ကချင်ပြည်နယ်ပိုင် ဖီမော၊ ဂေါ့လန်၊ ကမ်ဖန် ကျေးရွာ ၃ ရွာကိစ္စနဲ့ ဒီကနေ့ မြန်မာ့အရေကို ချိတ်ဆက်ပြီး ဆက်လက်ရေးသားပါရစေ။

ဒီဒေသဟာ တရုတ်ပြည်ရဲ့ အစိတ်အပိုင်းနယ်မြေဖြစ် ‘နိုင်’တယ်ဆိုတဲ့ အင်္ဂလိပ်တောင်တန်း အရာရှိတစ်ယောက်ရဲ့ မှားယွင်းစွာ မှတ်ချက်ချ ပြောဆို ရေးသားဖော်ပြခဲ့တာကို မှတ်သားထားပြီး တရုတ်အစိုးရက ဒီကျေးရွာ ၃ ရွာကို သူတို့ပိုင်နယ်မြေဒေသ ဖြစ်တယ်လို့ အကြောင်းပြ ပြောဆိုကာ မြန်မာနိုင်ငံ ဖဆပလအစိုးရထံ တောင်းခဲ့ပါတယ်။ 

ဒေသခံကျေးရွာသားတွေက တရုတ်လက်အောက်မှာ မနေချင်ဘဲ၊ မြန်မာနိုင်ငံ (ကချင်ပြည်နယ်) ထဲမှာသာ ဆက်လက် နေထိုင်သွားလိုကြတာကြောင့် ၁၉၅၇  ခုနှစ်မှာ ကချင်တက္ကသိုလ် ကျောင်းသားတွေက ဝန်ကြီးချုပ်ဦးနုအား သွားရောက်တွေ့ဆုံပါတယ်။  

ကချင်ပြည်နယ်ကို ကိုယ်ပိုင်အုပ်ချုပ်ခွင့် အာဏာအပြည့်အဝပေးဖို့ လိုလားကြောင်း၊ ဗိုလ်ချုပ်အောင်ဆန်း ကတိပြုခဲ့တာနဲ့ ကနေ့ကချင်ပြည်နယ် အခြေအနေက တခြားစီ ဖြစ်နေပါကြောင်း၊ ကချင်ပြည်နယ်ဟာ တိုးတက်သင့်သလောက် မတိုးတက်ကြောင်း၊ ကချင်တိုင်းရင်းသားတွေကို ခွဲခြားဆက်ဆံခြင်းမပြုဘဲ တန်းတူအခွင့်အရေး ပေးစေလိုကြောင်း၊ ဖီမော၊ ဂေါ့လန်၊ ကမ်ဖန်ကို တရုတ်အစိုးရလက်သို့ မပေးအပ်စေလိုကြောင်း၊ ဒီကိစ္စကို ကချင်တိုင်းရင်းသားတွေအားလုံး ကန့်ကွက်ပါကြောင်း စသဖြင့် တွေ့ဆုံတင်ပြ တောင်းဆိုခဲ့ကြပါတယ်။

ဦးနုက “တရုတ်အစိုးရက သူတို့ပိုင်နယ်မြေ ဖြစ်တယ်ဆိုတဲ့ စာရွက်အထောက်အထားပြပြီး တောင်းလာတာ ဖြစ်တယ်၊ သူတို့ငှားရမ်းထားတဲ့ နမ်ငေါန် အဆိုင်း ထရက်(၁) ကို ပြန်ပေးမယ်လို့ ပြောနေတယ်၊ ဒါကြောင့် ငြင်းရခက်တယ်၊ မင်းတို့လူငယ်တွေ သိအောင်ပြောပြတာဟု ဖျောင်းဖျ ပြောဆိုလိုက်တယ်” လို့  မှတ်တမ်းတခုကို ဖတ်ရပါတယ်။ 

