေးတော်ပုံ အောင်ကိုအောင်ရမယ်။

အရေးတော်ပုံ အောင်ရမည်။

ရွှေနွယ်မောင်

7 mins Ago

March 27, 2023

လူလိမ်များမွေးမြူထားသည့် စစ်ကောင်စီလက်ထက် မြန်မာပြည်

ဖေဖော်ဝါရီလ ၂၆ ရက်စွဲဖြင့် KNU ကရင်အမျိုးအသား အစည်းအရုံးဗဟိုက ကရင်ပြည်နယ် မြဝတီမြို့တောင်ဘက် ကာစီနိုလောင်းကစား ရွှေက္ကိုလ်မြို့သစ်တွင် တရားမဝင် ရာဇဝတ်အမှု လုပ်ငန်းများနှင့် သက်ဆိုင်နေသော လောင်းကစားဝိုင်းများ ပပျောက်ရေး သဘောထား ထုတ်ပြန်ခဲ့ပါသည်။ KNU အစည်းအရုံးဝင်များကိုလည်း ၄င်း လောင်းကစားမြို့သစ် တည်ဆောက်ခြင်းနှင့် ပက်သက်သော ပါဝင်လုပ်ကိုင်ခြင်း၊ ထောက်ကူခြင်းများအား တားမြစ်ထားသည်လို့ ဆိုပါသည်။

ကာစီနိုလောင်းကစားမြို့သစ် ထူထောင်လုပ်ကိုင်သူများမှာ ကမ္ဘောဒီးယားနိုင်ငံ တရားဥပဒေစိုးမိုးမှု အဖွဲ့များမှ ဝိုင်းဝန်းနှိမ်နင်းသဖြင့် တိမ်းရှောင်ထွက်ပြေးလာသောသူများသည် ကာစီနို လောင်းကစားမြို့တော် ရွှေက္ကိုလ်မြို့သစ်တွင် လောင်းကစားများ ဂိမ်းများသာ ပြုလုပ်နေခြင်း မဟုတ်။ အခြားသော အွန်လိုင်းလိမ်လည်မှုများစွာ ရှိနေသည်လို့ သိရှိရပါသည်။

၂၀၁၅ ခုနှစ်ကစပြီး မြန်မာနိုင်ငံတွင်လည်း ဖုန်းမက်ဆေ့ချ်များ၊ အွန်လိုင်းများမှ လိမ်လည်ခဲ့မှုများ ယနေ့ထိ လိမ်လည်ငွေတောင်းမှုများစွာ ရှိနေခဲ့ပါသည်။ ကျွန်တော်ကိုယ်တိုင် ၂၀၂၀ နှစ်ကုန်ခါနီး သူငယ်ချင်းဖြစ်သူ facebook messenger မှတဆင့် ငွေသုံးသောင်း အလိမ်ခံရဖူးပါသည်။ သူ facebook အသုံးပြုခြင်းမရှိသည်ကို ကျွန်​တော်က မသိရှိဘဲ ဖုန်းထဲမှာလည်း online bank အဆင်သင့်ရှိနေသဖြင့် လွှဲပေးလိုက်သည်။ ငွေလိုသော အကြောင်းအရာက ကားဝပ်ရှော့မှာ ကားပြင်ပြီး ငွေအနည်းငယ်လိုနေကြောင်း အကြောင်းပြပြောဆိုခြင်း ဖြစ်သည်။ သည်လိုနှင့် ငွေလွှဲပြီးပြီးချင်း သူငယ်ချင်းဖြစ်သူကို ငွေရောက်လား ဖုန်းဆက်မေးလိုက်မှ ကျွန်တော်တို့ အလိမ်ခံရပြီဆိုတာ သိလိုက်ရသည်။

