မြန်မာနဲ့ တရုတ် အဓိကကုန်သွယ်ရာ မြို့တမြို့ဖြစ်တဲ့ ရွှေလီမြို့အနီးနားက ရွာတွေမှာ ကိုဗစ်ရောဂါကြောင့် မကြာခဏ လော့ဒေါင်းချခံနေရတာ နှစ်ချီဖြစ်လာတာကြောင့် ဒေသခံတွေ စားဝတ်နေရေး ကျပ်တည်းလာပြီး အောက်တိုဘာ ၂၆ ရက်က ဆန္ဒပြခဲ့ကြပါတယ်။

တရုတ်ဘက်ခြမ်း ရွှေလီမြို့တဝိုက်က ရှမ်းရွာတွေကို တရုတ်ကျန်းမာရေးဌာနက ကိုဗစ်-၁၉ ကပ်ရောဂါအကြောင်းပြချက်နဲ့ သွားလာခွင့်ပိတ်ထားကာ မကြာခဏ လော့ဒေါင်းချနေတာကြောင့် ဒေသခံ ရွာသူ၊ ရွာသားတွေက သည်းမခံနိုင်တော့တာကြောင့် ဆန္ဒပြလာတာလို့ ဆိုပါတယ်

နယ်စပ်နေ ဒေသခံကုန်သည်တဦးက “ခုက ရွှေလီပတ်ချာလည်က ရှမ်းရွာတွေက မခံနိုင်တော့ဘူးလေဗျာ။ ၃ နှစ်တောင်မှ ကြည့်။ နေ့တိုင်း ထပြီး စား၊ ထပြီးစားဆိုတော့ အလုပ်လည်းမရှိဘူး။ ဒီတိုင်းကြီးက စားဝတ်နေရေး၊ နေရေးထိုင်ရေး၊ အစစအရာရာ အရမ်းကိုထိခိုက်နေပြီ။”လို့ပြောပါတယ်။

ရွှေလီဒေသခံတယောက်က “သူတို့ကို ကွာရန်တင်းပိတ်ထားတာလေ တရွာလုံးကို။ ဘယ်ကိုမှ မထွက်ခိုင်း၊ မသွားခိုင်းလို့ သည်းမခံနိုင်တော့လို့ဆန္ဒပြတာ” လို့ ပြောပါတယ်။

ရွာသားတွေဟာ ‌အမြဲတမ်းလိုလို ကိုဗစ်ပိုး စစ်နေရပြီး ရောဂါပိုး တယောက်တွေ့တာနဲ့ အဲဒီရပ်ကွက်တခုလုံး ဒါမှမဟုတ် တရွာလုံးကို လော့‌ဒေါင်း ချလိုက်တာကြောင့် အလုပ်လုပ်လို့မရတော့ဘဲ စားဝတ်နေရေး အလွန်ကျပ်တည်းလာတယ်လို့ ဆိုပါတယ်။

နောက်ထပ် ဒေသခံတယောက်က “ကိုဗစ်မတွေ့ရင်လည်း တွေ့တယ်လို့ပြောပြီး တရွာလုံးကို လော့ဒေါင်းချထားတယ်။ ဘာရောဂါပိုးမှ မပေါ်လည်း လာဖမ်းခေါ်သွားတယ်” လို့  ပြောပါတယ်။

ဒါ့အပြင် ကွာရန်တင်း ခေါ်ဆောင်ခံရသူတွေအနေနဲ့ ကုန်ကျစရိတ် ပေးဆောင်ရတယ်လို့ ဆိုပါတယ်။

“သူတို့ အဲဒီ ကွာရန်တင်းစင်တာမှာလည်း တရုတ်ယွမ်ငွေ ၁,၀၀၀ မထည့်ရင် ထမင်းမကျွေးဘူး။ အဲလိုပဲ ပိတ်လှောင်ထားတယ်။”