၁၉၅၇ ခုနှစ် တရုတ်အစိုးရရဲ့ ဖိတ်ကြားချက်အရ ပီကင်းသို့ ဦးနုနဲ့အတူ ဆမားဒူဝါဆင်ဝါးနောင်၊ ဒူဝါဇော်ရစ် တို့အဖွဲ့ လိုက်ပါခဲ့ကြပါတယ်။ ဒူဝါဇန်ထဆင်က “ဒီကိစ္စဟာ ကချင်ပြည်နယ်အရေးကိစ္စ ဖြစ်နေသဖြင့် ကချင်ပြည်နယ် လူထုနဲ့သာ သက်ဆိုင်တယ်၊ ကချင်လူထုသဘောထား ဆန္ဒမပါဘဲနဲ့ ကျနော် မဆုံးဖြတ်နိုင်ပါ၊ ဒါကြောင့် ကျနော် ကချင်ပြည်နယ်ကို အမြန်ပြန်သွားပြီး ကချင်ပြည်နယ် လူထု၏ သဘောထားကို အရင်ယူရမယ်၊ ကချင်ပြည်သူလူထု သဘောထားအတိုင်းသာ ဖြစ်သင့်ပါတယ်၊ ယခုလို ဝန်ကြီးချုပ်၏ ဆန္ဒကို ငြင်းပယ်မိတဲ့အတွက် ကျနော် ဝမ်းနည်းပါတယ်”လို့  ပြောပါတယ်။  

ဦးနုက ဒူဝါဇန်ထဆင်အား တရုတ်ခေါင်းဆောင်တွေရှေ့မှာ ငါ့ကို အရှက်ခွဲတယ်ဆိုပြီး အတော် အပြစ်တင်ခဲ့ပါတယ်။

အဆိုပါကျေးရွာ ၃ ရွာကိစ္စနဲ့ပတ်သက်ပြီး ဆုံးဖြတ်ချက်မချနိုင်သေးဘဲ တရုတ်နိုင်ငံမှ ပြန်လာခဲ့ကြပါတယ်။ သူတို့ ရန်ကုန်လေဆိပ်သို့ ရောက်ရှိလာသောအခါမှာ ကချင် တက္ကသိုလ်ကျောင်းသားများအဖွဲ့က ကန့်ကွက်ဆန္ဒပြပါတယ်။ 

ဦးနုလက်ထက် မပြီးနိုင် အငြင်းပွားနေတဲ့ ရွာ ၃ ရွာကို  ၁၉၅၈ ခုနှစ် ဗိုလ်နေဝင်း အိမ်စောင့်အစိုးရလက်ထက်မှာ တရုတ်အစိုးရလက်သို့ ပေးအပ်ဖို့ သဘောတူညီလိုက်ပါတယ်။ ဝန်ကြီးချုပ် ပြန်ဖြစ်လာတဲ့ ဦးနုကလည်း  ၁.၁၀.၁၉၆၀  နေ့ရက်မှာ  ပီကင်းမြို့ကို သွားရောက်ကာ တရုတ်ဝန်ကြီးချုပ် ချူအင်လိုင်းနဲ့ တွေ့ဆုံ သဘောတူစာချုပ်ကို  လက်မှတ်ထိုးပေးခဲ့လိုက်တဲ့အတွက် နောက်ဆုံး မြန်မာနိုင်ငံပိုင် ကချင်တို့ရဲ့ ကျေးရွာ ၃ ရွာ ဆုံးရှုံးခဲ့ရပါတယ်။ 

ဒီလိုအချိန်မှာ ဦးနုက ဗုဒ္ဓဘာသာကို နိုင်ငံတော်ဘာသာအဖြစ် တရားဝင်ကြေညာခဲ့ပြန်ပါတယ်။ ဒီလုပ်ရပ်အပေါ် ဦးနုက ဘာသာရေး ခုတုံးလုပ်ပြီး နိုင်ငံရေးကစားတယ်လို့ အတိုက်အခံ နိုင်ငံရေးသမားတွေနဲ့ အများပြည်သူက ဝေဖန်ခဲ့ကြပါတယ်။ တနိုင်ငံလုံးရှိ ခရစ်ယာန် ဘာသာဝင်တွေ ကလည်း ကန့်ကွက်ဆန္ဒပြခဲ့ကြပါတယ်။

