စစ်ကိုင်းတိုင်း၊ ရွှေဘိုမြို့နယ်မှာ စစ်ကောင်စီအရာရှိတွေ ရောက်ရှိနေတဲ့အတွက် စစ်သားတွေ နေရာအနှံ့ချထားချိန် မတ်လ ၂၈ ရက်က ရွှေဘိုကားကွင်းအနီး တံတားပေါ်မှာ မိုင်းကွဲပြီး ကလေးငယ်တဦး အပါအဝင် လူ ၂ဝ ကျော် ဒဏ်ရာရကာ ၁ ဦးသေဆုံးခဲ့ရတဲ့ ဖြစ်စဥ်နဲ့ ပတ်သက်ပြီး ရှုတ်ချတယ်လို့ Black Wolf Army က ပြောပါတယ်။
အဆိုပါဖြစ်စဥ်အပြီး တံတားပေါ် လူနာတွေကောက်ပြီးချိန်မှာ ကားကြီးကွင်းမြောက်ဘတ်လမ်းပေါ်မှာ ဒုတိယအကြိမ် ထပ်မံမိုင်းကွဲခဲ့တဲ့အတွက် ကလေးငယ်နှစ်ဦး အပါအဝင် အမျိုးသား ၁၂ ဦး၊ အမျိုးသမီးလူနာ ၈ ဦးကို မန္တလေးဆေးရုံ လွှဲပြောင်းထားပြီး ဆေးရုံရောက်ရှိချိန် အမျိုးသားတဦး သေဆုံးခဲ့တယ်လို့ Black Wolf Army မှ တာဝန်ရှိသူတဦးက ဒီဗွီဘီကို ပြောပါတယ်။
“မနေ့ကဖြစ်စဥ်က တော်တော်ကို ပြည်သူတွေ ထိခိုက်ခဲ့ရတယ်။ အဲ့အတွက် ကျနော်တို့လည်း လက်လှမ်းမီရာကို စုံစမ်းကြည့်ပေမဲ့ ပြည်သူ့ကာကွယ်ရေးတပ်တွေကတော့ မလုပ်ကြဘူးလို့ ပြောတယ်။ စစ်ကောင်စီလုပ်တာ အများကြီးဖြစ်နိုင်ပြီး တကယ်လို့ တခုခုသိရရင်လည်း လက်တုံ့ပြန်သွားမယ်။”
အခုလို မိုင်းဖောက်ခွဲတိုက်ခိုက်မှုတွေ လုပ်ဆောင်ခဲ့တဲ့အတွက် အပြစ်မဲ့ပြည်သူလူထု အများအပြား ထိခိုက်ဒဏ်ရာရရှိခဲ့လို့ ဘယ်အဖွဲ့အစည်းဖြစ်စေကာမူ BLACK WOLF - ARMY တပ်ဖွဲ့ဝင်တွေက ပြင်းထန်စွာ ရှုတ်ချတယ်လို့ ဒီဗွီဘီကို ပြောပါတယ်။
အဲဒီဖြစ်စဥ်မှာ ပြည်သူလူထုရဲ့ အသက်၊ အိုးအိမ်၊ စည်းစိမ်ကို ထိခိုက်နစ်နာစေတဲ့အတွက် နီးစပ်ရာ ပြည်သူ့ကာကွယ်ရေးတပ်တွေကို မေးကြည့်ရာမှာတော့ မလုပ်ဘူးလို့ ထွက်ဆိုကြတဲ့အတွက် ဆက်လက်ပြီး အလားတူလုပ်ရပ်မျိုး ထပ်မံပြုလုပ်လာပါက မရမကစုံစမ်းပြီး စစ်ကောင်စီတပ်ကဖြစ်စေ၊ ပြည်သူ့ကာကွယ်ရေးတပ်ဖွဲ့ကဖြစ်စေ ပြုလုပ်တယ်လို့ ကြားသိရပါက လက်တုံ့ပြန်သွားမယ်လို့ လတ်တလော သိရပါတယ်။
စစ်ကောင်စီထောင်ထားတဲ့မိုင်းလို့ သိရပါက ပြည်သူလူထုအနေနဲ့ အသက်အိုးအိမ်စည်းစိမ်ကို ထိခိုက်နစ်နာစေခဲ့တဲ့ စစ်ကောင်စီ တပ်ရင်းနံပါတ်၊ ဦးဆောင်သူနဲ့ စစ်ကောင်စီတပ်ဖွဲ့ဝင်တွေ၊ သူတို့ရဲ့အမည်နဲ့ ကိုယ်ရေးအချက်အလက်တွေကို BLACK WOLF - ARMY သို့ ပေးပို့နိုင်တယ်လို့ အသိပေးကြေညာထားပါတယ်။
ဓာတ်ပုံ-BWA
