စစ်ကိုင်း၊ ဝက်လက်မြို့နယ်၊ လှတောရွာအနီး၊ ရွှေဘို- မန္တလေးကားလမ်းမှာ ဧပြီ ၂၈ ရက် ညနေက ဖွဲသယ်လာတဲ့ ကားနဲ့ ခရီးသည်တင် အန်စာတုံးကား တိုက်မိပြီး လူ ၂ ဦးသေဆုံး၊ ၇ ဦး ထိခိုက်ဒဏ်ရာ ရရှိခဲ့တယ်လို့ ရွှေဘိုအခြေစိုက် ကယ်ဆယ်ရေးအသင်းက ပြောပါတယ်။

ကားနှစ်စီး မျက်နှာချင်းဆိုင်တိုက်မိတာကြောင့် လူ ၉ ဦးပါ အန်စာတုံးကားပေါ်မှ အမျိုးသား ၂ ဦး သေဆုံး၊ အမျိုးသမီး ၄ ဦးနဲ့ အမျိုးသား ၃ ဦးတို့ ဒဏ်ရာရရှိခဲ့ပြီး ဖွဲကားပေါ်ပါသူတွေတော့ ထိခိုက်မှု မရှိဘူးလို့ ဆိုပါတယ်။

ယာဉ်တိုက်မှုကြောင့် ဖွဲသယ်ကားမှာ ဘယ်ဘက်ခေါင်းခြမ်းပျက်စီးသွားပြီး အန်စာတုံးကားရဲ့ ဘယ်ဘက်ခြမ်းနဲ့ ကားခေါင်မိုးတွေပါ ပျက်စီးသွားတာပါ။

"ကားနှစ်စီးတိုက်တာ၊ အန်စာတုံးကားနဲ့ ဖွဲကားတိုက်ပါတယ်။ လှတောတောင်ဘက်ကွေ့မှာ၊ ယောကျာ်း ၂ ယောက် သေပါတယ်၊ ၇ ဦး ဒဏ်ရာရ ရပါတယ်။ သေတဲ့သူတွေက ၃၀၊ ၃၅ ဝန်းကျင်ပါပဲ၊ ပခုက္ကူနယ်သားတွေပါ" လို့ ရွှေဘိုမြို့ခံ ကယ်ဆယ်ရေးအသင်းတာဝန်ရှိသူတဦးက ပြောပါတယ်။

အန်စာတုံးကားဟာ ပခုက္ကူမြို့ကနေ ဖားကန့်မြို့ကို ပြေးဆွဲလာတဲ့ ခရီးစဉ်ဖြစ်တယ်လို့ သိရပြီး ကားပေါ်ပါသူတွေက ပခုက္ကူ၊ ချောင်းပြားရွာနေသူတွေလို့ သိရပါတယ်။

သေဆုံးသူ ၂ ဦးနဲ့ ဒဏ်ရာရရှိသူ ၇ ဦးအနက် ၅ ဦးကို ကယ်ဆယ်ရေးအသင်းတွေက ရွှေဘိုပြည်သူ့ဆေးရုံကြီးကို ပို့ဆောင်ပေးထားတယ်လို့ သိရပါတယ်။

ဧပြီ ၂၈ ရက် ည ၁၁ နာရီဝန်းကျင်လောက်ကလည်း ရန်ကုန်တိုင်း၊ သာကေတမြို့နယ် ရှုခင်းသာလမ်းမကြီး waterboom မှတ်တိုင်အနီးမှာ အိမ်စီးကားအဖြူရောင်တစီး အရှိန်မထိန်းနိုင်ဘဲ လမ်းဘေးဓာတ်တိုင်ကို ဝင်တိုက်မှု ဖြစ်ခဲ့တယ်လို့ သိရပါတယ်။

သာကေတမြို့ နယ်လူမှုကူညီရေးအဖွဲ့ဝင်တဦးက “လမ်းဘေးက လက်ရန်းတွေကို အရင်တိုက်ပြီးမှ ဓာတ်တိုင်ကို ဝင်တိုက်တာ၊ ကားထဲမှာ လူတွေညှပ်နေတာကို အကြောင်းကြားလာလို့ ကားထဲမှာ ရှိနေတဲ့ အမျိုးသား ၃ ဦးနဲ့ အမျိုးသမီး ၂ ဦး တို့ကို ကယ်ထုတ်နိုင်ခဲ့တယ်။ မြေပြင်ကုသမှုပေးပြုလုပ်ပေးခဲ့ပေမယ့် အသက် ၃၀ ဝန်းကျင် အမျိုးသမီးတဦး သေဆုံးခဲ့တယ်” လို့ ပြောပါတယ်။ 

ယာဉ်တိုက်မှုကြောင့် သေဆုံးသူ အမျိုးသမီးတဦးနဲ့ ဒဏ်ရာရလူနာတွေကို သာကေတမြို့နယ်က လူမှုကူညီရေးအသင်းများစုပေါင်းပြီး ရန်ကုန်ပြည်သူ့ဆေးရုံကြီးကို ပို့ဆောင်ကူညီပေးခဲ့တယ်လို့ သိရပါတယ်။