ကချင်လူငယ်တွေက ဗိုလ်ချုပ်အောင်ဆန်း ပေးခဲ့တဲ့ ကချင်ပြည်နယ်နဲ့ ကချင်တိုင်းရင်းသားတွေရဲ့ အခွင့်အရေးတွေအားလုံး ဆုံးရှုံးသွားပြီလို့ ခံစားလာခဲ့ကြပါတယ်။ အခွင့်အရေးတွေကို ပါလီမန်အတွင်း တောင်းဆိုလို့ ရလိမ့်မယ်လို့လည်း မထင်ကြတော့တဲ့အပြင် ပင်လုံညီလာခံသဘောတူညီချက်အတိုင်း ဖွဲ့စည်းထားတာမဟုတ်တဲ့ ပြည်ထောင်စု ဆိုတဲ့ အခင်းအကျင်းအခြေအနေကို ယုံကြည်မှုမရှိကြတော့ဘဲ  ၁၉၆၀ ပြည့်နှစ်  အောက်တိုဘာလ ၂၀  ရက်နေ့မှာ ကေအိုင်အို (KIO) ကို ဖွဲ့စည်းခဲ့ပြီး သူ့ရဲ့  လက်နက်ကိုင်တပ်ဖြစ်တဲ့ ကေအိုင်အေ (KIA) ကို  ၁၉၆၁ ခုနှစ် ဖေဖော်ဝါရီလ ၅ ရက်နေ့မှာ ဖွဲ့စည်းတည်ထောင်လိုက်ကြပါတယ်။ 

တိုင်းရင်းသားလက်နက်ကိုင်တော်လှန်ရေးအဖွဲ့တွေ ဖွဲ့စည်းထူထောင်လာကြရတဲ့ အဓိက အကြောင်းအရင်းတွေထဲမှာ ဖွဲ့စည်းအုပ်ချုပ်ပုံအခြေခံဥပဒေရဲ့ အားနည်းချက်နဲ့ နိုင်ငံရေးပြဿနာတွေနဲ့ ခေါင်းဆောင်တွေရဲ့ အမြော်အမြင် အားနည်းမှုကြောင့်ဆိုတာ အားလုံး သင်ခန်းစာယူစရာ ဖြစ်နေပါတယ်။ 

ဖီမော၊ ဂေါ့လန်၊ ကမ်ဖန် ရွာ ၃ ရွာဖြစ်စဉ်က သင်ခန်းစာယူစရာ ဖြစ်စဉ်တွေထဲက တစ်ခုပါပဲ။ အင်္ဂလိပ် တောင်တန်းအရာရှိတစ်ယောက်ရဲ့ ခရီးသွားဟန်လွဲ ရေးသားမှု မှတ်ချက်တစ်ခုကြောင့်  မြန်မာ့မြေ ကချင်ဒေသအစိတ်အပိုင်းဟာ တခြားသူအောက် ပါဖို့ အကြောင်းဖန်လာပါတယ်။  

ဒီနောက် နိုင်ငံ့တာဝန်ရှိသူတွေက ပြည်သူ့ဆန္ဒ ဒေသပြည်သူတို့ သဘောထားကို လျစ်လျူရှုခဲ့တဲ့အတွက် မဆုံးရှုံးသင့်ဘဲ ဆုံးရှုံးခဲ့ရပါတယ်။ 

ယခု မတ်လ  ၂၀ ရက်နေ့မှာ အာဆီယံအထူးကိုယ်စားလှယ်အဖွဲ့  မြန်မာနိုင်ငံကို လာမယ်၊ မြန်မာ့အရေးအတွက် တွေ့ကြမယ်၊ ဆွေးနွေးကြမယ်လို့ သတင်းအရင်းအမြစ်တွေက ဆိုကြပါတယ်။  

ဖိလစ်ပိုင်က ဆွေးနွေးပွဲ တကယ်လုပ်မယ်ဆိုရင် နိုင်ငံတော်၏အတိုင်ပင်ခံပုဂ္ဂိုလ် ဒေါ်အောင်ဆန်းစုကြည်နဲ့ သမ္မတဦးဝင်းမြင့်တို့ ပါမှလက်ခံမယ်၊ အာဏာသိမ်းစစ်တပ်က လက်တဆုပ်စာ ရွေးထားတာတွေနဲ့ လုပ်တာ လက်မခံဘူး၊ အာဆီယံဘုံသဘောတူညီချက်ကို အာဏာသိမ်းစစ်တပ်က ဘာနဲ့မှ အပေးအယူလုပ်တာ၊ အစားထိုးတာ လက်မခံဘူး၊ အာဏာသိမ်းစစ်တပ်ရဲ့ ရှေ့လုပ်ငန်းစဉ်တွေနဲ့ တွဲတာတွေ လာမလုပ်နဲ့ လက်မခံဘူးလို့ ပြောဆိုထားပါတယ်။ 