စစ်ကိုင်းတိုင်း၊ ရွှေဘိုမြို့၊ ထူးကြီးရွာကို ပြီးခဲ့တဲ့ ဖေဖော်ဝါရီ ၂၀ ရက် ညနေပိုင်းမှာ စစ်ကောင်စီတပ်တွေ ဝင်ရောက်စစ်ကြောင်းထိုးခဲ့ပြီးနောက် ရိုးရာလက်မှုပညာ ရက်ကန်းအလုပ်နဲ့ အသက်မွေးရတဲ့ လက်ရက်ကန်းတွေသာမက စက်ရက်ကန်း စုစုပေါင်း ရာချီနီးပါး မီးရှို့ဖျက်ဆီးခံခဲ့ရပါတယ်။
ပြည်တွင်းပြည်ပက အလှူရှင်တွေ စိုက်ထုတ်လှူဒါန်းမှုနဲ့အတူ ဒီလထဲမှာ ရက်ကန်းစင်တွေ အပါအဝင် မီးရှို့ခံရတဲ့ အိမ်တွေလည်း ပြန်ဆောက်ပေးသွားမှာဖြစ်ပြီး တလကို ရက်ကန်းစင် ၁၀ စင် လှူဖို့ မှန်းထားတယ်လို့ S&C မီးဘေးစစ်ဘေး ပညာရေး ကူညီစောင့်ရှောက်ရေးအဖွဲ့က ပြောပါတယ်။
ကူညီဆောင်ရွက်ပေးနေတဲ့ S&C တာဝန်ခံ ကိုစိုးမိုးအောင်က “ရက်ကန်းလုပ်ငန်းတခုတည်းနဲ့ အသက်မွေးဝမ်းကျောင်း လုပ်နေသူတွေကို ဦးစားပေး ရွေးထုတ် မဲနှိုက်ပြီး ပထမတသုတ် မဲဖောက်ပေးတာပါ၊ ဒါက ပထမအကြိမ်ပါ။ ၂ စင် စပြီး လှူတယ်။ ဒီနေ့လည်း ဆက်လှူမယ်။ လက်သမားဆရာ သေချာရှာပြီး လုပ်ပေးနေရတယ်” လို့ ပြောပါတယ်။
စစ်ကောင်စီတပ်တွေ စစ်ကြောင်းထိုး ဖျက်ဆီးသွားတဲ့ ရက်ကန်းစင်ပေါင်း ဆုံးရှုံးမှုက ကာလတန်ဖိုး သိန်းပေါင်း သောင်းဂဏန်းလောက်ရှိပြီး လက်ရက်ကန်းချည်းပဲ ရာနဲ့ချီ ကုန်သွားတာဖြစ်ကာ စက်ရက်ကန်းက တရုံကို အနိမ့်ဆုံး သိန်း ၂၀၀ ကနေ ၅၀၀၊ ၁,၀၀၀၊ ၁၀ ရုံလောက် လောင်သွားတာဆိုတော့ တရွာလုံးတွက်ရင် သိန်းပေါင်း သောင်းဂဏန်းနီးပါး ရှိတယ်လို့ ဆိုပါတယ်။
S&C တာဝန်ခံ ကိုစိုးမိုးအောင်က “စက်ရက်ကန်းစင်က ပိုက်ဆံရှိတဲ့သူတွေမှ ထောင်နိုင်တာ။ သူတို့ကတော့ သိန်းရာချီ ဆုံးရှုံးတာ။ အများကြီး ဆုံးရှုံးတာ။ တောင်သူနားတဲ့အခါ ရက်ကန်းခတ်ကြတာ၊ တရွာလုံးရဲ့ ၈၀ ရာခိုင်နှုန်းက ရက်ကန်းစီးပွားရေး၊ ကျန်တဲ့ ၂၀ ရာခိုင်နှုန်းက တောင်သူလုပ်ငန်း လုပ်ကိုင်နေတာ” လို့ ပြောပါတယ်။
ရွှေဘိုနယ်ထဲက ဆိပ်ခွန်၊ ထူးကြီးရွာ၊ ရွှေဘိုနဲ့ ဒီပဲယင်းအစပ် မူးမြစ်ကမ်းရွာတွေဟာ ရိုးရာရက်ကန်းရုံတွေ အများဆုံးရှိပြီး ဒီနယ်တွေထဲ ရိုးရာအထည်ရက်ကန်းလုပ်ငန်းကို အဓိကလုပ်ကိုင်ကြတာ ဖြစ်ပါတယ်။
လက်ရက်ကန်းစင်တလုံး ကာလပေါက်ဈေး ၆ သိန်းဝန်းကျင်ရှိကာ စက်ရက်ကန်းတစင်းရဲ့ ကာလပေါက်ဈေး တစင်းကို သိန်း ၂၀ ဝန်းကျင်ရှိပြီး စုစုပေါင်း ၁၀၀ နီးပါးကို စစ်ကောင်စီတပ်တွေက စစ်ကြောင်းထိုး မီးရှို့ဖျက်ဆီးခဲ့တာ ဖြစ်ပါတယ်။
