တရုတ်နိုင်ငံရဲ့ ကျယ်ပြောလှတဲ့ ရှင်ကျန်းဒေသမှာ နေထိုင်သူတွေဟာ တင်းကျပ်တဲ့ ကိုဗစ်-၁၉ ကာကွယ်ရေး အစီအမံတွေကို အဆုံးသတ်ဖို့ တောင်းဆိုဆန္ဒပြခဲ့ကြပါတယ်။
ရှင်ကျန်းမြို့တော် အူရုံမ်ချီမှာ နေထိုင်သူတွေဟာ လော့ဒေါင်းပိတ်ဆို့မှု ပြဋ္ဌာန်းထားတဲ့ တာဝန်ရှိသူ တွေနဲ့ ရန်ဖြစ်ကြပြီးနောက် ကိုဗစ်-လော့ဒေါင်း ရုပ်သိမ်းပေး ဆိုပြီး အော်ဟစ်ကြွေးကြော်ကြကာ အာဏာပိုင်တွေချထားတဲ့ အတားအဆီးတွေကို ဖြတ်ကျော်နေတဲ့ ဗွီဒီယိုတွေ တရုတ်ဆိုရှယ် မီဒီယာမှာ ပျံ့နှံ့ပြီး ရိုက်ကူးထားတဲ့ရက်စွဲကိုတော့ ရိုက်တာ သီးခြားအတည်မပြုနိုင်သေးပါဘူး။
ဒါပေမယ့် မီဒီယာအစီရင်ခံချက်တွေမှာတော့ နိုဝင်ဘာ ၂၄ ရက်က ရှင်းကျန်းမှာ လူ ၁၀ ဦး သေဆုံးခဲ့တဲ့ တိုက်ခန်းမီးလောင်မှု ဖြစ်ပွားပြီးနောက် နိုဝင်ဘာ ၂၅ ရက် ညပိုင်းမှာ ဆန္ဒပြမှုတွေ ဖြစ်ပွားခဲ့ကြောင်း မီဒီယာတွေက ဖော်ပြခဲ့ပါတယ်။
နိုင်ငံတော်ရုပ်သံ CCTV ကတော့ မီးလောင်မှု ဖြစ်ပွားရခြင်း အကြောင်းရင်းဟာ မီးပလပ်ပေါက်တွဲတခုကြောင့် ဖြစ်ပြီး တိုက်ခန်း အဆောက်အအုံကလည်း ကိုဗစ်-၁၉ ဖြစ်ပွားမှု မရှိတဲ့နယ်မြေက အန္တရာယ်နည်းပါးတယ်လို့ သတ်မှတ်ထားတဲ့ ခြံဝင်းထဲမှာ ဖြစ်ကြောင်း ဖော်ပြပါတယ်။
တရုတ်နိုင်ငံမှာ နိုဝင်ဘာ ၂၅ ရက်က ကိုဗစ်-၁၉ ကူးစက်မှုအသစ် ၃၅,၁၈၃ ခု ရှိကြောင်း၊ အဲဒီထဲက ၃,၄၇၄ ဦးမှာ ရောဂါလက္ခဏာပြပြီး ၃၁၇၀၉ ယောက်ကတော့ ရောဂါလက္ခဏာမပြကြောင်း ထုတ်ပြန်ခဲ့ပြီး ၃ မြောက်နေ့အဖြစ် အမြင့်ဆုံးအဆင့်ကို သတ်မှတ်ခဲ့ကြောင်း အမျိုးသား ကျန်းမာရေးကော်မရှင်က နိုဝင်ဘာ ၂၆ ရက်မှာ ပြောပါတယ်။