ဒီသဘောထားမျိုးကို အာဆီယံနိုင်ငံအများစုနဲ့ ကုလသမဂ္ဂ၊ အမေရိကန်နိုင်ငံနဲ့ ဥရောပ၊ အာရှအင်အားကြီးနိုင်ငံတွေကလည်း အသိအမှတ်ပြု လက်ခံအားပေးထားကြပါတယ်။  

မြန်မာ့အရေးဟာ ဒေါ်အောင်ဆန်းစုကြည်ပါဝင်နိုင်မှသာ နိုင်ငံအတွက် အကျိုးရှိစေ၊ ကောင်းမွန်စေမယ့်ရလဒ် ဖြစ်လာမယ်ဆိုတာ ကုလသမဂ္ဂ၊ အာဆီယံအပါအဝင် နိုင်ငံတကာ အသိုက်အဝန်းနဲ့ မြန်မာပြည်သူလူထုက နားလည်အသိအမှတ်ပြုလက်ခံ သဘောထားပေးထားပြီး ဖြစ်ပါတယ်။ 

ဒါပေမဲ့ နစကအတွက် လော်ဘီလုပ်ဆောင်နေတဲ့ မဲရှုံးပါတီတချို့က အာဆီယံ အထူးကိုယ်စားလှယ်အဖွဲ့ လာရင် ပြည်သူတွေရဲ့ ဆန္ဒနဲ့ဆန့်ကျင်ပြီး နစကစစ်အုပ်စုရဲ့ ရှေ့လုပ်ငန်းစဉ်တွေကို လိုလား အားပေးထောက်ခံကြဖို့၊ မြန်မာနဲ့ ကမ္ဘာကို လိမ်လည် လှည့်စားဖို့ နည်းလမ်းအမျိုးမျိုးနဲ့ ကြိုးပမ်းနေတာ မြင်တွေ့နေရပါတယ်။

နစကခေါင်းဆောင်တွေရော မဲရှုံးပါတီခေါင်းဆောင်တွေပါ ပြည်သူ့ဆန္ဒကို လျစ်လျူရှုပြီး ကိုယ်ကျိုးဆန္ဒတွေကို ရှေ့တန်းမတင်သင့်ကြတော့ပါဘူး။ အပြောမှား၊ အပြုမှား တချက်ဟာ တိုင်းပြည်အတွက် နစ်နာဆုံးရှုံးမှု များတယ်ဆိုတာ ရှေ့မှာ သင်ခန်းစာတွေ ရှိနေပါတယ်။ 

ယနေ့ မြန်မာ့အရေးဟာ ဒဏ်ရာအနာတရတွေ များလွန်းနေတဲ့  မြန်မာပြည်သူတွေအတွက် အကျိုးရှိမယ့် ရလဒ်အဖြေထွက်ဖို့ လိုအပ်နေပါပြီ။ 

စည်းလုံးညီညွတ်သော ဖက်ဒရယ်ဒီမိုကရေစီပြည်ထောင်စုကြီး အမြန်ဆုံးထူထောင်နိုင်ဖို့၊ တရားမျှတတဲ့ လူ့အဖွဲ့အစည်း ပေါ်ထွန်းဖို့၊ တိုင်းရင်းသားစည်းလုံးညီညွတ်ရေး ခိုင်မြဲစေဖို့၊  မြန်မာ့ဒီမိုကရေစီအရေး အောင်မြင်စေဖို့အတွက်ဆို ပြည်သူကို ရှေးရှု လုပ်ဆောင်ခြင်းဖြင့်သာ အရာရာအောင်မြင်နိုင်ပါတယ်။ ပြည်သူသာလျှင် အဓိက….