သူငယ်ချင်းဖြစ်သူမှာ အခြားသောသူများလည်း သူ အသုံးပြုခြင်း မရှိသော facebookမှ အလိမ်ခံနေရတာကြောင့် ငွေလွှဲပေးလိုက်သော ဘဏ်အကောင့်ကိုလိုက်၍ သက်ဆိုင်ရာ ပုဂ္ဂလိကဘဏ်ကို နှစ်ဦးသား အပြေးသွားလိုက်သည်။ ကျွန်တော် လွှဲထားသော ငွေမှာ ထုတ်ရှိထားခြင်း မရှိသေးသည့်အတွက် ဘဏ်ရုံးချုပ်ကို ဖြစ်စဥ်ပြောပြ၍ ဘဏ်အကောင့်ပိုင်ရှင် အချင်းချင်း ဖုန်းပြောခိုင်းသည်။ ဘဏ်ရုံးချုပ်မှလည်း ၄င်းအကောင့်ကို ယာယီပိတ်ထားလိုက်သည်။ တဖက်မှ ငွေချက်ချင်းပြန်လွှဲပေးမည် ပြောသော်လည်း သူငယ်ချင်းဖြစ်သူက နောက်လူတွေ ထပ်မဖြစ်ရအောင် အနီးစပ်ဆုံး အကောင့်ဖွင့်ထားသော ဘဏ်ခွဲကို ငွေသား တိုက်ရိုက်သွားပေးသွင်းရန် တောင်းဆိုလိုက်သည်။ နယ်စပ်ရောက်နေသဖြင့် မသွားရောက်နိုင်ကြောင်း ဖုန်း banking ကနေသာ လွှဲပေးလို့ရပါမည် ပြောလာသည်။ ယခု ကိစ္စမှာလည်း သူ မသိရှိကြောင်း ကလေးစက်ဘီး ဝယ်သူက သည်နံပါတ်နှင့် ငွေချေမည်ပြော၍ လက်ခံလိုက်ကြောင်းသာ အတွင်တွင်ပြောသည်။ သည်လိုနှင့် စစ်ကောင်စီ အာဏာသိမ်းလိုက်ပြီးချိန်အထိ တန်းလန်းကျန်ရစ်နေခဲ့သည်။

အကျိုးအကြောင်း ဆက်၍ပြောရမည်ဆို ရွှေက္ကိုလ်ကနေ အလုပ်ထွက်ခဲ့သော လူငယ်လေးတစ်ဦးနှင့် တွေ့ဆုံမိသည်။ သူ့ကို လောင်းကစားနှင့် ပတ်သက်သော လုပ်ငန်းများ အတော်ကျွမ်းကျင်ပြီလား မေးသည့်အခါ သူက လောင်းကစားဝိုင်းတွင် လုပ်ရသည့်အလုပ် မဟုတ်ပါဟု ပြောလာသည်။ သေသေချာချာ မေးကြည့်သည့်အခါ မြန်မာပြည်မှာ လူလိမ်များစွာ လက်ခံထားသည်ကို တွေ့ရှိရပါသည်။

ထိုလူငယ်လေးသည် ရန်ကုန်မှ ထွက်လာသူဖြစ်ပြီး ကွန်ပျူတာနှင့် အင်္ဂလိပ်စကား အနည်းငယ်ရသဖြင့် အလုပ်သင် ၁၅ ရက် ခန့်ခဲ့ပါသည်။ အလုပ်သင်ကာလ ပြီးသည်နှင့် တစ်လ ဘက် ၁၅၀၀၀ ရမည်ဆိုကာ လူငယ်လေး ဝင်ရောက်လုပ်ကိုင်ခဲ့သည်။

အလုပ်ချိန်မှာ ည ၈ နာရီမှ မနက် ၅ နာရီအထိ ဖြစ်သည်။ ကွန်ပျူတာတစ်လုံးပေးကာ အလုပ်ပိုင်ရှင်မှ ပေးသော နံပါတ်များကို webstite Test.Now မှတဆင့် ဖုန်းမက်ဆေ့ချ် ပို့ရသော အလုပ်ဖြစ်သည်။ အဓိကအားဖြင့် ဥရောပ၊ အမေရိကနှင့် အရှေ့အလယ်ပိုင်း ဒေသဘက်ကို ဖုန်း နံပါတ် မှားသလိုလိုဖြင့် မိတ်ဆက်စကားဆိုရသည်။ ပြောဆို ရေးသားသည့်အခါ သည်ဘက်မှ မိန်းကလေးတစ်ယောက်လို ရေးရသည်။ အဆင်ပြေပြေ ပြန်ပြောလာသည်နှင့် တယ်လီဂရမ် သုံးလား signal သုံးလား line သုံးလားဆိုပြီး မေးရပြီး  ok သည်နှင့် လူငယ်လေးသည် လုပ်ငန်းခေါင်းဆောင်ကို ပြောပြပြီး ကျန်သည့် ငွေဆက်လိမ်မည့် အဖွဲ့ဘက်ကို ပေးလိုက်ရပါသည်။

