ရန်ကုန်၊ ရွှေပေါက်ကံမြို့သစ်၊ မော်ကျွန်းမှတ်တိုင်မှာ ဖေဖော်ဝါရီ ၂၄ ရက်ည ၉ နာရီကျော်က အန်စာတုံးကားတစီးနဲ့ ဆယ်ကယ်တိုတစီးမတော်တဆ တိုက်မိပြီး အမျိုးသား ၁ ဦး၊ အမျိုးသမီးတစ်ဦးနဲ့ ကလေးငယ်နှစ်ဦး သေဆုံးခဲ့တယ်လို့ ရပ်ကွက်နေသူတွေဆီက သိရပါတယ်။
မိသားစုဝင်လေးဦးစီးလာတဲ့ ဆိုင်ကယ်ကို မနေ့ ၉ နာရီ ၁၀ မိနစ်လောက်မှာ ပုဂံလမ်းမကြီး မော်ကျွန်းမှတ်တိုင် EPC ရုံးရှေ့မှာ အန်စာတုံးကားတစ်စီးက တိုက်ခဲ့တာဖြစ်တယ်လို့ ရပ်ကွက်နေသူတစ်ဦးက ပြောပါတယ်။
"သုံးယောက်က တိုက်တဲ့နေရာမှာတင် ပွဲချင်းပြီးသေတယ်။ လင်မယားနှစ်ယောက်နဲ့ ၄ နှစ်အရွယ်ယောကျ်ားလေးတစ်ယောက်၊ ၇ နှစ် ရွယ် ကလေးမလေးက ဆေးရုံပို့ သေးတယ်။ ၁၂ နာရီလောက်မှ သေတာ"လို့ ပြောပါတယ်။
ယာဥ်တိုက်မှုဖြစ်စဉ်မှာ သေဆုံးသူသုံးဦးရဲ့ အလောင်းတွေကို မြောက်ဥက္ကလာပမြို့နယ် ဆေးရုံကို ပို့ဆောင်ပြီး ဒဏ်ရာရရှိတဲ့ ကလေးငယ်ကို မေဓာဝီဆေးရုံကိုပို့ဆောင်ပေးခဲ့ရာ ၁၂ နာရီကျော်မှာ ဆေးကုသရင်းထပ်မံသေဆုံးသွားတယ်လို့ အုပ်ချုပ်ရေးနဲ့နီးစပ်သူတစ်ဦးက ပြောပါတယ်။
သေဆုံးသူတွေရဲ့ မိသားစုဝင်တွေနဲ့အဆက်အသွယ်ရပါပြီဖြစ်ကြောင်းနဲ့ ရွှေပေါက်ကံ ၂၂ ရပ်ကွက်ထဲကပါ ဧည့်စာရင်းနဲ့လိုင်းခန်းမှာနေတဲ့ မိသားစုတွေဖြစ်ကြောင်းလည်း ပြောပါတယ်။
ယာဥ်တိုက်မှုဖြစ်စဉ်နဲ့ ပတ်သက်ပြီး အန်စာတုံးယာဥ်မောင်းကို ဖမ်းဆီးထားကာ ရွှေပေါက်ကံနယ်မြေရဲစခန်းမှာ စစ်ဆေးနေပါတယ်။
ရန်ကုန်တိုင်းဒေသကြီး ရွှေပေါက်ကံမြို့နယ် လျှပ်စစ်ရုံးရုံးဘေး ဘောလုံးကွင်းအတွင်း စစ်ကောင်စီအဖွဲ့တွေ တပ်စွဲထားတဲ့နေရာမှာ ဇန်နဝါရီ ၆ ရက် မနက်အစောပိုင်းက ဗုံး ၃ လုံးဆက်တိုက်ပေါက်ကွဲခဲ့တယ်လို့ ဒေသခံတွေက ပြောပါတယ်။
“မနက် ၅ နာရီလောက်က ဗုံးတွေ ဆက်တိုက်ပေါက်ကွဲတာပဲ။ အသံအတော် ကျယ်တယ်။ အစောကြီးဆိုတော့ လူထိခိုက်တာတော့ သေချာမသိဘူး” လို့ အနီးနားနေထိုင်သူတစ်ဦးက ပြောပါတယ်။
အဆိုပါ ဗုံးဖောက်ခွဲမှုကို Yangon Federal Army -YFA နဲ့ ပူးပေါင်းအဖွဲ့က M 79 40mm ဗုံးသီး ၃ လုံး နဲ့ တိုက်ခိုက်ခဲ့တာဖြစ်ပြီး စစ်ကောင်စီ လုံခြုံရေးတပ်ဖွဲ့ဝင် ၁၀ ဦးထိ ထိခိုက်နိုင်တယ်လို့ YFA ရဲ့ ထုတ်ပြန်ချက်အရ သိရပါတယ်။
ရန်ကုန်မှာ ပေါက်ကွဲမှုတွေ၊ ပစ်ခတ်မှုတွေ ဆက်တိုက်ဖြစ်ပွားနေသလို စစ်ကောင်စီ တပ်ဘက်ကေည်း စစ်ဆေးရေးတွေ တင်းကြပ်နေတယ်လို့ ဒေသခံတွေက ပြောပါတယ်။
ဇန်နဝါရီ ၅ ရက် ည ၇ နာရီကျော်လောက်ကလည်း ရန်ကုန်တိုင်းဒေသကြီး ဒေါပုံမြို့နယ် သင်္ဘောကျင်းရဲစခန်းကို B.E.R.A.F (ဗမာ့ နောက်ဆုံးတော်လှန်ရေး လက်နက်ကိုင်တပ်ဖွဲ့) က လက်ပစ်ဗုံးပစ်သွင်း တိုက်ခိုက်ခဲ့တယ်လို့ သိရပါတယ်။