ရွှေဟင်္သာ

အကြမ်းဖက်စစ်အုပ်စုက မြန်မာနိုင်ငံမှာ မွေးဖွားကြီးပြင်းခဲ့တဲ့ မြန်မာနိုင်ငံသား ၁၁ ဦးကို ၁၉၈၂ နိုင်ငံသား ဥပဒေပုဒ်မ ၆၇ ပါ ဗဟိုအဖွဲ့ လုပ်ပိုင်ခွင့်အရ၊ ဥပဒေပုဒ်မ ၁၆ နဲ့အညီ နိုင်ငံသားအဖြစ်မှ ရပ်စဲတယ်ဆိုပြီး မတ်လ ၅ ရက်နေ့ ဝါဒဖြန့်သတင်းစာမှာ ဖော်ပြထားတယ်။ မွေးရာပါ မြန်မာနိုင်ငံသား ပုဂ္ဂိုလ်တွေကို စကစအုပ်စုက ဒီလို ရပ်စဲပိုင်ခွင့် ရှိသလား။  ၁၉၈၂ မြန်မာနိုင်ငံသားဥပဒေကိုပဲ ကိုးကားပြီး  မွေးရာပါမြန်မာနိုင်ငံသားတွေကို နိုင်ငံသားအဖြစ်ရပ်စဲမှု အမိန့်ထုတ်နိုင်အောင် အဲဒီ ၁၉၈၂ ဥပဒေက နိုင်ငံသားဖြစ်မှု ပယ်ဖျက်ခွင့်ကို လွယ်လွယ်ပဲ ပေးထားသလား။  

အခန်း (၂) နိုင်ငံသားဖြစ်ခြင်း၊ ပုဒ်မ (၃) မှာဖော်ပြထားတာက ‘နိုင်ငံတော်တွင် ပါဝင်သော နယ်မြေတခုခု၌ မြန်မာသက္ကရာဇ် (၁၁၈၅) ခုနှစ်၊ ခရစ်သက္ကရာဇ်(၁၈၂၃) ခုနှစ်မတိုင်မီကာလမှစ၍ ပင်ရင်းနိုင်ငံအဖြစ် အမြဲနေထိုင်ခဲ့သော ကချင်၊ ကရင်၊ ချင်း၊ ဗမာ၊ မွန်၊ ရခိုင်၊ ရှမ်း စသည့် တိုင်းရင်းသားများနှင့် "မျိုးနွယ်စုများ"သည် မြန်မာနိုင်ငံသား ဖြစ်သည်၊

ပုဒ်မ (၄)- မည်သည့်မျိုးနွယ်စုသည် တိုင်းရင်းသားဖြစ်သည် မဖြစ်သည်ကို နိုင်ငံတော်ကောင်စီက ဆုံးဖြတ်သည်၊ (စာရေးသူ၏စကားချပ်.. မဆလခေတ်က ပြဋ္ဌာန်းခဲ့တဲ့ ဥပဒေမို့ တိုင်းရင်းသားဖြစ်ခြင်း မဖြစ်ခြင်းကို နိုင်ငံတော်ကောင်စီက ဆုံးဖြတ်တယ်၊ ယခုခေတ် ဘယ်နိုင်ငံမှာမဆို ရွေးချယ်ခံ တရားဝင် ပြည်ထောင်စုအစိုးရအဖွဲ့ကသာ အတည်ပြုနိုင်တာပါ)။

ပုဒ်မ(၅)- တိုင်းရင်းသားတိုင်းလည်းကောင်း၊ တိုင်းရင်းသားမိဘနှစ်ပါးမှ မွေးဖွားသူတိုင်းသည်လည်းကောင်း၊ မွေးရာပါနိုင်ငံသားဖြစ်သည်။

ပုဒ်မ(၆) ဤဥပဒေအာဏာတည်သည့်နေ့တွင် နိုင်ငံသားဖြစ်ပြီးသူသည် နိုင်ငံသားဖြစ်သည်။

ပုဒ်မ(၈) (က) နိုင်ငံတော်ကောင်စီသည် နိုင်ငံတော်၏ အကျိုးငှာ မည်သူမဆို နိုင်ငံသား၊ သို့မဟုတ် ဧည့်နိုင်ငံသား ၊သို့မဟုတ် နိုင်ငံသားပြုခွင့်ရသူအဖြစ် သတ်မှတ်နိုင်သည်၊

