ရှမ်း-ကရင်နီ(ကယား)နယ်စပ်၊ ရှမ်းပြည်နယ်တောင်ပိုင်း မိုးဗြဲမြို့မှာ စက်တင်ဘာ ၁၁ ရက်က တိုက်ပွဲဆက်လက်ဖြစ်ပွားနေပြီး စစ်ကောင်စီတပ်သား ၂၀ ကျော်သေဆုံးကြောင်း ကရင်နီအမျိုးသားများကာကွယ်ရေးတပ် (KNDF) က သတင်းထုတ်ပြန်ပါတယ်။
ဒီနေ့ တနေကုန်နီးပါး စစ်ကောင်စီတပ်ဖွဲ့ဝင်တွေနဲ့ ကရင်နီပူးပေါင်းတပ်တို့အကြား တိုက်ပွဲဖြစ်ပွားခဲ့ပြီးနောက် စစ်ကောင်စီတပ်ဖွဲ့ဝင် ၂၀ ကျော် သေဆုံးခဲ့ပြီး ပူးပေါင်းတပ်ဘက်ကလည်း နှစ်ယောက် ကျဆုံးသွားခဲ့ကြောင်း ထုတ်ပြန်ထားပါတယ်။
ဒီကနေ့တိုက်ပွဲအတွင်း စစ်ကောင်စီတပ်တွေထံကနေ လက်နက်ခဲယမ်းတွေနဲ့တွေလည်း KNDFက သိမ်းဆည်းရမိခဲ့ပါတယ်။
သိမ်းဆည်းရမိတဲ့ လက်နက်တွေထဲမှာ MA-1 သေနတ် တလတ် ၊ MA-3 သေနတ် နှစ်လက် ၊ RPG ဗုံးသစ်တွေ၊ (၆၀) မမ အသီးတွေ ၊ ဆက်သွယ်ရေး အထိုင်စက်တလုံး၊ ကျည်ဆန်တွေနဲ့ အသုံးအဆောင်တွေပါဝင်တယ်လို့ KNDF က ထုတ်ပြန်ပါတယ်။
ဒါ့အပြင် တိုက်ပွဲအတွင်း အထိနာတဲ့ စစ်ကောင်စီတပ်တွေဟာ တစ်နေကုန်နီးပါး လက်နက်ကြီး တွေ အလွန်အကျွံအသုံးပြုပစ်ခတ်ခဲ့သလို ညနေပိုင်းမှာလည်း တိုက်လေယာဉ်နဲ့ နှစ်ကြိမ် ပစ်ခတ်ခဲ့လို့ ပြည်သူလူထုတွေရဲ့ နေအိမ်အများအပြား ပျက်စီးသွားပါတယ်။
မိုးဗြဲမြို့၊ ပွဲကုန်း ၃ ရပ်ကွက်၊ ဘုရားကျောင်းဝင်းအနီး စက်တင်ဘာ ၈ ရက်ကစပြီး စစ်ကောင်စီတပ်နဲ့ ကရင်နီပူးပေါင်းတပ်တို့အကြား တိုက်ပွဲစတင်ဖြစ်ပွားပြီး ၄ ရက်ဆက်တိုက် တိုက်ပွဲပြင်းထန်ခဲ့ပါတယ်။
KNDF ရဲ့ ထုတ်ပြန်ချက်တွေအရ တိုက်ပွဲလေးရက်အတွင်း စစ်ကောင်စီဘက်က ၅၀ ကျော်သေဆုံးခဲ့ပြီး အများအပြား ဒဏ်ရာရရှိခဲ့သလို စစ်ကောင်စီတပ်ဖွဲ့ဝင်တွေရဲ့ လက်နက်ခဲယမ်းအသုံးအဆောင်တွေလည်း သိမ်းဆည်းရမိခဲ့ပါတယ်။
ကရင်နီ ပူးပေါင်းတပ်တွေဘက်ကတော့ နှစ်ယောက်ကျဆုံးပြီး ၁၉ ယောက် ဒဏ်ရာရရှိထားပါတယ်။
စက်တင်ဘာ ၈ ရက်က စတင်တဲ့ တိုက်ပွဲဟာ ၁၁ ရက်အထိဆက်ဖြစ်ပွားနေတာဖြစ်ပြီး စစ်ကောင်စီဘက်က လက်နက်ကြီးအဆမတန်ပစ်ခတ်တိုက်ခိုက်မှုအပြင် လေကြောင်းပစ်ကူပါ သုံးပြီးတိုက်ခိုက်နေတာဖြစ်လို့ မြို့အနီး ဖြတ်သန်းသွားလာတာမလုပ်ကြဖို့ KNDF က တွန်းထားပါတယ်။