လက်ရှိမှာတော့ ရွှေလီမှာ လော့ဒေါင်းကာလကို အောက်တိုဘာ ၃၁ ရက်နေ့အထိ ထပ်တိုးထားကြောင်း ဒေသခံတွေဆီက သိရပါတယ်။

မြန်မာ-တရုတ်နယ်စပ် ရွှေလီ၊ ဝမ်တိန်၊ ကျယ်ဂေါင်တွေမှာ ကိုဗစ် ပထမလှိုင်းကစပြီး အခုထိ အကြိမ်ကြိမ် မကြာခဏ လော့ဒေါင်းချတာတွေရှိလို့ အဲဒီဒေသမှာ လုပ်ငန်းလုပ်ကိုင်တဲ့သူတွေ အလုပ်လုပ်ဖို့ ခက်ခဲပြီး စားဝတ်နေရေး ကျပ်တည်းလာနေပါတယ်။

ကျယ်ဂေါင်ကိုတော့ သတ်မှတ်ချက်တွေ တင်းကျပ်ထားပြီး ပြီးခဲ့တဲ့ ၂၀၂၁ နှစ်လယ်လောက်ကစ နှစ်နိုင်ငံ ကုန်သွယ်မှုလုပ်ငန်းတွေအပြင် မြို့တွင်းထဲ ရောင်းဝယ်မှုကိုပါ ပိတ်ထားဆဲ ဖြစ်ပါတယ်။

အရှေ့မြောက် စီးပွားရေးတံခါးပေါက်ရဲ့ အဓိက အချက်အချာကျရာ မြို့တမြို့ဖြစ်တဲ့ တရုတ်-မြန်မာနယ်စပ် ရွှေလီမြို့ တမြို့လုံးနီးပါး လော့ဒေါင်းချထားရာက စက်တင်ဘာ ၂၁ ရက် ည တရုတ်စံတော်ချိန် ည ၁၂ နာရီကစပြီး ပြန်လည်ဖြေလျှော့သတ်မှတ်ခဲ့ကြောင်း နယ်စပ်ကုန်သည်လုပ်ငန်းရှင်တွေက ပြောပါတယ်။

ပို့ကုန်လုပ်ငန်းရှင်တယောက်က “ဟုတ်တယ်၊ ဟုတ်တယ်။ မနေ့က ၁၂ နာရီ ဖွင့်လိုက်တာ ဟုတ်တယ်” လို့ ပြောပါတယ်။

ပြီးခဲ့တဲ့ ဩဂုတ် ၃၁ ရက်ကစပြီး ရွှေလီမှာ ကိုဗစ်ပိုး ပြန်လည်စစ်ဆေးခဲ့ပြီး စက်တင်ဘာ ၁၆ ရက်မှ ၂၁ ရက်နေ့အထိ ၅ ရက်ကြာ တမြို့လုံးနီးပါး အသွားအလာ ကန့်သတ်ခဲ့တာ ဖြစ်ပါတယ်။

ရွှေလီမှာနေထိုင်တဲ့ ကုန်သည်တယောက်က “စက်တင်ဘာ ၁၆ ရက်နေ့မှ ၂၁ ရက်နေ့အထိ လော့ဒေါင်းပိတ်ထားတဲ့ နေရာတွေမှာ သုံးကြိမ် ကိုဗစ်ပိုးစစ်ဆေးတဲ့ အဖြေရလဒ်က အားလုံး ပိုးမတွေ့တာကြောင့် စက်တင်ဘာ ၂၁ ရက်နေ့ တရုတ်စံတော်ချိန် ည ၁၂ နာရီက လော့ဒေါင်းချ ပိတ်ထားတဲ့နေရာတွေ ပြန်ဖွင့်ပေးလိုက်ပြီ။ လော့ဒေါင်းဖြည်ပြီ” လို့ ရှင်းပြပါတယ်။