(ခ)  နိုင်ငံတော်ကောင်စီသည် နိုင်ငံတော်၏ အကျိုးငှာ "မွေးရာပါနိုင်ငံသား " မှအပ မည်သူကိုမဆို နိုင်ငံသား၊ သို့မဟုတ် ဧည့်နိုင်ငံသား၊ သို့မဟုတ် နိုင်ငံသားပြုခွင့်ရသူအဖြစ်မှ ရုပ်သိမ်းနိုင်သည်။ (စာရေးသူ စကားချပ်- မွေးရာပါနိုင်ငံသားကို နိုင်ငံသားဖြစ်ခွင့်မှ ရုပ်သိမ်းနိုင်ခွင့်မရှိ)

ပုဒ်မ(၁၄)- နိုင်ငံသားတစ်ဦးဦးသည် နိုင်ငံတော်ပါဝင်နေသော စစ်မက်ကာလအတွင်း  နိုင်ငံသားအဖြစ်ကို စွန့်လွှတ်ခွင့်မရှိစေရ " ၊

ပုဒ်မ(၁၆)- နိုင်ငံသားတစ်ဦးသည် နိုင်ငံတော်မှ  အပြီးအပိုင်ထွက်ခွာလျှင်ဖြစ်စေ၊ အခြားနိုင်ငံ၏ နိုင်ငံသားအဖြစ်ခံယူလျှင် သို့မဟုတ် မှတ်ပုံတင်လျှင်ဖြစ်စေ၊ အခြားနိုင်ငံကူးလက်မှတ် သို့မဟုတ် အလားတူလက်မှတ်ကို ထုတ်ယူလျှင်ဖြစ်စေ၊ နိုင်ငံသားအဖြစ်မှရပ်စဲသည်၊

ပုဒ်မ(၁၇)- မွေးရာပါနိုင်ငံသားတစ်ဦးကို  ပုဒ်မ (၁၆) ပါ ပြဋ္ဌာန်းချက်နှင့် ငြိစွမ်းသဖြင့် နိုင်ငံသားအဖြစ်မှ ရပ်စဲသည့် ကိစ္စမှတစ်ပါး အခြားမည်သည့်အခြေအနေတွင်မျှ နိုင်ငံသားအဖြစ်မှ ရုပ်သိမ်းခြင်းမရှိစေရ …

စသည် ဖော်ပြထားပါတယ်။

၁၉၈၂ နိုင်ငံသားဥပဒေကို ဆက်လက်ကျင့်သုံးနေဆဲဖြစ်တဲ့အတွက် အထက်ပါပုဒ်မများကလည်း တည်ဆဲ ဖြစ်ပါတယ်။ ယခု နစက မှထုတ်ပြန်ကြေညာလိုက်တဲ့ မွေးရာပါနိုင်ငံသား (၁၁) ဦးအား နိုင်ငံသားအဖြစ်မှ ရပ်စဲခြင်းဆိုတာက အဆိုပါတည်ဆဲ လဝကဥပဒေတွေကို ၎င်းတို့လိုသလို အသုံးပြုသုံးစွဲခြင်းသာ ဖြစ်တယ်လို့ မှတ်ယူရပါမယ်။ အဆိုပါပုဂ္ဂိလ် ၁၁ ဦးက ပြည်ပနိုင်ငံများသို့ အပြီးအပိုင် ထွက်ခွာမှု မဟုတ်ပါပေ။  နိုင်ငံ့အကျိုးငှာ နိုငံသားတစ်ဦး၏ တာဝန်ကို ထမ်းဆောင်ခြင်း သို့မဟုတ် နိုင်ငံရေးလုပ်ဆောင်နေခြင်း ဖြစ်ပါတယ်။ သို့ကြောင့်  ၁၉၈၂ နိုင်ငံသားဥပဒေ၊ ပုဒ်မ (၁၆) ကို ချိုးဖောက်ကျုးလွန်မှု မရှိပါပေ။ အခြားနိုင်ငံသားအဖြစ် သူတို့ခံယူပါမှ မြန်မာနိုင်ငံသားအဖြစ် ပယ်ဖျက်ခွင့် ရှိပါတယ်။