သည်လို ချိတ်ဆက်မှုမျိုး တစ်ညကို နှစ်ယောက်ရအောင် လုပ်ပေးရပါသည်။ အကယ်၍ တစ်ယောက်သာ ရပါက အလုပ်ချိန် တစ်နာရီ ပိုဆင်းပေးရသည်။ ထမင်းတစ်နေ့ ငါးနပ်ကျွေးသည်။ သို့သော် ငွေရများလို့သာ လုပ်ရသည့်အလုပ်မှာ လူလိမ်အလုပ် ဖြစ်နေသောကြောင့် လူငယ်လေး အလုပ်ကနေ ထွက်ခဲ့လိုက်သည်။

လောင်းကစားလုပ်ငန်းများသည် အာရှတွင် ခပ်များများ ရှိကြပါသည်။ မလေးရှား၊ စင်ကာပူ၊ ကိုရီးယား၊ ဂျပန်၊ ဟောင်ကောင်၊ ထိုင်ဝမ်နှင့် ထိုင်း စသည့်နိုင်ငံများသည် အနောက်နိုင်ငံသားများနှင့် အာရှတိုက်သားတို့အကြိုက် နေရာများဖြစ်သည်။ လောင်းကစားလုပ်ခြင်းသည် မကောင်းသည့် လုပ်ငန်းမှန်း သိကြသော်လည်း လူအတော်များများ ကြိုက်သောလုပ်ငန်းဖြစ်နေ၍ အထက်ဖော်ပြပါ နိုင်ငံများတွင် အခွန်အခ အဆမတန်ကောက်ကာ လုပ်ငန်းခွင့်ပြုခဲ့ကြသည်။ သို့သော် တရားဝင် လောင်းကစားဖြစ်သော်လည်း နိုင်ငံမှ ထောက်လှမ်းမှု အမြဲလုပ်နေကြသည်လို့ သိရပါသည်။ သည်လို နိုင်ငံများတွင် ဥပဒေနှင့်အညီ လုပ်ကိုင်ကြသည့်အခါ လူလိမ်များမှာ မြန်မာပြည်မှာ အခြေချလာကြသည်။ မြန်မာပြည်က ဘာကြောင့် ဒါတွေ လုပ်ခွင့်ရသည်လဲ။ ရှင်းပြအံ့။

ကျွန်တော်တို့နိုင်ငံတွင် ထိုင်းထီ၏ နောက်ဆုံးသုံးလုံးကို ချဲဆိုပြီး တရားမဝင် လောင်းကစားလုပ်ငန်း ရပ်တည်နေခဲ့သည်မှာ သိမီသလောက် စစ်အာဏာရှင် နေဝင်းလက်ထက်ကတည်းက ဖြစ်သည်။ (တိကျသော သက္ကရာဇ်နှစ် မသိရခြင်းသည် ကျွန်တော်၏ အားနည်းချက်ဖြစ်ပါသည်။) ချဲသည် မြန်မာတနိုင်ငံလုံး မသိသူ မရှိသလောက် ဖြစ်ပါသည်။ ရဲ လိုင်းကြေးပေး၍ ရောင်းချရသော လုပ်ငန်းဖြစ်သည်နှင့်အညီ အမှုလိုလို့ ဆိုကာ တရားမဝင် လောင်းကစားလုပ်ငန်း လုပ်ကိုင်သူအား ဖမ်းဟေ့ဆို တဆင့်ခံ ဒိုင်အသေးလေးများနှင့် ထိုးသားများသာ အများဆုံး အဖမ်းခံရပါသည်။ သူတို့လိုမျိုး အယောက်တစ်ရာဖမ်းပြီးမှသာ ဒိုင်ကြီးတွေ ဖမ်းမိတာရှိပါသည်။ အဘယ်ကြောင့်ဆိုသော် ဒိုင်ချုပ်ကြီးများသည် စစ်ဘက်၊ ရဲဘက် အရာရှိကြီးများနှင့် ပတ်သက်သောသူများ ဖြစ်နေသောကြောင့် ဖြစ်သည်။ 