ရုပ်ရှင်ရုံ၊ ဘား၊ ကလပ်၊ KTV၊ အနှိပ်ခန်း၊ ဖဲရုံ၊ အနုပညာသင်တန်းကျောင်းတွေကတော့ လတ်တလော ဖွင့်ခွင့်မရသေးဘူးလို့ ဆိုပါတယ်။

ရွှေလီမြို့ရဲ့ အရှေ့ဘက်မှ ရွှေလီအရှေ့ အမြန်လမ်းဆုံ၊ Mangliang ကျေးရွာ၊ Yunmen ကျေးရွာ၊ Panbeng ကျေးရွာ၊ တောင်ဘက် ရွှေလီမြစ်တလျှောက်၊ Jiejiao Guomen Community၊ အနောက်ဘက် To Longlin Avenue၊ Heha Village၊ မြောက်ဘက် Hangrui Expressway နဲ့ extension စတဲ့နေရာတွေကို အသွားအလာကန့်သတ်မှု ဖြေလျှော့လိုက်ပြီ ဖြစ်ကြောင်း ရွှေလီမြို့ စည်ပင်သာယာရေးအဖွဲ့ New Coronary Pneumonia ကူးစက်ရောဂါ ကာကွယ်ထိန်းချုပ်ရေး လုပ်ငန်းဌာနချုပ်ကလည်း စက်တင်ဘာ ၂၂ ရက် မနက်ပိုင်းမှာ သတင်းထုတ်ပြန်ထားပါတယ်။

ရွှေလီမှ ထွက်ခွာလိုသူတွေအနေနဲ့ ၂၄ နာရီအတွင်း ကိုဗစ်ပိုးစစ်ဆေးထားတဲ့ ပိုးမရှိကြောင်း လက်မှတ်နဲ့ ထွက်ခွာနိုင်ကြောင်းနဲ့ ခရီးစဉ်အကြောင်း တင်ပြလျှောက်ထားဖို့ လိုတယ်လို့ ဆိုပါတယ်။

အသွားအလာ ကန့်သတ်မှုကြောင့် နှစ်နိုင်ငံကုန်သွယ်ရာ ဝမ်တိန်-ကျင်စန်းကျော့ နယ်စပ်ဂိတ် အဝင်အထွက် ထိခိုက်မှုမရှိပေမဲ့ ရွှေလီမြို့နဲ့ တရုတ်ပြည်ထဲက တခြားမြို့ကြီးတွေ ကုန်တွေ သယ်ယူပို့ဆောင်မရခဲ့လို့ အွန်လိုင်းကတဆင့် မြန်မာဘက်ကနေ ရွှေလီဘက်ကို ပစ္စည်း မှာယူတင်သွင်းတဲ့ အမြန်ချောပို့စနစ် ခက်ခဲကြန့်ကြာခဲ့တာလည်း ဖြစ်ပါတယ်။

ပြီးခဲ့တဲ့ ကိုဗစ်ကပ်ရောဂါကာလ ရွှေလီမြို့နဲ့ ဆက်နွှယ် ကုန်သွယ်ရတဲ့ ဝမ်တိန်-ကျင်စန်းကျော့ ဂိတ်ဟာ အရှေ့မြောက်စီးပွား‌ေရး တံခါးပေါက်ရဲ့ အများဆုံး ကုန်သွယ်ရာနေရာ ဖြစ်လာကာ အဲဒီဂိတ်ကို ကိုဗစ်ရောဂါကြောင့် လပေါင်းများစွာ ပိတ်ခဲ့ရပြီး ပြီးခဲ့တဲ့ ၂၀၂၁ ခုနှစ် နှစ်ကုန်ပိုင်းကမှ ကိုဗစ်သတ်မှတ်ချက် စည်းကမ်းနဲ့အညီ အစားထိုး ယာဉ်မာင်းစနစ်နဲ့ ပြန်လည်ဖွင့်လှစ်ခဲ့တာပါ။