ပုဒ်မ (၆၇) အရ နိုင်ငံတော်ဗဟိုအဖွဲ့ရဲ့  ပုဒ်မ (၆၈) ဆိုင်ရာ လုပ်ပိုင်ခွင့်တွေကို နစကအဖွဲ့က တလွဲအသုံးချ လုပ်ဆောင်မှုသာလျှင်ဖြစ်ပါပေသည်၊။  မြန်မာနိုင်ငံသား ၁၁ ဦးရဲ့ လူ့ဂုဏ်သိက္ခာကို ညှိးနွမ်းအောင် ၁၉၈၂ နိုင်ငံသားဥပဒေကို ချိုးဖောက် ကျုးလွန် လုပ်ကိုင်ခြင်းသာ ဖြစ်တယ်။ ဥပဒေကျူးလွန်ဖောက်ဖျက်သူတွေ အနေနဲ့ တချိန်မှာ ပြန်လည်တရားရင်ဆိုင်ရမှာ ဖြစ်ပါတယ်။ စစ်ကောင်စီတို့ လက်ကိုင်ပြုနေဆဲဖြစ်တဲ့ ဖွဲ့စည်းပုံအခြေခံဥပဒေ၊ ပုဒ်မ(၄၄) မှာလည်း လူ့ဂုဏ်သိက္ခာ ညှိုးနွမ်းသေးသိမ်စေသည့် ပြစ်ဒဏ်ပြဋ္ဌာန်းခွင့် မရှိစေရ ဆိုတာ ပါရှိပါတယ်။

နောက်ပြီး နိုင်ငံသားတွေရဲ့ တရားဝင် ဥပဒေနဲ့အညီ ပိုင်ဆိုင်ထားပါသော အိုးအိမ်အဆောက်အဦများအား ချိတ်ပိတ်သိမ်းယူမှုနှင့် ပစ္စည်းပစ္စယများကို လုယူ သိမ်းယူ၊ ဖျက်ဆီး မီးရှို့မှုတွေက ၎င်းတို့ တသသဖြစ်နေတဲ့ ဖွဲ့စည်းပုံအခြေခံဥပဒေပါ ပြဋ္ဌာန်းချက်တွေကို ၎င်းတို့ကိုယ်တိုင် ချိုးဖောက်နေခြင်းသာ ဖြစ်ပါတယ်။ ပုဒ်မ (၃၅၆)- နိုင်ငံတော်သည် နိုင်ငံသားများ၏ တရားဝင်ရရှိပိုင်ဆိုင်ထားသော ရွှေ့ပြောင်းနိုင်သောပစ္စည်း၊ မရွှေ့ပြောင်းနိုင်သော ပစ္စည်းများနှင့်စပ်လျဉ်း၍ ဥပဒေအရကာကွယ်ပေးရမည် ဆိုတာ ပါရှိပါတယ်။

အထက်ပါ အချက်တွေကို ကြည့်ရင် စစ်ကောင်စီအကြမ်းဖက်အဖွဲ့က ၎င်းတို့လက်ကိုင်ပြုနေတဲ့ ၁၉၈၂ နိုင်ငံသားဥပဒေကိုလည်း အလွဲသုံးပြီး မွေးရာပါနိုင်ငံသားတွေကို နိုင်ငံသားအဖြစ်မှ ပယ်ဖျက်နေသလို၊ ၎င်းတို့ ပြဋ္ဌာန်းထားတဲ့ ၂၀၀၈ အခြေခံဥပဒေကိုလည်း ချိုးဖောက်လုပ်ကိုင်နေတဲ့အတွက် မြန်မာနိုင်ငံမှာ ဥပဒေမဲ့ အုပ်ချုပ်မှုသာ ရှိတယ်လို့ပဲ ဆိုရပါမယ်။ ဥပဒေမဲ့အုပ်ချုပ်မှုအောက်မှာ မှန်ကန်မျှတတဲ့ တရားစီရင်ရေး၊ တရားဝင် အမိန့်အာဏာတို့ လုံးဝမရှိနိုင်ပါ။ အာဏာကို တရားမဝင်လုယူထားတဲ့ နစကရဲ့ တောရိုင်းဥပဒေ စိုးမိုးမှုအောက်မှာ မြန်မာနိုင်ငံသားတွေရဲ့ လွတ်လပ်မှု လုံခြုံမှု လုံးဝဆိတ်သုဉ်းနေပါတယ်။

မြန်မာနိုင်ငံသားတွေ လွတ်လပ်မှု၊ လုံခြုံမှု ဥပဒေစိုးမိုးမှု၊ မှန်ကန်တဲ့တရားစီရင်မှု အမြန်ဆုံး ပြန်လည် ရရှိပါစေ…။

ရွှေဟင်္သာ