သည်လိုဖြင့် တရုတ်ကြီးများသည် မြန်မာ-ထိုင်းနယ်စပ်တွင် လောင်းကစားဝိုင်း အကြီးကြီးတစ်ခု ဖန်တီးကာ ၄င်းတို့ ဧရိယာအတွင်း လောင်းကစားပေါင်းစုံ လူလိမ်ပေါင်းစုံကို လက်ခံ၍ အဖွဲ့အစည်းများ၊ စစ်ဘက်ဆိုင်ရာ အရာရှိကြီးများအား လာဘ်ထိုးမှု ခပ်ကြီးကြီးပေးသောကြောင့် မည်သူမှ မတို့ရဲ မထိရဲဖြစ်နေသော ရွှေက္ကိုလ်မြို့သစ်ကြီး ပေါ်ပေါက်လာခြင်း ဖြစ်သည်။

အာဏာသိမ်းပြီးမှ ရွှေက္ကိုလ်မှာ ခြံဝယ်ထားသော အသိမိတ်ဆွေတစ်ယောက် ခြံသွားကြည့်ပြီး ပြန်အလာ BGF တပ်ဖွဲ့ဝင်မှ ငွေတောင်းရမ်းခြင်းခံရသည်။ ငါ လောင်းကစားဝိုင်းက ပြန်လာတာ မဟုတ်။ ငါ့ခြံကနေ ငါပြန်လာသည်ပြောမှသာ ဂိတ်ကနေ ငွေတောင်းခြင်းမရှိ လွှတ်ပေးလိုက်သည်လို့ ဆိုပါသည်။ ထိုမိတ်ဆွေမှ လက်တို့ကာ ပြောသွားသည့် စကားတစ်ခွန်း မမေ့ရက်စရာ ဖြစ်ခဲ့သည်။ စစ်ဘေးရှောင်များ အဲသည့်နားသွားနေကြရင် ကောင်းမည်။ လေယာဥ်၊ တိုက်ပွဲကင်းစင်ဇုန်နေရာဟု အကြံပေးပြောသွားသည်က ရင်နင့်စရာဖြစ်သည်။

စစ်ကောင်စီလက်ထက်တွင် မြို့ရွာအနှံ့ လောင်းကစားဝိုင်းများ တည်ထောင်ကာ ဝန်ထမ်းများကို အောက်ဆိုဒ်ဝင်ငွေခွင့်ပြုထားပြီး ပြည်သူလူထုကို အာရုံလွှဲနေချိန်တွင် ယနေ့ ရွှေက္ကိုလ် လောင်းကစားရုံကြီးမှ စစ်ကောင်စီ အရာရှိကြီးများတွက် ဘယ်၍ဘယ်မျှ လာဘ်စားမှုငွေတွေ ရနေကြပြီလဲ။ အခြားသော အဖွဲ့အစည်းများ အကျိုးတူ ပါနေသလား ဆိုတာကဖြင့် မေးခွန်းထုတ်ရမည့် အခြေအနေ ဖြစ်ပါသည်။

ယနေ့ စစ်ကောင်စီအား များစွာ အထောက်အကူပြုဖြစ်စေသော ငွေကြေးထောက်ပံ့သူများထဲတွင် လောင်းကစားလုပ်ငန်းများသည် အဓိကဖြစ်နေကြောင်း မြေပြင်လေ့လာမှု အခြေအနေများအရ သိရပါသည်။

ထို့ကြောင့် မြန်မာ့မြေပေါ်မှ စစ်အာဏာရှင်နှင့်အတူ လူလိမ် လူကောက်များ၊ ဝိသမ လောဘသားကောင်များကို မောင်းထုတ်မည့်အရေးက နွေဦးတော်လှန်ရေးနှင့်အတူ ရှင်းလင်းသွားရမည်ဟု ဆိုချင်ပါသည်။

ရွှေနွယ်မောင်

1 month Ago
Up