PhotoCrediit-KNDF
ရှမ်းကယားနယ်စပ် ဖယ်ခုံမြို့နယ်မှာ စက်တင်ဘာလ ၈ ရက်နေ့က စစ်ကောင်စီတပ်နဲ့ KNDF၊ PDF ပူးပေါင်းတပ်တို့အကြား ၂၅ မိနစ်ကြာ တိုက်ပွဲဖြစ်ပွားခဲ့ပြီးနောက်ပိုင်း ဆိုင်ကယ်စီးလာသူ အရပ်သားနှစ်ဦးကို စစ်ကောင်စီတပ်က အကြောင်းမဲပစ်သတ်သွားတယ်လို့ KNDF က သတင်းထုတ်ပြန်ပါတယ်။
ဖယ်ခုံမြို့နယ် ကုန်းဆုံကျေးရွာအုပ်စု ပူးချယ်ရွာအဝင်မှာ စစ်ကြောင်းချီနေတဲ့ စစ်ကောင်စီတပ်တွေကို ဖယ်ခုံအခြေစိုက် KNDF နဲ့ PDF တပ်တို့က မနက် ၉ နာရီမှာ မိုင်းဆွဲတိုက်ခိုက်ပြီး နှစ်ဖက် ထိတွေ့တိုက်ပွဲတွေ ဖြစ်ပွားခဲ့ပါတယ်။
တိုက်ပွဲအတွင်း စစ်ကောင်စီဘက်က ၅ ဦးကျဆုံးခဲ့ပြီး အဲဒီတိုက်ပွဲအပြီးမှာ စစ်ကောင်စီတပ်ဘက်က ဆိုင်ကယ်စီးလာသူ အရပ်သား ၂ ဦးကို အကြောင်းမဲ့ပစ်သတ်ခဲ့တာလို့ ဆိုပါတယ်။
စက်တင်ဘာ ၇ ရက်နေ့ညနေ ၆ နာရီဝန်းကျင်က တိုက်ပွဲဖြစ်ပွားခဲ့တဲ့ ဒီးမော့ဆိုမြို့နယ် ရဲစခန်းတိုက်ပွဲမှာ နှစ်ဖက်အပြန်အလှန် ပစ်ခတ်မှု ၂ နာရီကျော် ဖြစ်ပွားခဲ့ပေမယ့် တပ်အင်အား အလုံးအရင်းနဲ့ တပ်စွဲထားတဲ့ ဒီးမော့ဆိုရဲစခန်းကို သိမ်းပိုက်နိုင်ခြင်းမရှိကြောင်း ထုတ်ပြန်ပါတယ်။
အဆိုပါ ရဲစခန်းတိုက်ခိုက်မှုမှာ စစ်ကောင်စီတပ်က ထိခိုက်ကျဆုံးမှုရှိခဲ့ကြောင်း ဖော်ပြပါတယ်။
အလားတူ ဒီးမော့ဆိုမြို့နယ် စံပြ ၆ မိုင်မှာ တပ်စွဲထားတဲ့ စစ်ကောင်စည်တပ်ဟာ ကျေရွာအတွင်း ရှိ နေအိမ်တွေကို ဖောက်ထွင်း မီးရှို့တာတွေ လုပ်ဆောင်ခဲ့တယ်လို့ ဖော်ပြထားပါတယ်။
စက်တင်ဘာလ ၈ ရက်နေ့ ညကလည်း တိုက်ပွဲတွေဖြစ်ပွားပြီး လက်နက်ကြီးတွေနဲ့ ပစ်ခတ်တာ ကြောင့် ဒေသခံတွေ ညကြီးမင်းကြီးမှာ ထွက်ပြေးနေရသလို ဒီကနေ့ မနက်မှာလည်း လက်နက်ကြီးတွေနဲ့ ပစ်ခတ်နေကြောင်း ဒီးမောဆိုဒေသခံတွေက ပြောပါတယ်။
ကရင်နီပြည်နယ်မှာလည်း တိုက်ပွဲကြောင့် စစ်ရှောင်တွေ တနေ့ထက်တနေ့ များပြားလာသလို ၇ ရက်နေ့ ဒီးမော့ဆိုတိုက်ပွဲကြောင့် ဒေသခံတွေ ထပ်မံထွက်ပြေးတိမ်းရှောင်နေရပါတယ်။
