မန္တလေးတိုင်း၊ ပြင်ဦးလွင်ခရိုင်၊ စဉ့်ကူးမြို့နယ်အတွင်း မေ ၂၀ ရက် မနက်အစောပိုင်းက ဒေသကာကွယ်ရေး ပူးပေါင်းတပ်တွေရဲ့ တိုက်ခိုက်ဖောက်ခွဲမှုတွေကြောင့် မီးသတ်၊ ရဲနဲ့ စစ်သား အများအပြား ကျဆုံးဒဏ်ရာရခဲ့တယ်လို့ ဒေသကာကွယ်ရေးတပ်တွေက ပြောပါတယ်။
စဉ့်ကူးမြို့နယ် ရွှေပြည်ရဲကင်းကို မေလ ၂၀ ရက် မနက်တနာရီခွဲလောက် ဒေသကာကွယ်ရေး ပူးပေါင်းတပ်က ၂၅ မိနစ်လောက် ပစ်ခတ်ခဲ့တာကြောင့် ရဲကင်းက စခန်းမှူး အပါအဝင် ရဲ ၅ ဦး သေဆုံးပြီး အများအပြား ဒဏ်ရာရရှိခဲ့တယ်လို့ ဥဒေါင်းမင်းအဖွဲ့က ပြောပါတယ်။
အဲ့ဒီနောက် လာကူတဲ့ စစ်ကောင်စီတပ်ဖွဲ့တွေကိုလည်း လက်ပံလှကျေးရွာအနီးရှိ ငွေတောင်တိုးဂိတ်အနီးမှာ မနက်သုံးနာရီခွဲလောက် မိုင်းသုံးလုံး ဖောက်ခွဲတိုက်ခိုက်ခဲ့ပေမဲ့ ထိခိုက်မှု မရှိခဲ့ဘူးလို့ ဆိုပါတယ်။
စစ်ကောင်စီတပ်တွေဟာ ကျန်တဲ့မိုင်းတွေကို ရှာဖွေရှင်းလင်းနေစဉ် မနက် ငါးနာရီလောက် ပေါက်ကွဲခဲ့တာကြောင့် သုံးဦး သေဆုံးသွားကြောင်း၊ ဒီနောက် မွန်းတည့် ၁၂ နာရီလောက် နောက်တကြိမ် ထပ်မံရှင်းလင်းရာမှာလည်း မိုင်းပေါက်ကွဲခဲ့တာကြောင့် စစ်ကောင်စီတပ်ဖွဲ့ဝင် နှစ်ပွင့် ဗိုလ်တဦး၊ လက်ပံလှမှ မီးသတ်ဦးစီးတဦး၊ မီးသတ်တပ်သားတဦး ထပ်မံသေဆုံးခဲ့တယ်လို့ စဉ့်ကူးမြို့နယ် ပကဖရဲ့ လက်အောက်ခံ ဥဒေါင်းမင်းအဖွဲ့ တာဝန်ရှိသူက ပြောပါတယ်။
"မနက်ကရှင်းတာ မအောင်မြင်လိုက်တော့ နေ့လယ်ပိုင်းတချက်ကို စက်သေနတ်နဲ့ရမ်းတာ၊ ရမ်းပြီးတော့မှ မိုင်းရှာတာ တွေ့သွားတော့ သူတို့ မီးသတ်ကား ခေါ်ပြီးတော့မှ ရှင်းတာ။ အဲ့မှာ မိုင်းက သုံးလုံးထကွဲသွားတော့ မီးသတ်သမားနှစ်ယောက်နဲ့ စ(--) နှစ်ပွင့်တယောက်နဲ့ လစ်သွားတာ။ လစ်သွားတော့ အဲ့မှာ သူတို့ အုံပြုံနေတဲ့အချိန်ကို ဒီက တခါ ထပ်ခွဲလိုက်တော့ ကျန်တဲ့လူတွေပါ အကုန်ထပ်လစ်တာ။"