စစ်ကိုင်းတိုင်း၊ ဝက်လက်မြို့နယ်၊ ရွှေဘို-မန္တလေးကားလမ်းမှာ စက်တင်ဘာ ၂၂ ရက် ညနေ ၅ နာရီခွဲလောက်က စစ်ကောင်စီတပ်ဖွဲ့ဝင်တွေ လိုက်ပါလာတဲ့ သံပြားကာစစ်ကား ၂ စီးကို ပဒေသာမိုင်းတွေနဲ့ ၂ ကြိမ် ဖောက်ခွဲတိုက်ခိုက်ခဲ့တယ်လို့ ဒေသကာကွယ်ရေးအဖွဲ့က ပြောပါတယ်။

အဲ့ဒီစစ်ကား ၂ စီးဟာ ရွှေဘိုမြို့ကနေ ထွက်ခွာလာတာဖြစ်ပြီး ရွှေဘို-မန္တလေးကားလမ်းရှိ စိုင်နိုင်ကွေ့အနီးမှာ သိဒ္ဓိရှင် ပြည်သူ့ကာကွယ်ရေးအဖွဲ့၊ ဇာဏီသွေးတပ်ခွဲမှ ‌ပဒေသာမိုင်း ၆ လုံးနဲ့ ဖောက်ခွဲတိုက်ခိုက်ရာ ကား ၁ စီးမှာ ဆက်လက်မောင်းမရအောင် ထိခိုက်ပျက်စီးသွားခဲ့တယ်လို့ ဆိုပါတယ်။

သိဒ္ဓိရှင်ပြည်သူ့ကာကွယ်ရေးအဖွဲ့မှ တာဝန်ရှိသူတယောက်က “သူတို့က လှတောရဲစခန်းကို ဝင်ပြီး လှည့်လာတာ။ အင်အား ၇၀ ဝန်းကျင် ရှိလိမ့်မယ်။ ပွိုင့်မှာ ပဒေသာမိုင်းတွဲနဲ့ အဆင်သင့် စောင့်နေတာ။ မိုင်းကွင်းထဲအရောက်မှာ ထိထိရောက်ရောက် ဖောက်ခွဲတိုက်ခိုက်နိုင်ခဲ့တယ်။ သံပြားကာကား ၁ စီးက စက်ပိုင်းရော ဘီးပါ ထိသွားပုံရတယ်ဗျ။ ဆက်မောင်းမရတော့ ရပ်သွားတယ်။ အဲ့ဒီမှာ ဘေးပတ်ဝန်းကျင်ကို ရမ်းသန်းပြီး လက်နက်ငယ်ရော လက်နက်ကြီးနဲ့ပါ ရမ်းသန်းပစ်ခတ်တာတွေ လုပ်တယ်။ ကျနော်တို့တပ်ဖွဲ့တွေဘက်မှာတော့ အထိအခိုက် တစုံတရာ မရှိခဲ့ပါဘူး” လို့ ပြောပါတယ်။

ဒါ့အပြင် စိုင်နိုင်ကွေ့အနီး ရမ်းသန်းပစ်ခတ်ခဲ့တဲ့ စစ်ကောင်စီတပ်ဖွဲ့ဝင်တွေဟာ ကျန်ရှိတဲ့ ကား ၁ စီးနဲ့ ရွှေဘိုဘက်ကို ပြန်လည်ထွက်ခွာရာ စိုင်နိုင်လေးနဲ့ ဘုန်းတော်ဘွဲ့ကျေးရွာကြား အရောက်မှာ ပဒေသာမိုင်း ၅ လုံးနဲ့‌ ထပ်မံဖောက်ခွဲ တိုက်ခိုက်ခံရတယ်လို့ သိရပါတယ်။

အဲ့ဒီတိုက်ခိုက်မှုတွေအတွင်း စစ်ကောင်စီတပ်ဖွဲ့ဘက်က အထိအခိုက် အသေအပျောက် ရှိနိုင်ပေမဲ့ စုံစမ်းနေဆဲဖြစ်တဲ့အတွက် အတိအကျ မသိရသေးဘူးလို့ ဒေသကာကွယ်ရေးအဖွဲ့က ပြောပါတယ်။

ပြီးခဲ့တဲ့ ဩဂုတ် ၂၇ ရက်ကလည်း ရွှေဘို-မန္တလေးလမ်းက စိုင်နိုင်ကွေ့အနီးမှာ ‌စစ်ကောင်စီတပ်ဖွဲ့ရဲ့ ယာဉ်တန်းကို ဒေသကာကွယ်ရေး ပူးပေါင်းအဖွဲ့တွေက မိုင်းဆွဲတိုက်ခိုက်ခဲ့တာကြောင့် စစ်သား ၆ ယောက် သေဆုံးခဲ့ပါတယ်။