ဒီတိုက်ခိုက်မှုကို စဉ့်ကူးမြို့နယ်အတွင်းက မဟာမိတ်တပ်ပေါင်းစုတွေ၊ မဟာမိတ်ဖြစ်တဲ့ မတ္တရာ(ပကဖ) နဲ့ လင်းယုန်တပ်ဖွဲ့တို့ ပူးပေါင်းပြုလုပ်ခဲ့ပြီး အထိအခိုက်မရှိ အောင်မြင်စွာ ဆုတ်ခွာနိုင်ခဲ့တယ်လို့ သိရပါတယ်။
စဉ့်ကူးမြို့နယ်အတွင်း ဧရာဝတီအနီးက ကျေးရွာတွေမှာ စစ်ကောင်စီတပ်တွေက မီးရှို့ဖျက်ဆီးတာ၊ ပြည်သူတွေရဲ့ ပစ္စည်းတွေကို လုယက်ယူငင်တာတွေ လုပ်ဆောင်နေတာကြောင့် အစွမ်းကုန် တော်လှန်သွားမယ်လို့ ကာကွယ်ရေးတပ်ဖွဲ့တွေက ဆိုပါတယ်။
တော်လှန်ရေးကာလအတွင်း စစ်ကောင်စီကို တော်လှန်တိုက်ခိုက်ဖို့ လက်နက်အင်အား အင်မတန် နည်းပါးနေတာကြောင့် ဥဒေါင်းမင်းတပ်ဖွဲ့ကို အကူအညီပေးကြဖို့ကိုလည်း ဥဒေါင်းမင်းအဖွဲ့ရဲ့ တာဝန်ရှိသူက မေတ္တာရပ်ခံထားပါတယ်။
"ကျနော်တို့ကလည်း ဒါ အများကြီးမလိုပါဘူး၊ မောင်းပြန်တလက်ပဲ၊ ကျနော်တို့မှာ မောင်းပြန်တလက်ရရင် ဘုရားပေးတဲ့ ဆုလို့ပဲ ကျနော်တို့ မြင်တယ်ပေါ့ဗျာ။”
ဒီကနေ့ တိုက်ခိုက်မှု ဖြစ်ခဲ့တဲ့နေရာတွေမှာ စစ်ကောင်စီတပ်က လုံခြုံရေးတင်းကျပ်တာ၊ လမ်းကြောတွေ ပိတ်ဆို့ရှာဖွေ စစ်ဆေးတာတွေ ပြုလုပ်နေတယ်လို့ ဒေသခံတွေက ပြောပါတယ်။
စဉ့်ကူး တိုက်ခိုက်မှုဖြစ်စဉ်အတွင်း စစ်ကောင်စီဘက်က ထိခိုက်ကျဆုံးမှုနဲ့ ပတ်သက်ပြီး ဒီဗွီဘီက သီးခြားအတည်မပြုနိုင်သေးပါဘူး။
မန္တလေးမြို့၊ မဟာအောင်မြေမြို့နယ်၊ မဟာအောင်မြေကျောက်မျက်ရတနာ ရောင်းဝယ်ရေး စခန်း (ကျောက်ဝိုင်း) အနောက်ပေါက်မှာ နိုဝင်ဘာ ၄ ရက် မနက် ၆ နာရီကျော်က ပေါက်ကွဲမှု ဖြစ်ခဲ့ပါတယ်။
ဗုံးပေါက်ကွဲမှုကြောင့် အနီးနားရှိ ရဲတပ်ကြပ် တင်လင်းအောင်မှာ သေဆုံးခဲ့ပြီး ဒုရဲအုပ် သိန်းဇော်ဦး မှာ ဒဏ်ရာရှိခဲ့တယ်လို့ သိရပါတယ်။
“မသင်္ကာစရာ အထုတ်တွေ့တယ်ဆိုပြီး သွားကြည့်တာ။ သူတို့ စစ်ဆေးနေတဲ့အချိန် ပေါက်ကွဲတာလို့ ပြောနေကြတယ်။ တပ်ကြပ်ကတော့ သေသွားတယ်။ ဒုရဲအုပ်ကတော့ ဒဏ်ရာရရုံပဲ။”လို့ အနီးပတ်ဝန်းကျင်ရှိ ပြည်သူတစ်ဦးက ပြောပါတယ်။
ပေါက်ကွဲမှုဖြစ်ပြီး မကြာခင်မှာ စစ်ကောင်စီတပ်တွေ ရောက်လာပြီး အနီးပတ်ဝန်းကျင်မှာ စစ်ဆေးတာတွေ လုပ်ခဲ့ကြတယ်လို့ သိရပါတယ်။ အောက်တိုဘာလ ၁၉ ရက်နေ့ကလည်း ကျောက်ဝိုင်းမှာ ပေါက်ကွဲမှုဖြစ်ခဲ့ပါတယ်။
စစ်ကောင်စီ လက်အောက်ခံ မန္တလေးမြို့တော် စည်ပင်က ကျောက်ဝိုင်း ပြန်လည်ဖွင့်လှစ်ကာ အခွန်ကောက်နေတဲ့အတွက် မန္တလေးမြို့ခံ ကျောက်မျက်လုပ်ငန်းလုပ်ကိုင်သူ စီးပွားရေးသမားတွေ အနေနဲ့ ကျောက်ဝိုင်းအတွင်း ဝင်ရောက်ပြီး အရောင်းဝယ်လုပ်တာ၊ စစ်ကောင်စီကို အခွန်ပေးဆောင်တာတွေ မလုပ်ဖို့နဲ့ ကျောက်ဝိုင်းအတွင်း ဝင်ရောက်လုပ်ကိုင်ပါက အသက်အန္တရာယ်ရှိတယ်လို့ GZP ပြောက်ကျားတပ်ဖွဲ့က ထုတ်ပြန်ထားပါတယ်။
မန္တလေးတိုင်း၊ စဉ့်ကူးမြို့နယ်မှာလည်း မိုးကုတ်-မန္တလေးသွား ကားလမ်းဘေးရှိ ရွှေပြည်ရဲကင်းစခန်းမှာ နိုဝင်ဘာလ ၃ ရက် ညနေ ၅ နာရီကျော်လောက်က သေနတ်နဲ့ ပစ်ခတ်ခံရတယ်လို့ သိပါတယ်။
ပစ်ခတ်တဲ့အဖွဲ့ဟာ ဘယ်အဖွဲ့ကဆိုတာ မသိရပဲ ရွှေပြည်ရဲကင်းစခန်းရှေ့မှာ အပြန်အလှန် ပစ်ခတ်မှုဖြစ်ခဲ့ကာ ရဲတပ်သားတစ်ဦး ထိခိုက်ဒဏ်ရာရတယ်လို့ ဒေသခံတချို့ က ဆိုကြပါတယ်။
“ ညနေ ၅ နာရီလောက်မှာ ဆိုင်ကယ်နဲ့ လာပစ်သွားတာတဲ့။ စခန်းထဲက ရဲတွေက လည်း ပြန်ပစ်တယ်။ သေနတ်သံ အချက် သုံးဆယ်လောက် ကြားရတယ်။” လို့ ဒေသခံတစ်ဦး က ပြောပါတယ်။
ဒဏ်ရာရသူဟာ ရဲတပ်သားမင်းဖြိုးဟိန်းဖြစ်ပြီး ညာဘက်ခြေသလုံးတွင် ကျည်ဖောက်ဝင် ဒဏ်ရာတစ်ချက်ရရှိခဲ့တာကြောင့် ဆေးကုသမှုခံယူနေတယ်လို့ သိရပါတယ်။
